ಚಿನ್ನದ ಮೇಲಿನ ಜಿಎಸ್ಟಿ ದರವನ್ನು ಕೇಂದ್ರ ಸರ್ಕಾರ ಅಂತಿಮಗೊಳಿಸಿದ್ದು, ಚಿನ್ನದ ಮೇಲೆ ಶೇ. 3ರಷ್ಟು ಜಿಎಸ್ಟಿ ದರ ವಿಧಿಸಲು ಸರಕು ಮತ್ತು ಸೇವಾ ತೆರಿಗೆ(ಜಿಎಸ್ಟಿ) ಮಂಡಳಿ ನಿರ್ಧರಿಸಿದೆ.

ಶೇ. 3ಕ್ಕಿಂತ ಹೆಚ್ಚು 5ಕ್ಕಿಂತ ಕಡಿಮೆ ಜಿಎಸ್ಟಿ ದರ ನಿರೀಕ್ಷಿಸಲಾಗಿತ್ತು ಎಂದು ವಿಶ್ಲೇಷಕರು ಹೇಳಿದ್ದು, ರತ್ನಾಭರಣಗಳ ಮೇಲಿನ ಜಿಎಸ್ಟಿ ದರ ನಿರೀಕ್ಷೆಗಿಂತ ಕಡಿಮೆ ಇರುವುದರಿಂದ ಇದು ರತ್ನಾಭರಣ ಷೇರುಗಳ ಮೇಲೆ ಧನಾತ್ಮಕ ಪರಿಣಾಮ ಬೀರಿದೆ.

ಸಂಸ್ಕರಿಸಿದ ಆಹಾರ, ಸಿದ್ಧ ಉಡುಪು, ಪಾದರಕ್ಷೆ, ಬೀಡಿ ಸೇರಿದಂತೆ ಹಲವು ಉತ್ಪನ್ನಗಳ ಜಿಎಸ್ಟಿ ದರ ಅಂತಿಮಗೊಳಿಸಲಾಗಿದ್ದು, ಸಂಸ್ಕರಿಸಿದ ಆಹಾರಕ್ಕೆ ಶೇ. 5, ಬಿಸ್ಕತ್ ಮೇಲೆ ಶೇ. 18, ಬೀಡಿ ಶೇ. 28 ನಿಗದಿಪಡಿಸಲಾಗಿದೆ. 500ಕ್ಕಿಂತ ಕಡಿಮೆ ಬೆಲೆಯ ಪಾದರಕ್ಷೆಗಳ ಜಿಎಸ್ಟಿ ದರ ಶೇ. 5 ಹಾಗೂ ರೂ. 500ಕ್ಕಿಂತ ಹೆಚ್ಚಿನ ಬೆಲೆಯ ಪಾದರಕ್ಷೆಗಳ ಮೇಲೆ ಶೇ. 18ರಷ್ಟು ಜಿಎಸ್ಟಿ ದರ ನಿಗದಿಯಾಗಿದೆ.