ಜಿಯೋ, ಏರ್‌ಟೆಲ್‌ಗೆ ಠಕ್ಕರ್: ಬಿಎಸ್​ಎನ್​ಎಲ್‌ನಿಂದ 3300GB ಡೇಟಾ ಪ್ಲ್ಯಾನ್ ಬೆಲೆಯಲ್ಲಿ ಮತ್ತೆ ಕಡಿತ!

ಬೆಂಗಳೂರು, ಆಗಸ್ಟ್‌ 13: ಸರ್ಕಾರಿ ಸ್ವಾಮ್ಯದ ಭಾರತ್ ಸಂಚಾರ್ ನಿಗಮ್ ಲಿಮಿಟೆಡ್ (ಬಿಎಸ್​ಎನ್​ಎಲ್) ಭಾರತೀಯ ಟೆಲಿಕಾಂ ಮಾರುಕಟ್ಟೆಗೆ ಭರ್ಜರಿಯಾಗಿ ರೀಎಂಟ್ರಿ ಕೊಡಲು ಸಿದ್ದವಾಗಿದೆ. ರಿಲಾಯನ್ಸ್ ಜಿಯೋ, ಏರ್ ಟೆಲ್ ಮತ್ತು ವೊಡಾಫೋನ್ ಐಡಿಯಾ ಸಂಸ್ಥೆಗಳು ಬೆಲೆಗಳನ್ನು ತೀವ್ರವಾಗಿ ಹೆಚ್ಚಳ ಮಾಡಿದ ನಂತರ BSNL ಜನಪ್ರಿಯತೆಯು ಏಕಾಏಕಿ ಏರಿಕೆ ಕಂಡಿದ್ದು, ಆಕರ್ಷಕ ದರ ಭರ್ಜರಿ ರೀಚಾರ್ಜ್ ಪ್ಲಾನ್​ಗಳು ಬಳಕೆದಾರರನ್ನು ಆಕರ್ಷಿಸುತ್ತಿದೆ.

ಬಿಎಸ್​ಎನ್​ಎಲ್ ಈಗಾಗಲೇ ಕೈಗೆಟುಕುವ ಬೆಲೆಯ ರೀಚಾರ್ಜ್ ಯೋಜನೆಗಳ ಸಿರೀಸ್ ಪ್ರಾರಂಭಿಸಿದ್ದು, ಇದರ ಕಾರ್ಯತಂತ್ರ ಈಗಾಗಲೇ ಪ್ರಾರಂಭಿಸಿದ್ದು ಇದು ಗ್ರಾಹಕರನ್ನು ತನ್ನತ್ತ ಸೆಳೆಯುವಲ್ಲಿ ಮತ್ತು ಆದ್ಯತೆಗಳಲ್ಲಿ ಗಮನಾರ್ಹ ಬದಲಾವಣೆಗೆ ಕಾರಣವಾಗುತ್ತದೆ.

ಖಾಸಗಿ ಟೆಲಿಕಾಂ ಆಪರೇಟರ್‌ಗಳ ರೀಚಾರ್ಜ್ ಪ್ಲ್ಯಾನ್ ಗಳ ಬೆಲೆ ಏರಿಕೆಯಿಂದ BSNL ನ ಗ್ರಾಹಕರ ಸಂಖ್ಯೆಯಲ್ಲಿ ಗಮನಾರ್ಹ ಹೆಚ್ಚಳ ಕಂಡು ಬಂದಿದ್ದು, ಹೆಚ್ಚಿನ ಗ್ರಾಹಕರು ಕೈಗೆಟಕುವ ಆಯ್ಕೆಗಳನ್ನು ಹುಡುಕುತ್ತಿರುವ ಕಾರಣ ಭಾರತ್ ಸಂಚಾರ್ ನಿಗಮ್ ಲಿಮಿಟೆಡ್ ಕಡೆ ಮುಖ ಮಾಡಿದ್ದಾರೆ.

ಬಿಎಸ್​ಎನ್​ಎಲ್ ಕೇವಲ ಬಜೆಟ್ ಸ್ನೇಹಿ ರೀಚಾರ್ಜ್ ಯೋಜನೆಗಳ ಮೇಲೆ ಕೇಂದ್ರೀಕರಿಸದೇ 4ಜಿ ಸೇವೆ ಮತ್ತು 5G ನೆಟ್‌ವರ್ಕ್ ಸೇವೆಗಳನ್ನು ನೀಡುವಲ್ಲಿ ಉತ್ಸುಕವಾಗಿದೆ. ಈಗಾಗಲೇ ದೇಶಾದ್ಯಂತ 15,000 ಸೈಟ್‌ಗಳಲ್ಲಿ 4G ನೆಟ್‌ವರ್ಕ್‌ಗಳನ್ನು ಸ್ಥಾಪಿಸಲಾಗಿದ್ದು, ಬಿಎಸ್​ಎನ್​ಎಲ್ ತನ್ನ 4G ಸೇವೆಗಳನ್ನು2024ರ ಆಗಸ್ಟ್ 15ರ ಆಂಧ್ರಪ್ರದೇಶದಲ್ಲಿ ಪ್ರಾರಂಭಿಸಲು ಸಿದ್ಧವಾಗಿದೆ. ಜುಲೈ 2024 ರಲ್ಲಿ 2.17 ಲಕ್ಷಕ್ಕೂ ಹೆಚ್ಚು ಬಳಕೆದಾರರು ಬಿಎಸ್​ಎನ್​ಎಲ್​ನತ್ತ ಮುಖ ಮಾಡಿದ್ದಾರೆ. ಇದು ಆಂಧ್ರಪ್ರದೇಶದ ರಾಜ್ಯದ ಒಟ್ಟು ಗ್ರಾಹಕರ ಸಂಖ್ಯೆಯನ್ನು 40 ಲಕ್ಷಕ್ಕೆ ಹೆಚ್ಚಿಸಿದೆ.

ಇದಲ್ಲದೇ ಹೆಚ್ಚಿನ ಗ್ರಾಹಕರನ್ನು ಆಕರ್ಷಿಸುವ ತನ್ನ ಕಾರ್ಯತಂತ್ರದ ಭಾಗವಾಗಿ, ಬಿಎಸ್​ಎನ್​ಎಲ್ ಇತ್ತೀಚೆಗೆ ತನ್ನ ಜನಪ್ರಿಯ 3300GB ಡೇಟಾ ಪ್ಲ್ಯಾನ್ ಬೆಲೆಯಲ್ಲಿ ಮತ್ತಷ್ಟು ಕಡಿತಗೊಳಿಸಿದೆ. ರೂ.499 ಬೆಲೆಯ ಈ ಪ್ಲ್ಯಾನ್ ರೂ.100 ಕಡಿತಗೊಂಡು ರೂ.399ಕ್ಕೆ ಲಭ್ಯವಿದೆ. ಈ ಬೆಲೆ ಕಡಿತವು ಇಂಟರ್ನೆಟ್ ಬಳಕೆದಾರರನ್ನು ಆಕರ್ಷಿಸಲು ವಿನ್ಯಾಸಗೊಳಿಸಲಾಗಿದ್ದು, ಸಾಕಷ್ಟು ಡೇಟಾವನ್ನು ಅತ್ಯಂತ ಕಡಿಮೆ ಬೆಲೆಯಲ್ಲಿ ನೀಡುತ್ತದೆ. ರೂ 399 ಯೋಜನೆಯು ಗಣನೀಯ ಪ್ರಮಾಣದ ಡೇಟಾವನ್ನು ಒದಗಿಸುವುದಲ್ಲದೆ, ಬಳಕೆದಾರರು ವಿಶ್ವಾಸಾರ್ಹ, ಹೆಚ್ಚಿನ ವೇಗದ ಇಂಟರ್ನೆಟ್ ದೊರೆಯುವಂತೆ ಮಾಡಲು ಸಿದ್ದವಾಗಿದೆ.

ಬಿಎಸ್​ಎನ್​ಎಲ್​ಗೆ ಪೋರ್ಟ್ ಆಗುವುದು ಹೇಗೆ?

ಇತರ ಟೆಲಿಕಾಂ ಬಳಕೆದಾರರು ಬಿಎಸ್​ಎನ್​ಎಲ್​ ನಿಂದ ವರ್ಗಾವಣೆ ಅಥವಾ ಪೋರ್ಟ್ ಆಗುವುದು ಸುಲಭ. ಬಿಎಸ್​ಎನ್​ಎಲ್​ಗೆ ಹೇಗೆ ಪೋರ್ಟ್ ಆಗಲು ನೀವು ನಿಮ್ಮ ಮೊಬೈಲ್​ನಿಂದ 'Port ' ಟೈಪ್ ಮಾಡಿ 1900 ಸಂಖ್ಯೆಗೆ ಎಸ್ಸೆಮ್ಮೆಸ್ ಸಂದೇಶ ಕಳುಹಿಸಬೇಕು. ಈ ಸಂದರ್ಭ ನಿಮಗೆ ಯುಪಿಸಿ ನಂಬರ್ ಅಥವಾ ಯೂನಿಕ್ ಪೋರ್ಟಿಂಗ್ ಕೋಡ್ ಸಿಗುತ್ತದೆ. ಈ ಕೋಡ್ 15 ದಿನ ವ್ಯಾಲಿಡಿಟಿ ಇರುತ್ತದೆ. ನೀವು ಯಾವುದೇ ಬಿಎಸ್​ಎನ್​ಎಲ್ ಕಸ್ಟಮರ್ ಸರ್ವಿಸ್ ಸೆಂಟರ್ ಅಥವಾ ಅಧಿಕೃತ ಬಿಎಸ್​ಎನ್​ಎಲ್ ಫ್ರಾಂಚೈಸಿಗೆ ಹೋಗಿ ಅಲ್ಲಿ ಅರ್ಜಿ ತುಂಬಿಸಿಬೇಕು. ಆಗ ಅಲ್ಲಿರುವ ಆಪರೇಟರ್​ಗಳು ನಿಮ್ಮ ನಂಬರ್ ಅನ್ನು ಹೊಸ ಸಿಮ್​ಗೆ ಪೋರ್ಟ್ ಮಾಡಿಕೊಡುತ್ತಾರೆ.