ಹಿಂದುಸ್ಥಾನ್ ಏರೋನಾಟಿಕ್ಸ್

ಹಿಂದುಸ್ಥಾನ್ ಏರೋನಾಟಿಕ್ಸ್ ಕಂಪನಿ ಲಿಮಿಟೆಡ್ 2018 ರ ಮಾರ್ಚ್ ನಲ್ಲಿ ಪ್ರತಿ ಷೇರಿಗೆ ರೂ. 1,215 ರಲ್ಲಿ ಸಾರ್ವಜನಿಕ ಷೇರು ವಿತರಣೆ ಮಾಡಿತು. ನಂತರದ ದಿನಗಳಲ್ಲಿ ಷೇರಿನ ಬೆಲೆ ಸತತವಾದ ಇಳಿಕೆಯತ್ತ ಸಾಗಿದೆ. ಹಿಂದಿನ ವರ್ಷದ ಆಗಸ್ಟ್ ನಲ್ಲಿ ರೂ. 1,014 ರ ವಾರ್ಷಿಕ ಗರಿಷ್ಟದಲ್ಲಿದ್ದ ಷೇರು ಫೆಬ್ರವರಿಯಲ್ಲಿ ರೂ. 603 ರ ಸಮೀಪಕ್ಕೆ ಕುಸಿದು ವಾರ್ಷಿಕ ಕನಿಷ್ಠ ದಾಖಲಿಸಿದೆ. ಸಧ್ಯ ರೂ.670 ರ ಸಮೀಪವಿರುವ ಈ ಕಂಪನಿ ಷೇರು ಹೂಡಿಕೆದಾರರ ಸುಮಾರು ಶೇ.೪೫ ರಷ್ಟರ ಬಂಡವಾಳವನ್ನು ನಾಶಗೊಳಿಸಿ ನಿರುತ್ಸಾಹಿಗಳನ್ನಾಗಿಸಿದೆ.
ಹಿಂದಿನ ವರ್ಷ ಹಿಂದುಸ್ಥಾನ್ ಪೆಟ್ರೋಲಿಯಂ ಕಾರ್ಪೊರೇಷನ್ ಕಂಪೆನಿಯಲ್ಲಿನ ಶೇ.51.11 ರ ಭಾಗಿತ್ವವನ್ನು ಕೇಂದ್ರ ಸರ್ಕಾರ ರೂ.36,915 ಕೋಟಿಗಳಿಗೆ ಮತ್ತೊಂದು ಪ್ರಮುಖ ಸಾರ್ವಜನಿಕ ವಲಯದ ಕಂಪನಿ ಒ ಎನ್ ಜಿ ಸಿ ಗೆ ಮಾರಾಟ ಮಾಡಿ ಹಿಂದುಸ್ಥಾನ್ ಪೆಟ್ರೋಲಿಯಂ ಕಾರ್ಪೊರೇಷನ್ ನ್ನು ಒ ಎನ್ ಜಿ ಸಿ ಲಿಮಿಟೆಡ್ ನ ಅಂಗ ಸಂಸ್ಥೆಯನ್ನಾಗಿಸಿದೆ. ಇದಕ್ಕೆ ಅವಶ್ಯಕವಿದ್ದ ಸಂಪನ್ಮೂಲವನ್ನು ವಿವಿಧ ಬ್ಯಾಂಕ್ ಗಳಿಂದ ಪಡೆದುಕೊಳ್ಳುವುದರ ಜೊತೆಗೆ ಆಂತರಿಕ ನಿಧಿಯನ್ನು ಬಳಸಿಕೊಂಡಿದೆ. ಇದು ಹೊರನೋಟಕ್ಕೆ ಸರಿ ಎನಿಸಿದರೂ ಒ ಎನ್ ಜಿ ಸಿ ಕಂಪನಿಯನ್ನು ಹೆಚ್ಚು ಸಾಲಗಾರರನ್ನಾಗಿಸಿದೆ. ಈ ಮೂಲಕ ಪೇಟೆಯ ಆಸಕ್ತಿ ಕ್ಷೀಣಿತವಾಗಿದೆ. ಜೊತೆಗೆ ಷೇರುದಾರರ ನಿಧಿಯು ಕರಗಿದಂತಾಗಿದೆ.

ಇಂಡಿಯನ್ ಆಯಿಲ್ ಕಾರ್ಪೊರೇಷನ್

ಇದೇ ರೀತಿ ಭಾರತ್ ಪೆಟ್ರೋಲಿಯಂ ಕಾರ್ಪೊರೇಷನ್ ಕಂಪನಿಯ ಭಾಗಿತ್ವವನ್ನು ಇಂಡಿಯನ್ ಆಯಿಲ್ ಕಂಪನಿಗೆ ನೀಡುವ ಮೂಲಕ ಸುಮಾರು ರೂ.40 ಸಾವಿರ ಕೋಟಿಯಷ್ಟು ಬಂಡವಾಳ ಹಿಂತೆಗೆತ ಮಾಡಿದಂತಾಗುವುದು ಎಂಬ ಚಿಂತನೆಯಲ್ಲಿ ತೈಲ ಮಂತ್ರಾಲಯ ತೊಡಗಿದೆ ಎಂಬ ಸುದ್ಧಿಯು ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ಮತ್ತು ಭಾರತ್ ಪೆಟ್ರೋಲಿಯಂ ಕಾರ್ಪೊರೇಷನ್ ಗಳ ಷೇರಿನ ಬೆಲೆಯನ್ನು ಕ್ರಮವಾಗಿ ರೂ.116.70,ಮತ್ತು ರೂ.342.35 ರವರೆಗೂ ಕುಸಿಯುವಂತೆ ಮಾಡಿದೆ. ನಂತರದಲ್ಲಿ ಸ್ವಲ್ಪ ಚೇತರಿಕೆ ಕಂಡಿದೆ. ಈ ರೀತಿಯ ಬಂಡವಾಳ ಹಿಂತೆಗೆತಕ್ಕೆ ವಿತ್ತ ಮಂತ್ರಾಲಯವು ಒಪ್ಪುತ್ತಿಲ್ಲ ಎಂಬ ಮಾಧ್ಯಮ ಸುದ್ಧಿಯು ಈ ಚೇತರಿಕೆಗೆ ಪೂರಕ ಅಂಶವಾಗಿದೆ.

ಅನಿಶ್ಚಿತ ನೀತಿ

ಕೇಂದ್ರ ಸರ್ಕಾರದ ಈ ಅನಿಶ್ಚಿತ ನೀತಿಯ ಕಾರಣ ಷೇರುಪೇಟೆಗಳಲ್ಲಿ ಸಾರ್ವಜನಿಕ ವಲಯದ ಕಂಪನಿಗಳಿಗೆ ಹೆಚ್ಚು ಬೆಂಬಲ ದೊರೆಯುತ್ತಿಲ್ಲ. ಈ ಕಂಪನಿಗಳ ಸಾಧನೆಗಿಂತ ಸರ್ಕಾರದ ನಿರ್ಧಾರದ ತೂಕವೇ ಆಧ್ಯತೆ ಪಡೆದಿದೆ. ಸರ್ಕಾರ ಪೇಟೆಯ ನಂಬಿಕೆಯನ್ನು ಪಡೆದುಕೊಳ್ಳುವ ರೀತಿ ನಿರ್ಧರಿಸಿದಲ್ಲಿ ಭವಿಷ್ಯದಲ್ಲಿ ಉತ್ತಮ ಸಹಕಾರ ಪಡೆಯಲು ಸಾಧ್ಯ.