Bengaluru Airport: ಪ್ರಯಾಣಿಕರ ಅನುಕೂಲಕ್ಕೆ ಬೆಂಗಳೂರು ವಿಮಾನ ನಿಲ್ದಾಣದಿಂದ ಮಹತ್ವದ ನಿರ್ಧಾರ! ಏನದು?

ವಿಶ್ವದ ಅತೀ ದಟ್ಟಣೆಯ ವಿಮಾನ ನಿಲ್ದಾಣಗಳಲ್ಲಿ (Airport) ಬೆಂಗಳೂರೂ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ ಕೂಡಾ ಒಂದು. ಇದೀಗ ಜನದಟ್ಟಣೆ, ವಾಹನ ದಟ್ಟಣೆಯನ್ನು (Traffic Problems) ಕಮ್ಮಿ ಮಾಡುವ ನಿಟ್ಟಿನಲ್ಲಿ, ಬೆಂಗಳೂರು ವಿಮಾನ ನಿಲ್ದಾಣ ಮಹತ್ವದ ನಿರ್ಧಾರಕ್ಕೆ ಮುಂದಾಗಿದೆ. ವಿಮಾನ ನಿಲ್ದಾಣದಲ್ಲಿ ಪ್ರಯಾಣಿಕರ ಸುರಕ್ಷತೆಯನ್ನು ಕಾಪಾಡುವ ನಿಟ್ಟಿನಲ್ಲಿ ಆಗಮನ ಮತ್ತು ಪಿಕಪ್‌ಗಾಗಿ ಹೊಸ ನಿಯಮಗಳನ್ನು ಜಾರಿಗೆ ತರುತ್ತಿದೆ.

ವಿಮಾನ ನಿಲ್ದಾಣದ ಆಗಮನದ ಕರ್ಬ್‌ಸೈಡ್‌ಗಳಲ್ಲಿ ಪ್ರೈವೇಟ್‌ ವಾಹನಗಳ ಕಾಯುವಿಕೆ ಅವಧಿ ಹೆಚ್ಚಾಗುತ್ತಿರುವುದರಿಂದ ಸಂಚಾರ ದಟ್ಟಣೆ ಕೂಡಾ ಜಾಸ್ತಿಯಾಗಿದೆ ಎಂದು ವಿಮಾನ ನಿಲ್ದಾಣದ ಆಡಳಿತ ವರದಿ ಮಾಡಿದೆ. ಇದೀಗ ಈ ದಟ್ಟಣೆಗೆ ಪರಿಹಾರವಾಗಿ ಬೆಂಗಳೂರು ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ ನಿಯಮಿತ (BIAL) ಲೇನ್-ಸೆಗ್ರಿಗೇಷನ್‌ (Lane-Segregation) ವ್ಯವಸ್ಥೆಯನ್ನು ಪರಿಚಯಿಸಿದೆ. ಈ ವ್ಯವಸ್ಥೆ ಸುಗಮ ಸಂಚಾರ, ಶಿಸ್ತು ಹೀಗೆ ಹಲವು ಸಮಸ್ಯೆಗಳಿಗೆ ಪರಿಹಾರವಾಗಲಿದೆ.

ಏನಿದು ಹೊಸ ನಿಯಮ?
ಹೊಸ ನಿಯಮದ ಪ್ರಕಾರ, ಖಾಸಗಿ (ವೈಟ್-ಬೋರ್ಡ್) ವಾಹನಗಳು ಟರ್ಮಿನಲ್ 1 (T1) ಮತ್ತು ಟರ್ಮಿನಲ್ 2 (T2)ಪಾರ್ಕಿಂಗ್‌ ಸ್ಥಳದಲ್ಲಿ 8 ನಿಮಿಷಗಳ ಕಾಲ ಉಚಿತವಾಗಿ ಪ್ರವೇಶ ಪಡೆಯಬಹುದು. ಒಂದು ವೇಳೆ ಈ ಸಮಯ ಮೀರಿದರೆ ದಂಡ ಅನ್ವಯವಾಗುತ್ತದೆ ಎನ್ನಲಾಗಿದೆ. ಆ ಪ್ರಕಾರ, 8-13 ನಿಮಿಷಗಳ ಕಾಲ ನಿಂತರೆ ₹150 ರೂ., 13-18 ನಿಮಿಷಗಳ ಕಾಲ ನಿಂತರೆ ₹300 ರೂ., 18 ನಿಮಿಷ ಮೀರಿದರೆ ವಾಹನವನ್ನು ಹತ್ತಿರದ ಪೊಲೀಸ್ ಠಾಣೆಗೆ ಎಳೆದುಕೊಂಡು ಹೋಗಲಾಗುತ್ತದೆ ಎನ್ನಲಾಗಿದೆ. ಅಷ್ಟೇ ಅಲ್ಲದೇ ಹೆಚ್ಚುವರಿ ದಂಡ ಮತ್ತು ಟೋವಿಂಗ್ ಶುಲ್ಕ ಕೂಡಾ ಸ್ಟೇಷನ್‌ನಲ್ಲಿ ವಿಧಿಸಲಾಗುತ್ತದೆ ಎನ್ನಲಾಗಿದೆ.

ಇನ್ನು ವಿಮಾನ ಅಧಿಕಾರಿಗಳ ಪ್ರಕಾರ, ಈ ನಿಯಮದಿಂದಾಗಿ ದಟ್ಟಣೆ ಹೆಚ್ಚಾಗದೆ, ಪ್ರಯಾಣಿಕರಿಗೆ ಸುಗಮ ಪಿಕಪ್‌ಗೆ ಸಾಕಷ್ಟು ಸಮಯವನ್ನು ನೀಡುತ್ತದೆ. ವಾಣಿಜ್ಯ ವಾಹನಗಳಾದ ಹಳದಿ ಬೋರ್ಡ್ ಟ್ಯಾಕ್ಸಿಗಳು ಮತ್ತು ಎಲೆಕ್ಟ್ರಿಕ್ ಕ್ಯಾಬ್‌ಗಳು ಪಾರ್ಕಿಂಗ್‌ ವಲಯದಲ್ಲಿ ಮಾತ್ರ ಪಿಕಪ್‌ಗಾಗಿ ಕಾಯಬೇಕು. ಆದ್ದರಿಂದ ಮೊದಲ 10 ನಿಮಿಷಗಳ ಪಾರ್ಕಿಂಗ್ ಉಚಿತವಾಗಿ ಮಾಡುವ ಅವಕಾಶವಿದೆ.

ಪಾರ್ಕಿಂಗ್‌ ನಿಯಮಗಳು:
ಇನ್ನು T1 ಗಾಗಿ ವಾಣಿಜ್ಯ ವಾಹನಗಳು P3 ಮತ್ತು P4 ಪಾರ್ಕಿಂಗ್ ಜಾಗಗಳನ್ನು ಬಳಸಬೇಕು. T2 ವಾಹನಗಳು P2 ಜಾಗವನ್ನು ಬಳಸುವಂತೆ ಸೂಚಿಸಲಾಗಿದೆ. ಈ ಹೊಸ ಕ್ರಮಗಳು ಡಿಸೆಂಬರ್ 11, 2025 ರಂದು ಟರ್ಮಿನಲ್ 2 ರಲ್ಲಿ ಮತ್ತು ಡಿಸೆಂಬರ್ 13, 2025 ರಂದು ಟರ್ಮಿನಲ್ 1 ರಲ್ಲಿ ಜಾರಿಗೆ ಬರಲಿವೆ ಎಂದು ವರದಿಯಾಗಿದೆ.

ಇನ್ನು ಈ ಕುರಿತು ಬಿಐಎಎಲ್ ವಕ್ತಾರರು ಮಾತನಾಡಿದ್ದು, "ಇತ್ತೀಚಿನ ವಿಮಾನ ಅಡಚಣೆಗಳ ವರದಿಗಳು ಸರಿಯಾದ ನಂತರ, ಬೆಂಗಳೂರಿನ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ ಆಗಮನದ ಕರ್ಬ್‌ಸೈಡ್‌ಗಳಲ್ಲಿ ಹೊಸ ಪಿಕಪ್ ಕ್ರಮಗಳು ಮತ್ತು ಸಮಯ ಮೀರಿದರೆ ದಂಡ ವಿಧಿಸುವುದಾಗಿ ಹೇಳಿದ್ದಾರೆ. ಅಲ್ಲದೇ ಈ ನಿಯಮ ಡಿಸೆಂಬರ್ 11, 2025 ರಿಂದ ಟರ್ಮಿನಲ್ 2 ರಲ್ಲಿ ಮತ್ತು ಡಿಸೆಂಬರ್ 13, 2025 ರಿಂದ ಟರ್ಮಿನಲ್ 1 ರಲ್ಲಿ ಜಾರಿಗೆ ಬರಲಿದೆ ಎಂದು ಹೇಳಿದರು.