ಬ್ಯಾಂಕು ಖಾತೆ ತೆರೆಯುವಾಗ ಪಾನ್ ವಿವರ ಅಥವಾ ಫಾರ್ಮ್ 60 ಸಲ್ಲಿಸದೇ ಇರುವವರಿಂದ ಕಡ್ಡಾಯವಾಗಿ ಫೆಬ್ರವರಿ 28ರ ಒಳಗಾಗಿ ಸಂಗ್ರಹಿಸಬೇಕೆಂದು ಕೇಂದ್ರ ಸರ್ಕಾರ ಬ್ಯಾಂಕುಗಳಿಗೆ ಸೂಚನೆ ನೀಡಿದೆ.

ಶೂನ್ಯ ಬ್ಯಾಲೆನ್ಸ್ ಉಳಿತಾಯ ಖಾತೆಗಳಿಗೆ (ಜನಧನ ಖಾತೆಗಳು) ಪ್ಯಾನ್‌ ಅಥವಾ ಫಾರ್ಮ್ 60 ಸಲ್ಲಿಸುವುದರಿಂದ ವಿನಾಯಿತಿ ನೀಡಲಾಗಿದೆ.

ಹಳೆ ನೋಟು ನಿಷೇಧದ ಮುನ್ನ ಉಳಿತಾಯ ಖಾತೆಗಳಲ್ಲಿ ಆಗಿರುವ ಹಣಕಾಸು ವಹಿವಾಟುಗಳ ಪರಿಶೀಲನೆಗೆ ಆದಾಯ ತೆರಿಗೆ ಇಲಾಖೆ ಮುಂದಾಗಿದೆ. ಈ ಹಿನ್ನೆಲೆಯಲ್ಲಿ ಏಪ್ರಿಲ್‌ 1ರಿಂದ ನವೆಂಬರ್‌ 9 ರವರೆಗೆ ಉಳಿತಾಯ ಖಾತೆಗಳಲ್ಲಿ ಜಮೆ ಮಾಡಲಾದ ಮೊತ್ತದ ವಿವರ ನೀಡುವಂತೆ ಬ್ಯಾಂಕುಗಳು, ಸಹಕಾರಿ ಬ್ಯಾಂಕ್‌ಗಳು ಮತ್ತು ಅಂಚೆ ಕಚೇರಿಗಳಿಗೆ ಇಲಾಖೆ ಸೂಚಿಸಿದೆ.

ಪ್ಯಾನ್‌ ಕಾರ್ಡ್ ಕಡ್ಡಾಯ

ಆದಾಯ ತೆರಿಗೆ ಕಾಯಿದೆಯ 114 ಬಿ ನಿಯಮಕ್ಕೆ ಸರ್ಕಾರ ಇತ್ತಿಚಿಗೆ ತಿದ್ದುಪಡಿ ಮಾಡಿತ್ತು. ಈ ಹೊಸ ನಿಯಮದ ಅನ್ವಯ ಬ್ಯಾಂಕುಗಳು ಗ್ರಾಹಕರಿಂದ ಪಾನ್‌ ವಿವರಗಳನ್ನು ಸಂಗ್ರಹಿಸಿ, ಆಯಾ ಖಾತೆಗಳಿಂದ ನಡೆಯುವ ವ್ಯವಹಾರಗಳೊಂದಿಗೆ ಈ ವಿವರಗಳನ್ನು ದಾಖಲಿಸಬೇಕಿತ್ತು. ಇಲ್ಲಿಯವರೆಗೆ 50 ಸಾವಿರಕ್ಕಿಂತ ಹೆಚ್ಚಿನ ಮೊತ್ತದ ವ್ಹಾರಗಳಿಗೆ ಮಾತ್ರ ಪಾನ್‌ ವಿವರ ಸಲ್ಲಿಸಬೇಕಿತ್ತು.