$100,000 ವೀಸಾ ಶುಲ್ಕ: ಹೊಸ ನಿಯಮಕ್ಕೆ ಮೊದಲು H-1B ವೀಸಾ ಹೊಂದಿರುವವರು USಗೆ ಹಿಂತಿರುಗಿ ಎಂದ ಮೈಕ್ರೋಸಾಫ್ಟ್!

ಅಮೆರಿಕದ ವೀಸಾ ನಿಯಮಗಳಲ್ಲಿ ಬೃಹತ್ ಬದಲಾವಣೆ ಘೋಷಿತವಾಗುತ್ತಿದ್ದಂತೆಯೇ, ಜಾಗತಿಕ ತಂತ್ರಜ್ಞಾನ ದೈತ್ಯ ಮೈಕ್ರೋಸಾಫ್ಟ್ ತನ್ನ H-1B ಮತ್ತು H-4 ವೀಸಾ ಹೊಂದಿರುವ ಉದ್ಯೋಗಿಗಳಿಗೆ ತಕ್ಷಣವೇ ಯುಎಸ್‌ಗೆ ಹಿಂತಿರುಗುವಂತೆ ಸೂಚಿಸಿದೆ. ಸೆಪ್ಟೆಂಬರ್ 21ರ ಗಡುವಿನ ನಂತರ, ಪ್ರತಿ H-1B ವೀಸಾಗೆ ಕಂಪನಿಗಳು ವರ್ಷಕ್ಕೆ $100,000 ಪಾವತಿಸಬೇಕಾದ ನಿಯಮ ಜಾರಿಯಾಗಲಿದೆ.

ಮೈಕ್ರೋಸಾಫ್ಟ್ ತನ್ನ ಆಂತರಿಕ ಇಮೇಲ್‌ನಲ್ಲಿ ಸ್ಪಷ್ಟವಾಗಿ ಹೇಳಿದೆ: "H-1B ಮತ್ತು H-4 ವೀಸಾ ಹೊಂದಿರುವವರು ಗಡುವಿನ ಮುನ್ನವೇ ಅಮೆರಿಕಕ್ಕೆ ಹಿಂತಿರುಗಿ, ಮುಂದಿನ ದಿನಗಳಲ್ಲಿ ಅಲ್ಲೇ ಉಳಿಯಬೇಕು. ಗಡುವಿನ ನಂತರ ಅಮೆರಿಕಕ್ಕೆ ಹಿಂತಿರುಗುವವರಿಗೆ ಕಂಪನಿಗಳು ಹೆಚ್ಚಿನ ವೆಚ್ಚವನ್ನು ಭರಿಸಬೇಕಾಗುತ್ತದೆ," ಎಂದು ಕಂಪನಿ ಎಚ್ಚರಿಸಿದೆ.

ಟ್ರಂಪ್ ಸಹಿ ಹಾಕಿದ ಕಾರ್ಯಕಾರಿ ಆದೇಶ:

ಈ ನಿಯಮವನ್ನು ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸೆಪ್ಟೆಂಬರ್ 19 ರಂದು ಕಾರ್ಯಕಾರಿ ಆದೇಶಕ್ಕೆ ಸಹಿ ಹಾಕಿ ಜಾರಿಗೆ ತಂದಿದ್ದಾರೆ. ಹೊಸ ನಿಯಮದಡಿ, H-1B ವೀಸಾ ಪ್ರಾಯೋಜನೆ ಮಾಡಲು ಕಂಪನಿಗಳು ಪ್ರತಿ ಅರ್ಜಿಗೆ ವರ್ಷಕ್ಕೆ $100,000 ಪಾವತಿಸಬೇಕಾಗುತ್ತದೆ. ಇದು ಭಾರತದಂತೆ ಚೀನಾ ದೇಶದ ನುರಿತ ಕಾರ್ಮಿಕರ ಮೇಲೆ ಹೆಚ್ಚು ಅವಲಂಬಿಸಿರುವ ಟೆಕ್ ಕಂಪನಿಗಳಿಗೆ ದೊಡ್ಡ ಹೊಡೆತವಾಗಿದೆ. ಟ್ರಂಪ್ ಈ ಬದಲಾವಣೆಯನ್ನು ಸಮರ್ಥಿಸಿಕೊಂಡು, "ಅವರು ತುಂಬಾ ಸಂತೋಷಪಡುತ್ತಾರೆ ಎಂದು ನಾನು ಭಾವಿಸುತ್ತೇನೆ," ಎಂದು ಪ್ರತಿಕ್ರಿಯೆ ನೀಡಿದ್ದಾರೆ.

ಅಮೆರಿಕ ಸರ್ಕಾರದ ಸ್ಪಷ್ಟ ಸಂದೇಶ:

ಅಮೆರಿಕದ ವಾಣಿಜ್ಯ ಕಾರ್ಯದರ್ಶಿ ಹೊವಾರ್ಡ್ ಲಟ್ನಿಕ್ ತಿಳಿಸಿದ್ದಾರೆ: "ನಮ್ಮ ದೇಶದ ಶ್ರೇಷ್ಠ ವಿಶ್ವವಿದ್ಯಾಲಯಗಳಿಂದ ಪದವಿ ಪಡೆದ ಅಮೆರಿಕನ್ ಯುವಕರಿಗೆ ತರಬೇತಿ ನೀಡಿ. ಬೇರೆ ದೇಶಗಳಿಂದ ಜನರನ್ನು ಕರೆದು ನಮ್ಮ ಉದ್ಯೋಗಗಳನ್ನು ಕಸಿದುಕೊಳ್ಳುವ ಪರಿಸ್ಥಿತಿ ಬಾರದಂತೆ ನೋಡಿಕೊಳ್ಳಿ," ಎಂದು ಸ್ಪಷ್ಟ ಸಂದೇಶ ನೀಡಿದ್ದಾರೆ.

ಶ್ವೇತಭವನದ ಸಿಬ್ಬಂದಿ ಕಾರ್ಯದರ್ಶಿ ವಿಲ್ ಶಾರ್ಫ್ ಹೇಳಿದ್ದಾರೆ: "H-1B ವೀಸಾ ಕಾರ್ಯಕ್ರಮ ಹೆಚ್ಚಾಗಿ ದುರುಪಯೋಗವಾಗುತ್ತಿದೆ. ಹೊಸ ಶುಲ್ಕವು ನಿಜವಾಗಿಯೂ ನುರಿತ ಮತ್ತು ಅವಶ್ಯಕ ಉದ್ಯೋಗಿಗಳನ್ನು ಮಾತ್ರ ಕರೆತರಲು ಕಂಪನಿಗಳನ್ನು ಒತ್ತಾಯಿಸುತ್ತದೆ," ಎಂದು ಹೇಳಿದ್ದಾರೆ.

ಭಾರತಕ್ಕೆ ದೊಡ್ಡ ಹೊಡೆತ:

ಸರ್ಕಾರಿ ದತ್ತಾಂಶಗಳ ಪ್ರಕಾರ, ಕಳೆದ ವರ್ಷ H-1B ವೀಸಾಗಳಲ್ಲಿ ಶೇ.71 ರಷ್ಟು ವೀಸಾಗಳನ್ನು ಭಾರತ ಮೂಲದವರು ಪಡೆದಿದ್ದರು. ಚೀನಾ ಶೇ.11.7ರೊಂದಿಗೆ ಎರಡನೇ ಸ್ಥಾನದಲ್ಲಿತ್ತು. 2025ರ ಮೊದಲಾರ್ಧದಲ್ಲಿ ಅಮೆಜಾನ್ ಮತ್ತು ಅದರ ಕ್ಲೌಡ್ ವಿಭಾಗ AWS ಒಟ್ಟಾರೆ 12,000 ಕ್ಕೂ ಹೆಚ್ಚು H-1B ವೀಸಾಗಳಿಗೆ ಅನುಮೋದನೆ ಪಡೆದರೆ, ಮೈಕ್ರೋಸಾಫ್ಟ್ ಮತ್ತು ಮೆಟಾ ತಲಾ 5,000 ಕ್ಕೂ ಹೆಚ್ಚು ವೀಸಾಗಳಿಗೆ ಅನುಮೋದನೆ ಪಡೆದಿವೆ. ಹೀಗಾಗಿ, ಹೊಸ ನಿಯಮದಿಂದ ಭಾರತೀಯ ನುರಿತ ಉದ್ಯೋಗಿಗಳಿಗೆ ಅಮೆರಿಕ ಪ್ರವೇಶ ಇನ್ನಷ್ಟು ಕಷ್ಟವಾಗುವ ಸಾಧ್ಯತೆ ಇದೆ.

ಟೆಕ್ ಉದ್ಯಮಕ್ಕೆ ಏನರ್ಥ?

ಟೆಕ್ ಕಂಪನಿಗಳು ವರ್ಷಕ್ಕೆ ಸಾವಿರಾರು ನುರಿತ ವಿದೇಶಿ ಉದ್ಯೋಗಿಗಳನ್ನು ನೇಮಿಸುತ್ತವೆ. ಹೆಚ್ಚುವರಿ $100,000 ಶುಲ್ಕವು ಕಂಪನಿಗಳ ನೇಮಕಾತಿ ವೆಚ್ಚವನ್ನು ಭಾರೀ ಪ್ರಮಾಣದಲ್ಲಿ ಹೆಚ್ಚಿಸುವ ಸಾಧ್ಯತೆ ಇದೆ. ಕೆಲ ಕಂಪನಿಗಳು ಅಮೆರಿಕ ಹೊರಗಿನ ತಂತ್ರಜ್ಞಾನ ಕೇಂದ್ರಗಳಿಗೆ ಹೆಚ್ಚು ಒತ್ತು ನೀಡಬಹುದು ಎಂಬ ಅಂದಾಜು ತಜ್ಞರದು.