ಆಮ್ ಆದ್ಮಿ ಡೋರ್ ಸ್ಟೆಪ್ ಸರ್ವಿಸ್

ದೆಹಲಿ ಜನರಿಗೆ ನಿಜಕ್ಕೂ ಸಂತಸದಸ ಸುದ್ದಿ. ಅಗಸ್ಟ್ ನಂತರದಲ್ಲಿ ಸರ್ಕಾರಿ ಸೇವೆಗಳಿಗಾಗಿ ಸಾಲಿನಲ್ಲಿ ನಿಲ್ಲಬೇಕಾಗಿಲ್ಲ. ಮಂಗಳವಾರ ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ನೇತೃತ್ವದಲ್ಲಿ ನಡೆದ ಸಭೆಯಲ್ಲಿ ಆಡಳಿತಾತ್ಮಕ ಸುಧಾರಣೆ ಇಲಾಖೆಯ ಪ್ರಸ್ತಾವನೆಗೆ ಒಪ್ಪಿಗೆ ನೀಡಲಾಗಿದೆ. ಇದು ಆಮ್ ಆದ್ಮಿ ಪಕ್ಷದ ಮಹತ್ವಾಕಾಂಕ್ಷಿ ಯೋಜನೆಯಾಗಲಿದ್ದು, ಮನೆ ಬಾಗಿಲಿಗೆ ತಲುಪಿಸುವ ಸೇವೆ ಮುಂದಿನ ತಿಂಗಳು ಆರಂಭವಾಗಲಿದೆ.

ಪ್ರತಿ ತಿಂಗಳು 35 ಸೇವೆ ಸೇರ್ಪಡೆ

ಪ್ರತಿ ತಿಂಗಳು 30 ರಿಂದ 35 ಸೇವೆಗಳನ್ನು ಡೋರ್ ಸ್ಟೆಪ್ ಸರ್ವಿಸ್ ಸೇರಿಸುವ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಈಗಾಗಲೇ 100 ಸೇವೆಗಳ ಪಟ್ಟಿ ಸಿದ್ಧವಾಗಿದೆ.

ಸಿಗಲಿರುವ ಪ್ರಮುಖ ಸೇವೆಗಳು

ಪಿಂಚಣಿ ಕಾರ್ಡ್, ರೇಷನ್ ಕಾರ್ಡ್, ಜಾತಿ ಪ್ರಮಾಣ ಪತ್ರ ಸೇರಿದಂತೆ ಜನನ ಹಾಗೂ ಮರಣ ಪತ್ರವನ್ನು ಕೂಡ ಪಡೆಯಬಹುದಾಗಿದೆ. ಈ ಸೇವೆಗಳನ್ನು ಪಡೆಯಲು ಮನೆಯಲ್ಲಿಯೇ ಕುಳಿತು ಅರ್ಜಿ ತುಂಬಿದರೆ ಸಾಕು.

ಕಾಲ್ ಸೆಂಟರ್ ಸೌಲಭ್ಯ

ಸರ್ಕಾರಿ ಸೇವೆಗಳ ಸೌಲಭ್ಯ ಪಡೆಯಲು ಸರ್ಕಾರ ಒಂದು ಕಾಲ್ ಸೆಂಟರ್ ಸಂಖ್ಯೆ ನೀಡಲಿದೆ. ಆ ನಂಬರ್ ಗೆ ಕರೆ ಮಾಡಿ ಯಾವ ಸೇವೆ ಬೇಕೆಂಬುದನ್ನು ತಿಳಿಸಬೇಕು. ತದನಂತರ ಕಾಲ್ ಸೆಂಟರ್ ಉದ್ಯೋಗಿಗಳು ಕರೆ ಮಾಡಿ ತಮ್ಮ ಸೇವೆ ಕುರಿತು ಮಾಹಿತಿ ನೀಡಲಿದ್ದಾರೆ.

ಸೇವಾ ವೈಖರಿ

ಕೇಜ್ರವಾಲ್ ನೇತೃತ್ವದ ಡೋರ್ ಸ್ಟೆಪ್ ಸೇವೆಯನ್ನು 300 ಮೊಬೈಲ್ ಸಹಾಯಕರು ಆರಂಭಿಸಲಿದ್ದಾರೆ. ಇವರು ಸಾರ್ವಜನಿಕರಿಂದ ದಾಖಲೆ ಪಡೆದು ಪರಿಶೀಲಿಸಿದ ನಂತರ ಸಂಬಂಧಿಸಿದ ಇಲಾಖೆಗೆ ದಾಖಲೆಗಳನ್ನು ಸ್ಕ್ಯಾನ್ ಮಾಡಿ ಕಳುಹಿಸುವರು. ಪ್ರಮಾಣ ಪತ್ರ ಸಿದ್ಧವಾದ ಮೇಲೆ ಇಲಾಖೆಯು ಅರ್ಜಿದಾರರಿಗೆ ಹಾಗೂ ಮೊಬೈಲ್ ಸಹಾಯಕರಿಗೆ ಎಸ್ಎಂಎಸ್ ಕಳುಹಿಸಲಿದೆ.