ರಾತ್ರಿ 9ರ ನಂತರ ಎಟಿಎಂಗಳಿಗೆ ಹಣ ತುಂಬುವಂತಿಲ್ಲ: ಗೃಹ ಸಚಿವಾಲಯ

ಫೆಬ್ರವರಿ 8ರಿಂದ ಜಾರಿ

ಗೃಹ ಸಚಿವಾಲಯ ಹೊಸ ಅಧಿಸೂಚನೆ 2019ನೇ ಸಾಲಿನ ಫೆಬ್ರವರಿ 8ರಿಂದ ಜಾರಿಯಾಗಲಿದೆ. ಹಣ ಸಾಗಣೆ ಮಾಡುವ ವಾಹನಕ್ಕೆ ಇಬ್ಬರು ಸಶಸ್ತ್ರಧಾರಿಗಳು ಕಡ್ಡಾಯವಾಗಿ ಇರಬೇಕಾಗುತ್ತದೆ ಎಂದು ಗೃಹ ಸಚಿವಾಲಯ ಅಧಿಸೂಚನೆಯಲ್ಲಿ ತಿಳಿಸಿದೆ.

ಹೊಸ ನಿಯಮ ಜಾರಿಗೆ ಕಾರಣ

ಈಗಾಗಲೇ ಹಲವು ಎಟಿಎಂ ವಂಚನೆ ಪ್ರಕರಣಗಳು ವರದಿಯಾಗಿವೆ. ಮುಖ್ಯವಾಗಿ ಎಟಿಎಂಗಳಿಗೆ ನಗದು ಹಣ ಸಾಗಿಸುವ ವಾಹನಗಳ ಮೇಲೆ ದಾಳಿ ನಡೆಸಿ ಹಣ ದೋಚುವ ಪ್ರಕರಣಗಳು ಹೆಚ್ಚಾಗುತ್ತಿವೆ. ಹೀಗಾಗಿ ಎಟಿಎಂಗಳಿಗೆ ಹಣ ತುಂಬುವ ಬ್ಯಾಂಕುಗಳಿಗೆ, ಏಜೆನ್ಸಿಗಳಿಗೆ ಹೊಸ ಅದಿಸೂಚನೆ ಹೊರಡಿಸಿದೆ. ಎಟಿಎಂಗಳಿಗೆ ಹಣ ಭರ್ತಿ ತುಂಬುವವರು ರಾತ್ರಿ ವೇಳೆ ಕೆಲಸ ಮಾಡುವಂತಿಲ್ಲ.

ಗೃಹ ಸಚಿವಾಲಯದ ಆದೇಶದಲ್ಲಿ ಏನಿದೆ?

ಒಂದು ಬಾರಿ ಕೇವಲ ರೂ. 5 ಕೋಟಿ ಮಾತ್ರ ಸಾಗಿಸಲು ಅವಕಾಶ. ವಾಹನಕ್ಕೆ ಜಿಪಿಆರ್‌ಎಸ್‌, ಸಣ್ಣ ಸಿಸಿಟಿವಿ, ಒಬ್ಬ ಚಾಲಕ, ಇಬ್ಬರು ಎಟಿಎಂ ಅಧಿಕಾರಿಗಳು ಇರಬೇಕು. ಇಬ್ಬರು ಭದ್ರತಾ ಸಿಬ್ಬಂದಿಗಳಿರಬೇಕು (ಒಬ್ಬ ಚಾಲಕನ ಪಕ್ಕ, ಇನ್ನೊಬ್ಬ ಹಿಂದೆ ಕುಳಿತಿರಬೇಕು). ಹಣ ಭರ್ತಿ ಮಾಡುವಾಗ ಅಥವಾ ಖಾಲಿ ಮಾಡುವಾಗ ಹಾಗು ಟೀ/ಊಟಕ್ಕೆ ಹೋಗುವಾಗ ಒಬ್ಬ ಗನ್‌ ಮ್ಯಾನ್‌ ಜತೆಯಲ್ಲಿರಬೇಕು.