ಪ್ರಸ್ತುತ ದೇಶದ ವಿಮೆ ವಲಯವು ಏರುಗತಿಯಲ್ಲಿ ಸಾಗಿದೆ. ಆದರೆ ಇಂತಹ ಸಂದರ್ಭದಲ್ಲಿ ವಿಮೆ ವಹಿವಾಟಿನ ಮೇಲಿನ ತೆರಿಗೆಯನ್ನು ಶೇ. 3ರಷ್ಟು ಹೆಚ್ಚಿಸಿರುವುದು ವಿಮಾ ವಲಯದ ಬೆಳವಣಿಗೆಗೆ ಅಡ್ಡಿಯಾಗಲಿದೆ.

ದೇಶದಲ್ಲಿನ ವಿಮೆ ಸೌಲಭ್ಯ ವಿಸ್ತರಣೆಯು ಜಾಗತಿಕ ಶೇ. 6.2 ಗಿಂತ ಕಡಿಮೆ(ಶೇ. 3.5) ಇದೆ. ಹೀಗಿರುವಾಗ ವಿಮಾ ಕ್ಷೇತ್ರದ ಮೇಲಿನ ತೆರಿಗೆಯನ್ನು ಶೇ. 15 - 18ಕ್ಕೆ ಹೆಚ್ಚಿಸುವುದರಿಂದ ಉದ್ಯಮದ ಬೆಳವಣಿಗೆಗೆ ಅಡ್ಡಿಯಾಗಲಿದೆ ಎಂದು ವಿಶ್ಲೇಷಿಸಿಲಾಗಿದೆ.

ಶೇ. 3ರಷ್ಟು ಹೆಚ್ಚಿಸಿರುವ ವಿಮಾ ತೆರಿಗೆಯನ್ನು ಮರುಪರಿಶೀಲನೆ ಮಾಡಬೇಕು ಎಂದು ವಿಮೆ ಉದ್ಯಮ ಸರ್ಕಾರಕ್ಕೆ ವಿನಂತಿಸಿಕೊಂಡಿದೆ. ಹೊಸ ಜಿಎಸ್ಟಿ ದರದಲ್ಲಿನ ವಿಮೆ ಮತ್ತು ಹಣಕಾಸು ಸೇವೆಗಳ ಮೇಲಿನ ಗರಿಷ್ಠ ತೆರಿಗೆ ಆಘಾತಕಾರಿಯಾಗಿದೆ ಎಂದು ಬ್ಯಾಂಕಿಂಗ್‌ ಮೂಲಗಳು ಹೇಳಿವೆ.

ಈಗಾಗಲೇ ಜಿಎಸ್ಟಿ ಮಂಡಳಿ ಅಂತಿಮಗೊಳಿಸಿರುವ ಸರಕು ಮತ್ತು ಸೇವೆಗಳ ಕೆಲ ತೆರಿಗೆ ದರಗಳನ್ನು ಕೇಂದ್ರ ಕಡಿತಗೊಳಿಸುವ ಸಾಧ್ಯತೆ ಇದೆ ಎನ್ನಲಾಗಿದೆ. ಪ್ರಕಟಿಸಿರುವ ಸರಕು ಮತ್ತು ಸೇವಾ ತೆರಿಗೆಯ ಕೆಲ ದರಗಳು ದುಬಾರಿಯಾಗಿವೆ. ಇದು ಅನೇಕ ಕೈಗಾರಿಕಾ ವಲಯಗಳಿಗೆ ಉತ್ತೇಜನ ಆಗುವ ಬದಲು ಅವುಗಳ ವಹಿವಾಟಿಗೆ ಧಕ್ಕೆ ತರಲಿದೆ ಎಂಬ ಆತಂಕ ಉದ್ಯಮ ವಲಯ ವ್ಯಕ್ತಪಡಿಸಿದೆ.