Arattai app: ಅರಟ್ಟೈ ಮೆಸೇಜಿಂಗ್ ಆಪ್ ಸಖತ್ ಸದ್ದು..3 ಲಕ್ಷಕ್ಕೂ ಹೆಚ್ಚು ಜನ ಡೌನ್‌ಲೋಡ್! ವಾಟ್ಸಾಪ್‌ಗೆ ಟಕ್ಕರ್?

ಝೋಹೋ ಕಾರ್ಪೊರೇಷನ್ ಅಭಿವೃದ್ಧಿಪಡಿಸಿರುವ ಭಾರತೀಯ ಮೆಸೇಜಿಂಗ್ ಅಪ್ಲಿಕೇಶನ್ 'ಅರಟ್ಟೈ' ಇತ್ತೀಚೆಗೆ ವಾಟ್ಸಾಪ್‌ಗೆ ಹೊಸ ಸ್ಪರ್ಧೆಯನ್ನು ಒಡ್ಡುತ್ತಿದೆ. ದೇಶೀಯ ತಂತ್ರಜ್ಞಾನ ಮತ್ತು ಸ್ಥಳೀಯ ಫೀಚರ್‌ಗಳೊಂದಿಗೆ, ಈ ಆಪ್ ಚಾಟ್ ಪ್ರಿಯರ ಕುತೂಹಲವನ್ನು ಸೆಳೆದಿದೆ. ಪ್ರತಿದಿನ ಸುಮಾರು 3 ಲಕ್ಷಕ್ಕೂ ಹೆಚ್ಚು ಜನ ಅರಟ್ಟೈ ಡೌನ್‌ಲೋಡ್ ಮಾಡುತ್ತಿದ್ದಾರೆ.

ಮೆಸೇಜಿಂಗ್ ಆಪ್‌ಗಳಲ್ಲಿ ವಾಟ್ಸಾಪ್ ಬಹುತೇಕ ಜನರಿಗೆ ಮೊದಲ ಆಯ್ಕೆಯಾಗಿದ್ದರೂ, ಅರಟ್ಟೈ ಹೊಸ ತಂತ್ರಜ್ಞಾನ ಮತ್ತು ಸುಲಭ ಬಳಕೆಯ ವೈಶಿಷ್ಟ್ಯಗಳೊಂದಿಗೆ ಜನರನ್ನು ಸೆಳೆಯುತ್ತಿದೆ. ಈ ಆಪ್ ಸ್ವದೇಶಿ ತಂತ್ರಜ್ಞಾನ ಸಂಸ್ಥೆ ಜೋಹೋ ಕಾರ್ಪೊರೇಷನ್ ನಿರ್ಮಿಸಿದ್ದು, ದೇಶಾದ್ಯಂತ ಚರ್ಚೆಯ ವಿಷಯವಾಗಿದೆ. ಕೇವಲ ಮೂರು ದಿನಗಳಲ್ಲಿ ಗೂಗಲ್ ಪ್ಲೇ ಮೂಲಕ ಡೌನ್‌ಲೋಡ್‌ಗಳು ಗಣನೀಯವಾಗಿ ಹೆಚ್ಚಿದ್ದು, ಹೊಸ ಬಳಕೆದಾರರ ಸಂಖ್ಯೆ ದಿನಕ್ಕೆ 3,000ರಿಂದ 3,50,000ಕ್ಕೆ ಏರಿಕೆಯಾಗಿದೆ. ಜೋಹೋ ಸಂಸ್ಥಾಪಕ ಶ್ರೀಧರ್ ವೇಂಬು ಈ ಬೆಳವಣಿಗೆಯನ್ನು ಸಾಮಾಜಿಕ ಮಾಧ್ಯಮದಲ್ಲಿ ಖಚಿತಪಡಿಸಿದ್ದಾರೆ ಮತ್ತು ಮೂಲಸೌಕರ್ಯ ವಿಸ್ತರಣೆಗೆ ತಕ್ಷಣ ಕ್ರಮ ತೆಗೆದುಕೊಂಡಿದ್ದಾರೆ.

ಕೇಂದ್ರ ಸಚಿವರಾದ ಅಶ್ವಿನಿ ವೈಷ್ಣವ್ ಮತ್ತು ಧರ್ಮೇಂದ್ರ ಪ್ರಧಾನ್ ಅವರು ಸ್ವದೇಶಿ ಉತ್ಪನ್ನಗಳ ಬಳಕೆಯನ್ನು ಉತ್ತೇಜಿಸಲು ಹಲವಾರು ಬಾರಿ ಜನರನ್ನು ಪ್ರೋತ್ಸಾಹಿಸಿದ್ದಾರೆ. ಸಾಮಾಜಿಕ ಮಾಧ್ಯಮದಲ್ಲಿ ಅವರು ಭಾರತೀಯ ಮೆಸೇಜಿಂಗ್ ಅಪ್ಲಿಕೇಶನ್‌ಗಳನ್ನು ಪ್ರಯತ್ನಿಸಲು ಕರೆ ನೀಡಿದ ಪರಿಣಾಮ, ಅರಟ್ಟೈ ಟ್ರಾಫಿಕ್‌ನಲ್ಲಿ ಅಚ್ಚರಿಯಷ್ಟು ಏರಿಕೆ ಕಂಡುಬಂದಿದೆ.

2021 ರಲ್ಲಿ ಬಿಡುಗಡೆಯಾದ ಅರಟ್ಟೈ, ವಾಟ್ಸಾಪ್‌ಗೆ ಹೋಲಿಕೆಯ ಹಲವಾರು ವೈಶಿಷ್ಟ್ಯಗಳನ್ನು ಹೊಂದಿದೆ. ಪಠ್ಯ ಸಂದೇಶ, ಧ್ವನಿ ಟಿಪ್ಪಣಿಗಳು, ಫೋಟೋಗಳು, ಡಾಕ್ಯುಮೆಂಟ್ ಕಳುಹಿಸುವುದು, ಆಡಿಯೋ ಮತ್ತು ವೀಡಿಯೋ ಕರೆ ಮಾಡಲು ಅವಕಾಶವಿದೆ. ಸ್ಟೋರಿಗಳನ್ನು ಪೋಸ್ಟ್ ಮಾಡುವ ವೈಶಿಷ್ಟ್ಯವೂ ಇದರಲ್ಲಿ ಇದೆ. ತಮಿಳಿನಲ್ಲಿ "ಅರಟ್ಟೈ" ಅಂದರೆ ಚಾಟ್ ಎಂದು ಅರ್ಥ, ಇದು ಅಪ್ಲಿಕೇಶನ್‌ನ ಸ್ಥಳೀಯತೆಯನ್ನು ಪ್ರತಿಬಿಂಬಿಸುತ್ತದೆ.

ನಾಲ್ಕು ವರ್ಷಗಳ ನಂತರ, ಸ್ವದೇಶಿ ಆಂದೋಲನ ಮತ್ತು ಸಚಿವರ ಕರೆಯಿಂದ ಅರಟ್ಟೈ ಹೆಚ್ಚು ಜನಪ್ರಿಯವಾಗಿದೆ. ಜನರು ದೇಶೀಯ ಡಿಜಿಟಲ್ ಪ್ಲಾಟ್‌ಫಾರ್ಮ್‌ಗಳನ್ನು ಪ್ರಯತ್ನಿಸಲು ಪ್ರೇರಿತರಾಗಿದ್ದು, ಇದರ ಪರಿಣಾಮವಾಗಿ ಈ ಅಪ್ಲಿಕೇಶನ್ ಟ್ರಾಫಿಕ್‌ನಲ್ಲಿ ಭಾರಿ ಏರಿಕೆಯನ್ನು ಕಂಡಿದೆ.

ಅರಟ್ಟೈ ಕೇವಲ ಫೋನ್‌ಗಳಿಗೆ ಸೀಮಿತವಲ್ಲ. ಆಂಡ್ರಾಯ್ಡ್ ಫೋನ್, ಐಪ್ಯಾಡ್, ಐಒಎಸ್ ಸಾಧನಗಳು, ವಿಂಡೋಸ್ ಪಿಸಿಗಳು, ಲಿನಕ್ಸ್ ಕಂಪ್ಯೂಟರ್‌ಗಳು ಮತ್ತು ಮ್ಯಾಕ್‌ನಲ್ಲಿ ಇದನ್ನು ಬಳಸಬಹುದು. ಇದರಿಂದ ಪ್ರತಿಯೊಬ್ಬರಿಗೂ ಸುಲಭವಾಗಿ ಸ್ವದೇಶಿ ಮೆಸೇಜಿಂಗ್ ಆಪ್‌ನ್ನು ಬಳಸುವ ಅವಕಾಶ ಸಿಗುತ್ತದೆ.

ಜೋಹೋ ಸಂಸ್ಥೆಯು ನವೆಂಬರ್‌ನಲ್ಲಿ ಹೊಸ ವೈಶಿಷ್ಟ್ಯಗಳು, ಹೆಚ್ಚಿನ ಸಾಮರ್ಥ್ಯ ಮತ್ತು ಮಾರ್ಕೆಟಿಂಗ್ ಪ್ರಯತ್ನಗಳೊಂದಿಗೆ ಅರಟ್ಟೈ ಪುನರಾರಂಭಗೊಳ್ಳಲಿದೆ ಎಂದು ಘೋಷಿಸಿದೆ. ಭವಿಷ್ಯದಲ್ಲಿ ಭಾರತೀಯರಿಗೆ ವಿದೇಶಿ ಮೆಸೇಜಿಂಗ್ ಆಪ್‌ಗಳಿಗೆ ಸುರಕ್ಷಿತ, ಸ್ಥಳೀಯ ಪರ್ಯಾಯವನ್ನು ನೀಡುವ ದೃಷ್ಟಿಯಿಂದ, ಅರಟ್ಟೈ ಇನ್ನಷ್ಟು ಜನಪ್ರಿಯತೆಯನ್ನು ಗಳಿಸಲಿದೆ.

ಈ ಹಠಾತ್ ಜನಪ್ರಿಯತೆ, ದೇಶೀಯ ಡಿಜಿಟಲ್ ಪರಿಹಾರಗಳಿಗೆ ಹೆಚ್ಚಿನ ಬೇಡಿಕೆಯನ್ನು ತೋರಿಸುತ್ತದೆ. ಸ್ಥಳೀಯ ಫೀಚರ್‌ಗಳು, ಸುರಕ್ಷತೆ ಮತ್ತು ಸುಲಭ ಬಳಕೆ ಎಂಬುದರಿಂದ, ಅರಟ್ಟೈ ಭಾರತದ ಮೆಸೇಜಿಂಗ್ ಅಪ್ಲಿಕೇಶನ್‌ಗಳ ಭವಿಷ್ಯವನ್ನು ರೂಪಿಸುತ್ತಿದೆ.