11 ವರ್ಷಗಳ ಬಳಿಕ ಮಹಿಳೆಗೆ ನ್ಯಾಯ...ನಿವೇಶನಕ್ಕೆ ಕಾಯಿಸಿದ್ದಕ್ಕೆ ಬಡ್ಡಿ ಸಮೇತ 12 ಲಕ್ಷ ಮರುಪಾವತಿ!

ಬೆಂಗಳೂರು ನಗರದಲ್ಲಿ ವಸತಿ ನಿವೇಶನಕ್ಕಾಗಿ ದಶಕಕ್ಕೂ ಹೆಚ್ಚು ಕಾಲ ನಿರೀಕ್ಷಿಸಿದ ಮಹಿಳೆಗೆ ಕೊನೆಗೂ ನ್ಯಾಯ ದೊರೆತಿದೆ. 3ನೇ ಹೆಚ್ಚುವರಿ ಬೆಂಗಳೂರು ನಗರ ಜಿಲ್ಲಾ ಗ್ರಾಹಕ ವ್ಯಾಜ್ಯ ಪರಿಹಾರ ಆಯೋಗವು ಕರ್ನಾಟಕ ಟೆಲಿಕಾಂ ನೌಕರರ ಸಹಕಾರ ಸಂಘ ಮತ್ತು ಯೋಜನೆಯ ಡೆವಲಪರ್ ವಿರುದ್ಧ ತೀರ್ಪು ನೀಡಿ, ಪಾವತಿಸಿದ 12 ಲಕ್ಷಕ್ಕೂ ಹೆಚ್ಚಿನ ಮೊತ್ತವನ್ನು ಬಡ್ಡಿಯೊಂದಿಗೆ ಮರುಪಾವತಿಸಲು ಹಾಗೂ ಮಾನಸಿಕ ಯಾತನೆ ಮತ್ತು ಮೊಕದ್ದಮೆ ವೆಚ್ಚವನ್ನು ನೀಡಲು ಆದೇಶಿಸಿದೆ.

2011ರಲ್ಲಿ ಆರಂಭವಾದ ಕಾಯುವಿಕೆ:

2011 ಡಿಸೆಂಬರ್ 30ರಂದು, ಸರ್ಜಾಪುರ ರಸ್ತೆಯ ಕಲ್ಕೊಂಡರಹಳ್ಳಿಯ ನಿವಾಸಿ ಲೀನಾ ಖೇಮಾನಿ, ಬಿದರಗುಪ್ಪೆ ಅಟೀಬೆಲ್ ರಸ್ತೆಯ ಆಯುಷ್ಮಾನ್ಭವ ಲೇಔಟ್‌ನಲ್ಲಿ 60x40 ಅಡಿ ನಿವೇಶನಕ್ಕಾಗಿ ಅರ್ಜಿ ಸಲ್ಲಿಸಿದರು. ಈ ಯೋಜನೆಯನ್ನು ಡಿಬಿ ಎಂಟರ್‌ಪ್ರೈಸಸ್ ಅಭಿವೃದ್ಧಿಪಡಿಸಿತ್ತು. ಖೇಮಾನಿ ಅವರು ಸೇವಾ ಶುಲ್ಕವಾಗಿ 2.4 ಲಕ್ಷ ರೂ.ಗಳನ್ನು ಡೆವಲಪರ್‌ಗೆ ಮತ್ತು ಸೈಟ್ ಮೌಲ್ಯ 12 ಲಕ್ಷ ರೂ. ಪೈಕಿ 9.6 ಲಕ್ಷ ರೂ.ಗಳನ್ನು ಸಹಕಾರಿ ಸಂಘಕ್ಕೆ ಪಾವತಿಸಿದ್ದರು.

ನೋಂದಣಿ ವಿಳಂಬ..ಕೊರೋನಾ ಕಾರಣ ಹೇಳಿದ ಸೊಸೈಟಿ:

ನಿವೇಶನವನ್ನು ನೋಂದಾಯಿಸಲು ಸಹಕಾರಿ ಸಂಘವು ವರ್ಷಗಳ ಕಾಲ ವಿಳಂಬ ಮಾಡಿತು. 2020 ಡಿಸೆಂಬರ್ 23ರಂದು, ಕೋವಿಡ್-19 ಕಾರಣದಿಂದ ಕೆಲಸ ವಿಳಂಬವಾಗಿದೆ ಎಂದು ಹೇಳಿ, 12-14 ತಿಂಗಳಲ್ಲಿ ವಿನ್ಯಾಸ ಪೂರ್ಣಗೊಳ್ಳುತ್ತದೆ ಎಂದು ಭರವಸೆ ನೀಡಿತು. 2021 ಸೆಪ್ಟೆಂಬರ್ 9ರಂದು ಸಹ ಇದೇ ಮಾಹಿತಿ ಪುನರಾವರ್ತಿಸಲಾಯಿತು. ಆದರೆ, ಯಾವುದೇ ಪ್ರಗತಿ ಕಂಡುಬಂದಿಲ್ಲ.

ಕಾನೂನು ನೋಟಿಸ್ ಮತ್ತು ದೂರು:

ಸೈಟ್ ನೋಂದಣಿ ಆಗದೆ, ಯಾವುದೇ ಪರಿಹಾರ ನೀಡದ ಕಾರಣ, ಖೇಮಾನಿ ಅವರು 2023 ಸೆಪ್ಟೆಂಬರ್ 28ರಂದು ಸೊಸೈಟಿಗೆ ಕಾನೂನು ನೋಟಿಸ್ ಕಳುಹಿಸಿದರು. ನಂತರ 2024 ಜನವರಿ 20ರಂದು ಗ್ರಾಹಕ ದೂರು ದಾಖಲಿಸಿ, ಸೇವೆಯ ಕೊರತೆಗೆ ಪರಿಹಾರ ಕೋರಿದರು.

ಸೊಸೈಟಿಯ ವಾದ:

ತಮಗಾಗಿ ಬಾಕಿ 4.1 ಲಕ್ಷ ರೂ. ಪಾವತಿಸಿದರೆ ಸೈಟ್ ನೋಂದಾಯಿಸಲು ಸಿದ್ಧವಿದ್ದೇವೆ ಎಂದು ಸೊಸೈಟಿ ವಾದಿಸಿತು. ಜೊತೆಗೆ, 4.5 ಎಕರೆ ಭೂಮಿಗೆ ವಿನ್ಯಾಸ ಅನುಮೋದನೆ ಪಡೆದುಕೊಂಡಿದ್ದೇವೆ ಮತ್ತು 30 ಎಕರೆ ಕೃಷಿ ಭೂಮಿಯನ್ನು ವಸತಿ ಬಳಕೆಗೆ ಪರಿವರ್ತಿಸಲು ಅರ್ಜಿ ಸಲ್ಲಿಸಿದ್ದೇವೆ ಎಂದು ತಿಳಿಸಿತು. ಸೈಟ್ ಮೌಲ್ಯ 12 ಲಕ್ಷ ರೂ. ಅಲ್ಲ, 13.6 ಲಕ್ಷ ರೂ. ಎಂದು ಸಹ ವಾದಿಸಿತು.

ಆಯೋಗದ ತೀರ್ಪು:

ಆಯೋಗವು ಪರಿಶೀಲನೆ ನಡೆಸಿ, 11 ವರ್ಷಗಳಾದರೂ ವಿನ್ಯಾಸ ಪೂರ್ಣವಾಗಿಲ್ಲ ಮತ್ತು ನೋಂದಣಿ ಆಗಿಲ್ಲವೆಂದು ಗಮನಿಸಿತು. ಪಾವತಿಸಿದ ಹಣಕ್ಕೆ ಯಾವುದೇ ಪ್ರತಿಫಲ ಸಿಕ್ಕಿಲ್ಲವೆಂದು ತಿಳಿಸಿ, ಸಹಕಾರಿ ಸಂಘವನ್ನು ಸೇವೆಯ ಕೊರತೆಗೆ ತಪ್ಪಿತಸ್ಥರೆಂದು ಘೋಷಿಸಿತು. ಡೆವಲಪರ್ ಯಾವುದೇ ಸೇವೆ ನೀಡದೆ 2.4 ಲಕ್ಷ ರೂ. ಪಡೆದಿರುವುದು ಅನ್ಯಾಯಕರ ವ್ಯಾಪಾರ ಕ್ರಮವೆಂದು ಪರಿಗಣಿಸಲಾಯಿತು.

ಆಯೋಗವು 9% ಬಡ್ಡಿಯೊಂದಿಗೆ 9.6 ಲಕ್ಷ ರೂ. ಮತ್ತು ಅದೇ ಬಡ್ಡಿದರದೊಂದಿಗೆ 2.4 ಲಕ್ಷ ರೂ. ಮರುಪಾವತಿಸಲು, ಜೊತೆಗೆ ಮಾನಸಿಕ ಯಾತನೆಗಾಗಿ 30,000 ರೂ. ಮತ್ತು ಮೊಕದ್ದಮೆ ವೆಚ್ಚವಾಗಿ 10,000 ರೂ. ಪಾವತಿಸಲು ಸೊಸೈಟಿಗೆ ಆದೇಶ ನೀಡಿತು.