ಭಾರತ್ ಎಲೆಕ್ಟ್ರಾನಿಕ್ಸ್ ಲಿಮಿಟೆಡ್ ನ ನೂತನ ಅಧ್ಯಕ್ಷ ಮತ್ತು ಎಂಡಿ ಮನೋಜ್ ಜೈನ್ ನೇಮಕ

ನವದೆಹಲಿ, ಜೂನ್‌ 21: ಭಾರತ್ ಎಲೆಕ್ಟ್ರಾನಿಕ್ಸ್ ಲಿಮಿಟೆಡ್ (BEL) ಮನೋಜ್ ಜೈನ್ ಅವರನ್ನು ಕಂಪನಿಯ ಹೊಸ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕರನ್ನಾಗಿ ನೇಮಿಸಿದೆ.

ಈ ವರ್ಷದ ಜೂನ್ 20 ರಿಂದ ಜಾರಿಗೆ ಬರುವಂತೆ ಬಿಇಎಲ್ ನ ನೂತನ ಎಂಡಿ ಮತ್ತು ಅಧ್ಯಕ್ಷರಾಗಿ ಮನೋಜ್ ಅವರನ್ನು ನೇಮಿಸಲಾಗಿದೆ. ಅಂದಹಾಗೆ ಮನೋಜ್ ಅವರು ಬಿಇಎಲ್ ನಲ್ಲಿ ತಮ್ಮ ವೃತ್ತಿಜೀವನದ ಮೂವತ್ತು ವರ್ಷಗಳನ್ನು ಕಳೆದಿದ್ದು, ಈ ಅವಧಿಯಲ್ಲಿ ಅವರು ಸಂಶೋಧನೆ ಮತ್ತು ಅಭಿವೃದ್ದಿ ಕ್ಷೇತ್ರಕ್ಕೆ ಗಣನೀಯ ಕೊಡುಗೆ ನೀಡಿದ್ದಾರೆ.

ಎಂಡಿಯಾಗಿ ನೇಮಕವಾಗುವ ಮೊದಲು ಮನೋಜ್ ಜೈನ್ ಅವರು ಸೆಪ್ಟೆಂಬರ್ 2022 ರಿಂದ ಸಂಶೋಧನೆ ಮತ್ತು ಅಭಿವೃದ್ಧಿ ವಿಭಾಗದ ನಿರ್ದೇಶಕರಾಗಿದ್ದರು. ಈ ಸಂದರ್ಭದಲ್ಲಿಯೇ ಅಂದರೆ ಆಗಸ್ಟ್ 1, 2023 ರಿಂದ ಅವರು ಬೆಂಗಳೂರು ಸಂಕೀರ್ಣ ನಿರ್ದೇಶಕರ ಹೆಚ್ಚುವರಿ ಪ್ರಭಾರ ಸ್ಥಾನದಲ್ಲೂ ಕರ್ತವ್ಯವನ್ನು ನಿರ್ವಹಿಸಿದ್ದರು. ಇನ್ನು ನಿರ್ದೇಶಕರಾಗಿ (R&D) ಭಡ್ತಿ ಪಡೆಯುವ ಮೊದಲು ಅವರು BEL ನ ಬೆಂಗಳೂರು ಕಾಂಪ್ಲೆಕ್ಸ್‌ನಲ್ಲಿ ಎಲೆಕ್ಟ್ರಾನಿಕ್ ವಾರ್‌ಫೇರ್ ಮತ್ತು ಏವಿಯಾನಿಕ್ಸ್ SBU ನ ಜನರಲ್ ಮ್ಯಾನೇಜರ್ ಆಗಿದ್ದರು. ನವೆಂಬರ್ 2022 ರಿಂದ ಮೇ 2023 ರ ನಡುವೆ, ಜೈನ್ ಮಾನವ ಸಂಪನ್ಮೂಲ ನಿರ್ದೇಶಕರ ಸ್ಥಾನವನ್ನು ಸಹ ನಿರ್ವಹಿಸಿದ್ದರು.

ಆರ್ ಇಸಿ ಜೈಪುರ ( ಈಗ MNIT) ಯಿಂದ ಚಿನ್ನದ ಪದಕದೊಂದಿಗೆ ಎಲೆಕ್ಟ್ರಾನಿಕ್ಸ್ ನಲ್ಲಿ ಎಂಜಿನಿಯರಿಂಗ್ ಪದವಿಯನ್ನು ಪೂರ್ಣಗೊಳಿಸಿದ ನಂತರ 1991 ರ ಆಗಸ್ಟ್ ನಲ್ಲಿ ಭಾರತ್ ಎಲೆಕ್ಟ್ರಾನಿಕ್ಸ್ ಲಿಮಿಟೆಡ್ ನಲ್ಲಿ ಪ್ರೊಬೇಷನರಿ ಇಂಜಿನಿಯರ್ ಆಗಿ ತಮ್ಮ ವೃತ್ತಿಜೀವನ ಆರಂಭಿಸಿದರು. ಬಿಇ ಎಲ್ ನ ಕೋಟ್‌ದ್ವಾರ ಘಟಕದಲ್ಲಿ D&E ಯಲ್ಲಿ ಅವರ ಆರಂಭಿಕ ವರ್ಷಗಳಲ್ಲಿ, ಮನೋಜ್ ಜೈನ್ ಅವರು ಡಿಜಿಟಲ್ ಮಲ್ಟಿಪ್ಲೆಕ್ಸರ್‌ಗಳು, ಕ್ರಾಸ್ ಕನೆಕ್ಟ್‌ಗಳು, CDOT ಎಕ್ಸ್‌ಚೇಂಜ್‌ಗಳು ಮತ್ತು ಮಿಲಿಟರಿ ಸ್ವಿಚ್‌ಗಳ ಅಭಿವೃದ್ಧಿಯಲ್ಲಿ ಪ್ರಮುಖ ಪಾತ್ರ ವಹಿಸಿದರು.

ಇದಾದ ನಂತರ 1999 ರಲ್ಲಿ ಬೆಂಗಳೂರಿನ ಬಿಇಎಲ್ ನ ಕೇಂದ್ರೀಯ ಸಂಶೋಧನಾ ಪ್ರಯೋಗಾಲಯದಲ್ಲಿ ರಕ್ಷಣಾ ಜಾಲಗಳು ಮತ್ತು ನೆಟ್‌ವರ್ಕ್ ಮತ್ತು ಬೃಹತ್ ಭದ್ರತಾ ಪರಿಹಾರಗಳ ತಂತ್ರಜ್ಞಾನಗಳ ಅಭಿವೃದ್ಧಿಯಲ್ಲಿ ತೊಡಗಿಕೊಂಡರು. BEL ನ ಪ್ರಮುಖ ವ್ಯವಹಾರಗಳಲ್ಲಿ ಒಂದಾದ ರಾಡಾರ್ , ಬಲ್ಕ್ ಸೆಕ್ಯುರಿಟಿ ಸೆಲ್ಯೂಷನ್ , ಅವರು FPGA ಬಳಸಿಕೊಂಡು VeXT, ಸ್ಕ್ಯಾನ್ ಪರಿವರ್ತಕ ಮತ್ತು ಡಿಸ್ಪ್ಲೇ ಅಭಿವೃದ್ಧಿಯಲ್ಲಿ ತೊಡಗಿಸಿಕೊಂಡಿದ್ದರು.

2017 ರ ಡಿಸೆಂಬರ್ ನಿಂದ ಮೇ 2019 ರವರೆಗೆ CRL-ಬೆಂಗಳೂರಿನ ಮುಖ್ಯ ವಿಜ್ಞಾನಿಯಾಗಿ ಸೇವೆ ಸಲ್ಲಿಸಿದರು ಈ ವೇಳೆ ಅವರು ವಿವಿಧ ಡೊಮೇನ್ ಗಳಲ್ಲಿ ತಾಂತ್ರಿಕ ಪ್ರಗತಿಯನ್ನು ಮೇಲ್ವಿಚಾರಣೆ ಮಾಡಿದರು. ನಂತರ ಜೂನ್ 2019 ರಲ್ಲಿ BEL ನ ಉತ್ಪನ್ನ ಅಭಿವೃದ್ಧಿ ಮತ್ತು ನಾವೀನ್ಯತೆ ಕೇಂದ್ರದ (PD&IC) ಜನರಲ್ ಮ್ಯಾನೇಜರ್ ಪಾತ್ರ ವಹಿಸಿಕೊಂಡು ತಮ್ಮ ನಾಯಕತ್ವ ಪಾತ್ರದಲ್ಲಿ ಮುಂದುವರಿದರು.

ಮನೋಜ್ ಜೈನ್ ಅವರು ವಿವಿಧ R&D ಪ್ರಶಸ್ತಿಗಳು, Key Contributor Awards, ರಕ್ಷಾ ಮಂತ್ರಿ ಪ್ರಶಸ್ತಿ ಮತ್ತು SODET ಪ್ರಶಸ್ತಿಗಳನ್ನು ಸ್ವೀಕರಿಸಿದ್ದಾರೆ. ಅವರು ಅನೇಕ ತಾಂತ್ರಿಕ ವರದಿಗಳನ್ನು ಪ್ರಕಟಿಸಿದ್ದಾರೆ, ಹಲವಾರು ಪೇಟೆಂಟ್‌ಗಳಿಗೆ ಅರ್ಜಿ ಸಲ್ಲಿಸಿದ್ದಾರೆ ಮತ್ತು ರಕ್ಷಣಾ ಬಳಕೆದಾರರು ಮತ್ತು DRDO ಗಳಿಗೆ ಉಪನ್ಯಾಸಗಳನ್ನು ನೀಡಿದ್ದಾರೆ.