Game of growth: ಫಿನ್‌ಟೆಕ್ ಸ್ಟಾರ್ಟ್-ಅಪ್ ಸ್ಕೈಡೊ..ಗಡಿ ದಾಟಿದ ಪಾವತಿಗಳಿಗಾಗಿ UPI ತರ ಕ್ರಾಂತಿ! ಸಾಧ್ಯವಾಗಿದ್ದೇಗೆ?

ಜಾಗತಿಕ ವ್ಯವಹಾರಗಳ ವಿಸ್ತಾರ ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ಇಂದಿನ ಯುಗದಲ್ಲಿ ಗಡಿ-ದಾಟಿದ ಹಣಕಾಸು ವಹಿವಾಟುಗಳು ಇನ್ನೂ ಕಂಪನಿಗಳಿಗೆ ಸವಾಲಾಗಿವೆ. ಈ ಸವಾಲಿಗೆ ಪರಿಹಾರ ಹುಡುಕುವ ಗುರಿಯಿಂದ ಬೆಂಗಳೂರು ಮೂಲದ ಫಿನ್‌ಟೆಕ್ ಸ್ಟಾರ್ಟಪ್ ಸ್ಕೈಡೋ ಅಂತರರಾಷ್ಟ್ರೀಯ ಪಾವತಿಗಳನ್ನು ಭಾರತೀಯ ಉದ್ಯಮಗಳಿಗೆ ಸುಲಭಗೊಳಿಸಲು ಮುಂದಾಗಿದೆ. ಸ್ಕೈಡೋದ ಸಂಸ್ಥಾಪಕ ಶ್ರೀವತ್ಸನ್ ಶ್ರೀಹರ್ ಇತ್ತೀಚೆಗೆ ನೀಡಿದ ಸಂದರ್ಶನದಲ್ಲಿ ತಮ್ಮ ಉದ್ಯಮಶೀಲತಾ ಪಯಣ, ಅಂತರರಾಷ್ಟ್ರೀಯ ಪಾವತಿಗಳ ಸವಾಲುಗಳು ಹಾಗೂ ಭವಿಷ್ಯದ ದೃಷ್ಟಿಕೋನವನ್ನು ಹಂಚಿಕೊಂಡರು.

ಉದ್ಯಮಶೀಲತೆಯ ಕನಸಿನಿಂದ ಸ್ಕೈಡೋದ ಹುಟ್ಟು:

ಸ್ಕೈಡೋ ಆರಂಭಿಸಲು ಪ್ರೇರಣೆ ಏನು ಎಂದು ಕೇಳಿದಾಗ, ಶ್ರೀಹರ್ ಅವರು ಉದ್ಯಮಿಯಾಗಬೇಕೆಂಬ ಬಲವಾದ ಆಸೆಯೇ ಇದಕ್ಕೆ ಮೂಲ ಕಾರಣವೆಂದು ಹೇಳಿದರು. ಅವರು ಮತ್ತು ಸಹ-ಸಂಸ್ಥಾಪಕರು ಫಿನ್‌ಟೆಕ್ ಕ್ಷೇತ್ರದಲ್ಲಿ ಒಂದು ದೊಡ್ಡ ಸಮಸ್ಯೆಗೆ ತಂತ್ರಜ್ಞಾನ ಆಧಾರಿತ ಪರಿಹಾರವನ್ನು ಹುಡುಕಲು ಬಯಸಿದ್ದರು. ಅಂತರರಾಷ್ಟ್ರೀಯ ಪಾವತಿಗಳ ಸಂಕೀರ್ಣತೆ ಅವರ ಗಮನ ಸೆಳೆಯಿತು. "ಸ್ಥಳೀಯ ಪಾವತಿಗಳಂತೆ ಜಾಗತಿಕ ವಹಿವಾಟುಗಳೂ ಸರಳವಾಗಬೇಕು. ಯುಪಿಐ ರೀತಿಯ ಸುಲಭತೆಗೆ ಅಂತರರಾಷ್ಟ್ರೀಯ ಪಾವತಿಗಳನ್ನು ತಲುಪಿಸಬಹುದೇ ಎಂಬುದೇ ನಮ್ಮ ಆಲೋಚನೆ," ಎಂದು ಅವರು ಹೇಳಿದರು.

ಹಳೆಯ ವ್ಯವಸ್ಥೆಯ ಅಸಮರ್ಥತೆ:

ಅಂತರರಾಷ್ಟ್ರೀಯ ಪಾವತಿಗಳಲ್ಲಿ ಹಳೆಯ ವಿಧಾನಗಳ ತೊಂದರೆಗಳ ಬಗ್ಗೆ ಶ್ರೀಹರ್ ಮಾತನಾಡಿದರು. "ಪಾರಂಪರಿಕ ವೇದಿಕೆಗಳು ಹೆಚ್ಚಾಗಿ ಕ್ರೆಡಿಟ್ ಕಾರ್ಡ್ ವಿಧಾನಗಳನ್ನೇ ಅವಲಂಬಿಸಿವೆ. ಆದರೆ ನಾವು ಜಾಗತಿಕ ಮಟ್ಟದಲ್ಲಿ ಪಾಲುದಾರ ಬ್ಯಾಂಕುಗಳೊಂದಿಗೆ ನೇರ ಬ್ಯಾಂಕ್-ಟು-ಬ್ಯಾಂಕ್ ವರ್ಗಾವಣೆಯ ಮೇಲೆ ಒತ್ತು ನೀಡುತ್ತಿದ್ದೇವೆ. ಇದರಿಂದ ಪಾವತಿಗಳು ವೇಗವಾಗಿ, ಸುಲಭವಾಗಿ ಮತ್ತು ಕಡಿಮೆ ವೆಚ್ಚದಲ್ಲಿ ಪೂರ್ಣಗೊಳ್ಳುತ್ತವೆ. ಸ್ವೀಕರಿಸುವವರಿಗೆ ಹೆಚ್ಚುವರಿ ಪ್ರಕ್ರಿಯೆಗಳೂ ಇಲ್ಲ," ಎಂದು ಅವರು ವಿವರಿಸಿದರು.

ಯುವ ಕಾರ್ಯಪಡೆಯ ಶಕ್ತಿ ಮತ್ತು ಸವಾಲುಗಳು:

ಸ್ಕೈಡೋ ತಂಡದಲ್ಲಿ ಹೆಚ್ಚಿನವರು ಜೆನ್ Z ಯುವಕರು. ಸಂಸ್ಥೆಯ 100ಕ್ಕೂ ಹೆಚ್ಚು ಉದ್ಯೋಗಿಗಳಲ್ಲಿ ಬಹುತೇಕರು ಹೊಸ ಪದವೀಧರರಾಗಿದ್ದು, ಹೊಸ ಆಲೋಚನೆ ಮತ್ತು ಧೈರ್ಯದೊಂದಿಗೆ ಕೆಲಸ ಮಾಡುತ್ತಿದ್ದಾರೆ ಎಂದು ಶ್ರೀಹರ್ ಶ್ಲಾಘಿಸಿದರು. "ಯುವ ಮನಸ್ಸುಗಳು ಉದ್ಯಮದ ಹಳೆಯ ಪೂರ್ವಾಗ್ರಹಗಳಿಂದ ಮುಕ್ತವಾಗಿರುತ್ತವೆ. ಇದರಿಂದ ನಾವು ಹೊಸದನ್ನು ನಿರ್ಮಿಸಲು ಸಾಧ್ಯವಾಗುತ್ತದೆ," ಎಂದು ಅವರು ಹೇಳಿದರು. ಆದರೆ ಗ್ರಾಹಕರು ಮತ್ತು ಬ್ಯಾಂಕ್‌ಗಳ ವೇಳಾಪಟ್ಟಿಯೊಂದಿಗೆ ಅವರನ್ನು ಹೊಂದಿಸುವುದು ಕೆಲವೊಮ್ಮೆ ಸವಾಲಾಗುತ್ತದೆ ಎಂದೂ ಅವರು ಒಪ್ಪಿಕೊಂಡರು.

ನೇಮಕಾತಿ ತತ್ವ ಮತ್ತು ತಂಡ ನಿರ್ಮಾಣ:

ಸ್ಕೈಡೋದಲ್ಲಿ ಉದ್ಯೋಗಿಗಳನ್ನು ಆಯ್ಕೆ ಮಾಡುವಾಗ ಶೈಕ್ಷಣಿಕ ಶ್ರೇಷ್ಠತೆಯಷ್ಟೇ ಅಲ್ಲ, ಶ್ರದ್ಧೆ, ಉಪಕ್ರಮ ಮತ್ತು ಮೂಲಭೂತ ತತ್ವಗಳ ಚಿಂತನೆಗೂ ಹೆಚ್ಚಿನ ಮಹತ್ವ ನೀಡಲಾಗುತ್ತದೆ. "ಉದ್ಯಮಿಗಳು ದೃಷ್ಟಿಕೋನ ನೀಡಬೇಕು, ಉತ್ತಮ ಜನರನ್ನು ನೇಮಿಸಿಕೊಳ್ಳಬೇಕು ಮತ್ತು ತಂಡದ ಕಾರ್ಯಾಚರಣೆಗಳಿಗೆ ಸೂಕ್ತ ವ್ಯವಸ್ಥೆಗಳನ್ನು ನಿರ್ಮಿಸಬೇಕು," ಎಂದು ಶ್ರೀಹರ್ ಅಭಿಪ್ರಾಯಪಟ್ಟರು.

ನಿಧಿ ಸಂಗ್ರಹಣೆ: ಸವಾಲು ಮತ್ತು ಅತಿರಂಜನೆ:

ನಿಧಿ ಸಂಗ್ರಹಣೆ ಕುರಿತು ಶ್ರೀಹರ್ ಮಾತನಾಡಿದಾಗ, ಇದು ಒಂದೆಡೆ ಸವಾಲಾಗಿದ್ದರೆ, ಮತ್ತೊಂದೆಡೆ ಮಾಧ್ಯಮಗಳಲ್ಲಿ ಅತಿಪ್ರಚಾರವಾಗುತ್ತದೆ ಎಂದರು. "ವಾಸ್ತವವಾಗಿ 99% ಸ್ಟಾರ್ಟ್‌ಅಪ್‌ಗಳು ಮೊದಲ ಹೂಡಿಕೆ ಸುತ್ತಿನ ನಂತರ ನಿಧಿ ಸಂಗ್ರಹಣೆ ಮಾಡಲು ವಿಫಲವಾಗುತ್ತವೆ. ಯಶಸ್ವಿ ಕಂಪನಿಗಳಿಗೂ ಹೋರಾಟಗಳಿರುತ್ತವೆ. ಹೂಡಿಕೆದಾರರು ವ್ಯಾಪಕ ದೃಷ್ಟಿಕೋನದಿಂದ ನೋಡುವರೆ, ನಾವು ದಿನನಿತ್ಯದ ಕಾರ್ಯಾಚರಣೆಯ ಸವಾಲುಗಳಲ್ಲಿ ತೊಡಗಿದ್ದೇವೆ," ಎಂದು ಅವರು ಹೇಳಿದರು.

ಜಾಗತಿಕ B2B ಪಾವತಿಗಳ ನಾಯಕತ್ವ:

ಮುಂದಿನ ದಶಕದಲ್ಲಿ ಪಾವತಿಗಳ ಪ್ರಪಂಚ ಸಂಪೂರ್ಣ ಬದಲಾಗಲಿದೆ ಎಂದು ಶ್ರೀಹರ್ ಭಾವಿಸುತ್ತಾರೆ. "ತ್ವರಿತ ಪಾವತಿಗಳು, ಕ್ರಿಪ್ಟೋಕರೆನ್ಸಿಗಳು ಮತ್ತು ಸ್ಟೇಬಲ್‌ಕಾಯಿನ್‌ಗಳು ಮುಖ್ಯವಾಹಿನಿಯಾಗಲಿವೆ. ಆ ಭವಿಷ್ಯವನ್ನು ರೂಪಿಸುವ ಪ್ರಮುಖ ಕಂಪನಿಗಳಲ್ಲಿ ಸ್ಕೈಡೋ ಇರಬೇಕು," ಎಂದು ಅವರು ಕನಸು ಹಂಚಿಕೊಂಡರು. ಪ್ರಸ್ತುತ ಗುರಿ ಭಾರತದಲ್ಲಿ ವಿಸ್ತರಣೆ ಮಾಡುವುದು, ಆಮದು ಮತ್ತು ರಫ್ತು ವ್ಯವಹಾರಗಳಿಗೆ ಉತ್ತಮ ಅನುಭವ ಒದಗಿಸುವುದು ಹಾಗೂ ನಂತರ ಜಾಗತಿಕ ಮಾರುಕಟ್ಟೆಗಳಲ್ಲಿ ಪಾದಾರ್ಪಣೆ ಮಾಡುವುದು. "ಪೇಪಾಲ್ ಅಥವಾ ಸ್ಟ್ರೈಪ್‌ನಂತೆಯೇ ಭಾರತದಿಂದ ಜಗತ್ತಿಗೆ ಸೇವೆ ನೀಡುವ ಪಾವತಿ ಕಂಪನಿಯಾಗಲು ಬಯಸುತ್ತೇವೆ," ಎಂದು ಅವರು ಹೇಳಿದರು.

ಉದ್ಯಮಶೀಲತೆಯ ಪ್ರೇರಣೆ ಮತ್ತು ವೈಯಕ್ತಿಕ ಬೆಳವಣಿಗೆ:

ತಮ್ಮ ಬಾಲ್ಯದ ಅನುಭವ ಹಂಚಿಕೊಳ್ಳುತ್ತಾ, ಚೆನ್ನೈನಲ್ಲಿ ಬೆಳೆದಾಗ ತಮ್ಮ ತಂದೆ ಸ್ವಯಂ ನಿರ್ಮಿತ ಉದ್ಯಮಿಯಾಗಿದ್ದದ್ದು ತಮ್ಮ ಜೀವನದ ಪ್ರಮುಖ ಪ್ರೇರಣೆ ಎಂದು ಶ್ರೀಹರ್ ಹೇಳಿದರು. ಕುಟುಂಬದ ವ್ಯವಹಾರದಲ್ಲಿ ಹಲವು ವರ್ಷಗಳ ಅನುಭವದ ನಂತರ ಅವರು ಬೆಂಗಳೂರಿಗೆ ಬಂದು ಸ್ಟಾರ್ಟಪ್ ಲೋಕದಲ್ಲಿ ತೊಡಗಿಸಿಕೊಂಡರು. ನಾನು ತಂತ್ರಜ್ಞಾನ ಆಧಾರಿತ ಜಾಗತಿಕ ಕಂಪನಿಯನ್ನು ನಿರ್ಮಿಸಲು ಬಯಸಿದೆ, ಎಂದು ಅವರು ಹೇಳಿದರು.

ಉದ್ಯಮಶೀಲತೆಯಿಂದ ಬಂದ ವೈಯಕ್ತಿಕ ಪಾಠಗಳ ಬಗ್ಗೆ ಮಾತನಾಡುತ್ತಾ, ಇದರಿಂದ ನಾನು ಹೆಚ್ಚು ಮುಕ್ತಮನಸ್ಸಿನವನಾಗಿದ್ದೇನೆ. ಪ್ರತಿಭೆಯನ್ನು ಗೌರವಿಸುವುದು, ಉತ್ತಮ ಜನರೊಂದಿಗೆ ಉತ್ತಮ ಕಾರ್ಯಪರಿಸರ ನಿರ್ಮಿಸುವುದು, ದುರ್ಬಲತೆಗಳನ್ನು ಗುರುತಿಸಿ ಯೋಜನೆಯೊಂದಿಗೆ ಮುಂದುವರಿಯುವುದು ಕಲಿತಿದ್ದೇನೆ, ಎಂದು ಶ್ರೀಹರ್ ಹೇಳಿದರು.