Kantara: A Legend Chapter 1: 7 ವಾರವಾದ್ರೂ ನಿಂತಿಲ್ಲ ಕಾಂತಾರದ ಅಬ್ಬರ! ಒಂದು ವಾರದಲ್ಲಿ ಗಳಿಸಿದ್ದೆಷ್ಟು?

ಕಾಂತಾರದ ಅಬ್ಬರ ಇನ್ನೂ ನಿಂತಿಲ್ಲ. ಬಂದಿದ್ದು ಸ್ವಲ್ಪ ತಡವಾದ್ರೂ... ಭಾರೀ ಜನಮೆಚ್ಚುಗೆಯನ್ನು ಗಳಿಸಿದೆ. ಡಿವೈನ್‌ ಸ್ಟಾರ್‌ ರಿಷಬ್‌ ಶೆಟ್ಟಿ (Rishab Shetty) ಅಭಿನಯಿಸಿ, ನಿರ್ದೇಶಿಸಿರುವ ಕಾಂತಾರ: ಚಾಪ್ಟರ್‌ 1 ಚಿತ್ರವೂ ಸದ್ಯ ದೇಶದಲ್ಲಿ ಮಾತ್ರವಲ್ಲದೇ ವಿದೇಶದಲ್ಲೂ ಭಾರೀ ಸದ್ದು ಮಾಡುತ್ತಿದೆ. ಒಟಿಟಿಯಲ್ಲಿ ಬಿಡುಗಡೆಯಾದರೂ, ಥಿಯೇಟರ್‌ಗಳಲ್ಲಿ ಕಾಂತಾರದ ಕ್ರೇಜ್‌ ಇನ್ನೂ ಕಮ್ಮಿಯಾಗಿಲ್ಲ. ಸತತ 7 ವಾರವೂ ಉತ್ತಮ ಪ್ರದರ್ಶನದತ್ತ ಕಾಂತಾರ: ಚಾಪ್ಟರ್‌ 1 (Kantara: Chapter 1) ಕಾಲಿಟ್ಟಿದೆ.

ಏಳನೇ ವಾರವೂ ನಿಂತಿಲ್ಲ ಕಾಂತಾರದ ಅಬ್ಬರ!
ಆದರೆ 6 ವಾರಗಳಲ್ಲಿ ದಾಖಲೆ ಮೇಲೆ ದಾಖಲೆ ಮಾಡುತ್ತಾ ಬಂದಿದ್ದ, ಕಾಂತಾರ: ಚಾಪ್ಟರ್‌ 1 ಏಳನೇ ವಾರದಲ್ಲಿ ಯಾವುದೇ ದಾಖಲೆಯನ್ನು ಮೀರಲು ಸಾಧ್ಯವಾಗಲಿಲ್ಲ. ಏಳನೇ ವಾರದಲ್ಲೂ ಉತ್ತಮ ಪ್ರದರ್ಶನ ನೀಡಿ, ಪ್ರೇಕ್ಷಕರನ್ನು ಚಿತ್ರಮಂದಿರಗಳತ್ತ ಸೆಳೆಯುವಲ್ಲಿ ಯಶಸ್ವಿಯಾದರೂ, ಗಳಿಕೆಯಲ್ಲಿ ಸ್ವಲ್ಪ ಇಳಿಕೆ ಕಂಡಿದೆ ಎಂದು ವರದಿಯಾಗಿದೆ.

7ನೇ ವಾರದಲ್ಲಿ ಕಾಂತಾರ ಗಳಿಸಿದ್ದೆಷ್ಟು?
ಏಳನೇ ವಾರಾಂತ್ಯದಲ್ಲಿ, ಚಿತ್ರವು ಒಟ್ಟು ₹1.16 ಕೋಟಿ ಗಳಿಸಿದ್ದು, ಈ ಮೂಲಕ ಕಾಂತಾರ ದೇಶೀಯ ಮಾರುಕಟ್ಟೆಯಲ್ಲಿ ಒಟ್ಟು ₹620.72 ಕೋಟಿ ಸಂಗ್ರಹಿಸಿದೆ ಎಂದು ವರದಿಯಾಗಿದೆ. ಸತತ ಏಳನೇ ವಾರದಲ್ಲಿ ಕನ್ನಡ ಚಿತ್ರವೊಂದು ಇಷ್ಟು ಮಟ್ಟದಲ್ಲಿ ಗಳಿಕೆ ಕಂಡಿದ್ದರೂ, ಇತರ ಸಿನಿಮಾಗಳ ದಾಖಲೆಯನ್ನು ಮುಟ್ಟಲು ಸಾಧ್ಯವಾಗಲಿಲ್ಲ.

ಹೌದು, ಕಾಂತಾರ: ಚಾಪ್ಟರ್‌ 1, ಏಳನೇ ವಾರಾಂತ್ಯದಲ್ಲಿ, ಇತ್ತೀಚೆಗೆ ರಿಲೀಸ್‌ ಆಗಿ ಭಾರೀ ಸದ್ದು ಮಾಡಿದ್ದ ಅಶ್ವಿನ್ ಕುಮಾರ್ ಅವರ 'ಮಹಾವತಾರ್ ನರಸಿಂಹ' ಮತ್ತು ವಿಕ್ಕಿ ಕೌಶಲ್ ಅವರ 'ಛಾವಾ' ಚಿತ್ರಗಳ ಗಳಿಕೆಯನ್ನು ಮೀರಿಸಲು ಸಾಧ್ಯವಾಗಲಿಲ್ಲ.

ಅಶ್ವಿನ್ ಕುಮಾರ್ ಅವರ 'ಮಹಾವತಾರ್ ನರಸಿಂಹ' ತನ್ನ ಅದ್ಭುತ ಪ್ರದರ್ಶನದಿಂದ ₹250 ಕೋಟಿ ಗಳಿಸಿದ್ದು, ಆದರೆ ಏಳನೇ ವಾರಾಂತ್ಯದಲ್ಲಿ 'ಕಾಂತಾರ 2' ಗಿಂತಲೂ ಹೆಚ್ಚು ಆದಾಯ ಗಳಿಸಿದೆ. ಇದು ಏಳನೇ ವಾರಾಂತ್ಯದಲ್ಲಿ ₹1.91 ಕೋಟಿ ಗಳಿಸಿದ್ದು, ಎರಡನೇ ಅತಿ ಹೆಚ್ಚು ಗಳಿಕೆಯ ಚಿತ್ರವಾಗಿದೆ.

ನಿರ್ದಿಷ್ಟವಾಗಿ, 'ಮಹಾವತಾರ್ ನರಸಿಂಹ' 7ನೇ ವಾರದ ಶುಕ್ರವಾರ ₹44 ಲಕ್ಷ, ಶನಿವಾರ ₹57 ಲಕ್ಷ ಮತ್ತು ಭಾನುವಾರ ₹90 ಲಕ್ಷ ಗಳಿಸಿದೆ. ಆದರೆ, ಏಳನೇ ವಾರಾಂತ್ಯದಲ್ಲಿ ವಿಕ್ಕಿ ಕೌಶಲ್ ಮತ್ತು ಲಕ್ಷ್ಮಣ್ ಉತ್ತೇಕರ್ ಅವರ 'ಛಾವಾ' ಉತ್ತಮ ಗಳಿಕೆಯನ್ನು ಕಂಡಿತ್ತು.

'ಛಾವಾ' ಚಿತ್ರವು ಏಳನೇ ವಾರಾಂತ್ಯದಲ್ಲಿ ₹4.30 ಕೋಟಿ ಸಂಗ್ರಹಿಸಿದೆ. ಇದರಲ್ಲಿ ಶುಕ್ರವಾರ ₹1.15 ಕೋಟಿ, ಶನಿವಾರ ₹2 ಕೋಟಿ ಮತ್ತು ಭಾನುವಾರ ₹1.15 ಕೋಟಿ ಗಳಿಸುವ ಮೂಲಕ ಪ್ರೇಕ್ಷಕರಿಂದ ಭಾರೀ ಮೆಚ್ಚುಗೆ ಸುರಿಮಳೆಯನ್ನೇ ಪಡೆದುಕೊಂಡಿತ್ತು.

ಹಲವು ದಾಖಲೆಯತ್ತ "ಕಾಂತಾರ"!
ಕಾಂತಾರ: ಚಾಪ್ಟರ್‌ 1 ಚಿತ್ರ ಈಗಾಗಲೇ ಹಲವು ದಾಖಲೆಯನ್ನು ಸೃಷ್ಟಿಸಿದೆ. 2025 ರ ಅತೀ ದೊಡ್ಡ ಸೂಪರ್‌ ಹಿಟ್‌ ಚಿತ್ರವಾಗಿ ಮತ್ತು ಭಾರತೀಯ ಚಿತ್ರರಂಗದಲ್ಲಿ ಏಳನೇ ಅತೀ ದೊಡ್ಡ ಹಿಟ್‌ ಚಿತ್ರವೆಂದು ಗುರುತಿಸಿಕೊಂಡಿದೆ. ಈ ಮೂಲಕ ಕನ್ನಡ ಚಿತ್ರರಂಗವನ್ನು ಇಡೀ ವಿಶ್ವವೇ ತಿರುಗಿ ನೋಡುವಂತೆ ಮಾಡಿದ್ದು ಕಾಂತಾರ ಚಿತ್ರ ಅಂದರೂ ತಪ್ಪಾಗದು.