ಅಕ್ಷಯ ತೃತೀಯ 2025: ಚಿನ್ನ ಕೊಳ್ಳುವ ಭರದಲ್ಲಿ ಮೂರ್ಖರಾಗಬೇಡಿ.! ಅಸಲಿಯತ್ತು ಪರೀಕ್ಷಿಸಿ

"ಚಿನ್ನ " ಎಂಬ ಈ ಪದ ಕಿವಿಗೆ ಬೇಳುತ್ತಲೇ ಬಹುತೇಕ ಲಲನೆಯರ ಮುಖದಲ್ಲಿ ಮಂದಹಾಸ ಮೂಡುತ್ತದೆ. ಕೇವಲ ಅಲಂಕಾರಿಕ ಅಭರಣ ವಸ್ತುವಾಗಿ ಮಾತ್ರವಲ್ಲದೆ, ಚಿನ್ನವು ಆರ್ಥಿಕ ಭದ್ರತೆಯ ಸಂಕೇತವಾಗಿಯೂ, ಸಂಪ್ರದಾಯ ಮತ್ತು ಸಂಸ್ಕೃತಿಯ ಪ್ರತೀಕವಾಗಿಯೂ ಬೆಲೆ ಕಟ್ಟಲಾಗದ ಸ್ಥಾನವನ್ನು ಪಡೆದುಕೊಂಡಿದೆ.

10 ಗ್ರಾಂ ಚಿನ್ನಕ್ಕೆ ಭಾರತದಲ್ಲಿ ಒಂದು ಲಕ್ಷ ರೂ . ಬೆಲೆ ದಾಟಿದೆ. ಬಂಗಾರ ಎಷ್ಟೇ ದುಬಾರಿಯಾಗಲಿ ಅದನ್ನು ಖರೀದಿಸುವವರು ಸಂಖ್ಯೆ ಕುಂಠಿತಗೊಳ್ಳುವುದಿಲ್ಲ. ಈಗಂತೂ ಚಿನ್ನ ಕೇವಲ ಅಲಂಕಾರಕ್ಕೆ ಮಾತ್ರವಲ್ಲ ಹೂಡಿಕೆಗೂ ಪ್ರಮುಖವಾಗಿ ಬಳಕೆಯಾಗುತ್ತಿದೆ. ಬಂಗಾರ ಕೂಡಾ ಬೆಳ್ಳಿ, ತಾಮ್ರದಂತೆ ಒಂದು ಲೋಹ, ಅದರೆ ಹೂಡಿಕೆದಾರರಿಗೆ ಚಿನ್ನದ ಮೇಲೆ ಎಲ್ಲಕಿಂತ ಹೆಚ್ಚು ಮೋಹ. ಸ್ವರ್ಣಕೊಳ್ಳಲು ದಿನವೊಂದು ಇದೆ. ಅದೇ ಅಕ್ಷಯ ತೃತೀಯ.

ಅಕ್ಷಯ ತೃತೀಯ ಹಬ್ಬದಂದು ಚಿನ್ನ ಕೊಂಡರೆ ಅದು ಶುಭವೆಂದು ಪರಿಗಣಿಸಲಾಗಿದೆ. ಈ ದಿನವನ್ನು ಅದೃಷ್ಟ ಮತ್ತು ಸಮೃದ್ಧಿಯ ಸಂಕೇತವೆಂದು ನಂಬಲಾಗಿದೆ. ಹಾಗಾಗಿ, ಅನೇಕ ಜನರು ಈ ದಿನ ಚಿನ್ನವನ್ನು ಖರೀದಿಸಲು ಬಯಸುತ್ತಾರೆ. ಈ ಹಬ್ಬವನ್ನು ಭಾರತದಾದ್ಯಂತ ಆಚರಿಸಲಾಗುತ್ತದೆ. ಇದನ್ನು 'ಅಖ ತೀಜ್' ಎಂದೂ ಕರೆಯುತ್ತಾರೆ. ಎಂದರೆ ಅದೃಷ್ಟ ಮತ್ತು ಸಮೃದ್ಧಿಯ ಹಬ್ಬ ಎಂದರ್ಥ. ಸಂಸ್ಕೃತದಲ್ಲಿ 'ಅಕ್ಷಯ' ಎಂದರೆ ಎಂದೂ 'ಕಡಿಮೆಯಾಗದ' ಎಂಬ ಅರ್ಥವನ್ನೂ ಧ್ವನಿಸುತ್ತದೆ. ಈ ಬಾರಿ ಅಕ್ಷಯ ತೃತೀಯ ಏಪ್ರಿಲ್ 30ರಂದು ಬಂದಿದೆ. ಇದು ಚಿನ್ನದಲ್ಲಿ ಹೂಡಿಕೆ ಮಾಡಲು ಜನಪ್ರಿಯ ಸಮಯವಾಗಿರುವುದರಿಂದ ಆಭರಣಗಳು, ನಾಣ್ಯಗಳು ಅಥವಾ ಬಾರ್‌ಗಳಲ್ಲಿ ಯಾವ ರೂಪದಲ್ಲಿ ಚಿನ್ನ ಖರೀದಿಸಿದ್ರೂ ಎಚ್ಚರಿಕೆ ಪರಿಶೀಲಿಸಲು ಮರೆಯದಿರಿ.

ಸಾಮಾನ್ಯವಾಗಿ ಹಬ್ಬದ ಸಮಯದಲ್ಲಿ ಚಿನ್ನದ ಬೇಡಿಕೆಯು ಹೆಚ್ಚಾಗಿ ನಕಲಿ ಅಥವಾ ಅಶುದ್ಧ ಚಿನ್ನದ ಮಾರಾಟದಲ್ಲಿ ಏರಿಕೆಗೆ ಕಾರಣವಾಗುತ್ತದೆ. ನೀವು ಮಾರುಕಟ್ಟೆಗೆ ಹೋಗುವಾಗ, ನೀವು ಖರೀದಿಸುತ್ತಿರುವ ಚಿನ್ನವು ನಿಜವೋ ನಕಲಿಯೋ ಎಂದು ಹೇಗೆ ಪರಿಶೀಲಿಸುವುದು ಎಂದು ತಿಳಿದುಕೊಳ್ಳುವುದು ಮುಖ್ಯ.

ನೀವು ಖರೀದಿಸುತ್ತಿರುವ ಚಿನ್ನವು ನಿಜವಾದದ್ದೇ ಎಂದು ಖಚಿತಪಡಿಸಿಕೊಳ್ಳಲು ಭಾರತೀಯ ಗುಣಮಟ್ಟ ಸಂಸ್ಥೆ (BIS) ನೀಡುವ ಹಾಲ್‌ಮಾರ್ಕ್ ಅನ್ನು ಪರೀಕ್ಷಿಸುವುದು ಬಹಳ ಮುಖ್ಯ.

HUID ಸಂಖ್ಯೆಯನ್ನು ಪರಿಶೀಲಿಸಿ

ಪ್ರತಿಯೊಂದು ಹಾಲ್‌ಮಾರ್ಕ್ ಮಾಡಿದ ಚಿನ್ನದ ವಸ್ತುವು ಹಾಲ್‌ಮಾರ್ಕ್ ವಿಶಿಷ್ಟ ಗುರುತಿನ (HUID) ಸಂಖ್ಯೆಯನ್ನು ಹೊಂದಿರುತ್ತದೆ. ಇದು ಆರು-ಅಂಕಿಯ ಆಲ್ಫಾನ್ಯೂಮರಿಕ್ ಕೋಡ್ ಆಗಿದ್ದು ಅದು ವಸ್ತುವಿನ ಸತ್ಯಾಸತ್ಯತೆಯನ್ನು ಪರಿಶೀಲಿಸುತ್ತದೆ.

BIS ಹಾಲ್‌ಮಾರ್ಕ್‌ಪರೀಕ್ಷಿಸಿ

ಈ ಹಾಲ್‌ಮಾರ್ಕ್ ಚಿನ್ನದ ಶುದ್ಧತೆಯನ್ನು ಪ್ರಮಾಣೀಕರಿಸುತ್ತದೆ. ಅಧಿಕೃತ BIS ಹಾಲ್‌ಮಾರ್ಕ್ ಸಾಮಾನ್ಯವಾಗಿ ಈ ಕೆಳಗಿನ ಅಂಶಗಳನ್ನು ಒಳಗೊಂಡಿರುತ್ತದೆ.

ಕ್ಯಾರೆಟ್‌ಗಳಲ್ಲಿ ಚಿನ್ನದ ಶುದ್ಧತೆಯ ಮಟ್ಟ, ಉದಾಹರಣೆಗೆ 22K916 (ಇದರರ್ಥ 91.6% ಶುದ್ಧ ಚಿನ್ನ).

ಬಿಐಎಸ್ ಲೋಗೋ, ಆಭರಣ ವ್ಯಾಪಾರಿಯ ಗುರುತಿನ ಚಿಹ್ನೆ. ಈ ಎಲ್ಲಾ ಗುರುತುಗಳನ್ನು ಚಿನ್ನದ ಆಭರಣ ಅಥವಾ ವಸ್ತುವಿನ ಮೇಲೆ ಸ್ಪಷ್ಟವಾಗಿ ಮುದ್ರಿಸಲಾಗಿದೆಯೇ ಎಂದು ಖಚಿತಪಡಿಸಿಕೊಳ್ಳಿ.

BIS ಕೇರ್ ಅಪ್ಲಿಕೇಶನ್

ಚಿನ್ನದ ಶುದ್ಧತೆ, ನೋಂದಣಿ ಮತ್ತು ಹಾಲ್‌ಮಾರ್ಕಿಂಗ್ ಕೇಂದ್ರದ ಹೆಸರನ್ನು ನೋಡಲು ನೀವು 'BIS ಕೇರ್ ಅಪ್ಲಿಕೇಶನ್ ' ಮೂಲಕ ಈ ಸಂಖ್ಯೆಯನ್ನು ಪರಿಶೀಲಿಸಬಹುದು. ಇದು ಕಳಪೆ ಗುಣಮಟ್ಟದ ಮತ್ತು ನಕಲಿ ಉತ್ಪನ್ನಗಳನ್ನು ಖರೀದಿಸುವುದರಿಂದ ಗ್ರಾಹಕರನ್ನು ರಕ್ಷಿಸುತ್ತದೆ.

ಚಿನ್ನದ ಶುದ್ಧತೆಯನ್ನು ಅಳೆಯಲು 'ಕ್ಯಾರೆಟ್' ಎಂಬ ಅಳತೆಯನ್ನು ಬಳಸಲಾಗುತ್ತದೆ. ಇದನ್ನು 'K' ಎಂದು ಗುರುತಿಸಲಾಗುತ್ತದೆ. ಬೇರೆ ಬೇರೆ ಕ್ಯಾರೆಟ್‌ಗಳ ಚಿನ್ನವು ಎಷ್ಟು ಶುದ್ಧವಾಗಿದೆ ಎಂದು ತಿಳಿಯಬಹುದು.

24K ಚಿನ್ನ: ಇದು ಅತಿ ಹೆಚ್ಚು ಶುದ್ಧವಾದ ಚಿನ್ನ. ಇದರಲ್ಲಿ 99.9% ಚಿನ್ನವಿರುತ್ತದೆ. ಇದನ್ನು ಸಾಮಾನ್ಯವಾಗಿ ಚಿನ್ನದ ನಾಣ್ಯಗಳು ಮತ್ತು ಗಟ್ಟಿಗಳನ್ನು (ಬಾರ್‌ಗಳು) ತಯಾರಿಸಲು ಬಳಸುತ್ತಾರೆ. ಇದು ಬಹಳ ಮೃದುವಾಗಿರುತ್ತದೆ.

22K ಚಿನ್ನ: ಇದರಲ್ಲಿ 91.6% ಚಿನ್ನವಿರುತ್ತದೆ. ಉಳಿದ ಭಾಗವು ಇತರ ಲೋಹಗಳ ಮಿಶ್ರಣವಾಗಿರುತ್ತದೆ. ಈ ರೀತಿಯ ಚಿನ್ನವು ಆಭರಣಗಳನ್ನು ತಯಾರಿಸಲು ಸೂಕ್ತವಾಗಿರುತ್ತದೆ ಏಕೆಂದರೆ 24K ಚಿನ್ನಕ್ಕಿಂತ ಇದು ಸ್ವಲ್ಪ ಗಟ್ಟಿಯಾಗಿರುತ್ತದೆ.

18K ಅಥವಾ 14K ಚಿನ್ನ: ಈ ಕ್ಯಾರೆಟ್‌ಗಳ ಚಿನ್ನದಲ್ಲಿ ಶುದ್ಧ ಚಿನ್ನದ ಪ್ರಮಾಣವು ಕಡಿಮೆ ಇರುತ್ತದೆ. 18K ಚಿನ್ನದಲ್ಲಿ 75% ಚಿನ್ನ ಮತ್ತು 14K ಚಿನ್ನದಲ್ಲಿ 58.3% ಚಿನ್ನವಿರುತ್ತದೆ. ಉಳಿದ ಭಾಗವು ಇತರ ಲೋಹಗಳಾಗಿರುತ್ತವೆ. ಈ ರೀತಿಯ ಚಿನ್ನವು ಗಟ್ಟಿಯಾಗಿರುವುದರಿಂದ ಪ್ರತಿದಿನ ಬಳಸುವ ಆಭರಣಗಳಿಗೆ ಹೆಚ್ಚು ಬಾಳಿಕೆ ಬರುತ್ತದೆ.

ಮ್ಯಾಗ್ನೆಟ್ ಪರೀಕ್ಷೆ

ನಿಜವಾದ ಚಿನ್ನವು ಕಾಂತೀಯವಲ್ಲ. ವಸ್ತುವು ಆಯಸ್ಕಾಂತಕ್ಕೆ ಆಕರ್ಷಿತವಾದರೆ, ಅದು ಇತರ ಲೋಹಗಳೊಂದಿಗೆ ಬೆರೆಸಿರಬಹುದು ಅಥವಾ ನಕಲಿಯಾಗಿರಬಹುದು.

ಬಿಲ್ ಕೇಳಿ ಪಡೆಯಿರಿ

ಚಿನ್ನ ಖರೀದಿಸುವಾಗ ಯಾವಾಗಲೂ ತೂಕ, ಎಷ್ಟು ಶುದ್ಧವಾಗಿದೆ (ಕ್ಯಾರೆಟ್), ತಯಾರಿಕೆಯ ಖರ್ಚು ಮತ್ತು ಹಾಲ್‌ಮಾರ್ಕ್ ವಿವರಗಳಿರುವ ಬಿಲ್ ಕೇಳಿ ಪಡೆಯಿರಿ. ಇದು ವಿಮೆ ಮಾಡಿಸಲು ಮತ್ತು ಮರುಮಾರಾಟ ಮಾಡಲು ಸಹಾಯ ಮಾಡುತ್ತದೆ.