ಬಜೆಟ್ ಪೂರ್ವವಾಗಿ ಪ್ರಮುಖರ ಜತೆಗಿನ ಸಭೆ ಡಿ. 14ರಿಂದ ಆರಂಭ

ಪ್ರತಿ ವರ್ಷದ ಬಜೆಟ್ ಮುಂಚಿತವಾಗಿ ನಡೆಯುವ ಪ್ರಕ್ರಿಯೆಯ ಭಾಗವಾಗಿ, 2021- 22ನೇ ಸಾಲಿನ ಬಜೆಟ್ ಗೆ ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಸೋಮವಾರದಂದು (ಡಿಸೆಂಬರ್ 14, 2020) ವಿವಿಧ ವಲಯದ ಪ್ರಮುಖರ ಜತೆಯಲ್ಲಿ ಸಭೆ ಆರಂಭ ಮಾಡಲಿದ್ದಾರೆ. ಈ ವರ್ಚುವಲ್ ಸಭೆಗಳು ಸೋಮವಾರದಿಂದ ಶುರುವಾಗಲಿವೆ ಎಂದು ಹಣಕಾಸು ಸಚಿವಾಲಯವು ಮಾಹಿತಿ ನೀಡಿದೆ.

ಬಜೆಟ್ ಮುಂ‌ಚಿನ ಸೆಷನ್ ಗಳು ಬೆಳಗ್ಗೆ ಹಾಗೂ ಮಧ್ಯಾಹ್ನ ಪ್ರಮುಖ ಉದ್ಯಮಿಗಳ ಜತೆಗೆ ನಡೆಯಲಿವೆ. ಕೊರೊನಾ ಮಧ್ಯೆ, ಹೊಸದಾಗಿ ಇಮೇಲ್ ಸೃಷ್ಟಿಸಿ, ವಿವಿಧ ಸಂಸ್ಥೆಗಳು- ತಜ್ಞರಿಂದ ಮೂಲಕ ಸಲಹೆಗಳನ್ನು ಆಹ್ವಾನಿಸಲು ನಿರ್ಧಾರ ಮಾಡಿತ್ತು. ಆನ್ ಲೈನ್ ಕನ್ಸಲ್ಟೇಷನ್ ಹೆಚ್ಚು ಪ್ರಜಾಪ್ರಭುತ್ವ ರೀತಿಯಲ್ಲೂ ಹಾಗೂ ಸಂವಾದ ಸಾಧ್ಯವಾಗುವಂತೆಯೂ ಮಾಡುವ ಸಲುವಾಗಿ ಬಜೆಟ್ ಐಡಿಯಾಗಳಿಗಾಗಿಯೇ ಮೈಕ್ರೋಸೈಟ್ ಶುರು ಮಾಡಲಾಗಿತ್ತು.

ಈ ಪೋರ್ಟಲ್ ನವೆಂಬರ್ 15ರಿಂದ ನವೆಂಬರ್ 30ರ ತನಕ ಲಭ್ಯವಿತ್ತು. ಈಗ ಮಂಡಿಸಲಿರುವ ಬಜೆಟ್ ಮೋದಿ 2.0 ಹಾಗೂ ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಪಾಲಿನ ಮೂರನೇ ಬಜೆಟ್ ಇದಾಗಿದೆ. ಈ ಪೈಕಿ ಒಂದು ಮಧ್ಯಂತರ ಬಜೆಟ್ ಕೂಡ ಸೇರಿದೆ.

ಈ ಮಧ್ಯೆ, ರಿಸರ್ವ್ ಬ್ಯಾಂಕ್ ಇಂಡಿಯಾ ಗವರ್ನರ್ ಶಕ್ತಿಕಾಂತ ದಾಸ್ ಕಳೆದ ವಾರ ಮಾತನಾಡಿ, ಈ ಬಾರಿಯ ಬಜೆಟ್ ಬೆಳವಣಿಗೆಗೆ ಪೂರಕ ಆಗಿರಲಿದೆ ಎಂದಿದ್ದಾರೆ.