Children’s Day 2025: ಮಕ್ಕಳ ದಿನಾಚರಣೆಯ ಮಹತ್ವ ಹಾಗೂ ಆಚರಣೆ...ಚಾಚಾ ನೆಹರೂ ಅವರ ತತ್ವ ಸಿದ್ಧಾಂತಗಳೊಂದಿಗೆ!

ಭಾರತದಲ್ಲಿ ಪ್ರತಿ ವರ್ಷ ನವೆಂಬರ್ 14 ರಂದು ಮಕ್ಕಳ ದಿನಾಚರಣೆಯನ್ನು ಆಚರಿಸಲಾಗುತ್ತದೆ. ಈ ದಿನವನ್ನು ಭಾರತದ ಮೊದಲ ಪ್ರಧಾನಿ ಜವಾಹರಲಾಲ್ ನೆಹರೂ ಅವರ ಜನ್ಮದಿನದ ನಿಮಿತ್ತ ಆಚರಿಸಲಾಗುತ್ತದೆ. ಮಕ್ಕಳನ್ನು ತುಂಬಾ ಪ್ರೀತಿಸಿದ್ದರಿಂದ ಜನರು ಅವರನ್ನು ಆತ್ಮೀಯವಾಗಿ 'ಚಾಚಾ ನೆಹರೂ' ಎಂದು ಕರೆಯುತ್ತಿದ್ದರು. ಮಕ್ಕಳ ಹಕ್ಕುಗಳು, ಶಿಕ್ಷಣ ಮತ್ತು ಅವರ ಬೆಳವಣಿಗೆಗೆ ಸಮಾಜದಲ್ಲಿ ಸೂಕ್ತ ಮಹತ್ವ ಸಿಗಬೇಕೆಂಬ ಅರಿವು ಮೂಡಿಸುವುದು ಈ ದಿನದ ಮುಖ್ಯ ಉದ್ದೇಶ.

ನೆಹರೂ ಅವರ ಸೇವೆ, ಪ್ರೀತಿ ಮತ್ತು ದೂರದೃಷ್ಟಿಯನ್ನು ಸ್ಮರಿಸುವ ನಿಟ್ಟಿನಲ್ಲಿ ದೇಶಾದ್ಯಂತ ಶಾಲೆಗಳು ವಿವಿಧ ಕಾರ್ಯಕ್ರಮಗಳನ್ನು ಆಯೋಜಿಸುತ್ತವೆ. ಅನೇಕ ವಿದ್ಯಾರ್ಥಿಗಳು ನೆಹರೂ ಅವರ ಉಡುಪಿನ ಶೈಲಿಯನ್ನು ಅನುಕರಿಸಿ, ನೆಹರೂ ಜಾಕೆಟ್ ಮತ್ತು ಗಾಂಧಿ ಟೋಪಿ ಧರಿಸಿ ಆಚರಣೆಗಳಲ್ಲಿ ಪಾಲ್ಗೊಳ್ಳುವುದು ವಿಶೇಷ.

ಜವಾಹರಲಾಲ್ ನೆಹರೂ 1889 ರ ನವೆಂಬರ್ 14 ರಂದು ಜನಿಸಿ, ಸ್ವಾತಂತ್ರ್ಯ ಹೋರಾಟದಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಸ್ವತಂತ್ರ ಭಾರತದ ಮೊದಲ ಪ್ರಧಾನಿಯಾಗಿ, ಸಮಾಜವಾದ, ಪ್ರಜಾಪ್ರಭುತ್ವ ಮತ್ತು ಜಾತ್ಯತೀತತೆಯ ಮೌಲ್ಯಗಳನ್ನು ಬಲವಾಗಿ ಬೆಂಬಲಿಸಿದರು. ಕೈಗಾರಿಕೆ, ವಿಜ್ಞಾನ, ಶಿಕ್ಷಣ ಮತ್ತು ತಂತ್ರಜ್ಞಾನ ಕ್ಷೇತ್ರಗಳಲ್ಲಿ ಭಾರತಕ್ಕೆ ಬಲಿಷ್ಠ ಆಧಾರ ಕಟ್ಟಿದ ನಾಯಕರಲ್ಲಿ ಅವರು ಪ್ರಮುಖರು.

ಭಾರತದಲ್ಲಿ ಮಕ್ಕಳ ದಿನಾಚರಣೆಯನ್ನು ಮೊದಲ ಬಾರಿ 1954ರಲ್ಲಿ ಆಚರಿಸಲಾಯಿತು. ನಂತರ, 1957ರಲ್ಲಿ ಸರ್ಕಾರ ಅಧಿಕೃತವಾಗಿ ನವೆಂಬರ್ 14 ಅನ್ನು 'ಬಾಲ್ ದಿವಸ್' ಎಂದು ಘೋಷಿಸಿತು. ನೆಹರೂ ಅವರ ಗೌರವಾರ್ಥವಾಗಿ ಅಂಚೆ ಇಲಾಖೆ ವಿಶೇಷ ಅಂಚೆ ಲಕೋಟೆಗಳು ಮತ್ತು ಸ್ಮರಣಾರ್ಥ ಅಂಚೆಚೀಟಿಗಳನ್ನು ಬಿಡುಗಡೆಯೂ ಮಾಡಿತು.

ಮಕ್ಕಳ ದಿನದಂದು ಶಾಲೆಗಳಲ್ಲಿ ಆಟಗಳು, ಕ್ರೀಡಾ ಸ್ಪರ್ಧೆಗಳು, ಸಾಂಸ್ಕೃತಿಕ ಕಾರ್ಯಕ್ರಮಗಳು, ಭಾಷಣಗಳು ಮತ್ತು ಮನರಂಜನಾ ಕಾರ್ಯಕ್ರಮಗಳು ಆಯೋಜಿಸಲಾಗುತ್ತವೆ. ನೆಹರೂ ಅವರ ಮಾತುಗಳು ಮತ್ತು ಸಂದೇಶಗಳನ್ನು ಮಕ್ಕಳು ಮತ್ತು ಶಿಕ್ಷಕರು ನೆನಪಿಸಿಕೊಂಡು ಭವಿಷ್ಯದತ್ತ ಪ್ರೇರಣೆಯೊಂದಿಗೆ ನಡೆದುಕೊಳ್ಳುತ್ತಾರೆ. "ಮಕ್ಕಳು ದೇಶದ ನಾಳೆ" ಎಂಬ ನೆಹರೂ ಅವರ ಸಂದೇಶವನ್ನು ಈ ದಿನ ವಿಶೇಷವಾಗಿ ಹಂಚಿಕೊಳ್ಳಲಾಗುತ್ತದೆ.

ನೆಹರೂ ಅವರ ಸ್ಫೂರ್ತಿದಾಯಕ ಚಿಂತನೆಗಳು:

- "ಮಕ್ಕಳು ಉದ್ಯಾನದಲ್ಲಿನ ಮುಕುಳಗಳಂತೆ, ಅವರನ್ನು ಪ್ರೀತಿಯಿಂದ ಪೋಷಿಸಬೇಕು."
- "ಇಂದಿನ ಮಕ್ಕಳು ನಾಳಿನ ಭಾರತವನ್ನು ರೂಪಿಸುತ್ತಾರೆ."
- "ಸರಿಯಾದ ಶಿಕ್ಷಣವಿಲ್ಲದೆ ಸಮಾಜದಲ್ಲಿ ಸಮಾನತೆ ಸಾಧಿಸಲು ಸಾಧ್ಯವಿಲ್ಲ."
- "ನಮ್ಮ ಬುದ್ದಿವಂತಿಕೆ ಮತ್ತು ಮನುಷ್ಯತ್ವ ಎರಡೂ ಅಗತ್ಯ."
- "ಸತ್ಯವು ಯಾರಿಗೆ ಇಷ್ಟವಿರಲಿ ಇಲ್ಲದಿರಲಿ, ಅದು ಸತ್ಯವೇ."
- "ಜಗತ್ತು ಸೌಂದರ್ಯ ಮತ್ತು ಸಾಹಸಗಳಿಂದ ತುಂಬಿದೆ, ಅದನ್ನು ಕಂಡುಕೊಳ್ಳಲು ನಾವು ಕಲಿಯಬೇಕು."

ಮಕ್ಕಳ ದಿನಾಚರಣೆ ಮಕ್ಕಳು ಸಂತೋಷ, ನಗು ಮತ್ತು ಹೊಸ ಕನಸುಗಳಿಂದ ತುಂಬಿಕೊಳ್ಳುವ ಕ್ಷಣ. ನಮ್ಮ ಮನೆಯ, ಸಮಾಜದ ಮತ್ತು ದೇಶದ ಭವಿಷ್ಯವಾದ ಮಕ್ಕಳಿಗೆ ಈ ದಿನದಲ್ಲಿ ಹಾರ್ದಿಕ ಶುಭಾಶಯಗಳು. ಅವರು ತಮ್ಮ ಕನಸುಗಳನ್ನು ಹುಮ್ಮಸ್ಸಿನಿಂದ ಬೆನ್ನಟ್ಟಲಿ, ಬೆಳೆಯಲಿ, ಮತ್ತು ಭಾರತದ ಭವಿಷ್ಯವನ್ನು ಗರಿಷ್ಠ ಎತ್ತರಕ್ಕೆ ಕೊಂಡೊಯ್ಯಲಿ.