ಗೋಲ್ಡ್ ಲೋನ್ ಬಗ್ಗೆ ಬಿಗ್ ಅಪ್ಡೇಟ್: ಸಾಲದ ಅಂತರ ಕಡಿಮೆ ಮಾಡಲು ಆರ್‌ಬಿಐನಿಂದ ಶೀಘ್ರ ಹೊಸ ಆಯ್ಕೆ.!

ಭಾರತೀಯ ನಾಗರಿಕರು ಹೊಂದಿರುವಷ್ಟು ಚಿನ್ನವನ್ನು ಬಹುಷಃ ವಿಶ್ವದ ಯಾವುದೇ ಸರ್ಕಾರಗಳು ಕೂಡ ಹೊಂದಿರಲಿಕ್ಕಿಲ್ಲ ಎಂಬ ಮಾತು ಸದ್ಯ ಎಲ್ಲರಿಗೂ ತಿಳಿದಿರುವ ವಿಚಾರ. ಭಾರತದಲ್ಲಿ ಚಿನ್ನವನ್ನು ಕೇವಲ ಆಭರಣದ ದೃಷ್ಟಿಯಿಂದ ನೋಡದೇ ಶುಭ ಅಥವಾ ಒಳಿತು ಎಂಬ ಹಿನ್ನೆಲೆಯಿಂದಲೇ ಗುರುತಿಸಿಲಾಗುತ್ತದೆ. ಇದೇ ಕಾರಣದಿಂದ ಬಹುತೇಕ ಭಾರತದ ಎಲ್ಲಾ ನಗರಗಳಲ್ಲೂ ಚಿನ್ನದಂಗಡಿಗಳು ಸರ್ವೇ ಸಾಮಾನ್ಯವಾಗಿದೆ. ಅದೂ ಅಲ್ಲದೆ ಚಿನ್ನವನ್ನು ಅಡವಿರಿಸಿ ಸಾಲ ನೀಡುವ ಸಂಸ್ಥೆಗಳು ಕೂಡ ಇದೀಗ ಭಾರತದಲ್ಲಿ ಅಲ್ಲಲ್ಲಿ ಹುಟ್ಟಿಕೊಳ್ಳುತ್ತಿದೆ. ಇನ್ನು ಚಿನ್ನದ ಸಾಲ ನೀಡುವ ಸಂಸ್ಥೆಗಳು ಅವರು ನಿಗದಿಪಡಿಸಿದ ಬಡ್ಡಿಯನ್ನು ಸಾಲಗಾರರಿಂದ ವಸೂಲಿ ಮಾಡಲಾಗುತ್ತದೆ. ಸದ್ಯ ಬ್ಯಾಂಕ್‌ಗಳು ಮತ್ತು NBFC ಸೇರಿದಂತೆ ಚಿನ್ನದ ಸಾಲ ಪೂರೈಕೆದಾರರು ಸಾಲಗಾರರಿಗೆ ಮಾಸಿಕ EMI ಮರುಪಾವತಿ ಆಯ್ಕೆಗಳನ್ನು ಪರಿಚಯಿಸಲು ಯೋಜಿಸುತ್ತಿದ್ದಾರೆ ಎನ್ನಲಾಗಿದೆ. ಚಿನ್ನದ ಸಾಲ ವಿತರಣೆಯ ಪ್ರಸ್ತುತ ನಿಯಮಗಳಲ್ಲಿ ಹಲವಾರು ಸಮಸ್ಯೆಗಳಿದ್ದು, ಇದನ್ನು ತಪ್ಪಿಸಲು ಅರ್‌ಬಿಐ ಈ ಕ್ರಮಕ್ಕೆ ಮುಂದಾಗಿದೆ. ಈ ಮೂಲಕ ಸಾಲದ ಅವಧಿಯನ್ನು ದೀರ್ಘ ಸಮಯಕ್ಕೆ ಕೊಂಡುಹೋಗುವುದನ್ನು ತಪ್ಪಿಸಿ, ಪಾರದರ್ಶಕ ರೀತಿಯಲ್ಲಿ ಕೊಡು ಕೊಳ್ಳುವಿಕೆಗೆ ಆರ್‌ಬಿಐ ಹೆಚ್ಚಿನ ಗಮನ ಹರಿಸಿದೆ. ಸದ್ಯ ಅಸ್ತಿತ್ವದಲ್ಲಿರುವ ಚಿನ್ನದ ಸಾಲದ ನಿಯಮಗಳಲ್ಲಿನ ಸಮಸ್ಯೆಗಳನ್ನು ಎತ್ತಿತೋರಿಸುತ್ತಿದ್ದು, ಪರಿಣಾಮ ಸದ್ಯ ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾ (RBI)ವು ಇದರತ್ತ ನಿಗಾ ಇರಿಸಲು ಮುಂದಾಗಿದೆ ಎನ್ನಲಾಗಿದೆ. ಚಿನ್ನದ ಸಾಲಗಳ ಸೋರ್ಸಿಂಗ್ ಮತ್ತು ಮೌಲ್ಯಮಾಪನ, ಸರಿಯಾದ ಶ್ರದ್ಧೆ, ನಿಧಿಯ ಅಂತಿಮ ಬಳಕೆಯನ್ನು ಮೇಲ್ವಿಚಾರಣೆ ಮಾಡುವುದು ಮತ್ತು ಹರಾಜಿನ ಸಮಯದಲ್ಲಿ ಪಾರದರ್ಶಕತೆಯನ್ನು ಕಾಪಾಡಿಕೊಳ್ಳುವುದು ಸೇರಿದಂತೆ ಅನೇಕ ಕ್ಷೇತ್ರಗಳಲ್ಲಿನ ಸಮಸ್ಯೆಗಳನ್ನು ರಿಸರ್ವ್‌ ಬ್ಯಾಂಕ್ ಗುರುತಿಸಿದೆ.

ಹೊಸ ನಿಯಮದಲ್ಲೇನಿದೆ?

ಇನ್ನು ಪ್ರಸ್ತಾವಿತ ಹೊಸ ನಿಯಮದಲ್ಲಿ ಹಲವು ವಿಚಾರಗಳು ಅಡಕವಾಗಿದೆ. ನೂತನ ನಿಯಮದ ಪ್ರಕಾರ, ಸಾಲಗಾರರು ಸಾಲದ ಅವಧಿಯ ಪ್ರಾರಂಭದಿಂದ ಸಮಾನ ಮಾಸಿಕ ಕಂತುಗಳ ಮೂಲಕ ಅಸಲು ಮತ್ತು ಬಡ್ಡಿ ಎರಡನ್ನೂ ಮರುಪಾವತಿಸಲಿದ್ದಾರೆ. ಈ ಹಿಂದೆ ಸಾಮಾನ್ಯವಾಗಿ ಬಳಸಲಾಗುತ್ತಿದ್ದ ಬುಲೆಟ್ ಮರುಪಾವತಿ ವಿಧಾನವನ್ನು ಬದಲಿಸುವ ಮೂಲಕ ಸಾಲದಾತರು ಚಿನ್ನದ ಸಾಲಗಳನ್ನು ಟರ್ಮ್ ಲೋನ್‌ಗಳಾಗಿ ನೀಡಲು ಪರಿಗಣಿಸುತ್ತಿದ್ದಾರೆ. ಅದೂ ಅಲ್ಲದೆ ಸಾಮಾನ್ಯವಾಗಿ ಚಿನ್ನದ ಮೇಲಿನ ಸಾಲದ ವ್ಯವಸ್ಥೆಯಲ್ಲಿ ಸಾಲಗಾರರಿಗೆ ಸಾಲದ ಅವಧಿಯ ಕೊನೆಯಲ್ಲಿ ಬಡ್ಡಿ ಸೇರಿದಂತೆ ಸಂಪೂರ್ಣ ಮೊತ್ತವನ್ನು ಪಾವತಿಸಬೇಕಿದೆ. ಅದರಲ್ಲೂ ಮೆಚ್ಯೂರಿಟಿಯ ಮೊದಲು ಒಟ್ಟು ಮೊತ್ತವನ್ನು ಇತ್ಯರ್ಥಪಡಿಸುವವರೆಗೆ ಭಾಗಶಃ ಪಾವತಿಗಳನ್ನು ಸಹ ಇದರಲ್ಲಿ ಅನುಮತಿಸಲಾಗಿದೆ. ಇದರ ಹೊರತಾಗಿಯೂ ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾ (RBI)ವು ಈ ವಿಧಾನದಲ್ಲಿ ಡೀಫಾಲ್ಟ್‌ಗಳು ಮತ್ತು ಅಕ್ರಮಗಳ ಅಪಾಯಗಳನ್ನು ಕೂಡ ಇದರಲ್ಲಿ ಬೊಟ್ಟು ಮಾಡಿದೆ.

ಆರ್‌ಬಿಐ ಸುತ್ತೋಲೆಯಲ್ಲಿ ಏನಿದೆ?

ಇನ್ನು ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾ (RBI)ವು ಸೆಪ್ಟೆಂಬರ್ 30 ರ ತನ್ನ ಸುತ್ತೋಲೆಯಲ್ಲಿ ಚಿನ್ನದ ಸಾಲಗಳಲ್ಲಿ ಮೂಲ, ಮೌಲ್ಯ ಮತ್ತು ಮೇಲ್ವಿಚಾರಣೆಯಲ್ಲಿ ನ್ಯೂನತೆಗಳನ್ನು ಎತ್ತಿ ತೋರಿಸಿದೆ. ಅಲ್ಲದೆ ಆರ್‌ಬಿಐಯು ಸಾಲ-ಟು-ಮೌಲ್ಯ (LTV) ಅನುಪಾತಗಳು, ಹರಾಜಿನಲ್ಲಿ ಪಾರದರ್ಶಕತೆ ಮತ್ತು ಅಪಾಯದ ಮೌಲ್ಯಮಾಪನಗಳೊಂದಿಗೆ ಮುಂತಾದ ಸಮಸ್ಯೆಗಳನ್ನು ಎತ್ತಿ ತೋರಿಸಿದೆ. ಹೆಚ್ಚುವರಿಯಾಗಿ ಭಾಗಶಃ ಪಾವತಿಗಳೊಂದಿಗೆ ಸಾಲಗಳನ್ನು ರೋಲಿಂಗ್ ಮಾಡುವುದು ಸಮಸ್ಯಾತ್ಮಕವಾಗಿದೆ ಎಂದು ಉಲ್ಲೇಖಿಸಿದೆ. ಚಿನ್ನದ ಮೇಲಾಧಾರದ ಮೇಲೆ ಮಾತ್ರ ಅವಲಂಬಿತರಾಗುವ ಬದಲು ಸಾಲಗಾರರ ಮರುಪಾವತಿ ಸಾಮರ್ಥ್ಯವನ್ನು ಮೌಲ್ಯಮಾಪನ ಮಾಡಲು ಸಾಲದಾತರನ್ನು ಆರ್‌ಬಿಐ ಒತ್ತಾಯಿಸಿದೆ. ಸಾಲದಾತರು ಒತ್ತೆ ಇಟ್ಟ ಚಿನ್ನದ ಮೌಲ್ಯವನ್ನು ಮಾತ್ರ ಅವಲಂಬಿಸಿರುವ ಬದಲು ಸಾಲಗಾರರ ಮರುಪಾವತಿ ಸಾಮರ್ಥ್ಯದ ಮೇಲೆ ಕೇಂದ್ರೀಕರಿಸಬೇಕೆಂದು ಆರ್‌ಬಿಐ ಬಯಸುತ್ತದೆ ಎಂದು ಹಿರಿಯ ಬ್ಯಾಂಕ್‌ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಚಿನ್ನದ ಸಾಲದ ಬೇಡಿಕೆಯಲ್ಲಿ ಏರಿಕೆ

ಎಲ್ಲರಿಗೂ ತಿಳಿದಿರುವಂತೆ ಭಾರತದಲ್ಲಿ ಚಿನ್ನದ ಮೇಲೆ ಸಾಲ ಪಡೆಯುವವರ ಸಂಖ್ಯೆ ತೀವ್ರವಾಗಿ ಹೆಚ್ಚುತ್ತಿದೆ. ಆದರೆ ಕೆಲವೊಂದು ಹಣಕಾಸಿನ ಸಂಸ್ಥೆಗಳು ಇದನ್ನೇ ಬಂಡವಾಳ ಮಾಡಿಕೊಂಡು ಬಡಕುಟುಂಬಗಳನ್ನು ಶೋಷಿಸುತ್ತಾರೆ ಎಂಬ ಆರೋಪಗಳು ಕೇಳಿಬಂದಿರುವ ಹಿನ್ನೆಲೆಯಲ್ಲಿ ಸದ್ಯ ಆರ್‌ಬಿಐ ಕ್ರಮಕ್ಕೆ ಮುಂದಾಗಿದೆ. ಬ್ಯಾಂಕುಗಳು ಮತ್ತು ಎನ್‌ಬಿಎಫ್‌ಸಿಗಳು ಸೆಪ್ಟೆಂಬರ್ 30 ರ ಹೊತ್ತಿಗೆ ಆಭರಣಗಳ ಮೇಲೆ 1.4 ಲಕ್ಷ ಕೋಟಿ ರೂಪಾಯಿ ಸಾಲವನ್ನು ವಿತರಿಸಿವೆ. ಇದು ವರ್ಷದಿಂದ ವರ್ಷಕ್ಕೆ ಶೇಕಡಾ 51 ರಷ್ಟು ಹೆಚ್ಚಳವಾಗಿದೆ. ಈ ಏರಿಕೆಯು ಹೆಚ್ಚಿನ ಚಿನ್ನದ ಬೆಲೆಗಳಿಗೆ ಕಾರಣವಾಗಿದೆ, ಇದು ಸಾಲಗಾರರಿಗೆ ಅಸ್ತಿತ್ವದಲ್ಲಿರುವ ಸಾಲಗಳ ಮೇಲೆ ಹೆಚ್ಚುವರಿ ಟಾಪ್-ಅಪ್‌ಗಳನ್ನು ಪಡೆಯಲು ಅವಕಾಶ ಮಾಡಿಕೊಟ್ಟಿದೆ. ಇದಲ್ಲದೆ. ಅಲ್ಲದೆ ಅಸುರಕ್ಷಿತ ಮತ್ತು ಕಿರುಬಂಡವಾಳ ಸಾಲಗಳ ಸೀಮಿತ ಲಭ್ಯತೆಯು ಹೆಚ್ಚಿನ ಸಾಲಗಾರರನ್ನು ಚಿನ್ನದ ಸಾಲಗಳತ್ತ ಪ್ರೇರೇಪಿಸಿದೆ.