Bengaluru Metro: ಮೆಟ್ರೋ ದರ ಮತ್ತೆ ಏರಿಕೆ? 71% ದರ ಹೆಚ್ಚಿಸಿದ್ದಲ್ಲದೇ ಈಗ ವರ್ಷಕ್ಕೊಮ್ಮೆ ಏರಿಸೋ ಪ್ಲಾನ್!

ಫೆಬ್ರವರಿ 2024ರಲ್ಲಿ ಮೆಟ್ರೋ ದರಗಳನ್ನು ಶೇಕಡಾ 71ರಷ್ಟು ಏರಿಸಿ ದೇಶದಲ್ಲೇ ಅತ್ಯಂತ ದುಬಾರಿ ಮೆಟ್ರೋ ಎಂದು ಹೆಸರು ಮಾಡಿಸಿಕೊಂಡ ನಂತರ, ಬೆಂಗಳೂರು ಮೆಟ್ರೋ ರೈಲು ನಿಗಮ ಲಿಮಿಟೆಡ್ (BMRCL) ಇದೀಗ ವಾರ್ಷಿಕ ದರ ಪರಿಷ್ಕರಣೆಯ ಯೋಜನೆ ರೂಪಿಸುತ್ತಿದೆ. ಆರ್ಥಿಕ ಸ್ಥಿರತೆಯನ್ನು ಕಾಯ್ದುಕೊಳ್ಳಲು ಪ್ರತಿ ವರ್ಷ ಶೇಕಡಾ 5ರಷ್ಟು ದರ ಏರಿಕೆ ಮಾಡಬೇಕೆಂದು ದರ ನಿಗದಿ ಸಮಿತಿ (FFC) ಶಿಫಾರಸು ಮಾಡಿದೆ. ಈ ಸಲಹೆ ಅಂಗೀಕರಾದರೆ, ಮುಂದಿನ ದರ ಏರಿಕೆ ಫೆಬ್ರವರಿ 2026ರಲ್ಲಿ ಜಾರಿಯಾಗಬಹುದು.

ವರದಿ ಬಹಿರಂಗವಾದ ಹಿನ್ನಲೆ:

ಮೆಟ್ರೋ ದರ ಏರಿಕೆಯ ಬಗ್ಗೆ ಸಿದ್ಧವಾದ FFC ವರದಿಯನ್ನು BMRCL ಏಳು ತಿಂಗಳ ಕಾಲ ಸಾರ್ವಜನಿಕರಿಗೆ ನೀಡಲಿಲ್ಲ. ಹಲವಾರು RTI ಅರ್ಜಿಗಳು ತಿರಸ್ಕೃತವಾದ ನಂತರ, ವಿಷಯ ಹೈಕೋರ್ಟ್‌ಗೆ ತಲುಪಿತು. ಅಂತಿಮವಾಗಿ, ಕೋರ್ಟ್ ವಿಚಾರಣೆಗೂ ಒಂದು ದಿನ ಮೊದಲು, BMRCL ವರದಿಯನ್ನು ತನ್ನ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಿತು. ಈ ವರದಿ ಪ್ರಕಾರ, BMRCL 7.5 ವರ್ಷಗಳ ಅವಧಿಯಲ್ಲಿ ಶೇಕಡಾ 105ರಷ್ಟು ದರ ಏರಿಕೆಯನ್ನು ಕೋರಿದ್ದು, ಮೂಲ ದರವನ್ನು 21 ರೂ.ಗೆ ಮತ್ತು ಗರಿಷ್ಠ ದರವನ್ನು 123 ರೂ.ಗೆ ಏರಿಸಲು ಶಿಫಾರಸು ಮಾಡಿದೆ.

ನಷ್ಟದ ಭಾರ ಹೆಚ್ಚಾಗುತ್ತಿರುವ BMRCL:

ಮೆಟ್ರೋ ಸೇವೆಗಳು ಪ್ರಾರಂಭವಾದಾಗಿನಿಂದಲೇ BMRCL ದೊಡ್ಡ ಮಟ್ಟದ ನಷ್ಟವನ್ನು ಎದುರಿಸುತ್ತಿದೆ. 2019-20ರಲ್ಲಿ 641 ಕೋಟಿ ರೂ. ನಷ್ಟ ದಾಖಲಾದರೆ, 2020-21ರಲ್ಲಿ ಅದು 905 ಕೋಟಿ ರೂ.ಗಳಷ್ಟಕ್ಕೆ ಏರಿತು. ಕೊರೋನಾ ಸಾಂಕ್ರಾಮಿಕ ಇದಕ್ಕೆ ಪ್ರಮುಖ ಕಾರಣವಾಗಿತ್ತು. 2023-24ರಲ್ಲಿ ನಷ್ಟವು 627 ಕೋಟಿ ರೂ.ಗಳಷ್ಟಿತ್ತು.

ಮೆಟ್ರೋ ವಿಸ್ತರಣೆ, ನಿರ್ವಹಣೆ, ಇಂಧನ, ಸಿಬ್ಬಂದಿ ವೇತನ, ಸಾಲ ಬಡ್ಡಿ ಪಾವತಿಗಳಂತಹ ಹೊಣೆಗಾರಿಕೆಗಳು ದಿನೇ ದಿನೇ ಹೆಚ್ಚುತ್ತಿವೆ. 2025-26ರಲ್ಲಿ ಮಾತ್ರವೇ BMRCLಗೆ ಸಾಲದ ಅಸಲು ಮತ್ತು ಬಡ್ಡಿ ಪಾವತಿಗಾಗಿ 775 ಕೋಟಿ ರೂ.ಗಳ ಅಗತ್ಯವಿದ್ದು, 2029-30ರಲ್ಲಿ ಇದು 2,776 ಕೋಟಿ ರೂ.ಗಳಷ್ಟಾಗುವ ನಿರೀಕ್ಷೆಯಿದೆ.

ಸಾರ್ವಜನಿಕ ಪ್ರತಿಕ್ರಿಯೆ: ಬೆಲೆ ಏರಿಕೆಗೆ ವಿರೋಧ ಹೆಚ್ಚು:

ಅಕ್ಟೋಬರ್ 2024ರಲ್ಲಿ ದರ ಏರಿಕೆ ಕುರಿತು ಸಲಹೆ ಮತ್ತು ಆಕ್ಷೇಪಣೆಗಳನ್ನು ಆಹ್ವಾನಿಸಲಾಗಿತ್ತು. ಒಟ್ಟು 1,126 ಪ್ರತಿಕ್ರಿಯೆಗಳು ಬಂದಿದ್ದು, 51% ಜನರು ದರ ಏರಿಕೆಯನ್ನು ವಿರೋಧಿಸಿದರು. 27% ಪ್ರಯಾಣಿಕರು ಮಾತ್ರ ಸಮಂಜಸವಾದ ಏರಿಕೆಯನ್ನು ಒಪ್ಪಿಕೊಂಡಿದ್ದರು. ವಿದ್ಯಾರ್ಥಿ ಪಾಸ್‌ಗಳು, ಮಾಸಿಕ ಪಾಸ್‌ಗಳು, ಭಾನುವಾರ ಉಚಿತ ಪ್ರಯಾಣ ಸೇರಿದಂತೆ ಹಲವು ಬೇಡಿಕೆಗಳನ್ನು ಸಾರ್ವಜನಿಕರು ಮುಂದಿಟ್ಟಿದ್ದರು.

ಸಾರ್ವಜನಿಕ ಬೇಡಿಕೆಗಳಿಗೆ BMRCL ಪ್ರತಿಕ್ರಿಯೆ:

ಜನದಟ್ಟಣೆ ಇಲ್ಲದ ಸಮಯದಲ್ಲಿ 20% ರಿಯಾಯಿತಿ ನೀಡಲು ಬೇಡಿಕೆ ಇತ್ತು. ಆದರೆ BMRCL ಕೇವಲ 5% ರಿಯಾಯಿತಿಯನ್ನು ಮಾತ್ರ ಪರಿಗಣಿಸಬಹುದು ಎಂದಿದೆ. ಸ್ಮಾರ್ಟ್ ಕಾರ್ಡ್ ಕನಿಷ್ಠ ಬ್ಯಾಲೆನ್ಸ್ ನಿಯಮ ತೆಗೆದುಹಾಕಲು ಸಾಧ್ಯವಿಲ್ಲ ಎಂದು ತಿಳಿಸಲಾಗಿದೆ. ಪ್ರಯಾಣಿಕರು ನಿರ್ಗಮನ ಸಮಯದಲ್ಲಿ ಸಾಕಷ್ಟು ಬ್ಯಾಲೆನ್ಸ್ ಇಲ್ಲದಿದ್ದರೆ ಸಮಸ್ಯೆ ಉಂಟಾಗಬಹುದು ಎಂದು BMRCL ಹೇಳಿದೆ. ವಿಶೇಷ ಚೇತನರು ಮತ್ತು ಹಿರಿಯ ನಾಗರಿಕರಿಗೆ ರಿಯಾಯಿತಿ ನೀಡಲು ತಂತ್ರಜ್ಞಾನ ಹೂಡಿಕೆ ಅಗತ್ಯವಿದೆ, ಇದು ಈಗ ಸಾಧ್ಯವಿಲ್ಲ ಎಂದಿದೆ.

ಮಾಸಿಕ ಪಾಸ್ ನೀಡುವ ಸಲಹೆಯನ್ನು ಸಮಿತಿ ತಿರಸ್ಕರಿಸಿದೆ:

ಭಾನುವಾರ ಮತ್ತು ರಾಷ್ಟ್ರೀಯ ರಜಾದಿನಗಳಲ್ಲಿ ಉಚಿತ ಪ್ರಯಾಣ ಬದಲು, ಹೆಚ್ಚುವರಿ ರಿಯಾಯಿತಿ ನೀಡುವ ಪ್ರಸ್ತಾಪ ಮಾತ್ರ ಇರಿಸಲಾಗಿದೆ.

BMRCL ಪ್ರತಿ ಮೂರು ವರ್ಷಗಳಿಗೊಮ್ಮೆ ದರ ನಿಗದಿ ಸಮಿತಿಯನ್ನು ರಚಿಸಲು ತೀರ್ಮಾನಿಸಿದೆ. ದರ ಏರಿಕೆಯ ನಿರ್ಧಾರ ಪ್ರಯಾಣಿಕರ ಮೇಲೆ ಹೊರೆ ಹಾಕಿದರೂ, ಸಂಸ್ಥೆಯ ಆರ್ಥಿಕ ಸ್ಥಿತಿ ಸುಧಾರಿಸಲು ಇದು ಅಗತ್ಯವಿದೆ ಎಂದು BMRCL ಹೇಳಿದೆ.