ಶೀಘ್ರದಲ್ಲೇ ಭಾರತದಾದ್ಯಂತ 4G ಸೇವೆಗಳನ್ನು ಪ್ರಾರಂಭಿಸಲಿದೆ ಬಿಎಸ್‌ಎನ್‌ಎಲ್‌

ನವದೆಹಲಿ, ಮೇ 7: ಅಧಿಕೃತ ಮೂಲಗಳ ಪ್ರಕಾರ, ಸರ್ಕಾರಿ ಸ್ವಾಮ್ಯದ ಬಿಎಸ್‌ಎನ್‌ಎಲ್‌ (BSNL) ಕೇಂದ್ರದ "ಆತ್ಮನಿರ್ಭರ್" ನೀತಿಗೆ ಅನುಗುಣವಾಗಿ ಸಂಪೂರ್ಣ ಸ್ವದೇಶಿ ತಂತ್ರಜ್ಞಾನವನ್ನು ಬಳಸಿಕೊಂಡು ಆಗಸ್ಟ್‌ನಿಂದ ದೇಶಾದ್ಯಂತ 4G ಸೇವೆಗಳನ್ನು ಪ್ರಾರಂಭಿಸಲಿದೆ ಎಂದು ತಿಳಿದು ಬಂದಿದೆ.

ಬಿಎಸ್‌ಎನ್‌ಎಲ್‌ ಅಧಿಕಾರಿಗಳು 4G ನೆಟ್‌ವರ್ಕ್‌ನಲ್ಲಿ ಸೆಕೆಂಡಿಗೆ 40-45 ಮೆಗಾಬಿಟ್ ಗರಿಷ್ಠ ವೇಗವನ್ನು ದಾಖಲಿಸಿದ್ದಾರೆ ಎಂದು ಹೇಳಿಕೊಂಡಿದ್ದಾರೆ, ಇದನ್ನು 700 ಮೆಗಾಹರ್ಟ್ಜ್ (Mhz) ಪ್ರೀಮಿಯಂ ಸ್ಪೆಕ್ಟ್ರಮ್ ಬ್ಯಾಂಡ್‌ನಲ್ಲಿ ಮತ್ತು ಪ್ರಾಯೋಗಿಕ ಹಂತದಲ್ಲಿ 2,100 Mhz ಬ್ಯಾಂಡ್‌ನಲ್ಲಿ ಹೊರತಂದಿದೆ.

ಕಂಪನಿಯು ಪಂಜಾಬ್‌ನಲ್ಲಿ ಐಟಿ ಕಂಪನಿ ಟಿಸಿಎಸ್‌ ಮತ್ತು ಸರ್ಕಾರಿ ಟೆಲಿಕಾಂ ಸಂಶೋಧನಾ ಸಂಸ್ಥೆ C-DoT ನೇತೃತ್ವದ ಒಕ್ಕೂಟದಿಂದ ಸ್ಥಳೀಯವಾಗಿ ಅಭಿವೃದ್ಧಿಪಡಿಸಿದ ತಂತ್ರಜ್ಞಾನವನ್ನು ಬಳಸಿಕೊಂಡು 4G ಸೇವೆಗಳನ್ನು ಹೊರತಂದಿದೆ ಮತ್ತು ಸುಮಾರು 8 ಲಕ್ಷ ಚಂದಾದಾರರನ್ನು ಸೇರ್ಪಡೆ ಮಾಡಿದೆ.

"C-DoT ಅಭಿವೃದ್ಧಿಪಡಿಸಿದ 4G ಕೋರ್ ಪಂಜಾಬ್‌ನ ಬಿಎಸ್‌ಎನ್‌ಎಲ್‌ ನೆಟ್‌ವರ್ಕ್‌ನಲ್ಲಿ ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿದೆ. ಇದನ್ನು ಕಳೆದ ವರ್ಷ ಜುಲೈನಲ್ಲಿ ಸ್ಥಾಪಿಸಲಾಗಿದೆ. ಅಂತಹ ಸಂಕೀರ್ಣ ತಂತ್ರಜ್ಞಾನದ ಯಶಸ್ಸನ್ನು ಸಾಬೀತುಪಡಿಸಲು 12 ತಿಂಗಳುಗಳನ್ನು ತೆಗೆದುಕೊಳ್ಳುತ್ತದೆ. ಆದರೆ C-DoT ಕೋರ್ 10 ರೊಳಗೆ ಸ್ಥಿರವಾಗಿದೆ. ಬಿಎಸ್‌ಎನ್‌ಎಲ್‌ ದೇಶಾದ್ಯಂತ ಆತ್ಮನಿರ್ಭರ್ 4G ತಂತ್ರಜ್ಞಾನವನ್ನು ಪ್ರಾರಂಭಿಸುತ್ತದೆ" ಎಂದು ಅಧಿಕಾರಿಯೊಬ್ಬರು ಪಿಟಿಐಗೆ ತಿಳಿಸಿದ್ದಾರೆ.

ಕೋರ್ ನೆಟ್ವರ್ಕ್ ಎನ್ನುವುದು ನೆಟ್‌ವರ್ಕ್ ಹಾರ್ಡ್‌ವೇರ್, ಸಾಧನಗಳು ಮತ್ತು ಸಾಫ್ಟ್‌ವೇರ್‌ಗಳ ಸಂಗ್ರಹವಾಗಿದ್ದು, ಅದು ದೂರಸಂಪರ್ಕ ನೆಟ್‌ವರ್ಕ್‌ನಲ್ಲಿ ಮೂಲಭೂತ ಸೇವೆಗಳನ್ನು ಒದಗಿಸುತ್ತದೆ. ಟೆಲಿಕಾಂ ನಿಯಂತ್ರಕ ಟ್ರಾಯ್ ಇತ್ತೀಚಿನ ಪ್ರಕಟಣೆಯಲ್ಲಿ ಒಟ್ಟುಗೂಡುವಿಕೆ, ಕರೆ ನಿಯಂತ್ರಣ, ಸ್ವಿಚಿಂಗ್, ದೃಢೀಕರಣ, ಚಾರ್ಜಿಂಗ್, ಗೇಟ್‌ವೇ ಕಾರ್ಯನಿರ್ವಹಣೆ ಇತ್ಯಾದಿಗಳ ಕಾರ್ಯವನ್ನು ಒದಗಿಸುವ ನೆಟ್‌ವರ್ಕ್‌ನ ಭಾಗವಾಗಿ ಕೋರ್ ಅನ್ನು ವಿವರಿಸಿದೆ.

TCS, Tejas Networks ಮತ್ತು ಸರ್ಕಾರಿ ಸ್ವಾಮ್ಯದ ITI ಗಳು 5G ಗೆ ಅಪ್‌ಗ್ರೇಡ್ ಮಾಡಬಹುದಾದ 4G ನೆಟ್‌ವರ್ಕ್ ಅನ್ನು ನಿಯೋಜಿಸಲು BSNL ನಿಂದ ಸುಮಾರು 19,000 ಕೋಟಿ ಮೌಲ್ಯದ ಆರ್ಡರ್‌ಗಳನ್ನು ಪಡೆದುಕೊಂಡಿವೆ. ಇತ್ತೀಚಿನ ಗಳಿಕೆಯ ವರದಿಯಲ್ಲಿ, ತೇಜಸ್ ನೆಟ್‌ವರ್ಕ್‌ನ ಕಾರ್ಯನಿರ್ವಾಹಕ ನಿರ್ದೇಶಕ ಮತ್ತು ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಅರ್ನೋಬ್ ರಾಯ್ ಅವರು ಬಿಎಸ್‌ಎನ್‌ಎಲ್‌ನ ಮೊಬೈಲ್ ನೆಟ್‌ವರ್ಕ್ ಅನ್ನು ವಲಯಗಳಾದ್ಯಂತ ನಿಯೋಜಿಸಲಾಗುತ್ತಿದೆ ಎಂದು ಹೇಳಿದರು.

ಬಿಎಸ್‌ಎನ್‌ಎಲ್ ನೆಟ್‌ವರ್ಕ್‌ನಲ್ಲಿ ಸಿ-ಡಾಟ್ ಕೋರ್ ಲಭ್ಯವಿಲ್ಲದಿದ್ದರೆ, ಉಪಕರಣಗಳು ಅಸ್ತಿತ್ವದಲ್ಲಿರುವ ಕೋರ್‌ಗೆ ಸಂಯೋಜನೆಗೊಳ್ಳುತ್ತಿವೆ. BSNL ಭಾರತದಾದ್ಯಂತ 4G ಮತ್ತು 5G ಸೇವೆಗಳಿಗಾಗಿ 1.12 ಲಕ್ಷ ಟವರ್‌ಗಳನ್ನು ನಿಯೋಜಿಸುವ ಪ್ರಕ್ರಿಯೆಯಲ್ಲಿದೆ.

"ಕಂಪನಿಯು ದೇಶಾದ್ಯಂತ 4G ಸೇವೆಗಾಗಿ 9,000 ಟವರ್‌ಗಳನ್ನು ಸ್ಥಾಪಿಸಿದೆ, ಅವುಗಳಲ್ಲಿ 6,000 ಕ್ಕೂ ಹೆಚ್ಚು ಪಂಜಾಬ್, ಹಿಮಾಚಲ ಪ್ರದೇಶ, ಯುಪಿ ಪಶ್ಚಿಮ ಮತ್ತು ಹರಿಯಾಣ ವೃತ್ತಗಳಲ್ಲಿ ಸಕ್ರಿಯವಾಗಿವೆ. BSNL ಕಳೆದ 4-5 ವರ್ಷಗಳಿಂದ 4G ಸಾಮರ್ಥ್ಯದ ಸಿಮ್ ಅನ್ನು ಮಾತ್ರ ಮಾರಾಟ ಮಾಡುತ್ತಿದೆ. ಹಳೆಯ ಸಿಮ್ ಹೊಂದಿರುವ ಗ್ರಾಹಕರು ಮಾತ್ರ ಸೇವೆಯನ್ನು ಅನುಭವಿಸಲು ಹೊಸ ಸಿಮ್ ಅನ್ನು ಪಡೆಯಬೇಕಾಗುತ್ತದೆ" ಎಂದು BSNL ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.