ಪಿಎಫ್ ಅಡಮಾನದಲ್ಲಿ ಶೀಘ್ರ ಸ್ವಂತ ಮನೆ ಖರೀದಿ!
ಹೌದು. ಕನಸಿನ ಮನೆ ಹೊಂದುವ ಪಿಎಫ್ ಚಂದಾದಾರರಿಗೆ ಒಂದು ಶುಭ ಸುದ್ದಿಯನ್ನು ಇಪಿಎಫ್ಒ ಹೊರತಂದಿದ್ದು, ವಿಶಿಷ್ಟ ಯೋಜನೆಯನ್ನು ಶೀಘ್ರದಲ್ಲಿಯೇ ಪರಿಚಯಿಸಲಿದೆ.
ನಾಲ್ಕು ಕೋಟಿ ಚಂದಾದಾರರಿಗೆ ಕೈಗೆಟಕುವ ಮನೆ ಖರೀದಿಗೆ ಭವಿಷ್ಯ ನಿಧಿಯನ್ನು ಒತ್ತೆ ಇಡುವ ಈ ಯೋಜನೆಯನ್ನು ಜಾರಿಗೆ ತರಲು ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆ ಶೀಘ್ರದಲ್ಲಿಯೇ ಕಾರ್ಯೋನ್ಮುಕವಾಗಲಿದೆ. (ಎಸ್ಬಿಐ ಗೃಹ ಸಾಲ ಯೋಜನೆ: ಗ್ರಾಹಕರಿಗೆ ಬಂಪರ್ ಆಫರ್)
ಇಎಂಐ (EMI) ಅವಕಾಶ
ಪಿಎಫ್ ಚಂದಾದಾರರಿಗಾಗಿ ಮನೆ ಖರೀದಿ ಯೋಜನೆಯನ್ನು ರೂಪಿಸುತಿದ್ದು, ಈ ಉದ್ದೇಶಕ್ಕೆ ಚಂದಾದಾರರು ತಮ್ಮ ಭವಿಷ್ಯ ನಿಧಿಯ ಮೊತ್ತವನ್ನು ಅಡ ಇರಿಸಬೇಕಾಗುತ್ತದೆ. ಸಾಲದ ಮಾಸಿಕ ಸಮಾನ ಕಂತು (ಇಎಂಐ) ತುಂಬಲು ಪಿಎಫ್ ಕೊಡುಗೆಯನ್ನು ಬಳಸಿಕೊಳ್ಳಲು ಈ ಯೋಜನೆಯಲ್ಲಿ ಅವಕಾಶ ಮಾಡಿಕೊಡಲಾಗುವುದು ಎಂದು ಕಾರ್ಮಿಕ ಕಾರ್ಯದರ್ಶಿ ಶಂಕರ್ ಅಗರ್ವಾಲ್ ಸುದ್ದಿ ಸಂಸ್ಥೆಗೆ ತಿಳಿಸಿದ್ದಾರೆ.
ಸಿಬಿಟಿ ಸಮ್ಮತಿ
ಈ ಯೋಜನೆಯ ಪ್ರಸ್ತಾಪವನ್ನು ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆಯ (ಇಪಿಎಫ್ಒ) ಧರ್ಮದರ್ಶಿಗಳ ಕೇಂದ್ರೀಯ ಮಂಡಳಿ(ಸಿಬಿಟಿ) ಎದುರು ಮಂಡಿಸಲಾಗುವುದು. ಮಂಡಳಿಯ ಸಭೆಯು ಮುಂದಿನ ತಿಂಗಳು ನಡೆಯಲಿದೆ. ಸಿಬಿಟಿ ಯು ಇದಕ್ಕೆ ಸಮ್ಮತಿ ನೀಡುತಿದ್ದಂತೆಯೇ ಪಿಎಫ್ ಚಂದಾದಾರರು ಈ ಯೋಜನೆ ಪ್ರಯೋಜನಗಳನ್ನು ಪಡೆದುಕೊಳ್ಳಬಹುದಾಗಿದೆ.
ಮನೆ ಪಡೆಯಲು ಮಾನದಂಡ
ಸಾಲ ಪಡೆಯಲು ಪಿಎಫ್ ಚಂದಾದಾರರ ಅರ್ಹತೆ ಏನಿರಬೇಕು? ಅಡಮಾನ ಪ್ರಕ್ರಿಯೆ ಹೇಗೆ? ಸ್ವಂತ ಮನೆ ಹೊಂದುವ ಕನಸಿನ ಯೋಜನೆಯಲ್ಲಿ ಎಷ್ಟು ಹಣ ಸಿಗುತ್ತದೆ? ಕಡಿಮೆ ವೆಚ್ಚದ ಮನೆಯ ಮಾನದಂಡಗಳೇನು? ಗೃಹ ನಿರ್ಮಾಣ ಸ್ವರೂಪ ಎಂಥದ್ದು? ಇತ್ಯಾದಿ ವಿಚಾರಗಳ ಕುರಿತು ಯಾವುದೇ ಮಾಹಿತಿ ಹೊರಬಂದಿಲ್ಲ. ಮುಂದಿನ ತಿಂಗಳ ಸಭೆಯ ನಂತರ ಇವೇಲ್ಲಕ್ಕೂ ಉತ್ತರ ಸಿಗಲಿದೆ.
ಇಷ್ಟದ ಮನೆ ಖರೀದಿ
ಪಿಎಫ್ ಚಂದಾದಾರರಿಗಾಗಿ ಮನೆ ಖರೀದಿ ಯೋಜನೆ ಅಡಿಯಲ್ಲಿ ಯಾವುದೇ ನಿಯಮ/ಷರತ್ತು ಹೇರಲು ಬಯಸುವುದಿಲ್ಲ. ನಾವು ಭೂಮಿ ಖರೀದಿಸುವುದಿಲ್ಲ ಅಥವಾ ಮನೆಗಳನ್ನು ನಿರ್ಮಿಸುವುದಿಲ್ಲ. ಪಿಎಫ್ ಚಂದಾದಾರರು ಮುಕ್ತ ಮಾರುಕಟ್ಟೆಯಲ್ಲಿ ಇಷ್ಟದ ಮನೆಯನ್ನು ಖರೀದಿಸಬಹುದಾಗಿದೆ ಎಂದು ಇಪಿಎಫ್ಒ ಹೇಳಿದೆ.
ಯೋಜನೆ ಉದ್ದೇಶ
ಕಡಿಮೆ ವರಮಾನ ಹೊಂದಿರುವ ಪಿಎಫ್ ಚಂದಾದಾರರು ಮತ್ತು ಸೇವಾವಧಿಯಲ್ಲಿ ಮನೆ ಖರೀದಿಸಲು ಸಾಧ್ಯವಾಗದೆ ಇರುವವರ ಅನುಕೂಲಕ್ಕಾಗಿ ಈ ಯೋಜನೆ ರೂಪಿಸಲಾಗುತ್ತಿದೆ.
ಸಾಲದ ಮರುಪಾವತಿ
ಪಿಎಫ್ ಅಡಮಾನದಲ್ಲಿ ಮನೆ ಖರೀದಿ ಯೋಜನೆಯಲ್ಲಿ ಸಾಲದ ಮರುಪಾವತಿಗೆ ಸಂಬಂಧಿಸಿದಂತೆ ಸದಸ್ಯ, ಬ್ಯಾಂಕ್ ಅಥವಾ ಗೃಹ ನಿರ್ಮಾಣ ಸಂಸ್ಥೆ ಮತ್ತು ಇಪಿಎಫ್ಒ ಮಧ್ಯೆ ತ್ರಿಪಕ್ಷೀಯ ಒಪ್ಪಂದ ಮಾಡಿಕೊಳ್ಳಲಾಗುವುದು.
ಯೋಜನೆ ವಿಸ್ತಾರ
ವಸತಿ ಮತ್ತು ನಗರ ಬಡತನ ನಿರ್ಮೂಲನ ಸಚಿವಾಲಯದ ಅಡಿಯಲ್ಲಿ ಈ ಯೋಜನೆಯನ್ನು ಹೆಚ್ಚಿನ ಫಲಾನುಭವಿಗಳಿಗೆ ತಲುಪುವಂತೆ ವಿಸ್ತರಿಸಲಾಗುವುದು ಎಂದು ಹೇಳಲಾಗಿದೆ.
ಕಾರ್ಮಿಕ ಸಚಿವರ ಹೇಳಿಕೆ
ಇಪಿಎಫ್ ಚಂದಾದಾರರಿಗೆ ಕಡಿಮೆ ವೆಚ್ಚದಲ್ಲಿ ಮನೆ ಒದಗಿಸುವ ಯೋಜನೆಯನ್ನು ಸರ್ಕಾರ ಅನ್ವೇಷಿಸುತ್ತಿದ್ದು, ಈ ಚರ್ಚೆ ಪ್ರಾಥಮಿಕ ಹಂತದಲ್ಲಿದೆ ಎಂದು ಕಾರ್ಮಿಕ ಸಚಿವ ದತ್ತಾತ್ರೇಯ ಬಂಡಾರು ತಿಳಿಸಿದ್ದಾರೆ.
ಗೃಹ ಸಾಲ ಪಡೆಯುವ ಮುನ್ನ ಇಲ್ಲೊಮ್ಮೆ ನೋಡಿ