ADR Crash: ಟಿಸಿಎಸ್ Q1 ನಂತರ ಇನ್ಫೋಸಿಸ್-ವಿಪ್ರೋಗೆ ಶಾಕ್..ADR ಶೇ. 4-7% ಇಳಿಕೆಯಾಗಿದ್ದು ಯಾಕೆ?

ಭಾರತದ ಅತಿದೊಡ್ಡ ಐಟಿ ಕಂಪನಿಗಳು ಅಂದ್ರೆ ನೆನಪಾಗೋದು TCS, ಇನ್ಫೋಸಿಸ್ ಮತ್ತು ವಿಪ್ರೋ..ಇವುಗಳು ಜಗತ್ತಿನ ಪ್ರಮುಖ ಷೇರು ಮಾರುಕಟ್ಟೆಗಳಲ್ಲಿ ಪ್ರಭಾವ ಬೀರುತ್ತಿರುವಂತಹ ಕಂಪನಿಗಳಾಗಿವೆ. ಅಂದಹಾಗೆ ಇದೀಗ TCS ಕಂಪನಿ ತನ್ನ 2026ರ ಹಣಕಾಸು ವರ್ಷದ, ಮೊದಲ ತ್ರೈಮಾಸಿಕ ಫಲಿತಾಂಶವನ್ನು ಜುಲೈ 10ರಂದು ರಿಲೀಸ್ ಮಾಡಿದೆ. ಒಂದು ಶಾಕಿಂಗ್ ಸಂಗತಿ ಏನಂದರೆ ಅಮೆರಿಕದ ನ್ಯೂಯಾರ್ಕ್ ಸ್ಟಾಕ್ ಎಕ್ಸ್ಚೇಂಜ್ (NYSE) ನಲ್ಲಿ ಈ ಕಂಪನಿಗಳ ADRಗಳು (American Depositary Receipts) ತೀವ್ರ ಕುಸಿತಕ್ಕೆ ಒಳಗಾದವು. ಆದಾಯದಲ್ಲಿ ನಿರೀಕ್ಷೆಗೂಡದ ಬೆಳವಣಿಗೆಯೇ ಈ ಕುಸಿತಕ್ಕೆ ಪ್ರಮುಖ ಕಾರಣವಾಗಿದೆ.

ಲಾಭದಲ್ಲಿ ಏರಿಕೆ..ಆದ್ರೂ ಆದಾಯಕ್ಕೆ ಹೊಡೆತ:

ಟಾಟಾ ಕನ್ಸಲ್ಟೆನ್ಸಿ ಸರ್ವೀಸಸ್ (TCS) ತನ್ನ ತ್ರೈಮಾಸಿಕ ಲಾಭವನ್ನು ₹12,760 ಕೋಟಿಗಳಷ್ಟು ವರದಿ ಮಾಡಿದ್ದು, ಇದು ತ್ರೈಮಾಸಿಕ ಆಧಾರದ ಮೇಲೆ ಶೇ. 5.98 ಹಾಗೂ ವರ್ಷದ ಆಧಾರದ ಮೇಲೆ ಶೇ. 4.4ರಷ್ಟು ಏರಿಕೆಯಾಗಿದೆ. ಆದರೆ ಕಂಪನಿಯ ಒಟ್ಟು ಆದಾಯವು ರೂ. 63,437 ಕೋಟಿಗಳಷ್ಟಾಗಿದ್ದು, ಇದು ತ್ರೈಮಾಸಿಕ ಆಧಾರದ ಮೇಲೆ ಶೇ. 1.6ರಷ್ಟು ಇಳಿಕೆ ಕಂಡಿದೆ. ಸ್ಥಿರ ಕರೆನ್ಸಿಯಲ್ಲಿ ನೋಡಿದರೆ ಈ ಆದಾಯ ಶೇ. 3.1ರಷ್ಟು ಕುಸಿತವಾಗಿದೆ. ಈ ಪೈಕಿ ಬಿಎಸ್ಎನ್ಎಲ್ ಯೋಜನೆಯ ನಂತರದ ಕುಸಿತವು ಟಿಸಿಎಸ್ ಆದಾಯದಲ್ಲಿ ಶೇ. 2.8ರಷ್ಟು ಕಡಿಮೆಗೆ ಕಾರಣವಾಗಿದೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಗಳಲ್ಲೂ ಶೇ. 0.5ರಷ್ಟು ಇಳಿಕೆ ಕಂಡುಬಂದಿದೆ.

ಇನ್ಫೋಸಿಸ್ ಮತ್ತು ವಿಪ್ರೋ ಎಡಿಆರ್‌ಗಳಲ್ಲಿ ಕುಸಿತ:

ಟಿಸಿಎಸ್‌ನ ಆದಾಯ ನಿರೀಕ್ಷೆಗೂಡದ ಕಾರಣ, ಅದರ ಪರಿಣಾಮ ಇನ್ಫೋಸಿಸ್ ಮತ್ತು ವಿಪ್ರೋ ಎಡಿಆರ್‌ಗಳ ಮೇಲೆ ಕೂಡ ಬೀರಿದೆ. ಜುಲೈ 10 ರಂದು, ಇನ್ಫೋಸಿಸ್ ಎಡಿಆರ್ ತಲಾ $18.12 ಕ್ಕೆ ವಹಿವಾಟುಗೊಂಡಿದ್ದು, ಶೇ. 3.7ರಷ್ಟು ಇಳಿಕೆಯಾಗಿದೆ. ಇದು ದಿನದ ಕನಿಷ್ಠ $18.06 ಕ್ಕೆ ತಲುಪಿದೆ. ವಿಪ್ರೋ ಎಡಿಆರ್ ಕೂಡ ಶೇ. 6.51ರಷ್ಟು ಕುಸಿತ ಕಂಡು $2.87 ಮಟ್ಟಕ್ಕಿಳಿದಿದ್ದು, ನಂತರ $2.945ಕ್ಕೆ ಏರಿಕೆಯಾಯಿತು. ಈ ಕುಸಿತದಿಂದ ಹೂಡಿಕೆದಾರರಲ್ಲಿ ಆತಂಕ ಹೆಚ್ಚಾಗಿದ್ದು, ಉಳಿದ ಐಟಿ ಕಂಪನಿಗಳ ಮೇಲಿನ ವಿಶ್ವಾಸವನ್ನು ಕೂಡ ಬಡಿದಿದೆ.

ಜುಲೈ 17ಕ್ಕೆ ವಿಪ್ರೋ ತ್ರೈಮಾಸಿಕ ಫಲಿತಾಂಶ:

ವಿಪ್ರೋ ತನ್ನ ತ್ರೈಮಾಸಿಕ ಫಲಿತಾಂಶವನ್ನು ಜುಲೈ 17 ರಂದು ಪ್ರಕಟಿಸಲಿದೆ. ಆಕ್ಸಿಸ್ ಸೆಕ್ಯುರಿಟೀಸ್‌ನ ವಿಶ್ಲೇಷಕರ ಪ್ರಕಾರ, ಕಂಪನಿ ರೂಪಾಯಿಗಳ ಲೆಕ್ಕದಲ್ಲಿ ಶೇ. 3ರಷ್ಟು ತ್ರೈಮಾಸಿಕ ಆದಾಯದ ಬೆಳವಣಿಗೆ ತೋರಬಹುದು. ವೆಚ್ಚ ನಿಯಂತ್ರಣ ಕ್ರಮಗಳ ಪರಿಣಾಮವಾಗಿ ಅದರ ಕಾರ್ಯಾಚರಣೆಯ ಲಾಭಾಂಶಗಳಲ್ಲಿ ಸುಧಾರಣೆ ಸಾಧ್ಯವೆಂಬ ನಿರೀಕ್ಷೆ ಇದೆ.

ಜುಲೈ 23ಕ್ಕೆ ಇನ್ಫೋಸಿಸ್ ತ್ರೈಮಾಸಿಕ ಫಲಿತಾಂಶ:

ಇನ್ಫೋಸಿಸ್ ತನ್ನ ತ್ರೈಮಾಸಿಕ ಫಲಿತಾಂಶವನ್ನು ಜುಲೈ 23 ರಂದು ಪ್ರಕಟಿಸಲಿದೆ. ವಿಶ್ಲೇಷಕರ ಪ್ರಕಾರ, ಹೆಚ್ಚು ಕೆಲಸದ ದಿನಗಳು ಮತ್ತು ಬಿಎಫ್‌ಎಸ್‌ಐ ವಿಭಾಗದಲ್ಲಿ ಚಟುವಟಿಕೆಯ ಹೆಚ್ಚಳದಿಂದಾಗಿ ಶೇ. 2.6ರಷ್ಟು ಆದಾಯದ ಬೆಳವಣಿಗೆ ಸಾಧ್ಯವಿದೆ. ಆದರೆ, ಹಿರಿಯ ಉದ್ಯೋಗಿಗಳಿಗೆ ವೇತನ ಹೆಚ್ಚಳ, MRE ಕನ್ಸಲ್ಟಿಂಗ್ ಮತ್ತು ಇತರ ಸ್ವಾಧೀನ ವ್ಯವಹಾರಗಳಿಂದ ಆಗುವ ವೆಚ್ಚ ಏರಿಕೆಯ ಕಾರಣದಿಂದ ಆಪರೇಟಿಂಗ್ ಲಾಭಾಂಶ ಶೇ. 1.2ರಷ್ಟು ಕುಸಿಯುವ ನಿರೀಕ್ಷೆ ಇದೆ. FY26 ಮಾರ್ಗದರ್ಶನವನ್ನೂ ಇನ್ಫೋಸಿಸ್ ಶೇ. 0%-3%ರಷ್ಟು ವ್ಯಾಪ್ತಿಗೆ ಇಳಿಸಿದೆ. ಹಿಂದಿನ ಮಾರ್ಗದರ್ಶನ ಶೇ. 4.5%-5% ಇತ್ತು

ಟಿಸಿಎಸ್ ಲಾಭದ ವರದಿ ಶಕ್ತಿಶಾಲಿಯಾಗಿ ಕಾಣಿಸಿದರೂ ಆದಾಯದ ಮಿಶ್ರ ಫಲಿತಾಂಶವು ಇಡೀ ಐಟಿ ಕ್ಷೇತ್ರದ ಮೇಲಿನ ವಿಶ್ವಾಸಕ್ಕೆ ಹೊಡೆತ ನೀಡಿದೆ. ಇನ್ಫೋಸಿಸ್ ಮತ್ತು ವಿಪ್ರೋ ಇಂತಹ ಕಂಪನಿಗಳ ಎಡಿಆರ್‌ಗಳಲ್ಲಿ ತಕ್ಷಣದ ಪ್ರತಿಕ್ರಿಯೆ, ಹೂಡಿಕೆದಾರರು ಬಹುಪಾಲು ಮುಂಚಿತ ನಿರೀಕ್ಷೆಗಳನ್ನು ಹೊಂದಿದ್ದನ್ನು ಸೂಚಿಸುತ್ತದೆ. ಮುಂದಿನ ವಾರಗಳಲ್ಲಿ ಈ ಕಂಪನಿಗಳು ಪ್ರಕಟಿಸಲಿರುವ ತ್ರೈಮಾಸಿಕ ಫಲಿತಾಂಶಗಳ ಆಧಾರದ ಮೇಲೆ ಹೂಡಿಕೆದಾರರು ತಮ್ಮ ಮುಂದಿನ ಚಲನೆ ನಿರ್ಧರಿಸುವ ಸಾಧ್ಯತೆ ಇದೆ.