ಚೀನಾ ವಸ್ತುಗಳನ್ನು ಭಾರತದಲ್ಲಿ ಬಹಿಷ್ಕರಿಸುವುದಕ್ಕೆ ಕಾಸಿಯಾ ವಿರೋಧ

ಬೆಂಗಳೂರು: ಭಾರತದಲ್ಲಿ ಚೀನಾ ವಸ್ತುಗಳನ್ನು ನಿಷೇಧ ಮಾಡುವ ಕುರಿತಂತೆ ಕರ್ನಾಟಕ ಸಣ್ಣ ಕೈಗಾರಿಕೆಗಳ ಸಂಘ (ಕಾಸಿಯಾ) ವಿರೋಧ ವ್ಯಕ್ತಪಡಿಸಿದೆ.

ಒಂದು ವೇಳೆ ಭಾರತದಲ್ಲಿ ಚೀನಾ ವಸ್ತುಗಳನ್ನು ಸಂಪೂರ್ಣವಾಗಿ ನಿರಾಕರಿಸಿದರೆ ಸಣ್ಣ ಕೈಗಾರಿಕೆಗಳು ಭಾರೀ ಸಂಕಷ್ಟಕ್ಕೆ ಸಿಲುಕಿಕೊಳ್ಳಲಿವೆ ಎಂದು ಕಾಸಿಯಾ ಅಭಿಪ್ರಾಯಪಟ್ಟಿದೆ. ಭಾರತ ಮತ್ತು ಚೀನಾದ ನಡುವೆ ವಾರ್ಷಿಕವಾಗಿ 90 ಬಿಲಿಯನ್ ಡಾಲರ್ ವಹಿವಾಟು ಇದೆ. ವಿಶ್ವದಲ್ಲಿ ದೊಡ್ಡ ಉತ್ಪಾದನಾ ರಾಷ್ಟ್ರವಾಗಿರುವ ಚೀನಾವನ್ನು ಭಾರತ ಸಾಕಷ್ಟು ಅವಲಂಬಿಸಿದೆ. ಹೀಗಾಗಿ ಏಕಾಏಕಿ ಚೀನಾದ ವಸ್ತುಗಳ ಮೇಲೆ ನಿರ್ಭಂಧ ವಿಧಿಸುವುದು ಸರಿಯಲ್ಲ ಎಂದು ಕಾಸಿಯಾ ಹೇಳಿದೆ.

ಭಾರತದ ಅನೇಕ ಕ್ಷೇತ್ರಗಳಲ್ಲಿ ಚೀನಾದ ಅನೇಕ ಕಂಪನಿಗಳು ಹೂಡಿಕೆ ಮಾಡಿವೆ. ಇದರಿಂದ ಲಕ್ಷಾಂತರ ಜನರಿಗೆ ಉದ್ಯೋಗವಕಾಶಗಳು ಸಿಕ್ಕಿವೆ. ಅದೇ ರೀತಿ ಭಾರತದ ಅನೇಕ ಕಂಪನಿಗಳು ಚೀನಾದಲ್ಲಿ ಹೂಡಿಕೆ ಮಾಡಿವೆ. ಒಂದು ವೇಳೆ ಚೀನಾವನ್ನು ಬಹಿಷ್ಕರಿಸಿದರೇ ಈ ಎಲ್ಲ ವ್ಯವಹಾರಗಳು ನಿಂತು, ಲಕ್ಷಾಂತರ ಕೋಟಿ ರುಪಾಯಿ ಹಾನಿಯಾಗಲಿದೆ. ಇದು ಭಾರತದ ಆರ್ಥಿಕ ಹಿಂಜರಿತಕ್ಕೆ ಮಹತ್ವದ ಕಾರಣವಾಗಲಿದೆ ಎಂದು ಕಾಸಿಯಾ ಹೇಳಿದೆ.

ಕೋವಿಡ್ 19 ರ ಪರಿಣಾಮ ಕರ್ನಾಟಕದ ಸಣ್ಣ ಕೈಗಾರಿಕೆಗಳು ಭಾರೀ ಸಂಕಷ್ಟಕ್ಕೆ ಸಿಲುಕಿವೆ. ಹೀಗಾಗಿ ಸರ್ಕಾರ ಶೇ 4 ರ ಬಡ್ಡಿ ದರದಲ್ಲಿ ಸಾಲ ವಿತರಿಸಿ ಅವುಗಳನ್ನು ಪುನಶ್ಚೇತನ ಮಾಡಬೇಕು ಎಂದು ಕಾಸಿಯಾ ಮನವಿ ಮಾಡಿದೆ.