Bengaluru Metro: ಎಷ್ಟೇ ವಿರೋಧಿಸಿದ್ರೂ ಟಿಕೆಟ್‌ ದರ ಕಡಿಮೆ ಮಾಡಲ್ಲ...BMRCL ಖಡಕ್‌ ನಿರ್ಧಾರ, ಪ್ರಯಾಣಿಕರಿಗೆ ಒತ್ತಡ!

ಬೆಂಗಳೂರಿನಲ್ಲಿ ಸಾರಿಗೆ ವ್ಯವಸ್ಥೆಯೂ ಬಲು ದುಬಾರಿ. ಅದರಲ್ಲೂ ಮೆಟ್ರೋ ಟಿಕೆಟ್ ದರ ಏರಿಕೆಯಾದಾಗಿಂದ, ಓಡಾಟ ಅನ್ನೋದು ನುಂಗಲಾರದ ಬಿಸಿ ತುಪ್ಪವಾಗಿದೆ. ಈ ದರ ಏರಿಕೆ ವಿರುದ್ಧ ನಾಗರಿಕರು ಹಾಗೂ ಜನಪ್ರತಿನಿಧಿಗಳಿಂದ ಅಸಮಾಧಾನ ವ್ಯಕ್ತವಾಗಿದೆ. ಆದರೆ ಬೆಂಗಳೂರು ಮೆಟ್ರೋ (Bengalru Metro) ರೈಲು ಕಾರ್ಪೊರೇಷನ್ ಲಿಮಿಟೆಡ್ (BMRCL) ತನ್ನ ನಿಲುವು ಸ್ಪಷ್ಟಪಡಿಸಿ, ದರ ಪರಿಷ್ಕರಣೆಯನ್ನು ಪುನಃ ಪರಿಶೀಲಿಸುವ ಯಾವುದೇ ಯೋಚನೆ ಇಲ್ಲ ಎಂದು ತಿಳಿಸಿದೆ. ಫೆಬ್ರವರಿ 9ರಂದು ಪರಿಷ್ಕೃತ ದರಗಳು ಜಾರಿಗೆ ಬಂದಿದ್ದು, ಈ ನಿರ್ಧಾರವು ಎಫ್‌ಎಫ್‌ಸಿ (Fare Fixation Committee) ಶಿಫಾರಸುಗಳ ಆಧಾರದಲ್ಲೇ ಮಾಡಲಾಗಿದೆ ಎಂದು ನಿಗಮವು ಹೇಳಿದೆ.

ದರ ಏರಿಕೆ ಕುರಿತ ವಿವಾದ, ನಾಗರಿಕರು ಮತ್ತು ಸಂಸದರ ಆಕ್ಷೇಪಣೆ:

ನಗರದ ಹಲವಾರು ನಾಗರಿಕರು ಹಾಗೂ ಬೆಂಗಳೂರು ದಕ್ಷಿಣ ಸಂಸದ ತೇಜಸ್ವಿ ಸೂರ್ಯ ಅವರು ಮೆಟ್ರೋ ದರ ಏರಿಕೆಯಲ್ಲಿ ಅಸಂಗತತೆಗಳಿವೆ ಎಂದು ಹೇಳಿದ್ದಾರೆ. ಅವರ ಪ್ರಕಾರ, ಬಿಎಂಆರ್‌ಸಿಎಲ್ ಎಫ್‌ಎಫ್‌ಸಿ ಶಿಫಾರಸುಗಳಿಗೆ ಹೊಂದಿಕೆಯಾಗದ ರೀತಿಯಲ್ಲಿ 105% ರಷ್ಟು "ಅತಿಯಾದ" ದರ ಏರಿಕೆಯನ್ನು ಜಾರಿಗೊಳಿಸಿದೆ. ಜೊತೆಗೆ ನಗರ ಸಂಚಾರ ತಜ್ಞ ಸತ್ಯ ಅರಿಕುಠಾರಂ ಕೂಡಾ ದೆಹಲಿ ಮೆಟ್ರೋ ಮಾದರಿಯ ಸೂತ್ರವನ್ನು ತಪ್ಪಾಗಿ ಅನ್ವಯಿಸಿರುವುದು, ಕಾರ್ಯಾಚರಣಾ ವೆಚ್ಚದ ಲೆಕ್ಕಾಚಾರದಲ್ಲಿ ಅಸಮರ್ಪಕ ವಿಧಾನ ಬಳಸಿರುವುದು ಮತ್ತು ಮೂಲ ವರ್ಷದ ಆಯ್ಕೆಯಲ್ಲಿ ಲೋಪಗಳಿವೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

BMRCL ಸ್ಪಷ್ಟನೆ, ನಿಜವಾದ ಏರಿಕೆ ಅಷ್ಟೇನೂ ಹೆಚ್ಚು ಇಲ್ಲ:

ಬಿಎಂಆರ್‌ಸಿಎಲ್ ಸಾಮಾಜಿಕ ಮಾಧ್ಯಮದ ಮೂಲಕ ನೀಡಿದ ಸ್ಪಷ್ಟೀಕರಣದಲ್ಲಿ, 105.2% ಅಂಕಿ-ಅಂಶವು ನಿಜವಾದ ದರ ಏರಿಕೆಯನ್ನು ತೋರಿಸುವುದಿಲ್ಲ ಎಂದು ತಿಳಿಸಿದೆ. ಇದು 2017ರಿಂದ ಕಾರ್ಯಾಚರಣಾ ವೆಚ್ಚದಲ್ಲಿ ಕಂಡುಬಂದ ಒಟ್ಟು ಬದಲಾವಣೆಯ ಸೂಚ್ಯಂಕ ಮಾತ್ರವಾಗಿದ್ದು, ಬಡ್ಡಿ, ಇಂಧನ, ಸವಕಳಿ ಹಾಗೂ ಸಿಬ್ಬಂದಿ ವೆಚ್ಚಗಳನ್ನು ಇದರಲ್ಲಿ ಪರಿಗಣಿಸಲಾಗಿಲ್ಲ. ನಿಜವಾದ ದರ ಏರಿಕೆ ಎಫ್‌ಎಫ್‌ಸಿ ಶಿಫಾರಸು ಪ್ರಕಾರ 0%ರಿಂದ 81.8% ರವರೆಗೆ ಇದ್ದು, ಸರಾಸರಿ 51.6% ಏರಿಕೆಯಷ್ಟೇ ಕಂಡುಬಂದಿದೆ.

ಸಮತೋಲನದ ಪ್ರಯತ್ನ, ಪ್ರಯಾಣಿಕರ ಮೇಲಿನ ಬಾಧೆ ತಗ್ಗಿಸಲು ಕ್ರಮ:

ಬಿಎಂಆರ್‌ಸಿಎಲ್ ಒಟ್ಟು 600 ಕ್ಕೂ ಹೆಚ್ಚು ದರ ಸಂಯೋಜನೆಗಳನ್ನು ಪರೀಕ್ಷಿಸಿ, ಯಾವುದೇ ನಿಲ್ದಾಣದಿಂದ ಮತ್ತೊಂದು ನಿಲ್ದಾಣಕ್ಕೆ ಗರಿಷ್ಠ ದರ ಏರಿಕೆಯನ್ನು 71.4% ಕ್ಕೆ ಸೀಮಿತಗೊಳಿಸಿದೆ. ಒಟ್ಟು 4,624 ದರ ಮ್ಯಾಟ್ರಿಕ್ಸ್ ಪ್ರವೇಶಗಳಲ್ಲಿ, ಸುಮಾರು 70% ದರಗಳು 30% ರಿಂದ 60% ರವರೆಗೆ ಏರಿಕೆಯಾಗಿದೆ. 7.6% ದರಗಳು 71.4% ಕ್ಕೆ ಏರಿಕೆಯಾದರೆ, ಸುಮಾರು 3% ದರಗಳು ಕಡಿಮೆಯಾಗಿವೆ. ಬಿಎಂಆರ್‌ಸಿಎಲ್ ಹೇಳುವಂತೆ, ಎಫ್‌ಎಫ್‌ಸಿ ವರದಿಯಲ್ಲಿನ 366% ಅಂಕಿ-ಅಂಶವು ವರ್ಷದಿಂದ ವರ್ಷಕ್ಕೆ ದರ ಏರಿಕೆ ಅಲ್ಲ, ಅದು 7.5 ವರ್ಷಗಳ ಅವಧಿಯಲ್ಲಿ ಕಾರ್ಯಾಚರಣೆ ಮತ್ತು ನಿರ್ವಹಣಾ ವೆಚ್ಚಗಳ ತೂಕದ ಸೂಚ್ಯಂಕವನ್ನು ಮಾತ್ರ ತೋರಿಸುತ್ತದೆ.

ಪ್ರಯಾಣಿಕರ ಅನುಕೂಲಕ್ಕಾಗಿ ಹೊಸ ರಿಯಾಯಿತಿಗಳು:

ದರ ಪರಿಷ್ಕರಣೆಯ ನಂತರ ಪ್ರಯಾಣಿಕರ ಮೇಲಿನ ಹೊರೆ ಕಡಿಮೆ ಮಾಡಲು ಸ್ಮಾರ್ಟ್ ಕಾರ್ಡ್ ರಿಯಾಯಿತಿಗಳು, ಸಾಮಾನ್ಯ ಸಮಯದ ರಿಯಾಯಿತಿಗಳು ಮತ್ತು ರಜಾದಿನದ ದರ ಕಡಿತಗಳನ್ನು ಬಿಎಂಆರ್‌ಸಿಎಲ್ ಪರಿಚಯಿಸಿದೆ. ಪ್ರಾರಂಭದಲ್ಲಿ ಪ್ರಯಾಣಿಕರ ಸಂಖ್ಯೆ ಸ್ವಲ್ಪ ಕಡಿಮೆಯಾದರೂ, ಹಳದಿ ಮಾರ್ಗದ ಪ್ರಾರಂಭದ ನಂತರ ಮೆಟ್ರೋ ಸೇವೆ ಬಳಸುವವರ ಸಂಖ್ಯೆ ಮತ್ತೆ ಹೆಚ್ಚಾಗಿದೆ. ನಿಗಮದ ಪ್ರಕಾರ, ಮುಂದಿನ ತಿಂಗಳುಗಳಲ್ಲಿ ಪ್ರಯಾಣಿಕರ ಸಂಖ್ಯೆ ಇನ್ನಷ್ಟು ಏರಿಕೆ ಕಾಣುವ ನಿರೀಕ್ಷೆಯಿದೆ.

ಮೆಟ್ರೋ ದರ ಏರಿಕೆ ಕುರಿತಂತೆ ಜನರಲ್ಲಿ ಅಸಮಾಧಾನ ಇದ್ದರೂ, ಬಿಎಂಆರ್‌ಸಿಎಲ್ ಪ್ರಕಾರ ಈ ದರ ಪರಿಷ್ಕರಣೆ ಶಿಫಾರಸುಗಳ ಆಧಾರದಲ್ಲೇ ನಡೆದಿದ್ದು, ಪ್ರಯಾಣಿಕರ ಅನುಕೂಲ ಮತ್ತು ಸೇವಾ ಗುಣಮಟ್ಟವನ್ನು ಕಾಪಾಡುವ ಉದ್ದೇಶದಿಂದಲೇ ಈ ಕ್ರಮ ಕೈಗೊಳ್ಳಲಾಗಿದೆ. ನಿಗಮವು ಭವಿಷ್ಯದಲ್ಲಿ ಪ್ರಯಾಣಿಕರ ಅನುಭವ ಸುಧಾರಿಸಲು ಮತ್ತು ಮೆಟ್ರೋ ಸೇವೆಯನ್ನು ಹೆಚ್ಚು ಜನ ಸ್ನೇಹಿಯಾಗಿಸಲು ಬದ್ಧವಾಗಿದೆ ಎಂದು ತಿಳಿಸಿದೆ.