ಮಗಳ ಮದುವೆಗೆ 550 ಕೋಟಿ ರೂ. ಖರ್ಚು ಮಾಡಿದ್ದ ಉದ್ಯಮಿ ಮುಂದೆ ದಿವಾಳಿಯಾಗಿ ಜೈಲಿಗೆ ಹೋಗಿದ್ಯಾಕೆ?

ವ್ಯಾಪಾರದ ಜಗತ್ತು ಒಂದು ಸಮುದ್ರವಿದ್ದಂತೆ. ಈ ಸಾಗರ ಒಂದು ಕ್ಷಣ ನಮ್ಮನ್ನು ತೇಲಿಸಬಹುದು ಮತ್ತೊಮ್ಮೆ ಮುಳುಗಿಸಿಬಿಡಬಹುದು. ಅದಕ್ಕಾಗಿಯೇ ಹೇಳುವುದು ವ್ಯವಹಾರದಲ್ಲಿ ಯಶಸ್ಸು ಸಿಕ್ಕರೂ ನಿರಂತರ ಎಚ್ಚರದಲ್ಲಿದ್ದೂ, ಪ್ರಯತ್ನ ಮತ್ತು ಶ್ರಮ ಹಾಕುತ್ತಿರಬೇಕಾಗುತ್ತದೆ. ಕೊಂಚ ಪಾಲು ಅದೃಷ್ಟವನ್ನು ಅವಲಂಬಿಸಿರುತ್ತದೆ.

ಉದ್ಯಮ ಜಗತ್ತಿನಲ್ಲಿ ಯಶಸ್ವಿನ ಕಥೆಗಳು ಎಷ್ಟು ಸಿಗುತ್ತವೋ ಅದಕ್ಕಿಂತ ನಾಲ್ಕು ಪಟ್ಟು ವೈಫಲ್ಯದ ಸ್ಟೋರಿಗಳಿರುತ್ತವೆ. ಯಶಸ್ಸಿನ ಉತ್ತುಂಗದಲ್ಲಿ ದೊಡ್ಡ ದೊಡ್ಡ ಉದ್ಯಮಿಗಳಿಗೂ ಕೂಡಾ ನಷ್ಟ ಎಂಬುವುದು ಕಾಡದೇ ಬಿಡದು. ಆದರೆ ದುರಾದೃಷ್ಟಕರ ಪ್ರಕರಣದಲ್ಲಿ ಕೆಲ ಉದ್ಯಮಿಗಳು ಸಂಪೂರ್ಣ ದಿವಾಳಿಯಾಗಿಬಿಡುತ್ತದೆ. ಒಂದು ಕಾಲದಲ್ಲಿ ಸಿರಿವಂತಿಕೆಯ ತೇಲಾಡುತ್ತಿದ್ದ ವಿಶ್ವದ ಬಿಲಿಯನೇರ್ ಗಳಲ್ಲಿ ಒಬ್ಬರಾಗಿ ಆ ಬಳಿಕ ದಿವಾಳಿಯಲ್ಲಿ ದೈನಂದಿನ ಖರ್ಚು ವೆಚ್ಚಗಳಿಗೂ ಹೆಂಡತಿ ಮಕ್ಕಳನ್ನು ಅವಲಂಬಿಸಬೇಕಾದ ಪರಿಸ್ಥಿತಿ ಬಂದ ಉದ್ಯಮಿಯ ಸ್ಟೋರಿ ಇದು. ಅವರೇ ಪ್ರಮೋದ್ ಮಿತ್ತಲ್ . ಒಂದೊಮ್ಮೆ ಇಸ್ಪತ್ ಇಂಡಸ್ಟ್ರೀಸ್ ಲಿಮಿಟೆಡ್ (ಈಗ JSW ಇಸ್ಪಾಟ್ ಸ್ಟೀಲ್) ಅಧ್ಯಕ್ಷರಾಗಿದ್ದ ಇವರು ಯುನೈಟೆಡ್ ಕಿಂಗ್‌ಡಮ್ (ಯುಕೆ) ನಲ್ಲಿ ಶ್ರೀಮಂತ ವ್ಯಕ್ತಿಗಳಲ್ಲಿ ಒಬ್ಬರಾಗಿದ್ದರು. ಉಕ್ಕಿನ ಉದ್ಯಮಿ ಲಕ್ಷ್ಮಿ ಮಿತ್ತಲ್ ಅವರ ಸಹೋದರಾಗಿರುವ ಪ್ರಮೋದ್ ತನ್ನ ಸಾಲಗಾರರಿಗೆ 2.5 ಬಿಲಿಯನ್ ಪೌಂಡ್‌ಗಳನ್ನು (ಆಗಿನ ಸಮಯದಲ್ಲಿ ಸುಮಾರು 24,000 ಕೋಟಿ ರೂ.) ಪಾವತಿಸಿದ ನಂತರ 2020 ರಲ್ಲಿ ಅವರನ್ನು ದಿವಾಳಿ ಎಂದು ಘೋಷಿಸಲಾಯಿತು.

ಮಗಳ ಮದುವೆಗೆ 550 ಕೋಟಿ ರೂ. ಖರ್ಚು ಮಾಡಿದ್ದ ಪ್ರಮೋದ್ ಮಿತ್ತಲ್

ಪ್ರಮೋದ್ ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿಗಳಲ್ಲಿ ಒಬ್ಬರಾಗಿದ್ದರು. ಅವರ ಸಿರಿವಂತಿಕೆ ಎಷ್ಟಿತ್ತೆಂದರೆ ಅವರು ತಮ್ಮ ಖರ್ಚು ವೆಚ್ಚಗಳಿಗೆ ಐಷಾರಾಮಿ ಜೀವನಕ್ಕೆ ಹೆಸರುವಾಸಿಯಾಗಿದ್ದರು. ಪ್ರಮೋದ್ 2013 ರಲ್ಲಿ ತಮ್ಮ ಮಗಳು ಸೃಷ್ಟಿಯ ಮದುವೆಗಾಗಿ ಬರೋಬ್ಬರಿ 550 ಕೋಟಿ ರೂಪಾಯಿಗಳನ್ನು ಖರ್ಚು ಮಾಡಿದ್ದರು.

68 ವರ್ಷ ವಯಸ್ಸಿನ ಪ್ರಮೋದ್ ಅವರನ್ನು ಲಂಡನ್ ನ್ಯಾಯಾಲಯದಲ್ಲಿ 2020ರ ಜೂನ್ ನಲ್ಲಿ 130 ಮಿಲಿಯನ್ ಪೌಂಡ್‌ಗಳ ಸಾಲದೊಂದಿಗೆ ದಿವಾಳಿ ಎಂದು ಘೋಷಿಸಿತು. ಪ್ರಮೋದ್ ಮಿತ್ತಲ್ ಅವರು 2,549,089,370 ಪೌಂಡ್‌ಗಳ ಸಾಲವನ್ನು ಘೋಷಿಸಿದ್ದರು. ತನ್ನ ದಿವಾಳಿತನದ ಫೈಲಿಂಗ್‌ನಲ್ಲಿ, ಮಿತ್ತಲ್ ಅವರು ತನಗೆ ಯಾವುದೇ ವೈಯಕ್ತಿಕ ಆದಾಯವಿಲ್ಲ ಮತ್ತು ಆ ಸಮಯದಲ್ಲಿ ತನ್ನ ಹೆಸರಿಗೆ ಮಾತ್ರ ದೆಹಲಿಯಲ್ಲಿ ಕೇವಲ 45 ಪೌಂಡ್‌ಗಳ ಮೌಲ್ಯದ್ದಾಗಿದೆ ಎಂದು ಹೇಳಿಕೊಂಡಿದ್ದಾನೆ.

ಅವರ ಮಾಸಿಕ ವೈಯಕ್ತಿಕ ಖರ್ಚುವೆಚ್ಚ ಸುಮಾರು 2,000 ರಿಂದ 3,000 ಪೌಂಡ್‌ಗಳಷ್ಟಿದ್ದು, ಅವುಗಳನ್ನು ಅವರ ಪತ್ನಿ ಭರಿಸುತ್ತಿದ್ದರು. ತಮ್ಮ ಸಾಲಗಾರರಿಗೆ ಹಣವನ್ನು ಮರುಪಾವತಿ ಮಾಡಲು ಅವರು ತಮ್ಮ ಕುಟುಂಬದಿಂದ ಹಣವನ್ನು ಸಾಲ ಪಡೆದಿದ್ದರು. ತಮ್ಮ ಪತ್ನಿ ಸಂಗೀತಾಳಿಂದ 1.1 ಮಿಲಿಯನ್ ಪೌಂಡ್‌ಗಳು, ತಮ್ಮ ಮಗ ದಿವ್ಯೇಶ್‌ನಿಂದ 2.4 ಮಿಲಿಯನ್ ಪೌಂಡ್‌ಗಳು ಮತ್ತು ಅವರ ಸೊಸೆ ಅಮಿತ್ ಲೋಹಿಯಾಳಿಂದ 1.1 ಮಿಲಿಯನ್ ಪೌಂಡ್‌ಗಳು ಸಾಲವಾಗಿ ಪಡೆದಿದ್ದಾರೆ ಎಂದು ಆ ಸಮಯದ ವರದಿಗಳು ಹೇಳಿದೆ.

ದಿವಾಳಿಯಂಚಿಗೆ ತಲುಪಿದ್ದು ಹೇಗೆ?

ಪ್ರಮೋದ್ ಮಿತ್ತಲ್ ಅವರ ಆರ್ಥಿಕ ಅವನತಿ GIKIL ಎಂಬ ಬೋಸ್ನಿಯಾ ಮೂಲದ ಮೆಟಲರ್ಜಿಕಲ್ ಕಂಪನಿ ಪಡೆದ ಸಾಲಕ್ಕೆ ಭದ್ರತಾಧಾರರಾಗಲು ತೆಗೆದುಕೊಂಡ ನಿರ್ಣಾಯಕ ನಿರ್ಧಾರದಿಂದ ಪ್ರಾರಂಭವಾಯಿತು. ಅವರು ಈ ಕಂಪನಿಯ ಸಹ-ಮಾಲೀಕರಾಗಿದ್ದರು ಮತ್ತು ಕಂಪನಿಯ ಮೇಲ್ವಿಚಾರಣಾ ಮಂಡಳಿಯ ಅಧ್ಯಕ್ಷರಾಗಿದ್ದರು. 2013 ರಲ್ಲಿ, ಕಂಪನಿಗೆ 166 ಮಿಲಿಯನ್ ಡಾಲರ್‌ಗಳ ಸಾಲವನ್ನು ಮರುಪಾವತಿ ಮಾಡಲು ಸಾಧ್ಯವಾಗಲಿಲ್ಲ. ಇದರ ಪರಿಣಾಮವಾಗಿ, ಪ್ರಮೋದ್ ಮಿತ್ತಲ್ ಅವರ ಮೇಲೆ ಸಾಲವನ್ನು ತೀರಿಸುವಂತೆ ಒತ್ತಾಯ ಹೇರಲಾಯಿತು. ಇದು ಅವರನ್ನು ದಿವಾಳಿತನದ ಹಾದಿಗೆ ಕೊಂಡೊಯಿತು.

ಪ್ರಮೋದ್ ಮಿತ್ತಲ್ ಅವರು 2019 ರಲ್ಲಿ ಬಾಸ್ನಿಯಾದಲ್ಲಿ ವಂಚನೆ ಆರೋಪದ ಮೇಲೆ ಇತರ ಇಬ್ಬರು GIKIL ಅಧಿಕಾರಿಗಳೊಂದಿಗೆ ಬಂಧಿಸಲ್ಪಟ್ಟರು. ಒಂದು ವರ್ಷದ ನಂತರ, 2020 ರಲ್ಲಿ, ಅವರನ್ನು UK ನಲ್ಲಿ ದಿವಾಳಿ ಎಂದು ಘೋಷಿಸಲಾಯಿತು ಮತ್ತು ಅವರು ಶೂನ್ಯ ಆದಾಯವನ್ನು ಹೊಂದಿದ್ದಾರೆ ಮತ್ತು ಅವರ ದೈನಂದಿನ ವೆಚ್ಚಗಳನ್ನು ಪಾವತಿಸಲು ಅವರ ಹೆಂಡತಿ ಮತ್ತು ಮಕ್ಕಳನ್ನು ಅವಲಂಬಿಸಿದ್ದಾರೆ ಎಂದು ಘೋಷಿಸಿದರು.

ಹೆಚ್ಚುವರಿಯಾಗಿ, ಪ್ರಮೋದ್ ಮಿತ್ತಲ್ ಅವರು ಭಾರತದಲ್ಲಿ 2,200 ಕೋಟಿ ರೂಪಾಯಿ ವಂಚನೆ ಸ್ಟೇಟ್ ಟ್ರೇಡಿಂಗ್ ಕಾರ್ಪೊರೇಷನ್ (ಎಸ್‌ಟಿಸಿ) ನಲ್ಲಿ ಮನಿ ಲಾಂಡರಿಂಗ್ ಆರೋಪಗಳನ್ನು ಎದುರಿಸುತ್ತಿದ್ದಾರೆ. ಎಸ್‌ಟಿಸಿಯೊಂದಿಗಿನ ಒಪ್ಪಂದದ ನಿಯಮಗಳ ಪ್ರಕಾರ ಪಾವತಿಗಳನ್ನು ಮಾಡಲು ವಿಫಲವಾದ ಕಾರಣ ಮಿತ್ತಲ್ ಮೇಲೆ 'ಕ್ರಿಮಿನಲ್ ನಂಬಿಕೆಯ ಉಲ್ಲಂಘನೆ' ಆರೋಪವಿದೆ.

ಇಂದು, ಅವರ ಸಹೋದರ ಲಕ್ಷ್ಮಿ ಮಿತ್ತಲ್ ಅವರು ಫೋರ್ಬ್ಸ್ ಪ್ರಕಾರ 15.5 ಬಿಲಿಯನ್ ಯುಎಸ್ ಡಾಲರ್‌ಗಳ ನಿವ್ವಳ ಮೌಲ್ಯದೊಂದಿಗೆ ಇನ್ನೂ ಭಾರತದ ಅತ್ಯಂತ ಶ್ರೀಮಂತರಲ್ಲಿ ಒಬ್ಬರಾಗಿದ್ದಾರೆ.