UNION BUDGET 2026: ರಫ್ತು ಕುಸಿತ–ಆಮದು ಏರಿಕೆ ನಡುವೆ ಬಜೆಟ್‌ 2026 ದೇಶಕ್ಕೆ ಕೊಡುತ್ತಾ ಹೊಸ ದಿಕ್ಕು? ನಿರೀಕ್ಷೆಗಳೇನು?

2026ರ ಕೇಂದ್ರ ಬಜೆಟ್ ಎಲ್ಲರ ಚಿತ್ತ ಸೆಳೆದಿದೆ. ಈ ಬಜೆಟ್‌ನಲ್ಲಿ ಏನೇನು ಪ್ರಯೋಜನಗಳು ಸಿಗಬಹುದು ಎಂಬ ಕುತೂಹಲ ಅರಳಿದೆ. ರಫ್ತು ಕುಸಿತ, ಆಮದು ಹೆಚ್ಚಳ ಮತ್ತು ಜಾಗತಿಕ ರಾಜಕೀಯ ಗೊಂದಲ ಈ ಎಲ್ಲವುಗಳು ಒಮ್ಮೆಲೇ ಒತ್ತಡ ಹಾಕುತ್ತಿವೆ. ಈ ಕಾರಣದಿಂದ ಈ ಬಾರಿ ಬಜೆಟ್‌ನಲ್ಲಿ ವ್ಯಾಪಾರಕ್ಕೆ ಸಂಬಂಧಿಸಿದ ನಿರ್ಧಾರಗಳಿಗೆ ಹೆಚ್ಚು ತೂಕ ಸಿಗುವ ಸಾಧ್ಯತೆ ಇದೆ.

ರಫ್ತು ಕುಸಿತ: ಅಕ್ಟೋಬರ್‌ನ ಅಂಕಿಗಳು ಕಳವಳಕಾರಿ:

ಇನ್ನು ಅಕ್ಟೋಬರ್ ತಿಂಗಳಲ್ಲಿ ದೇಶದ ರಫ್ತು 11.8% ಕಡಿಮೆಯಾಗಿದೆ. ಇದು 34.38 ಬಿಲಿಯನ್ ಡಾಲರ್ ಮಟ್ಟಕ್ಕೆ ಇಳಿದಿದೆ. ಈ ಇಳಿಕೆ ದೇಶದ ರಫ್ತು ವಲಯದ ಸ್ಥಿತಿ ದುರ್ಬಲವಾಗುತ್ತಿದೆ ಎಂದು ತೋರಿಸುತ್ತದೆ. ಇದರ ವಿರುದ್ಧವಾಗಿ, ಆಮದು 16.6% ಏರಿಕೆಯಾಗಿದೆ. ಇದು 76.06 ಬಿಲಿಯನ್ ಡಾಲರ್‌ ತಲುಪಿದೆ. ರಫ್ತು ಇಳಿಕೆ ಮತ್ತು ಆಮದು ಏರಿಕೆ ಇವುಗಳೆರಡೂ ಸೇರಿ ವಾಣಿಜ್ಯ ಕೊರತೆಯನ್ನು ಹೆಚ್ಚಿಸುತ್ತಿವೆ. ಈ ಪರಿಸ್ಥಿತಿಯು ಸರ್ಕಾರಕ್ಕೆ ತುರ್ತಾಗಿ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಅವಶ್ಯಕತೆಯನ್ನು ತೋರಿಸುತ್ತಿದೆ.

ಅಮೆರಿಕಾ ಮಾರುಕಟ್ಟೆಯ ಬೇಡಿಕೆ ಕಡಿಮೆಯಾದ ಪರಿಣಾಮ:

ಭಾರತಕ್ಕೆ ಅತಿದೊಡ್ಡ ರಫ್ತು ಮಾರುಕಟ್ಟೆಯಾದ ಅಮೆರಿಕಾದಿಂದ ದೊಡ್ಡ ಹೊಡೆತ ಬಂದಿದೆ. ಅಕ್ಟೋಬರ್ 2025ರಲ್ಲಿ ಅಮೆರಿಕಾಕ್ಕೆ ರಫ್ತು 6.3 ಬಿಲಿಯನ್ ಡಾಲರ್ ಆಗಿದೆ. ಇದು ಹಿಂದಿನ ವರ್ಷದ 6.9 ಬಿಲಿಯನ್ ಡಾಲರ್‌ನಿಗಿಂತ ಕಡಿಮೆ. ಇದರಿಂದ ಸುಮಾರು 9% ಕುಸಿತ ಕಂಡುಬಂದಿದೆ. ಈ ಇಳಿಕೆಯ ಮುಖ್ಯ ಕಾರಣ ಅಮೆರಿಕಾ ಸರ್ಕಾರ ವಿಧಿಸಿರುವ ಹೆಚ್ಚಿದ ಸುಂಕಗಳು. ಹೆಚ್ಚಿನ ತೆರಿಗೆಗಳಿಂದ ಭಾರತೀಯ ಉತ್ಪನ್ನಗಳು ಅಮೆರಿಕಾದಲ್ಲಿ ದುಬಾರಿಯಾಗಿವೆ. ಬೆಲೆ ಹೆಚ್ಚಾದಾಗ ಬೇಡಿಕೆ ಸಹಜವಾಗಿ ಕಡಿಮೆಯಾಗುತ್ತದೆ. ಇದು ರಫ್ತು ವಲಯಕ್ಕೆ ನೇರ ಪರಿಣಾಮ ಬೀರುತ್ತಿದೆ.

ಜಾಗತಿಕ ರಾಜಕೀಯ ಒತ್ತಡ:

ವಿಶ್ವದಲ್ಲಿ ನಡೆಯುತ್ತಿರುವ ಜಿಯೋಪಾಲಿಟಿಕಲ್ ಗಲಾಟೆಗಳು ವ್ಯಾಪಾರಕ್ಕೆ ಅಸ್ಥಿರತೆಯನ್ನು ತರುತ್ತಿವೆ. ಯುದ್ಧಗಳು ಮತ್ತು ರಾಜಕೀಯ ಬಿಕ್ಕಟ್ಟುಗಳು ಜಾಗತಿಕ ಬೇಡಿಕೆಯನ್ನು ದುರ್ಬಲಗೊಳಿಸುತ್ತಿವೆ. ಜಾಗತಿಕ ಬೇಡಿಕೆ ಕಡಿಮೆಯಾಗಿದಾಗ ರಫ್ತು ದೇಶಗಳಿಗೆ ಹೊಡೆತ ಬರುವುದು ಸಹಜ. ಭಾರತೀಯ ಉತ್ಪನ್ನಗಳಿಗೂ ಇದೇ ಪರಿಸ್ಥಿತಿ ಎದುರಾಗುತ್ತಿದೆ. ಆ ಕಾರಣದಿಂದ ರಫ್ತು ಮಾರುಕಟ್ಟೆಗಳಲ್ಲಿ ಬೆಳವಣಿಗೆ ನಿಧಾನಗೊಂಡಿದೆ. ಈ ಬದಲಾವಣೆಗಳನ್ನು ಗಮನದಲ್ಲಿರಿಸಿ ಬಜೆಟ್‌ನಲ್ಲಿ ಕ್ರಮ ಕೈಗೊಳ್ಳಬೇಕಾಗಿದೆ.

2026ರ ಬಜೆಟ್‌ನಿಂದ ಏನು ನಿರೀಕ್ಷೆ?

ರಫ್ತು ಕುಸಿತವನ್ನು ನಿಲ್ಲಿಸಲು ಸರ್ಕಾರ ಬೆಂಬಲ ಕ್ರಮಗಳನ್ನು ಘೋಷಿಸಬಹುದು. ತೆರಿಗೆ ಸಡಿಲಿಕೆಗಳು, ರಫ್ತು ಮಾಡುವ ಕಂಪನಿಗಳಿಗೆ ಪ್ರೋತ್ಸಾಹ, ಮತ್ತು ಉತ್ಪಾದನಾ ವೆಚ್ಚ ಕಡಿಮೆ ಮಾಡುವ ಯೋಜನೆಗಳು ಇದರಲ್ಲಿ ಸೇರಬಹುದು.

ಅಮೆರಿಕಾ ಮಾರುಕಟ್ಟೆಯಲ್ಲಿ ಕುಸಿತ ಕಂಡಿರುವ ಕಾರಣ, ಭಾರತ ತನ್ನ ರಫ್ತನ್ನು ಬೇರೆ ದೇಶಗಳಿಗೆ ತಿರುಗಿಸುವ ಪ್ರಯತ್ನ ಮಾಡಬಹುದು. ಏಷ್ಯಾ, ಆಫ್ರಿಕಾ, ಯುರೋಪ್ ಮುಂತಾದ ಮಾರುಕಟ್ಟೆಗಳಲ್ಲಿ ಹೊಸ ಅವಕಾಶಗಳನ್ನು ಹುಡುಕಲು ಸರ್ಕಾರ ಸ್ಪಷ್ಟ ಯೋಜನೆಗಳನ್ನು ಆಲೋಚಿಸಬಹುದು.

ಒಟ್ಟಾರೆ ವ್ಯಾಪಾರಕ್ಕೆ ಕೇಂದ್ರ ಬಜೆಟ್‌ ಮಹತ್ವದ ತಿರುವು:

ರಫ್ತು ಕುಸಿತ, ಆಮದು ಏರಿಕೆ, ಅಮೆರಿಕಾ ಸುಂಕಗಳ ಒತ್ತಡ ಮತ್ತು ಜಾಗತಿಕ ರಾಜಕೀಯ ಅಸ್ಥಿರತೆ ಈ ಎಲ್ಲವುಗಳ ನೋಡಿದಾಗ 2026ರ ಬಜೆಟ್‌ ಭಾರತಕ್ಕೆ ಮಹತ್ವದ ತಿರುವಿನ ಬಜೆಟ್ ಆಗಬಹುದು. ಈ ಬಜೆಟ್‌ನಲ್ಲಿ ಸರ್ಕಾರ ಕೈಗೊಳ್ಳುವ ಕ್ರಮಗಳು ಮುಂದಿನ ವರ್ಷಗಳಲ್ಲಿ ಭಾರತದ ವಾಣಿಜ್ಯ ದಿಕ್ಕನ್ನು ನಿರ್ಧರಿಸಲಿದೆ. ಸರಿಯಾದ ಬೆಂಬಲ ದೊರೆತರೆ ರಫ್ತು ವಲಯ ಮತ್ತೆ ಬಲವಾಗಿ ಬೆಳೆಯುವ ಸಾಧ್ಯತೆ ಇದೆ.