Meesho IPO: ಹೊಸ ಶಿಖರ ಸಾಧಿಸಿದ ಮೀಶೋ IPO...ಮೊದಲ ದಿನವೇ 63% ಸಬ್‌ಸ್ಕ್ರಿಪ್ಷನ್! ಅಪ್ಲೈ ಮಾಡಲು ಸೂಕ್ತವೇ?

ಭಾರತದಲ್ಲಿ ಪ್ರಸಿದ್ಧಿ ಪಡೆದಿರುವ ಇ-ಕಾಮರ್ಸ್ ಸಂಸ್ಥೆಯಾದ ಮೀಶೋ (Meesho) ಈಗ ಹೂಡಿಕೆ ಜಗತ್ತಿನಲ್ಲಿ ಮತ್ತೊಂದು ಸಾಧನೆ ಮಾಡಿದೆ. ಇಡೀ ದೇಶವೇ ತಿರುಗಿನೋಡುವಂತೆ ಮಾಡಿದೆ ಇಂದಿನ ಮೀಶೋ ಸಾಧನೆ. ಅದೇನೆಂದರೆ ಮೀಶೋ ಕಂಪನಿ ಇಂದು (ಡಿಸೆಂಬರ್ 3) ಅಧಿಕೃತವಗಿ, IPO ಆರಂಭಿಸಿದೆ. ಆರಂಭದ ಮೊದಲ ದಿನವೇ ಊಹೆಗೂ ಮೀರಿದ ಸಾಧನೆ ಮಾಡಿದೆ. ಅಂದರೆ ಐಪಿಒ ಆರಂಭಿಸಿದ ಕೇವಲ 3 ಗಂಟೆಗಳಲ್ಲಿ 63% ಸಬ್ಸ್ಕ್ರಿಪ್ಷನ್ ಆಗಿದ್ದು, ಕಂಪನಿಯ ಮೇಲೆ ಮಾರುಕಟ್ಟೆ ವಿಶ್ವಾಸ ಇದೆ ಎಂದು ಸ್ಪಷ್ಟವಾಗಿದೆ. ವಿಶೇಷವಾಗಿ ಚಿಲ್ಲರೆ ಹೂಡಿಕೆದಾರರು ಮೊದಲಿನಿಂದಲೇ ಹೆಚ್ಚು ಆಸಕ್ತಿ ತೋರಿಸಿರುವುದು ಕಾಣಬಹುದು.

ಮೊದಲ ದಿನದ ಸಬ್ಸ್ಕ್ರಿಪ್ಷನ್ ವಿವರಗಳು:

ಮೀಶೋ ಐಪಿಒ ಆರಂಭಿಸಿದ ಮೊದಲ ದಿನವೇ ಒಟ್ಟು 0.64 ಪಟ್ಟು ಸಬ್ಸ್ಕ್ರೈಬ್ ಆಗಿದೆ. ಹಾಗೂ ಚಿಲ್ಲರೆ ಹೂಡಿಕೆದಾರರ ವಿಭಾಗ 2.37 ಮಟ್ಟಕ್ಕೆ ತಲುಪಿದೆ. ಇದೊಂದು ಅತ್ಯಂತ ಬಲವಾದ ಪ್ರತಿಕ್ರಿಯೆ ಎನ್ನಬಹುದಾಗಿದೆ. NII ವಿಭಾಗದಲ್ಲಿ 0.77 ಪಟ್ಟು ಸಬ್ಸ್ಕ್ರಿಪ್ಷನ್ ಆಗಿದ್ದರೆ, QIB ವಿಭಾಗದಲ್ಲಿ ಮೊದಲ ದಿನ ಯಾವುದೇ ಚಟುವಟಿಕೆ ಕಾಣಿಸಲಿಲ್ಲ. ಹೂಡಿಕೆದಾರರ ಈ ಪ್ರತಿಕ್ರಿಯೆ IPOಗೆ ಉತ್ತಮ ಆರಂಭವಾಗಿದೆ.

GMP ಜಿಗಿತ - ಲಿಸ್ಟಿಂಗ್ ಲಾಭದ ಸೂಚನೆ:

Meesho IPO ಗ್ರೀ ಮಾರ್ಕೆಟ್ ಪ್ರೀಮಿಯಂ (GMP) ₹44ಕ್ಕೆ ಏರಿಕೆಯಾಗಿದೆ. ಬೆಲೆಪಟ್ಟಿ 111 ರೂ. ಆಗಿರುವುದರಿಂದ, IPO ಲಿಸ್ಟಿಂಗ್ 155 ರೂ. ಸುತ್ತ ಬರಬಹುದು ಎಂದು ಮಾರುಕಟ್ಟೆಯಲ್ಲಿ ನಿರೀಕ್ಷಿಸಲಾಗಿದೆ. ಮಾರುಕಟ್ಟೆ ಮನೋಭಾವ ಇದೇ ರೀತಿ ಮುಂದುವರಿದರೆ, 39%ರವರೆಗೆ ಲಾಭದ ಸಾಧ್ಯತೆ ಇದೆ ಎಂದು ವಿಶ್ಲೇಷಕರು ಹೇಳುತ್ತಿದ್ದಾರೆ.

IPO ಗಾತ್ರ ಮತ್ತು ಹಣ ಸಂಗ್ರಹಿಸುವ ವಿಧಾನ:

ಒಟ್ಟಿನಲ್ಲಿ Meesho IPO ರೂ. 5,421.20 ಕೋಟಿಯ ಗಾತ್ರದದ್ದು. ಫ್ರೆಶ್ ಇಶ್ಯೂ ಭಾಗದಿಂದ ರೂ. 4,250 ಕೋಟಿ ಸಂಗ್ರಹಿಸಲಾಗುತ್ತಿದ್ದು, ಈ ಹಣವನ್ನು ಕಂಪನಿಯ ವಿಸ್ತರಣೆ, ಕಾರ್ಯಾಚರಣೆ ಮತ್ತು ಹಣಕಾಸು ಬಲಪಡಿಸಲು ಬಳಸಲಾಗುತ್ತದೆ. ಜೊತೆಗೆ OFS ಮೂಲಕ ಹಳೆಯ ಹೂಡಿಕೆದಾರರು ರೂ. 1,171.20 ಕೋಟಿ ಮೌಲ್ಯದ ಷೇರುಗಳನ್ನು ಮಾರಾಟ ಮಾಡುತ್ತಿದ್ದಾರೆ.

ಬೆಲೆಪಟ್ಟಿ ಮತ್ತು IPO ವೇಳಾಪಟ್ಟಿ:

Meesho IPO ಬೆಲೆಪಟ್ಟಿ 105 ರೂ. ಇಂದ 111 ರೂ. ನಡುವೆ ನಿಗದಿಯಾಗಿದೆ. IPO ಡಿಸೆಂಬರ್ 3ರಿಂದ 5ರವರೆಗೆ ಹೂಡಿಕೆಗಾಗಿ ತೆರೆದಿದ್ದು, ಅಲಾಟ್ಮೆಂಟ್ ಡಿಸೆಂಬರ್ 8ರಂದು ನಡೆಯಲಿದೆ. ಷೇರುಗಳು ಡಿಸೆಂಬರ್ 10ರಂದು BSE ಮತ್ತು NSEಗಳಲ್ಲಿ ಲಿಸ್ಟ್ ಆಗುವ ಸಾಧ್ಯತೆ ಇದೆ.

Meesho ವ್ಯವಹಾರ ಮಾದರಿಯ ಪ್ರಮುಖ ಅಂಶ:

Meesho ಒಂದು ಶೂನ್ಯ ಕಮಿಷನ್ ಮಾರುಕಟ್ಟೆ ಮಾದರಿಯನ್ನು ಬಳಸುತ್ತದೆ. ಇದರ ಮೂಲಕ ಮಾರಾಟಗಾರರಿಗೆ ಕಡಿಮೆ ವೆಚ್ಚದಲ್ಲಿ ತಮ್ಮ ಉತ್ಪನ್ನಗಳನ್ನು ಗ್ರಾಹಕರಿಗೆ ತಲುಪಿಸುವ ಅವಕಾಶ ಸಿಗುತ್ತದೆ. ಕಂಪನಿ ಜಾಹೀರಾತು, ಲಾಜಿಸ್ಟಿಕ್ಸ್ ಮತ್ತು ಮಾರ್ಚೆಂಟ್ ಸೇವೆಗಳ ಮೂಲಕ ಆದಾಯ ಗಳಿಸಿದೆ. ಕಳೆದ ಎರಡು ವರ್ಷಗಳಲ್ಲಿ ಪಾಸಿಟಿವ್ ಫ್ರೀ ಕ್ಯಾಶ್ ಫ್ಲೋ ದಾಖಲಿಸಿರುವುದು ಹೂಡಿಕೆದಾರರಲ್ಲಿ ನಂಬಿಕೆ ಹೆಚ್ಚಿಸಿದೆ.

ಬ್ರೋಕರೇಜ್ ಸಂಸ್ಥೆಗಳ ಅಭಿಪ್ರಾಯ:

Meesho IPO ಕುರಿತು ವಿಮರ್ಶೆ ಮಾಡಿದ 8 ಬ್ರೋಕರೇಜ್ ಸಂಸ್ಥೆಗಳಲ್ಲಿ 4 ಸಂಸ್ಥೆಗಳು IPOಗೆ "ಸಬ್‌ಸ್ಕ್ರೈಬ್" ಶಿಫಾರಸು ಮಾಡಿವೆ. ಕಂಪನಿ FY25 ಆಧಾರದ ಮೇಲೆ 5.3x ಬೆಲೆಯಿಂದ ಮಾರಾಟದಲ್ಲಿ (Price to sale) ಟ್ರೇಡ್ ಆಗುತ್ತಿರುವುದು ಗಮನಾರ್ಹ. ತಾಂತ್ರಿಕತೆ ಮತ್ತು ಮಾರ್ಕೆಟಿಂಗ್‌ಗಾಗಿ ಹೆಚ್ಚಿನ ಹೂಡಿಕೆ ಮಾಡುತ್ತಿರುವುದರಿಂದ ದೀರ್ಘಾವಧಿಯಲ್ಲಿ ಲಾಭದಾಯಕತೆ ಸಾಧ್ಯವೆಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಹೂಡಿಕೆದಾರರಿಗೆ ಅಂತಿಮ ಸಂದೇಶ:

Meesho IPOಗೆ ಮೊದಲ ದಿನ ಸಿಕ್ಕ ಉತ್ತಮ ಪ್ರತಿಕ್ರಿಯೆ, GMP ಏರಿಕೆ ಮತ್ತು ಬ್ರೋಕರೇಜ್‌ಗಳಿಂದ ಬಂದ ಧನಾತ್ಮಕ ಅಭಿಪ್ರಾಯ-ಇವೆಲ್ಲವೂ ಇದು ಪರಿಗಣಿಸಬಹುದಾದ IPO ಎಂದು ಸೂಚಿಸುತ್ತವೆ. ವಿಶೇಷವಾಗಿ ದೀರ್ಘಾವಧಿ ಹೂಡಿಕೆ ಯೋಚಿಸುವವರಿಗೆ ಇದು ಆಕರ್ಷಕ ಆಯ್ಕೆಯಾಗಬಹುದು.

(ಹಕ್ಕುತ್ಯಾಗ: ವ್ಯಕ್ತಿಗತ ವಿಶ್ಲೇಷಕರ ಅಥವಾ ಘಟಕಗಳ ಅಭಿಪ್ರಾಯಗಳು ಮತ್ತು ಶಿಫಾರಸುಗಳು ಮಾತ್ರ ಇಲ್ಲಿ ಸೂಚಿಸಲಾಗಿದೆ ಮತ್ತು ಅವು Goodreturns.in ಅಥವಾ Greynium Information Technologies Private Limited (ಒಟ್ಟಿಗೆ "ನಾವು" ಎಂದು ಉಲ್ಲೇಖಿಸಲಾಗಿದೆ) ಅವರ ಅಭಿಪ್ರಾಯಗಳನ್ನು ಪ್ರತಿಬಿಂಬಿಸುವುದಿಲ್ಲ. ಯಾವುದೇ ವಿಷಯದ ನಿಖರತೆ, ಪೂರ್ಣತೆ ಅಥವಾ ನಂಬಿಕಾರ್ಹತೆಯನ್ನು ನಾವು ಖಚಿತಪಡಿಸುವುದಿಲ್ಲ, ಸಮರ್ಥಿಸುತ್ತಿಲ್ಲ ಅಥವಾ ಹೊಣೆಗಾರರಲ್ಲ. ನಾವು ಯಾವುದೇ ಹೂಡಿಕೆ ಸಲಹೆ ನೀಡುವುದಿಲ್ಲ ಅಥವಾ_SECURITIES_ ಖರೀದಿ ಅಥವಾ ಮಾರಾಟವನ್ನು ಪ್ರೇರೇಪಿಸುವುದಿಲ್ಲ. ಎಲ್ಲಾ ಮಾಹಿತಿಯು ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರ ನೀಡಲಾಗಿದ್ದು, ಯಾವುದೇ ಹೂಡಿಕೆ ನಿರ್ಧಾರಗಳನ್ನು ಕೈಗೊಳ್ಳುವ ಮೊದಲು ಲೈಸೆನ್ಸ್ ಪಡೆದ ಹಣಕಾಸು ಸಲಹೆಗಾರರಿಂದ ಸ್ವತಃ ಪರಿಶೀಲಿಸುವುದು ಅಗತ್ಯ.)