Amazon: ಅಮೇಜಾನ್ ಗೋಡೌನ್‌ಗೆ ನೇರ ಪ್ರವೇಶ..ಪ್ಯಾಕೇಜ್, ಬಿಲ್ಲಿಂಗ್, ಡೆಲಿವರಿ ಎಲ್ಲವೂ ನಿಮ್ಮ ಕಣ್ಮುಂದೆ! ಎಲ್ಲೆಲ್ಲಿ?

ಯಾವುದೋ ಒಂದು ಪ್ರಾಡಕ್ಟ್‌ನ ಆನ್‌ಲೈನ್‌ನಲ್ಲಿ ಬುಕ್ ಮಾಡ್ತಿರಾ. ನಿಮಗೆ ಬೇಕಾದ ದಿನಕ್ಕೆ ಆ ಪ್ರಾಡಕ್ಟ್ ನಿಮ್ಮ ಮನೆ ಬಾಗಿಲಿಗೆ, ಉತ್ತಮ ಪ್ಯಾಕೇಜಿಂಗ್‌ನಲ್ಲಿ ಡೆತಲುಪುತ್ತೆ. ಆದರೆ ಎಂದಾದರೂ ಅದು ನಿಮ್ಮ ಮನೆ ಬಾಗಿಲಿಗೆ ಹೇಗೆ ಬರುತ್ತೆ, ಆ ಪ್ರಯಾಣ ಹೇಗಿರುತ್ತೆ ಎಂದು ಆಲೋಚಿಸಿದ್ದೀರಾ? ಅಂತಹ ಅನುಭವವನ್ನು ಖಚಿತವಾಗಿ ನೀವೆಂದೂ ಕಂಡಿರಲ್ಲ. ಆದರೆ ಅಂತಹ ಅನುಭವ ನೀಡೋ ಮುಂದಾಗಿದೆ ಅಮೇಜಾನ್ ಕಂಪನಿ..ಅದು ಕೂಡ ದೆಹಲಿ ಮತ್ತು ಬೆಂಗಳೂರಿನಲ್ಲಿ ಗೊತ್ತಾ..

ಜನರಿಗೆ ಅಮೆಜಾನ್ ಗೋದಾಮಿಗೆ ಪ್ರವೇಶ:

ಹೌದು, 2025ರ ಅಂತ್ಯದವರೆಗೆ, ಅಮೆಜಾನ್ ಇಂಡಿಯಾ ದೆಹಲಿ NCR ಮತ್ತು ಬೆಂಗಳೂರಿನಲ್ಲಿರುವ ತನ್ನ ದೊಡ್ಡ ಗೋದಾಮುಗಳ (Fulfillment Centers) ಪ್ರವಾಸದ ಅವಕಾಶ ನೀಡಲಿದೆ. ಜನರು ಈಗ ನೇರವಾಗಿ ಈ ಗೋದಾಮುಗಳಿಗೆ ಹೋಗಿ, ತಮ್ಮ ಪ್ಯಾಕೇಜ್‌ಗಳು ಹೇಗೆ ಸಂಸ್ಕರಿಸಲ್ಪಡುತ್ತವೆ ಎಂಬುದನ್ನು ನೋಡಿ ಬರುವ ಅವಕಾಶವನ್ನು ಪಡೆಯುತ್ತಾರೆ.

ಈ ಪ್ರವಾಸದಲ್ಲಿ ಏನು ಕಾಣಬಹುದು?

- ನಿಮ್ಮ ಪ್ಯಾಕೇಜ್ ಸ್ಟಾಕ್‌ನಲ್ಲಿನಿಂದ ಹೇಗೆ ಆಯ್ಕೆಯಾಗುತ್ತದೆ ಎಂಬುದನ್ನು ನೇರವಾಗಿ ನೋಡಬಹುದು
- ಪ್ಯಾಕಿಂಗ್, ಲೇಬಲ್ ಹಾಕುವುದು, ಡೆಲಿವರಿಗೆ ತಯಾರಾಗುವುದು ಹೇಗೆ ನಡೆಯುತ್ತದೆ ಎಂಬ ಪ್ರಕ್ರಿಯೆ
- ಸಾವಿರಾರು ಉತ್ಪನ್ನಗಳು ಹೇಗೆ ಶೇಖರಿಸಿಕೊಳ್ಳಲಾಗುತ್ತದೆ
- ಕೆಲಸ ಮಾಡುತ್ತಿರುವ ಜನರನ್ನೂ ಹಾಗೂ ಅಲ್ಲಿ ಬಳಸುವ ತಂತ್ರಜ್ಞಾನಗಳನ್ನೂ ನೇರವಾಗಿ ನೋಡಬಹುದು

ಪ್ರವಾಸದ ವಿವರಗಳು:

ಈ ಪ್ರವಾಸಗಳು ವಾರಕ್ಕೆ ಮೂರರಷ್ಟು ಬಾರಿ ನಡೆಯಲಿದ್ದು, ಪ್ರತಿ ಪ್ರವಾಸದಲ್ಲಿ 20 ಜನರಿಗಷ್ಟೆ ಅವಕಾಶ ನೀಡಲಾಗುತ್ತದೆ. 45 ರಿಂದ 60 ನಿಮಿಷಗಳ ಮಾರ್ಗದರ್ಶಿತ ಪ್ರವಾಸ ಆಗಿರುತ್ತದೆ. ಈ ಪ್ರವಾಸಕ್ಕೆ ಭಾಗವಹಿಸಲು ಜನರು ಆನ್‌ಲೈನ್‌ನಲ್ಲಿ ನೋಂದಾಯಿಸಬೇಕು. ಪ್ರವಾಸಗಳು 2025ರ ಕೊನೆಯ ಭಾಗದಿಂದ ಆರಂಭವಾಗುತ್ತವೆ.

ಗೋದಾಮುಗಳ ಗಾತ್ರ ಎಷ್ಟು ಗೊತ್ತಾ?

- ದೆಹಲಿ NCR ಗೋದಾಮು ಸುಮಾರು 4.5 ಲಕ್ಷ ಚದರ ಅಡಿಗಳು
- ಬೆಂಗಳೂರು ಗೋದಾಮು ಸುಮಾರು 2 ಮಿಲಿಯನ್ ಘನ ಅಡಿಗಳಿಗಿಂತ ಹೆಚ್ಚಾದ ಜಾಗ

ಇವು ಭಾರತದಲ್ಲಿನ ಅಮೆಜಾನ್‌ನ ಅತ್ಯಂತ ದೊಡ್ಡ ಫುಲ್‌ಫಿಲ್‌ಮೆಂಟ್ ಕೇಂದ್ರಗಳಾಗಿವೆ. ಈ ಗೋದಾಮುಗಳಲ್ಲಿ ದಿನಕ್ಕೆ ಲಕ್ಷಾಂತರ ಪ್ಯಾಕೇಜ್‌ಗಳು ತಯಾರಾಗಿ ಗ್ರಾಹಕರ ಮನೆಗಳಿಗೆ ಹೋಗುತ್ತವೆ.

ಅಮೆಜಾನ್ ಹೇಳಿದ್ದು ಏನು?

ಅಮೆಜಾನ್‌ನ ಕಾರ್ಯಾಚರಣೆ ಉಪಾಧ್ಯಕ್ಷ ಅಭಿನವ್ ಸಿಂಗ್ ಹೇಳುವಂತೆ, "ಈ ಪ್ರವಾಸಗಳು ಗ್ರಾಹಕರಿಗೆ ನಮ್ಮ ತಂತ್ರಜ್ಞಾನ, ಜನ ಮತ್ತು ಸೇವೆಗಳ ಹಿಂದೆ ಇರುವ ಜವಾಬ್ದಾರಿಯನ್ನು ತೋರಿಸುತ್ತವೆ."

ಇದರ ಜೊತೆಗೆ, ಟೋಕಿಯೊದಲ್ಲಿ ನಡೆದ "Delivering the Future" ಕಾರ್ಯಕ್ರಮದಲ್ಲಿ ಈ ಘೋಷಣೆ ಮಾಡಲಾಯಿತು. ಇದರಲ್ಲಿ ಅಮೆಜಾನ್ ತನ್ನ ಹೊಸ ತಂತ್ರಜ್ಞಾನ, ಡಿಜಿಟಲ್ ವ್ಯವಸ್ಥೆ, ಮತ್ತು ಗ್ಲೋಬಲ್ ತಲುಪು ಶಕ್ತಿ ಬಗ್ಗೆ ಮಾಹಿತಿಯನ್ನು ಹಂಚಿಕೊಂಡಿತು.

ಈ ರೀತಿಯ ಸಾರ್ವಜನಿಕ ಪ್ರವಾಸಗಳನ್ನು ಅಮೆಜಾನ್ 2014ರಿಂದಲೇ ಆರಂಭಿಸಿದೆ. ಈಗಾಗಲೇ ಅಮೆರಿಕ, ಯುಕೆ, ಫ್ರಾನ್ಸ್, ಜರ್ಮನಿ, ಇಟಲಿ, ಆಸ್ಟ್ರೇಲಿಯಾ ಮುಂತಾದ ದೇಶಗಳಲ್ಲಿ 20 ಲಕ್ಷಕ್ಕೂ ಹೆಚ್ಚು ಜನರು ಈ ಗೋದಾಮು ಪ್ರವಾಸದಲ್ಲಿ ಪಾಲ್ಗೊಂಡಿದ್ದಾರೆ.

ಈ ವಿಶೇಷ ಯೋಜನೆಯ ಮೂಲಕ, ಅಮೆಜಾನ್ ತನ್ನ ಗೋದಾಮುಗಳನ್ನು ಸಾರ್ವಜನಿಕರಿಗೆ ತೆರೆದು, ಪ್ಯಾಕೇಜ್‌ಗಳ ಹಿಂದಿರುವ ಪೂರೈಕೆ ಜಾಲವನ್ನು ಜನರಿಗೆ ತೋರಿಸಲು ಮುಂದಾಗಿದೆ. ಇದು ಕಂಪನಿಯ ಸೇವೆಯ ಮೇಲಿನ ನಂಬಿಕೆಯನ್ನು ಹೆಚ್ಚು ಗಟ್ಟಿಗೊಳಿಸುವ ಹೆಜ್ಜೆಯೂ ಆಗಿದೆ.

ಅಮೆಜಾನ್‌ನ ಈ ಹೊಸ ಉಪಕ್ರಮವು ಗ್ರಾಹಕರೊಂದಿಗೆ ನೇರ ಸಂಪರ್ಕ ನಿರ್ಮಿಸಲು ಪಾರದರ್ಶಕತೆಗೆ ಮಾಡಿರುವ ಮಹತ್ವದ ಹೆಜ್ಜೆಯಾಗಿದೆ. ದಿನಕ್ಕೊಂದು ಕ್ಲಿಕ್ ಮಾಡುವ ಗ್ರಾಹಕರಿಗೆ, ಪ್ಯಾಕೇಜ್ ಹಿಂದಿರುವ ಪೂರೈಕೆ ಜಾಲ, ತಂತ್ರಜ್ಞಾನ, ಹಾಗೂ ಶ್ರಮದ ಎಳಹಂಡಿಯನ್ನು ನೇರವಾಗಿ ಪರಿಚಯಿಸಬೇಕೆಂಬ ಉದ್ದೇಶ ಇದಕ್ಕೆ ಇದೆ.