ಭಾರತೀಯರ ವಿದೇಶದಲ್ಲಿರುವ ಕಪ್ಪು ಹಣ, ಅಕ್ರಮ ಆಸ್ತಿ ತನಿಖೆಗೆ ವಿಶೇಷ ಘಟಕ

ದೇಶದಾದ್ಯಂತ ಇರುವ ಆದಾಯ ತೆರಿಗೆ ಇಲಾಖೆಯ ತನಿಖಾ ದಳಕ್ಕೆ ಸರ್ಕಾರದಿಂದ ವಿಶೇಷ ಘಟಕವನ್ನು ಸೃಷ್ಟಿಸಲಾಗಿದೆ. ಈ ಘಟಕವು ಭಾರತೀಯರು ಬಹಿರಂಗ ಮಾಡದ ಆಸ್ತಿ, ವಿದೇಶದಲ್ಲಿನ ಇರುವ ಸ್ವತ್ತು ಹಾಗೂ ಕಪ್ಪು ಹಣ ಪ್ರಕರಣಗಳ ತನಿಖೆ ನಡೆಸುತ್ತದೆ. ಫಾರಿನ್ ಅಸೆಟ್ ಇನ್ವೆಸ್ಟಿಗೇಷನ್ ಯೂನಿಟ್ಸ್ (FAIU) ಅನ್ನು ಈಚೆಗೆ ದೇಶದ ವಿವಿಧೆಡೆ ಇರುವ ಎಲ್ಲ ಹದಿನಾಲ್ಕು ತನಿಖಾ ನಿರ್ದೇಶನಾಲಯದಲ್ಲಿ ಸೃಷ್ಟಿಸಲಾಯಿತು.

ಇದು ಮುಖ್ಯವಾಗಿ ದಾಳಿ ನಡೆಸುತ್ತದೆ ಮತ್ತು ವಶಪಡಿಸಿಕೊಳ್ಳುತ್ತದೆ. ಇದರ ಜತೆಗೆ ವಿವಿಧ ವಿಧಾನದಲ್ಲಿ ತೆರಿಗೆ ಕಳುವು ಮಾಡಿರುವುದನ್ನು ಪತ್ತೆ ಹಚ್ಚುವುದಕ್ಕೆ ಗುಪ್ತಚರ ವಿಭಾಗವನ್ನು ಗಟ್ಟಿಗೊಳಿಸುತ್ತದೆ. ತೆರಿಗೆ ಇಲಾಖೆಯಲ್ಲಿ ಇರುವ ಎಲ್ಲ 69 ಹುದ್ದೆಗಳನ್ನು ಸಿಬಿಡಿಟಿಯಿಂದ ಕಳೆದ ನವೆಂಬರ್ ನಲ್ಲಿ ಈ ಘಟಕದ ರಚನೆಗೆ ನಿಯೋಜಿಸಲಾಯಿತು. ಅದಕ್ಕೆ ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅನುಮತಿ ನೀಡಿದ್ದರು ಎಂದು ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.

ಈಗ ಜಾಗತಿಕ ಮಟ್ಟದಿಂದ ತೆರಿಗೆ ಮಾಹಿತಿಗಳು ವಿನಿಮಯ ಆಗುತ್ತಿವೆ. ಜಾಗತಿಕ ಮಟ್ಟದ ಅಕ್ರಮ ಹಣ ವರ್ಗಾವಣೆ ಮತ್ತು ಭಯೋತ್ಪಾದಕರಿಗೆ ಹಣಕಾಸು ನೆರವು, ತೆರಿಗೆ ಕಳುವಿನ ಪ್ರಕರಣಗಳನ್ನು ತಡೆಯಲು ಪರಸ್ಪರ ಸಹಕಾರ ಒಪ್ಪಂದಗಳು ಆಗಿವೆ. ವಿವಿಧ ದೇಶೀ ಹಾಗೂ ಅಂತರರಾಷ್ಟ್ರೀಯ ಮೂಲಗಳಿಂದಲೂ ದತ್ತಾಂಶಗಳು ಬರುತ್ತಿವೆ. ಆದ್ದರಿಂದ ಅಷ್ಟು ದೊಡ್ಡ ಪ್ರಮಾಣದ ಮಾಹಿತಿ ವಿಶ್ಲೇಷಣೆಗಾಗಿಯೇ ಈ ಘಟಕ ಕೆಲಸ ಮಾಡುತ್ತಿದೆ.

ಅಷ್ಟೇ ಅಲ್ಲ, ಈ ಹೊಸ ಘಟಕವು ಜಾಗತಿಕ ತೆರಿಗೆ ದಾಖಲಾತಿ ಲೀಕ್ಸ್ ಗಳಾದ ಪನಾಮ ಪೇಪರ್ಸ್ ನಂಥ ಪ್ರಕರಣಗಳ ತನಿಖೆ ಕೂಡ ಮಾಡುತ್ತದೆ. ಈಕ್ವಿಟಿ, ಮ್ಯೂಚುವಲ್ ಫಂಡ್ ಗಳು, ಇನ್ಷೂರೆನ್ಸ್ ಮೊದಲಾದವುಗಳ ಬಗ್ಗೆ ಮಾಹಿತಿ ವಿನಿಮಯವನ್ನು ತಾನಾಗಿಯೇ ಮಾಡಿಕೊಳ್ಳುವ ಒಪ್ಪಂದ ಸಹ ಮಾಡಿಕೊಳ್ಳಲಾಗಿದೆ. ಇಂಥ ಒಪ್ಪಂದ ಪ್ರಮುಖವಾಗಿ ಭಾರತ ಮತ್ತು ಯುಎಸ್ ಮಧ್ಯೆ ಆಗಿದೆ.