ಆರ್ಥಿಕ ಬೆಳವಣಿಗೆ ಹಾಗೂ ದೇಶದ ಚಿನ್ನದ ಮಾರುಕಟ್ಟೆಯಲ್ಲಿನ ಪಾರದರ್ಶಕತೆ ಚಿನ್ನದ ಬೇಡಿಕೆಯನ್ನು 2020ರ ವೇಳೆಗೆ 950 ಟನ್ ಗೆ ಹೆಚ್ಚಿಸಲಿದೆ ಎಂದು ವರ್ಲ್ಡ್ ಗೋಲ್ಡ್ ಕೌನ್ಸಿಲ್ ವರದಿ ಮಾಡಿದೆ.

ಕಳೆದ ಕೆಲ ತಿಂಗಳಿಂದ ಚಿನ್ನದ ಬೇಡಿಕೆಯಲ್ಲಿ ಇಳಿಕೆಯಾದರೂ ತರುವಾಯ ಮತ್ತೆ ಚೇತರಿಕೆ ಕಂಡಿದೆ. ಚಿನ್ನದ ಬೇಡಿಕೆ ಮೇಲೆ ಹಿಡಿತ ತರಬೇಕೆಂಬ ಪ್ರಯತ್ನ ಕೂಡ ಸಫಲವಾಗಲಿಲ್ಲ. ಏಕೆಂದರೆ ಭಾರತೀಯರಿಗೆ ಚಿನ್ನದ ಮೇಲಿರುವ ಮೋಹ ಕಡಿಮೆ ಮಾಡುವುದು ಅಷ್ಟು ಸುಲಭದ ವಿಚಾರವಲ್ಲ ಎಂದು ವರದಿಯಲ್ಲಿ ಹೇಳಲಾಗಿದೆ.

2017ರ ಸಾಲಿನಲ್ಲಿ ಗ್ರಾಹಕರು 650 ರಿಂದ 750 ಟನ್ ಚಿನ್ನ ಖರೀದಿಸುವ ಸಾಧ್ಯತೆ ಇದೆ. ಆರ್ಥಿಕ ಬೆಳವಣಿಗೆ ಹಾಗೂ ಪಾರದರ್ಶಕತೆಯಿಂದಾಗಿ ಚಿನ್ನದ ಬೇಡಿಕೆ ಹೆಚ್ಚಾಗಲಿದೆ. ಇದರಿಂದಾಗಿ 2020ರ ವೇಳೆಗೆ 850 ರಿಂದ 950 ಟನ್ ಚಿನ್ನ ಖರೀದಿಸುವ ಸಾಧ್ಯತೆ ಇದೆ ಎಂದು ವರ್ಲ್ಡ್ ಗೋಲ್ಡ್ ಕೌನ್ಸಿಲ್ ವರದಿ ಮಾಡಿದೆ.

ನೋಟು ರದ್ದತಿ ನಂತರ ಜನರು ಚಿನ್ನದ ಮೇಲಿನ ಹೂಡಿಕೆ ಕಡೆಗೆ ಹೆಚ್ಚಿನ ಒಲವು ತೋರುತ್ತಿದ್ದಾರೆ ಎನ್ನಲಾಗಿದೆ. ಗ್ರಾಹಕರು ನಗದು ವ್ಯವಹಾರದಿಂದ ಡಿಜಿಟಲ್ ವ್ಯವಹಾರದ ಕಡೆಗೆ ಮುಂದಾಗುತ್ತಿದ್ದು, ಸಂಘಟಿತ ವ್ಯಾಪಾರಸ್ಥರಿಗೆ ಹೆಚ್ಚು ಅನುಕೂಲವಾಗಲಿದೆ. ಇದು ಪಾರದರ್ಶಕತೆ ಹೆಚ್ಚಿಸುವಲ್ಲಿ ಸಹಾಯಕವಾಗಲಿದೆ. ಅಲ್ಲದೆ ಚಿನ್ನದ ಗುಣಮಟ್ಟದಲ್ಲಿ ವಂಚನೆ ಮಾಡುವುದು ಕಡಿಮೆಯಾಗಲಿದೆ ಎಂದು ಹೇಳಲಾಗಿದೆ.