ಹಳೆ 500, 1000 ನೋಟುಗಳ ರದ್ದತಿ ನಂತರ ಶೇ. 35ರಷ್ಟು ಉದ್ಯೋಗ ಹಾಗೂ ಶೇ. 50ರಷ್ಟು ಆದಾಯದಲ್ಲಿ ಇಳಿಕೆಯಾಗಿದೆ ಎಂದು ಅಖಿಲ ಭಾರತೀಯ ಉತ್ಪಾದಕರ ಒಕ್ಕೂಟ(AIMO) ವರದಿ ಮಾಡಿದೆ.

ಪ್ರಧಾನಿ ಮೋದಿ ನವೆಂಬರ್ 8ರಂದು ನೋಟುಗಳ ನಿಷೇಧ ಮಾಡಿದ ನಂತರ ಮೊದಲ ಒಂದು ತಿಂಗಳಲ್ಲಿ ಸಣ್ಣ, ಅತಿ ಸಣ್ಣ ಉದ್ಯಮಗಳ ಮೇಲೆ ಭಾರೀ ಹೊಡೆತ ಬಿದ್ದಿದೆ.

ನೋಟು ನಿಷೇಧದ ಪರಿಣಾಮ ಸುಮಾರು 3 ಲಕ್ಷ ಸಣ್ಣ, ಅತಿ ಸಣ್ಣ, ಮಧ್ಯಮ ಉದ್ಯಮ, ಉತ್ಪಾದನೆ ಮತ್ತು ರಪ್ತುಗಳ ಮೇಲೆ ಭಾರೀ ಪ್ರಮಾಣದಲ್ಲಿ ಪರಿಣಾಮ ಬೀರಿದೆ ಎಂದು ಸಮೀಕ್ಷೆ ವರದಿ ಮಾಡಿದೆ.

2017 ರ ಮಾರ್ಚ್ ಅಂತ್ಯದ ಸಂದರ್ಭದಲ್ಲಿ ಸಣ್ಣ, ಅತಿ ಸಣ್ಣ, ಮಧ್ಯಮ ಉದ್ಯಮಗಳ ಉದ್ಯೋಗಗಳಲ್ಲಿ ಶೇ. 60 ರಷ್ಟು ಕಡಿತ ಹಾಗೂ ಶೇ. 55 ರಷ್ಟು ಆದಾಯದಲ್ಲಿ ಕಡಿತ ಸಂಭವಿಸಲಿದ್ದು, ನೋಟು ನಿಷೇಧದಿಂದ ನಿರೀಕ್ಷೆಗೂ ಮೀರಿದ ಮಟ್ಟದಲ್ಲಿ ಸಣ್ಣ, ಅತಿ ಸಣ್ಣ, ಮಧ್ಯಮ ಉದ್ಯಮಗಳ ಮೇಲೆ ಹೊಡೆತ ಬಿದ್ದಿದೆ ಭಾರತೀಯ ಉತ್ಪಾದಕರ ಒಕ್ಕೂಟ ಹೇಳಿದೆ.