ಕೈ ಕೊಟ್ಟ ಅದೃಷ್ಟ; ಕೇವಲ 72 ಗಂಟೆಗಳಲ್ಲಿ ₹29,900 ಕೋಟಿಯ ಅರ್ಧದಷ್ಟು ಕಳಕೊಂಡ ಮಹಿಳೆ

ಅದೃಷ್ಟ ಮತ್ತು ದುರಾದೃಷ್ಟ ಜೀವನದಲ್ಲಿ ಯಾವ ಸಂದರ್ಭದಲ್ಲಾದರೂ ಬರಬಹುದು. ಇಂಡೋನೇಷ್ಯಾದ ಶ್ರೀಮಂತ ಮಹಿಳೆ ಮರೀನಾ ಬುಡಿಮನ್ ಅವರ ಕಥೆ ಇದನ್ನೇ ತೋರಿಸುತ್ತದೆ.

ಇಂಡೋನೇಷ್ಯಾದ ಅತ್ಯಂತ ಸಿರಿಅಂತ ಮಹಿಳೆ ಎಂಬ ಖ್ಯಾತಿ ಗಳಿಸಿದ್ದ ಇವರು ಸಂಪತ್ತು ಕೇವಲ ಮೂರೇ ಮೂರು ದಿನದಲ್ಲಿ ಅರ್ಧದಷ್ಟು ಕರಗಿ ಹೋಗಿದೆ . ಹೀಗಾಗಿ ಅದೃಷ್ಟ ಲಕ್ಷ್ಮಿ ಯಾವಾಗ ಹೇಗೆ ಬದಲಾಗುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ.

ಡಿ.ಸಿ.ಐ. ಇಂಡೋನೇಷ್ಯಾ (Data Center Indonesia) ಇಂಡೋನೇಷ್ಯಾ ದೇಶದ ಪ್ರಮುಖ ಡೇಟಾ ಕೇಂದ್ರ ಕಂಪನಿ. ಕಂಪನಿ ಇಂಡೋನೇಷ್ಯಾದಲ್ಲಿ ಡೇಟಾ ಕೇಂದ್ರಗಳ ಅಭಿವೃದ್ಧಿ, ನಿರ್ವಹಣೆ ಮತ್ತು ಕಾರ್ಯಾಚರಣೆಯ ಮೇಲೆ ಕೇಂದ್ರೀಕರಿಸುತ್ತದೆ. ಈ ಸಂಸ್ಥೆಯ ಸಹ-ಸಂಸ್ಥಾಪಕಿ ಮತ್ತು ಅಧ್ಯಕ್ಷೆ ಮರೀನಾ ಬುಡಿಮನ್ ಒಂದು ಕಾಲದಲ್ಲಿ ತಮ್ಮ ಅಗಾಧ ಸಂಪತ್ತಿನ ಗಳಿಕೆಗಾಗಿಯೇ ಸುದ್ದಿಗಳಲ್ಲಿದ್ದರು. ಸೌತ್ ಚೀನಾ ಮಾರ್ನಿಂಗ್ ಪೋಸ್ಟ್ (SCMP) ವರದಿಯ ಪ್ರಕಾರ, ಅವರು ದಿನವೊಂದಕ್ಕೆ ಸರಿ ಸುಮಾರು 350 ಮಿಲಿಯನ್ ಯುಎಸ್ ಡಾಲರ್ ಗಳಿಸುತ್ತಿದ್ದರು ಮತ್ತು ಸುಮಾರು 7.5 ಬಿಲಿಯನ್ ಯುಎಸ್ ಡಾಲರ್ ನಿವ್ವಳ ಮೌಲ್ಯವನ್ನು ಹೊಂದಿದ್ದರು.

ಆದರೆ ಅಘಾತಕಾರಿ ಘಟನೆ ಅಂದ್ರೆ ಕೇವಲ ಮೂರು ದಿನಗಳಲ್ಲಿ ಅವರು 3.6 ಬಿಲಿಯನ್ ಯುಎಸ್ ಡಾಲರ್ ಕಳೆದುಕೊಂಡಿದ್ದಾರೆ. ಅಂದರೆ ಮೂರು ವಾರಗಳಲ್ಲಿ, ಅವರು ತಮ್ಮ ಒಟ್ಟು ಸಂಪತ್ತಿನ ಅರ್ಧದಷ್ಟು ನಷ್ಟ ಅನುಭವಿಸಿದ್ದಾರೆ.

ಪ್ರಮುಖ ಡೇಟಾ ಸೆಂಟರ್ ಕಂಪನಿಯಾದ DCI ಇಂಡೋನೇಷ್ಯಾ ಮಾರ್ಚ್ 18 ರಂದು ಸುಮಾರು 17 ಶತಕೋಟಿ USD ಮಾರುಕಟ್ಟೆ ಬಂಡವಾಳೀಕರಣದೊಂದಿಗೆ ವಹಿವಾಟನ್ನು ಕೊನೆಗೊಳಿಸಿತ್ತು. ಆದರೆ, ಇಷ್ಟು ದೊಡ್ಡ ಮೌಲ್ಯಮಾಪನ ಇರುವ ಹೊರತಾಗಿಯೂ, ಕಳೆದ ವರ್ಷ ಕಂಪನಿಯ ಆದಾಯ ಕೇವಲ 112 ಮಿಲಿಯನ್ USD ಆಗಿದ್ದು, 49 ಮಿಲಿಯನ್ USD ಲಾಭವನ್ನು ಗಳಿಸಿತು. ಇದು ಕಂಪನಿಯ ಷೇರು ಮೌಲ್ಯ ಮತ್ತು ಸ್ಥಿರತೆಯ ಬಗ್ಗೆ ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕುವಂತೆ ಮಾಡಿತು.

ಈ ಘಟನೆಯಲ್ಲಿ ಮರೀನಾ ಬುಡಿಮನ್ ಮಾತ್ರವಲ್ಲ, ಅವರ ಕಂಪನಿಯ ಸಹ-ಸಂಸ್ಥಾಪಕರಾದ ಒಟ್ಟೊ ಟೊಟೊ ಸುಗಿರಿ ಮತ್ತು ಹ್ಯಾನ್ ಆರ್ಮಿಂಗ್ ಹನಾಫಿಯಾ ಕೂಡ ಷೇರು ಬೆಲೆಗಳ ತೀವ್ರ ಕುಸಿತದಿಂದಾಗಿ ತಮ್ಮ ಸಂಪತ್ತಿನಲ್ಲಿ ಭಾರಿ ನಷ್ಟ ಅನುಭವಿಸಿದರು.ಕಂಪನಿಯ ಷೇರುಗಳು ಕುಸಿದಾಗ, ಈ ಮೂವರು ಬಿಲಿಯನೇರ್‌ಗಳ ಸಂಪತ್ತಿನ ಮೇಲೆ ದೊಡ್ಡ ಹೊಡೆತ ಬಿತ್ತು.

ಮರೀನಾ ಬುಡಿಮನ್ ಅವರ ಸಂಪತ್ತಿನ ಹಠಾತ್ ಕುಸಿತಕ್ಕೆ ಇಂಡೋನೇಷ್ಯಾದ ಷೇರು ಮಾರುಕಟ್ಟೆಯ ಅಸ್ಥಿರತೆಯೇ ಮುಖ್ಯ ಕಾರಣ. ಅಂತೆಯೇ ಡಿ.ಸಿ.ಐ. ಇಂಡೋನೇಷ್ಯಾದ ಷೇರುಗಳ ಹಠಾತ್ ಕುಸಿತಕ್ಕೆ ಹಲವಾರು ಅಂಶಗಳು ಕಾರಣವಾದವು.

ಮೊದಲನೆಯದಾಗಿ, ಇಂಡೋನೇಷ್ಯಾದ ಷೇರು ಮಾರುಕಟ್ಟೆಯು ತನ್ನ ಅನಿರೀಕ್ಷಿತ ಸ್ವರೂಪಕ್ಕೆ ಹೆಸರುವಾಸಿಯಾಗಿದೆ, ಅಲ್ಲಿ ಬೆಲೆಗಳು ತೀವ್ರವಾಗಿ ಬದಲಾಗಬಹುದು. ಎರಡನೆಯದಾಗಿ, ಹೆಚ್ಚಿನ ಇಂಡೋನೇಷ್ಯಾದ ಕಂಪನಿಗಳಂತೆ, ಡಿ.ಸಿ.ಐ. ಇಂಡೋನೇಷ್ಯಾ ಕೂಡಾ ಕಡಿಮೆ ವಹಿವಾಟು ನಡೆಸುವ ಷೇರುಗಳನ್ನು ಹೊಂದಿದೆ. ಅಂದರೆ ಸಣ್ಣ ಖರೀದಿ ಅಥವಾ ಮಾರಾಟ ಆದೇಶಗಳು ಸಹ ಷೇರುಗಳ ಬೆಲೆಯಲ್ಲಿ ಗಮನಾರ್ಹ ಬದಲಾವಣೆಗಳನ್ನು ಉಂಟುಮಾಡಬಹುದು. ಮೂರನೆಯದಾಗಿ, ಡಿ.ಸಿ.ಐ. ಇಂಡೋನೇಷ್ಯಾದ ಷೇರು ಮಾಲೀಕತ್ವದ ವಿತರಣೆಯು ಸಹ ಸಮಸ್ಯೆಯಾಗಿತ್ತು. ಕಂಪನಿಯ ಸುಮಾರು 78% ಷೇರುಗಳು ಕೇವಲ ನಾಲ್ಕು ವ್ಯಕ್ತಿಗಳ ಒಡೆತನದಲ್ಲಿದ್ದವು. ಇದು ಸಾರ್ವಜನಿಕ ವ್ಯಾಪಾರಕ್ಕೆ ಕಡಿಮೆ ಪ್ರಮಾಣದ ಷೇರುಗಳನ್ನು ಬಿಟ್ಟಿತು, ಇದರಿಂದಾಗಿ ಷೇರುಗಳು ಮಾರುಕಟ್ಟೆಯ ಏರಿಳಿತಗಳಿಗೆ ಹೆಚ್ಚು ಸೂಕ್ಷ್ಮವಾಗಿದ್ದವು. ಈ ಎಲ್ಲಾ ಅಂಶಗಳು ಒಟ್ಟಾಗಿ ಮರೀನಾ ಬುಡಿಮನ್ ಮತ್ತು ಅವರ ಸಹೋದ್ಯೋಗಿಗಳು ತಮ್ಮ ಸಂಪತ್ತಿನಲ್ಲಿ ದೊಡ್ಡ ನಷ್ಟವನ್ನು ಅನುಭವಿಸಲು ಕಾರಣವಾದವು.

ಸಿಂಗಾಪುರದ ಎಸ್‌ಜಿಎಂಸಿ ಕ್ಯಾಪಿಟಲ್ ಪ್ರೈವೇಟ್ ಲಿಮಿಟೆಡ್‌ನ ಫಂಡ್ ಮ್ಯಾನೇಜರ್ ಮೋಹಿತ್ ಮಿರ್‌ಪುರಿ ಅವರು ಈ ಬೆಲೆ ಏರಿಳಿತಗಳಿಗೆ ಪ್ರಮುಖ ಕಾರಣವೆಂದರೆ "ಟೈಟ್ ಫ್ರೀ ಫ್ಲೋಟ್("tight free float)" ಎಂದು ವಿವರಿಸುತ್ತಾರೆ. "ಟೈಟ್ ಫ್ರೀ ಫ್ಲೋಟ್" ಎಂದರೆ ಸಾರ್ವಜನಿಕವಾಗಿ ವ್ಯಾಪಾರ ಮಾಡುವ ಷೇರುಗಳ ಸಂಖ್ಯೆ ಕಡಿಮೆಯಿರುವುದು. ಬಿಡ್-ಆಫರ್ ಸ್ಪ್ರೆಡ್‌ಗಳು ಕಿರಿದಾಗಿ ಕಂಡುಬಂದರೂ, ದೊಡ್ಡ ಪ್ರಮಾಣದ ವ್ಯಾಪಾರವು ಷೇರುಗಳ ಬೆಲೆಯ ಮೇಲೆ ತೀವ್ರ ಪರಿಣಾಮ ಬೀರಬಹುದು ಎನ್ನುತ್ತಾರೆ.