ಮುಂಗಡ ತೆರಿಗೆ ಪಾವತಿಗೆ ಇಂದೇ ಕೊನೆಯ ದಿನ: ದಂಡ ತಪ್ಪಿಸಲು ಈ 45% ನಿಯಮ ಪಾಲಿಸಿ

ಇಂದು (ಸೆಪ್ಟೆಂಬರ್ 15) ಮುಂಗಡ ತೆರಿಗೆಯ (Advance Tax) ಎರಡನೇ ಕಂತು ಪಾವತಿಸಲು ಕೊನೆಯ ದಿನವಾಗಿದೆ. 2026–27ನೇ ಹಣಕಾಸು ವರ್ಷದಲ್ಲಿ ನಿಮ್ಮ ಅಂದಾಜು ತೆರಿಗೆ ಹೊಣೆಗಾರಿಕೆ ₹10,000 ಕ್ಕಿಂತ ಹೆಚ್ಚಿದ್ದರೆ, ನೀವು ತೆರಿಗೆ ಪಾವತಿಸುವುದು ಕಡ್ಡಾಯ. ಆದರೆ, ಯಾವುದೇ ವ್ಯಾಪಾರ ಅಥವಾ ವೃತ್ತಿಪರ ಆದಾಯವಿಲ್ಲದ ನಿವಾಸಿ ಹಿರಿಯ ನಾಗರಿಕರಿಗೆ ಇದರಿಂದ ವಿನಾಯಿತಿ ನೀಡಲಾಗಿದೆ. ಸಾಮಾನ್ಯ ತೆರಿಗೆದಾರರು ಇಂದಿನ ವೇಳೆಗೆ ತಮ್ಮ ಒಟ್ಟು ವಾರ್ಷಿಕ ತೆರಿಗೆ ಹೊಣೆಗಾರಿಕೆಯಲ್ಲಿ ಕನಿಷ್ಠ ಶೇ. 45 ರಷ್ಟನ್ನಾದರೂ ಪಾವತಿಸಿರಬೇಕು.

ಒಂದು ವೇಳೆ ನೀವು ನಿಗದಿತ ಮೊತ್ತಕ್ಕಿಂತ ಕಡಿಮೆ ತೆರಿಗೆ ಪಾವತಿಸಿದರೆ, ಆ ಬಾಕಿ ಮೊತ್ತಕ್ಕೆ ಬಡ್ಡಿ ತೆರಬೇಕಾಗುತ್ತದೆ. ಹೀಗಾಗಿ ಈ ನಿಯಮ ಅತ್ಯಂತ ಪ್ರಮುಖ. ಇನ್ನು ಸೆಕ್ಷನ್ 44AD ಅಥವಾ 44ADA ಅಡಿಯಲ್ಲಿ ಬರುವ ಪ್ರಿಸಂಪ್ಟಿವ್ ತೆರಿಗೆದಾರರಿಗೆ ಕಾಲಮಿತಿ ಬೇರೆಯೇ ಇದೆ. ಅವರು ಮಾರ್ಚ್ 15ರ ವೇಳೆಗೆ ಶೇ. 100 ರಷ್ಟು ತೆರಿಗೆಯನ್ನು ಪಾವತಿಸಬೇಕಾಗುತ್ತದೆ. ಜೂನ್ ಕಂತಿನಲ್ಲಿ ಏನಾದರೂ ಬಾಕಿ ಉಳಿದಿದ್ದರೆ, ಅದನ್ನು ಈ ಕಂತಿನಲ್ಲಿ ಸರಿಹೊಂದಿಸಿಕೊಳ್ಳಬಹುದು. ಇನ್ನು ಮುಂದಿನ ಕಂತುಗಳ ಕೊನೆಯ ದಿನಾಂಕಗಳು ಡಿಸೆಂಬರ್ 15 ಮತ್ತು ಮಾರ್ಚ್ 15 ಆಗಿವೆ.

ಮುಂಗಡ ತೆರಿಗೆಯ ಶೇ. 45ರ ನಿಯಮ ಇಲ್ಲಿದೆ ನೋಡಿ

ಕೊನೆಯ ದಿನಾಂಕ	ಪಾವತಿಸಬೇಕಾದ ಒಟ್ಟು ತೆರಿಗೆ	ಯಾರಿಗೆ ಅನ್ವಯ?
ಜೂನ್ 15	15%	ಪ್ರಿಸಂಪ್ಟಿವ್ ಹೊರತುಪಡಿಸಿ ಎಲ್ಲರಿಗೂ
ಸೆಪ್ಟೆಂಬರ್ 15	45%	ಪ್ರಿಸಂಪ್ಟಿವ್ ಹೊರತುಪಡಿಸಿ ಎಲ್ಲರಿಗೂ
ಡಿಸೆಂಬರ್ 15	75%	ಪ್ರಿಸಂಪ್ಟಿವ್ ಹೊರತುಪಡಿಸಿ ಎಲ್ಲರಿಗೂ
ಮಾರ್ಚ್ 15	100%	ಎಲ್ಲರಿಗೂ (ಪ್ರಿಸಂಪ್ಟಿವ್ ತೆರಿಗೆದಾರರು ಪೂರ್ತಿ ಮೊತ್ತ ಪಾವತಿಸಬೇಕು)

ಆನ್‌ಲೈನ್‌ನಲ್ಲಿ ಮುಂಗಡ ತೆರಿಗೆ ಪಾವತಿಸುವುದು ಹೇಗೆ?

ಆದಾಯ ತೆರಿಗೆ ಪೋರ್ಟಲ್‌ನಲ್ಲಿ ಲಾಗಿನ್ ಆಗಿ ಅಥವಾ ಲಾಗಿನ್ ಆಗದೆಯೂ 'e-Pay Tax' ಆಯ್ಕೆ ಬಳಸಿ ತೆರಿಗೆ ಪಾವತಿಸಬಹುದು. 'New Payment' ಕ್ಲಿಕ್ ಮಾಡಿ, 'Income Tax' ಆಯ್ಕೆ ಮಾಡಿದ ನಂತರ 'Advance Tax (100)' ಮೇಲೆ ಕ್ಲಿಕ್ ಮಾಡಿ. ಸರಿಯಾದ ಅಸೆಸ್‌ಮೆಂಟ್ ವರ್ಷ ಅಥವಾ ತೆರಿಗೆ ವರ್ಷವನ್ನು ಆಯ್ಕೆ ಮಾಡಿ ವಿವರಗಳನ್ನು ಭರ್ತಿ ಮಾಡಿ. ನಂತರ ಸಿಗುವ 'ಚಲನ್ ರೆಫರೆನ್ಸ್ ನಂಬರ್' ಅನ್ನು ಸುರಕ್ಷಿತವಾಗಿ ಕಾಯ್ದಿರಿಸಿಕೊಳ್ಳಿ. UPI, ನೆಟ್ ಬ್ಯಾಂಕಿಂಗ್, NEFT/RTGS ಅಥವಾ ನೇರವಾಗಿ ಬ್ಯಾಂಕ್ ಕೌಂಟರ್‌ನಲ್ಲೂ ಹಣ ಪಾವತಿಸಬಹುದು. UPI ಅಥವಾ ಕಾರ್ಡ್‌ಗಳ ಮೂಲಕ ಪಾವತಿಸುವುದಿದ್ದರೆ 'Payment Gateway' ಆಯ್ಕೆ ಮಾಡಿಕೊಳ್ಳಿ.

ತೆರಿಗೆ ಪಾವತಿಸುವ ಮುನ್ನ, ಈ ವರ್ಷದಲ್ಲಿ ಇದುವರೆಗೆ ಬಂದಿರುವ ಒಟ್ಟು ಆದಾಯವನ್ನು ಮತ್ತೊಮ್ಮೆ ಸರಿಯಾಗಿ ಲೆಕ್ಕ ಹಾಕಿ. ಇದರಲ್ಲಿ ನಿಮ್ಮ ಬೋನಸ್, ರಿಸ್ಟ್ರಿಕ್ಟೆಡ್ ಸ್ಟಾಕ್ ಯೂನಿಟ್‌ಗಳು (RSU), ಫ್ಯೂಚರ್ಸ್ ಮತ್ತು ಆಪ್ಷನ್ಸ್ (F&O) ಆದಾಯ, ಬಂಡವಾಳ ಲಾಭ (Capital Gains) ಹಾಗೂ ಬ್ಯಾಂಕ್ ಬಡ್ಡಿ ಎಲ್ಲವನ್ನೂ ಸೇರಿಸಿಕೊಳ್ಳಿ. ತೆರಿಗೆ ಕ್ರೆಡಿಟ್‌ನಲ್ಲಿ ಯಾವುದೇ ವ್ಯತ್ಯಾಸಗಳಿಲ್ಲ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಆ್ಯನುಯಲ್ ಇನ್ಫರ್ಮೇಷನ್ ಸ್ಟೇಟ್‌ಮೆಂಟ್ (AIS) ಮತ್ತು ಫಾರ್ಮ್ 26AS ಅನ್ನು ಪರಿಶೀಲಿಸಿ. ಈಗಾಗಲೇ ಪಾವತಿಸಿದ ತೆರಿಗೆ ಮತ್ತು ಟಿಡಿಎಸ್ (TDS) ನಮೂದುಗಳನ್ನು ತಾಳೆ ಮಾಡಿ, ಅಂತಿಮವಾಗಿ ಪಾವತಿಸಬೇಕಾದ ಕಂತಿನ ಮೊತ್ತವನ್ನು ಲೆಕ್ಕ ಹಾಕಿ.

ಇಂದಿನ ಡೆಡ್‌ಲೈನ್ ತಪ್ಪಿದರೆ, ಕಂತಿನ ಬಾಕಿ ಮೊತ್ತದ ಮೇಲೆ ಸೆಕ್ಷನ್ 234C ಅಡಿಯಲ್ಲಿ ಬಡ್ಡಿ ಬೀಳುತ್ತದೆ. ಹಾಗೆಯೇ ಒಟ್ಟು ಮುಂಗಡ ತೆರಿಗೆ ಪಾವತಿ ಶೇಕಡಾ 90ಕ್ಕಿಂತ ಕಡಿಮೆಯಿದ್ದರೆ ಸೆಕ್ಷನ್ 234B ಅನ್ವಯವಾಗುತ್ತದೆ. ಆದ್ದರಿಂದ ತಕ್ಷಣವೇ ತೆರಿಗೆ ಪಾವತಿಸಿ. ಬ್ಯಾಂಕ್‌ನಿಂದ ಮಾಹಿತಿ ಸಿಕ್ಕ ನಂತರವಷ್ಟೇ ಪೋರ್ಟಲ್‌ನಲ್ಲಿ ನಿಮ್ಮ ಪಾವತಿ ಅಪ್‌ಡೇಟ್ ಆಗಬಹುದು. UPI ಅಥವಾ ನೆಟ್ ಬ್ಯಾಂಕಿಂಗ್ ಮೂಲಕ ಪಾವತಿಸಿದರೆ ತಕ್ಷಣ ಜಮೆಯಾಗುತ್ತದೆ; ಆದರೆ NEFT, RTGS ಮತ್ತು ಬ್ಯಾಂಕ್ ಕೌಂಟರ್ ಪಾವತಿಗಳು ಬ್ಯಾಂಕ್ ಕೆಲಸದ ಸಮಯವನ್ನು ಅವಲಂಬಿಸಿರುತ್ತವೆ. ಮುಂದಿನ ಕಂತು ಪಾವತಿಸಲು ಡಿಸೆಂಬರ್ 15 ಮತ್ತು ಮಾರ್ಚ್ 15 ಕೊನೆಯ ದಿನಗಳಾಗಿವೆ.