Bengaluru Metro: 3ನೇ ಹಂತ ಮತ್ತಷ್ಟು ವಿಳಂಬ...2026ರ ಜನವರಿಗೂ ಪ್ರಾರಂಭವಿಲ್ಲ! ಹಾಗಾದ್ರೆ ಯಾವಾಗ ಗೊತ್ತಾ?

ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (BMRCL) ತಿಳಿಸಿರುವಂತೆ, ಮೆಟ್ರೋ 3ನೇ ಹಂತದ ನಿರ್ಮಾಣ ಕಾರ್ಯವು ಮೊದಲು ನಿರೀಕ್ಷಿಸಿದ್ದಂತೆ 2026ರ ಜನವರಿಯಲ್ಲಿ ಅಲ್ಲದೆ, ಜೂನ್‌ನಲ್ಲಿ ಪ್ರಾರಂಭವಾಗಲಿದೆ. ಭೂಸ್ವಾಧೀನ, ಯುಟಿಲಿಟಿ ಸ್ಥಳಾಂತರ ಹಾಗೂ ಮರ ಕಡಿಯುವಂತಹ ಪೂರ್ವಸಿದ್ಧತಾ ಕೆಲಸಗಳು ನಿಧಾನಗತಿಯಲ್ಲಿ ಸಾಗುತ್ತಿರುವುದೇ ಇದಕ್ಕೆ ಕಾರಣವಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಸೆಪ್ಟೆಂಬರ್ 13ರಿಂದ 17ರವರೆಗೆ ನಡೆದ ಪರಿಸರ ಪಾಲುದಾರರ ಅಂತಿಮ ಸಭೆಯಲ್ಲಿ ಈ ಮಾಹಿತಿ ಹೊರಬಂದಿದೆ. 3ನೇ ಹಂತದ ಕಾರ್ಯಾಚರಣೆ 2031ರ ಮೇ ತಿಂಗಳಲ್ಲಿ ಪೂರ್ಣಗೊಂಡು ರೈಲು ಸಂಚಾರ ಆರಂಭವಾಗುವ ನಿರೀಕ್ಷೆಯಿದೆ.

44.65 ಕಿ.ಮೀ ಉದ್ದದ ಈ ಯೋಜನೆ ಪೂರ್ಣಗೊಂಡರೆ, ಬೆಂಗಳೂರಿನ ಮೆಟ್ರೋ ಜಾಲವು ಒಟ್ಟು 222.2 ಕಿ.ಮೀ ವಿಸ್ತಾರ ಹೊಂದಲಿದೆ. ಆದರೆ ಮರ ಕಡಿಯಲು ಅಗತ್ಯ ಅನುಮೋದನೆಗಳು 2026ರ ಮಧ್ಯದಲ್ಲಿ ಮಾತ್ರ ದೊರಕುವ ಸಾಧ್ಯತೆ ಇದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ಅಂತಿಮ ಸಭೆಯಲ್ಲಿ ಅಧಿಕಾರಿಗಳು ಹೇಳುವಂತೆ, ಮೆಟ್ರೋ 3ನೇ ಹಂತದಲ್ಲಿ ಕಡಿಯಬೇಕಾದ ಮರಗಳ ಸಂಖ್ಯೆ 11,137ರಿಂದ 6,700ಕ್ಕೆ ಇಳಿಸಲಾಗಿದೆ. ಕಾರಿಡಾರ್ 1ರ ಪ್ಯಾಕೇಜ್ 1 (ಜೆಪಿ ನಗರ 4ನೇ ಹಂತದಿಂದ ಮೈಸೂರು ರಸ್ತೆವರೆಗೆ 10.88 ಕಿ.ಮೀ) ಭಾಗದಲ್ಲಿ ಸುಮಾರು 1,100 ಮರಗಳನ್ನು ಕಡಿಯಲು ಅಥವಾ ಸ್ಥಳಾಂತರಿಸಲು ಈಗಾಗಲೇ ಅನುಮತಿ ದೊರೆತಿದೆ.

ಆದರೆ ಪ್ಯಾಕೇಜ್ 2 (ಮೈಸೂರು ರಸ್ತೆಯಿಂದ ಕಂಠೀರವ ಸ್ಟುಡಿಯೋವರೆಗೆ 10.6 ಕಿ.ಮೀ) ಹಾಗೂ ಪ್ಯಾಕೇಜ್ 3 (ಕಂಠೀರವ ಸ್ಟುಡಿಯೋದಿಂದ ಕೆಂಪಾಪುರದವರೆಗೆ 10.67 ಕಿ.ಮೀ) ಭಾಗಗಳಲ್ಲಿ ಮರ ಎಣಿಕೆಯ ಕಾರ್ಯ ಇನ್ನೂ ನಡೆಯುತ್ತಿದೆ. ಎಣಿಕೆಯ ನಂತರ ತಜ್ಞರ ಸಮಿತಿ ಪರಿಶೀಲನೆ ನಡೆಸಿ, ಅನುಮೋದನೆ ನೀಡುತ್ತದೆ ಎಂದು ತಿಳಿಸಲಾಗಿದೆ.

ಮೆಟ್ರೋ ಯೋಜನೆಯಿಂದ ಬಾಧಿತವಾಗುವ ಪ್ರತಿಯೊಂದು ಮರಕ್ಕೂ 10 ಸ್ಥಳೀಯ ಮರಗಳನ್ನು ನಗರದೊಳಗೆ ನೆಡುವ ಮೂಲಕ ಪರಿಹಾರ ಅರಣ್ಯೀಕರಣ ನಡೆಸಲಾಗುತ್ತದೆ ಎಂದು BMRCL ತಿಳಿಸಿದೆ. ಇದಕ್ಕಾಗಿ 43.53 ಕೋಟಿ ರೂಪಾಯಿ ವೆಚ್ಚದಲ್ಲಿ ಪರಿಸರ ಮೇಲ್ವಿಚಾರಣಾ ಯೋಜನೆ ರೂಪಿಸಲಾಗಿದೆ.

ಭೂಸ್ವಾಧೀನ, ಮರ ಕಡಿಯುವುದು, ಯುಟಿಲಿಟಿ ಸ್ಥಳಾಂತರ ಇವುಗಳನ್ನೆಲ್ಲ ಒಟ್ಟಿಗೆ ಪೂರ್ಣಗೊಳಿಸಿದ ಬಳಿಕವೇ ನೆಲಮಟ್ಟದ ನಿರ್ಮಾಣ ಕಾರ್ಯ ಪ್ರಾರಂಭವಾಗುತ್ತದೆ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ಈ ಯೋಜನೆಯಡಿ ಜೆಪಿ ನಗರ 4ನೇ ಹಂತದಿಂದ ಕೆಂಪಾಪುರದವರೆಗೆ 28.486 ಕಿ.ಮೀ ಉದ್ದದ ಮೇಲ್ಸೇತುವೆ ಹಾಗೂ ಹೊಸಹಳ್ಳಿಯಿಂದ ಕಡಬಗೆರೆಯವರೆಗೆ 8.635 ಕಿ.ಮೀ ಉದ್ದದ ಇನ್ನೊಂದು ಮೇಲ್ಸೇತುವೆ ನಿರ್ಮಾಣವಾಗಲಿದೆ.

ರಾಜ್ಯ ಸರ್ಕಾರ 9,700 ಕೋಟಿ ರೂಪಾಯಿಗಳ ಡಬಲ್ ಡೆಕ್ಕರ್ ಯೋಜನೆಗೆ ಅನುಮೋದನೆ ನೀಡಿರುವುದರಿಂದ, ವಿವರವಾದ ಯೋಜನಾ ವರದಿ (DPR) ಸಂಪೂರ್ಣವಾಗಿ ಪರಿಷ್ಕರಣೆ ಅಗತ್ಯವಿದೆ ಎಂದು ಪರಿಸರ ತಜ್ಞ ದತ್ತಾತ್ರೇಯ ಟಿ. ದೇವರೆ ಹೇಳಿದ್ದಾರೆ. ಪರಿಷ್ಕೃತ ವರದಿ ಸಿದ್ಧವಾದ ನಂತರವೇ ಸಾರ್ವಜನಿಕ ಸಮಾಲೋಚನೆ ನಡೆಸಬೇಕು ಎಂದು ಅವರು ಮನವಿ ಮಾಡಿದ್ದಾರೆ.