ರೈತರಿಗೆ ಬಂಪರ್ ಸುದ್ದಿ..9.7 ಕೋಟಿ ಅನ್ನದಾತರ ಖಾತೆಗೆ 2,000 ರೂ.! PM ಕಿಸಾನ್ 20ನೇ ಕಂತು ಆಗಸ್ಟ್ 2ರಂದು ಖಾತೆಗೆ!

ಭಾರತದ ಸಾವಿರಾರು ರೈತರಿಗೆ ಬಹು ನಿರೀಕ್ಷಿತ ಸುದ್ದಿಯೊಂದು ಸಿಕ್ಕಿದೆ. ಅದೇನೆಂದರೆ ಪ್ರಧಾನಮಂತ್ರಿ ಕಿಸಾನ್ ಸಮ್ಮಾನ್ ನಿಧಿ (PM-KISAN) ಯೋಜನೆಯ 20ನೇ ಕಂತು ಬಿಡುಗಡೆಗೆ ದಿನಾಂಕ ನಿಗದಿಯಾಗಿದೆ. ಆಗಸ್ಟ್ 2, 2025 ರಂದು ಶನಿವಾರ, ಉತ್ತರ ಪ್ರದೇಶದ ವಾರಣಾಸಿಯಲ್ಲಿ ನಡೆಯುವ ವಿಶೇಷ ಕಾರ್ಯಕ್ರಮದಲ್ಲಿ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಈ ಕಂತಿನ ಹಣ ಬಿಡುಗಡೆ ಮಾಡಲಿದ್ದಾರೆ.

ಈ ಸಂದರ್ಭದಲ್ಲೇ, ಕೇಂದ್ರ ಸರ್ಕಾರವು 9.7 ಕೋಟಿಗೂ ಹೆಚ್ಚು ರೈತರ ಖಾತೆಗೆ ಪ್ರತಿ ರೈತರಿಗೆ 2,000 ರೂ. ಮೊತ್ತದ ಹಣ ನೇರವಾಗಿ ಜಮೆ ಮಾಡಲಿದೆ. ಈ ಮೂಲಕ, ಕಿಸಾನ್ ಯೋಜನೆಯ 20ನೇ ಕಂತು ಫಲಾನುಭವಿಗಳಿಗೆ ತಲುಪಲಿದೆ.

ಧ್ವನಿಸಂದೇಶದ ಮೂಲಕ ಮಾಹಿತಿ:

ಪಿಎಂ ಕಿಸಾನ್ ಯೋಜನೆಯ ಅಧಿಕೃತ ಖಾತೆಯಿಂದ ಸಾಮಾಜಿಕ ಜಾಲತಾಣದಲ್ಲಿ ನೀಡಿರುವ ಮಾಹಿತಿಯ ಪ್ರಕಾರ, ಇನ್ನು ಮುಂದೆ ಕಾಯುವ ಅಗತ್ಯವಿಲ್ಲ! ಪಿಎಂ ಕಿಸಾನ್ ಯೋಜನೆಯ 20ನೇ ಕಂತಿನ ಹಣ ನೇರವಾಗಿ ನಿಮ್ಮ ಖಾತೆಗೆ ಆಗಸ್ಟ್ 2 ರಂದು ವರ್ಗಾಯಿಸಲಾಗುವುದು. ಈ ಸಂದೇಶದ ಮೂಲಕ ರೈತರಿಗೆ ಖಾತೆಯಲ್ಲಿ ಹಣ ಜಮೆಯಾದ ಕುರಿತು ಧ್ವನಿಸಂದೇಶದ ಮೂಲಕವೂ ಮಾಹಿತಿ ಲಭ್ಯವಾಗಲಿದೆ.

ಫೆಬ್ರವರಿಯಲ್ಲಿ 19ನೇ ಕಂತು ನೀಡಲಾಗಿತ್ತು:

ಇದಕ್ಕೂ ಮೊದಲು, ಫೆಬ್ರವರಿ 2025 ರಲ್ಲಿ ಯೋಜನೆಯ 19ನೇ ಕಂತಿನ ಹಣವನ್ನು ಫಲಾನುಭವಿಗಳಿಗೆ ನೀಡಲಾಗಿತ್ತು. ಈಗ 20ನೇ ಕಂತು ಬಿಡುಗಡೆಗೆ ಸಿದ್ಧತೆ ನಡೆಯುತ್ತಿದೆ.

ಇ-ಕೆವೈಸಿ ಕಡ್ಡಾಯ:

ಯೋಜನೆಯ ಮುಂದಿನ ಕಂತು ತಪ್ಪದಂತೆ ಪಡೆಯಲು, ಎಲ್ಲ ರೈತರು ತಮ್ಮ e-KYC ಪ್ರಕ್ರಿಯೆಯನ್ನು ಪೂರ್ಣಗೊಳಿಸಬೇಕು. ಈ ಪ್ರಕ್ರಿಯೆ ಇಲ್ಲದೆ, ಫಲಾನುಭವಿ ಪಟ್ಟಿಯಿಂದ ನಿಮ್ಮ ಹೆಸರು ತೆಗೆದು ಹಾಕಲಾಗುವ ಸಾಧ್ಯತೆ ಇದೆ.

e-KYC ಪೂರ್ಣಗೊಳಿಸುವ ಮೂರು ವಿಧಾನಗಳು:

• OTP ಆಧಾರಿತ ಇ-ಕೆವೈಸಿ (ಮೊಬೈಲ್ ಮೂಲಕ)
• ಬಯೋಮೆಟ್ರಿಕ್ ಇ-ಕೆವೈಸಿ (ನಿಕಟದ CSC ಕೇಂದ್ರಗಳಲ್ಲಿ)
• ಮುಖದ ದೃಢೀಕರಣ (Face Authentication)

ಕೇಂದ್ರ ಕೃಷಿ ಸಚಿವಾಲಯದ ಪ್ರಕಾರ, ಪಿಎಂ ಕಿಸಾನ್ ಯೋಜನೆಯಡಿಯಲ್ಲಿ ಪಾವತಿ ಆಧಾರ್ ಆಧಾರಿತವಾಗಿದ್ದು, ಇ-ಕೆವೈಸಿ ಜೊತೆಗೆ ಭೂಮಿಯ ದಾಖಲೆಗಳ ಪರಿಶೀಲನೆಯೂ ಕಡ್ಡಾಯವಾಗಿದೆ. ಈ ಕ್ರಮಗಳನ್ನು ಪೂರ್ಣಗೊಳಿಸದ ರೈತರಿಗೆ ತಾತ್ಕಾಲಿಕವಾಗಿ ಸೌಲಭ್ಯ ನಿಲ್ಲಿಸಲಾಗುತ್ತದೆ. ಆದಾಗ್ಯೂ, ಇವುಗಳನ್ನು ಪೂರೈಸಿದ ಬಳಿಕ, ಬಾಕಿ ಕಂತುಗಳೊಂದಿಗೆ ಹಣ ಪಾವತಿಯಾಗಲಿದೆ.

ಫಲಾನುಭವಿ ಸ್ಥಿತಿಯನ್ನು ಹೇಗೆ ಪರಿಶೀಲಿಸಬೇಕು?

• https://pmkisan.gov.in ವೆಬ್‌ಸೈಟ್‌ಗೆ ತೆರಳಿ
• 'Know Your Status' ಕ್ಲಿಕ್ ಮಾಡಿ
• ನಿಮ್ಮ ನೋಂದಣಿ ಸಂಖ್ಯೆ ಅಥವಾ ಆಧಾರ್ ಸಂಖ್ಯೆಯನ್ನು ನಮೂದಿಸಿ
• ಫಲಾನುಭವಿ ಪಟ್ಟಿಯಲ್ಲಿ ನಿಮ್ಮ ಹೆಸರು ಪರಿಶೀಲಿಸಿ
• ನಿಮ್ಮ e-KYC ಸ್ಥಿತಿಯೂ ಇಲ್ಲಿ ತಿಳಿಯಲಿದೆ

2019 ರಲ್ಲಿ ಘೋಷಣೆಗೊಂಡ ಈ ಯೋಜನೆಯಡಿ, ದೇಶದ ಸಣ್ಣ ಮತ್ತು ಅತಿ ಸಣ್ಣ ರೈತರಿಗೆ ವಾರ್ಷಿಕ ₹6,000 ಹಣ ನೀಡಲಾಗುತ್ತದೆ. ಈ ಹಣವು ಮೂರು ಕಂತುಗಳಲ್ಲಿ - ಏಪ್ರಿಲ್-ಜುಲೈ, ಆಗಸ್ಟ್-ನವೆಂಬರ್, ಡಿಸೆಂಬರ್-ಮಾರ್ಚ್ - ಬಿಡುಗಡೆ ಮಾಡಲಾಗುತ್ತದೆ. ಈ ಯೋಜನೆ ವಿಶ್ವದ ಅತಿದೊಡ್ಡ ಡೈರೆಕ್ಟ್ ಬೆನಿಫಿಟ್ ಟ್ರಾನ್ಸ್‌ಫರ್ (DBT) ಯೋಜನೆಗಳಲ್ಲಿ ಒಂದಾಗಿದೆ.

ಅರ್ಜಿ ಸಲ್ಲಿಸುವುದು ಹೇಗೆ?

• https://pmkisan.gov.in ಗೆ ಹೋಗಿ
• 'New Farmer Registration' ಆಯ್ಕೆಮಾಡಿ
• ಆಧಾರ್ ಸಂಖ್ಯೆ, ಕ್ಯಾಪ್ಚಾ ನಮೂದಿಸಿ
• ವಿವರಗಳನ್ನು ಸರಿಯಾಗಿ ಭರ್ತಿ ಮಾಡಿ
• ಸಲ್ಲಿಸಿ ಮತ್ತು ಮುದ್ರಣ ತೆಗೆದುಕೊಳ್ಳಿ

ಯಾರು ಅರ್ಹರು?

• ಭಾರತೀಯ ಪ್ರಜೆಯಾಗಿರಬೇಕು
• ತಮ್ಮದೇ ಆದ ಕೃಷಿಯೋಗ್ಯ ಭೂಮಿಯ ನಿರ್ವಹಿಸುತ್ತಿರಬೇಕು
• ಸಣ್ಣ ಅಥವಾ ಅತಿ ಸಣ್ಣ ರೈತರಾಗಿರಬೇಕು
• ತಿಂಗಳಿಗೆ ₹10,000ಕ್ಕಿಂತ ಕಡಿಮೆ ಪಿಂಚಣಿಯನ್ನು ಪಡೆಯುವವಿರಬೇಕು
• ಆದಾಯ ತೆರಿಗೆ ಸಲ್ಲಿಸಿರಬಾರದು
• ಸಾಂಸ್ಥಿಕ ಭೂಮಾಲೀಕರಾಗಿರಬಾರದು

ಅರ್ಹ ರೈತರು ಪಿಎಂ ಕಿಸಾನ್ ಯೋಜನೆಯ 20ನೇ ಕಂತಿನ ಹಣವನ್ನು ಪಡೆಯಲು ಇ-ಕೆವೈಸಿ ಮತ್ತು ಭೂಮಿಯ ವಿವರಗಳನ್ನು ಶೀಘ್ರದಲ್ಲೇ ಪರಿಶೀಲಿಸಿ. ಎಲ್ಲಾ ಅವಶ್ಯಕ ದಾಖಲೆಗಳನ್ನು ಪೂರ್ಣಗೊಳಿಸಿದರೆ, ನಿರಂತರವಾಗಿ ಯೋಜನೆಯ ಲಾಭ ಪಡೆಯಲು ಯಾವುದೇ ಅಡಚಣೆ ಎದುರಾಗದು.