ಅನಂತ: ಬೆಂಗಳೂರಿನಲ್ಲಿ ಗೂಗಲ್ ನ ಅತಿದೊಡ್ಡ ಜಾಗತಿಕ ಕ್ಯಾಂಪಸ್ ಅನಾವರಣ; ಎಷ್ಟೊಂದು ವೈಶಿಷ್ಟ.!

ಗೂಗಲ್ ತನ್ನ ನೂತನ ಕ್ಯಾಂಪಸ್ 'ಅನಂತ'ವನ್ನು ಬೆಂಗಳೂರಿನಲ್ಲಿ ಪ್ರಾರಂಭಿಸಿದ್ದು, ಇದು ತಂತ್ರಜ್ಞಾನ ದೈತ್ಯ ಸಂಸ್ಥೆಯ ಭಾರತದ ಮೇಲಿರುವ ಬದ್ಧತೆಯ ಮಹತ್ವದ ಮೈಲಿಗಲ್ಲಾಗಿದೆ. ದೈತ್ಯ ಟೆಕ್‌ ಕಂಪನಿ ಗೂಗಲ್‌ ಜಾಗತಿಕವಾಗಿ ಅತಿದೊಡ್ಡ ಕ್ಯಾಂಪಸ್‌ಗಳಲ್ಲಿ ಒಂದಾಗಿರುವ "ಅನಂತ" ವನ್ನು ಫೆಬ್ರವರಿ 19ರಂದು ಬುಧವಾರ ಸಿಲಿಕಾನ್ ಸಿಟಿಯಲ್ಲಿ ಅನಾವರಣಗೊಳಿಸಿದೆ.

ಸಂಸ್ಕೃತದಲ್ಲಿ 'ಅನಂತ' ಅಥವಾ 'ಅಪರಿಮಿತ' ಎಂಬ ಅರ್ಥವನ್ನು ನೀಡುವ 'ಅನಂತ', ತಂತ್ರಜ್ಞಾನದ ಮೂಲಕ ಅಪರಿಮಿತ ಸಾಮರ್ಥ್ಯದ ಗೂಗಲ್‌ನ ದೃಷ್ಟಿಕೋನವನ್ನು ಸಂಕೇತಿಸುತ್ತದೆ. ಈ ಕ್ಯಾಂಪಸ್ ಬೆಂಗಳೂರಿನ ಮಹದೇವಪುರದಲ್ಲಿದೆ. 5,000ಕ್ಕೂ ಹೆಚ್ಚು ಆಸನ ಸಾಮರ್ಥ್ಯವನ್ನು ಇದು ಹೊಂದಿದೆ. ಪ್ರವೇಶಸಾಧ್ಯತೆಯನ್ನು ಗಮನದಲ್ಲಿಟ್ಟುಕೊಂಡು ಕ್ಯಾಂಪಸ್ ವಿನ್ಯಾಸಗೊಳಿಸಲಾಗಿದೆ ಮತ್ತು ಅದರ ನಿರ್ಮಾಣದಲ್ಲಿ ಬಳಸಲಾದ ಹೆಚ್ಚಿನ ವಸ್ತುಗಳನ್ನು ಸ್ಥಳೀಯ ಮೂಲಗಳಿಂದಲೇ ತೆಗೆದುಕೊಳ್ಳಲಾಗಿದೆ ಎಂಬುದು ವಿಶೇಷ. "ಸಭಾ" ಎಂಬ ಎಲ್ಲರೂ ಒಂದೆಡೆ ಸೇರಬಹುದಾದ ಕೇಂದ್ರ ಸಭೆ ಸ್ಥಳ ಮತ್ತು ಎಲ್ಲೆಡೆ ಪ್ರವೇಶ ಸಾಧ್ಯತೆಯ ವೈಶಿಷ್ಟ್ಯಗಳನ್ನು ಈ ಕಟ್ಟಡ ಹೊಂದಿದೆ.

ಅನಂತ ಕ್ಯಾಂಪಸ್ ಮತ್ತೊಂದು ವಿಶೇಷವೆಂದರೆ 100 ಪ್ರತಿಶತ ತ್ಯಾಜ್ಯ ನೀರಿನ ಮರುಬಳಕೆಯನ್ನು ಇಲ್ಲಿ ಮಾಡಲಾಗುತ್ತದೆ. ಇದರೊಂದಿಗೆ ಮಳೆನೀರು ಕೊಯ್ಲು ವ್ಯವಸ್ಥೆಯನ್ನು ಒಳಗೊಂಡಿದೆ. ಇದರಿಂದ ನೂರಾರು ಲೀಟರ್ ಮಳೆನೀರನ್ನು ಸ್ಥಳದಲ್ಲೇ ಸಂಗ್ರಹಿಸುತ್ತದೆ ಮತ್ತು ಶಕ್ತಿಯ ಬಳಕೆಯನ್ನು ಕಡಿಮೆ ಮಾಡಲು ಭಾರತದ ಅತಿದೊಡ್ಡ ಸ್ಮಾರ್ಟ್ ಗ್ಲಾಸ್ ಅಳವಡಿಸಿಕೊಳ್ಳಲಾಗಿದೆ. ಅಂದರೆ ಭಾರತದ ಅತಿದೊಡ್ಡ ಎಲೆಕ್ಟ್ರೋ-ಕ್ರೋಮಿಕ್ ಗಾಜಿನ್ನು ಬಳಕೆ ಮಾಡಿಕೊಳ್ಳಲಾಗಿದ್ದು, ಈ ಕಟ್ಟಡದ ವಾಸ್ತುಶಿಲ್ಪಗಳು ಕೂಡಾ ಆಸಕ್ತಿಕರವಾಗಿದೆ. ನೈಸರ್ಗಿಕ ಬೆಳಕನ್ನು ಹೆಚ್ಚಿಸುವ ಮತ್ತು ಉತ್ಪಾದಕ ಕೆಲಸದ ವಾತಾವರಣವನ್ನು ಬೆಳೆಸುವ ವಿಶಿಷ್ಟವಾದ ಶಿಲ್ಪಕಲೆ ಮುಂಭಾಗವನ್ನು ಒಳಗೊಂಡಂತೆ ಅತ್ಯಾಧುನಿಕ ವೈಶಿಷ್ಟ್ಯಗಳನ್ನು ಇದು ಒಳಗೊಂಡಿದೆ. ವಿಶಾಲ ಸ್ಥಳಾವಕಾಶವನ್ನು ಕಚೇರಿ ಹೊಂದಿದ್ದು,ಕ್ಯಾಂಪಸ್‌ನಲ್ಲಿ ವಾಕಿಂಗ್ ಮತ್ತು ಜಾಗಿಂಗ್‌ಗೆ ಪ್ರತ್ಯೇಕ ಜಾಗಗಳು ಹೊಂದಿದೆ. ಇದು ಬರೋಬ್ಬರಿ 16 ಲಕ್ಷ ಚದರ ಅಡಿ ಸ್ಥಳಾವಕಾಶವನ್ನು ಹೊಂದಿದ್ದು ಸುಮಾರು 11 ಅಂತಸ್ತುಗಳನ್ನು ಒಳಗೊಂಡಿದೆ. ಇಷ್ಟೇ ಅಲ್ಲದೇ ಚೈಲ್ಡ್ ಡೇ ಕೇರ್ ಕೇಂದ್ರ ಇಲ್ಲಿರಲಿದ್ದು , ದೈಹಿಕ ವ್ಯಾಯಾಮಕ್ಕಾಗಿ ಜಿಮ್ ವ್ಯವಸ್ಥೆ, ಆಟದ ಕೇಂದ್ರ, , ಬ್ಯಾಡ್ಮಿಂಟನ್ ಕೋರ್ಟ್ , ವಾಲಿಬಾಲ್ , ಕ್ರಿಕೆಟ್ ಆಡಲು ಸೌಲಭ್ಯಗಳಿವೆ.

ಇಲ್ಲಿರುವ ಪುಟ್ಟದಾದ ಹಚ್ಚ ಹಸಿರಿನ ಅರಣ್ಯವು ಉದ್ಯೋಗಿಗಳಿಗೆ ಶಾಂತಿಯುತವಾಗಿ ಕಾಲಕಳೆಯುವಂತೆ ಮಾಡುತ್ತದೆ. ಅನಂತ ಎಂಬ ಹೆಸರಿನಂತೆ ಅನೇಕ ವಿಶೇಷತೆಗಳನ್ನು ಈ ಕಟ್ಟಡ ಹೊಂದಿದ್ದು ದೃಷ್ಟಿಹೀನರಿಗೆ ಒಡಾಟ ನಡೆಸಲು ವಿಶೇಷ ಸ್ಪರ್ಶತೆಯುಳ್ಳ ನೆಲಹಾಸು, ಅವರಿಗೆ ಅನುಕೂಲವಾದ ಸೌಲಭ್ಯಗಳು ಮತ್ತು ಬ್ರೈಲ್ ವಿವರಗಳನ್ನು ಒಳಗೊಂಡಿವೆ. ಕಟ್ಟಡದ ಒಳಾಂಗಣಗಳು ಸ್ಥಳೀಯವಾಗಿ ಮೂಲದ ವಸ್ತುಗಳನ್ನು ಒಳಗೊಂಡಿದ್ದು, ಪರಿಸರಕ್ಕೆ ಸಕಾರಾತ್ಮಕ ಕೊಡುಗೆ ನೀಡುವುದರ ಜೊತೆಗೆ ಪ್ರಾದೇಶಿಕ ಆರ್ಥಿಕತೆಯನ್ನು ಬೆಂಬಲಿಸುವ Google ನ ಬದ್ಧತೆಗೆ ಪ್ರತಿಬಿಂಬದಂತಿದೆ. ಗೂಗಲ್‌ನ ವಿವಿಧ ವಿಭಾಗಗಳಾದ ಆಂಡ್ರಾಯ್ಡ್‌, ಸರ್ಚ್‌, ಪೇ, ಕ್ಲೌಡ್‌, ಮ್ಯಾಪ್ಸ್‌, ಪ್ಲೇ ಮತ್ತು ಗೂಗಲ್‌ ಡೀಪ್‌ಮೈಂಡ್‌ ತಂಡಗಳು ಇಲ್ಲಿಂದ ಕಾರ್ಯ ನಿರ್ವಹಿಸಲಿವೆ ಎಂದು ತಿಳಿದುಬಂದಿದೆ.

" ಈ ಕ್ಯಾಂಪಸ್ ಜಾಗತಿಕ ತಂತ್ರಜ್ಞಾನ ಕ್ಷೇತ್ರದಲ್ಲಿ ಭಾರತದ ಕಾರ್ಯತಂತ್ರದ ಮಹತ್ವಕ್ಕೆ ಸಾಕ್ಷಿಯಾಗಿದೆ. ಗೂಗಲ್‌ನ ಉದ್ಯೋಗಿಗಳ ಸಂಖ್ಯೆ ಹೆಚ್ಚುತ್ತಿರುವಂತೆ, ಈ ಕ್ಯಾಂಪಸ್ ಅತ್ಯಾಧುನಿಕ ಸೌಲಭ್ಯಗಳನ್ನು ಹೊಂದಿದೆ. ಅಲ್ಲದೆ, ಜಗತ್ತಿಗಾಗಿ ಭಾರತದಲ್ಲಿ ಪರಿಹಾರಗಳನ್ನು ರೂಪಿಸುವ ಗೂಗಲ್‌ನ ಗುರಿಯನ್ನು ಇದು ಬೆಂಬಲಿಸುತ್ತದೆ. ಭಾರತವು ತನ್ನ ನಾಗರಿಕರಿಗೆ ತಂತ್ರಜ್ಞಾನದೊಂದಿಗೆ ಮಹತ್ವಾಕಾಂಕ್ಷೆಯ ಹೊಸ ರೂಪವನ್ನು ನೀಡಿದೆ. ಕಳೆದ 20 ವರ್ಷಗಳಿಂದ ಗೂಗಲ್ ಅದರ ಹೆಮ್ಮೆಯ ಪಾಲುದಾರನಾಗಿದೆ. ಬೆಂಗಳೂರಿನಲ್ಲಿರುವ ಹೊಸ ಅನಂತ ಕ್ಯಾಂಪಸ್ ನಮ್ಮ ಪ್ರಯಾಣದಲ್ಲಿ ಮಹತ್ವದ ಮೈಲಿಗಲ್ಲನ್ನು ಗುರುತಿಸುತ್ತದೆ, ಇದು AI ಯೊಂದಿಗೆ ನಡೆಯುತ್ತಿರುವ ತಾಂತ್ರಿಕ ಮಾದರಿ ಬದಲಾವಣೆಯನ್ನು ಗುರುತಿಸುತ್ತದೆ," ಎಂದು ಉದ್ಘಾಟನಾ ಸಮಾರಂಭದಲ್ಲಿ ಗೂಗಲ್ ಇಂಡಿಯಾದ ಉಪಾಧ್ಯಕ್ಷೆ ಮತ್ತು ಕಂಟ್ರಿ ಮ್ಯಾನೇಜರ್ ಪ್ರೀತಿ ಲೋಬಾನಾ ಹೇಳಿದ್ದಾರೆ.