ಹೆಚ್ಚು ಮಾರಾಟವಾಗಲಿಲ್ಲ ಬಿಯರ್; ಅಬಕಾರಿ ಆದಾಯಕ್ಕೆ ಕತ್ತರಿ

| Updated: Thursday, June 4, 2020, 20:29 [IST]

ಬೆಂಗಳೂರು, ಜೂನ್ 4: ರಾಜ್ಯ ಸರ್ಕಾರಕ್ಕೆ ಹೆಚ್ಚು ಆದಾಯ ತಂದು ಕೊಡುವ ಅಬಕಾರಿ ಇಲಾಖೆ ಕೊರೊನಾವೈರಸ್ ಲಾಕ್‌ಡೌನ್‌ನಿಂದ ಸಂಕಷ್ಟಕ್ಕೆ ಜಾರಿದೆ. ಕಳೆದ 72 ದಿನ ನಿರಂತರವಾಗಿ ಲಾಕ್‌ಡೌನ್ ಪರಿಣಾಮ ಅಬಕಾರಿ ಇಲಾಖೆಗೆ ಹರಿದು ಬರುತ್ತಿದ್ದ ಆದಾಯ ಖೋತಾ ಆಗಿದೆ.

ಕಳೆದ ಮೇ ನಲ್ಲಿ 48 ದಿನಗಳ ಲಾಕ್‌ಡೌನ್ ಬಳಿಕ ಮದ್ಯ ಮಾರಾಟಕ್ಕೆ ರಾಜ್ಯ ಸರ್ಕಾರ ಅನುಕೂಲ ಕಲ್ಪಿಸಿತು. ಮದ್ಯ ಮಾರಾಟದಲ್ಲಿ ಏರುಗತಿ ಕಂಡರೂ, ನಿರೀಕ್ಷಿಸಿದ ಆದಾಯ ಬಂದಿಲ್ಲ ಎಂದು ಅಬಕಾರಿ ಮೂಲಗಳು ತಿಳಿಸುತ್ತವೆ. ಬೊಕ್ಕಸಕ್ಕೆ ಹಣ ಹರಿದು ಬರಲಿ ಎಂಬ ದೃಷ್ಟಿಯಿಂದ ರಾಜ್ಯ ಸರ್ಕಾರ ಕೆಲವು ಷರತ್ತುಗಳ ಮೇಲೆ ಮದ್ಯ ಮಾರಾಟಕ್ಕೆ ಅನುಮತಿ ನೀಡಿದೆ. ಆದರೆ, ಬಿಯರ್ ಮಾರಾಟ ಸಂಪೂರ್ಣ ಕುಸಿದಿರುವುದಾಗಿ ಅಬಕಾರಿ ಇಲಾಖೆ ಹೇಳಿದೆ.

ಕೊರೊನಾ ಹಾವಳಿಯಿಂದ ರಾಜ್ಯದಲ್ಲಿ ಬಿಯರ್ ಮಾರಾಟ ಶೇ 72 ರಷ್ಟು ಕುಸಿತ ಕಂಡಿರುವುದರಿಂದ ಬಿಯರ್ ಮಾರಾಟದಿಂದ ಬರುತ್ತಿದ್ದ ಆದಾಯ ಖೋತಾ ಆಗಿದೆ.

ಕೇವಲ 9.26 ಲಕ್ಷ ಬಿಯರ್ ಬಾಕ್ಸ್ ಮಾರಾಟ

ಲಾಕ್‌ಡೌನ್ ನಿಂದ ಜನ ಮನೆಯಲ್ಲಿದ್ದಾರೆ. ಬಾರ್, ಪಬ್‌ಗಳು ಮುಚ್ಚಿವೆ. ಇದರಿಂದ ಬಿಯರ್ ಪ್ರಿಯರು ಬಿಯರ್‌ನಿಂದ ದೂರ ಹೋದಂತಾಗಿದೆ. ಕಳೆದ ವರ್ಷದ ಮೇ 1 ರಿಂದ 31 ರವರೆಗೆ 21.31 ಲಕ್ಷ ಬಿಯರ್ ಬಾಕ್ಸ (ಕೇಸ್) ಮಾರಾಟವಾಗಿತ್ತು. ಈ ವರ್ಷ ಇದೇ ಅವಧಿಯಲ್ಲಿ ಕೇವಲ 9.26 ಲಕ್ಷ ಬಿಯರ್ ಬಾಕ್ಸ್ ಮಾರಾಟವಾಗಿವೆ.

ಕಾರಣ ಏನು?

ಬಿಯರ್ ಮಾರಾಟದಲ್ಲಿ ಇಷ್ಟೊಂದು ಪ್ರಮಾಣದಲ್ಲಿ ಇಳಿಕೆ ಕಾಣುವುದಕ್ಕೆ ಕೊರೊನಾ ಲಾಕ್‌ಡೌನ್ ಬಹುಮುಖ್ಯ ಕಾರಣವಾಗಿದೆ. ಬಾರ್ ರೆಸ್ಟೊರಂಟ್‌ ಹಾಗೂ ಪಬ್ ಗಳು ಮುಚ್ಚಿರುವುದರಿಂದ ಬಿಯರ್ ಪ್ರಿಯರು ಬಿಯರ್‌ನಿಂದ ದೂರ ಉಳಿಯುವಂತಾಗಿದೆ. ಅಲ್ಲದೇ, ಬಿಯರ್ ದರವೂ ಹೆಚ್ಚಳವಾಗಿರುವುದು ಒಂದು ಕಾರಣವಾಗಿದೆ. ದೇಶಿ ಮದ್ಯವೇ ಜಾಸ್ತಿ ಮಾರಾಟವಾಗುತ್ತಿದೆ.

ಅವಧಿ ಮೀರಿದ ಬಿಯರ್‌ಗಳನ್ನು ನಾಶಪಡಿಸಲೇಬೇಕಾಗುತ್ತದೆ

ಲಾಕ್‌ಡೌನ್ ನಿಂದ ಮದ್ಯ ಮಾರಾಟಕ್ಕೆ 48 ದಿನ ಬ್ರೇಕ್ ಬಿದ್ದಿತ್ತು. ಹೀಗಾಗಿ 3.2 ಲಕ್ಷ ಲೀಟರ್ ಬಿಯರ್ ಉಗ್ರಾಣಗಳಲ್ಲಿ ಶೇಕರಿಸಿಡಲಾಗಿತ್ತು. ಸದ್ಯ ಬಿಯರ್ ಹೆಚ್ಚು ಮಾರಾಟವಾಗುತ್ತಿಲ್ಲವಾದ್ದರಿಂದ ಅವಧಿ ಮೀರಿದ ಬಿಯರ್‌ಗಳನ್ನು ನಾಶಪಡಿಸಲೇಬೇಕಾಗುತ್ತದೆ. ಬಿಯರ್ ಬಾಟಲ್‌ ಅವಧಿ ಆರು ತಿಂಗಳು ಮಾತ್ರ ಆಗಿರುತ್ತದೆ.

40 ಕೋಟಿ ರುಪಾಯಿಯ ಬಿಯರ್ ನಾಶ

ಕಳೆದ ವರ್ಷ ಸುಮಾರು 40 ಕೋಟಿ ರುಪಾಯಿಯ ಬಿಯರ್ ನಾಶ ಪಡಿಸಲಾಗಿತ್ತು. ಈ ವರ್ಷ ಇದು ಇನ್ನೂ ಹೆಚ್ಚಾಗುವ ಸಂಭವವಿದೆ. ಲಾಕ್‌ಡೌನ್ ಪರಿಣಾಮವಾಗಿ ಮಾರಾಟವಾಗದೇ ಉಳಿದಿರುವ ಬಿಯರ್‌ ಅವಧಿ ಮುಗಿಯುತ್ತಾ ಬರುತ್ತಿದೆ ಎಂದು ಅಬಕಾರಿ ಮೂಲಗಳು ತಿಳಿಸಿವೆ