ಬಜಾಜ್‌ ಆಟೋದ ಔರಂಗಾಬಾದ್‌ ಪ್ಲಾಂಟ್‌ನಲ್ಲಿ 200 ಜನರಿಗೆ ಕೊರೊನಾ

ಮುಂಬೈ: ಮಹಾರಾಷ್ಟ್ರದ ಔರಂಗಾಬಾದ್‌ನ ವಾಲುಜ್‌ನಲ್ಲಿರುವ ಬಜಾಜ್ ಆಟೋ ಲಿಮಿಟೆಡ್ ಕಾರ್ಖಾನೆಯಲ್ಲಿ 200 ಕ್ಕೂ ಹೆಚ್ಚು ಉದ್ಯೋಗಿಗಳಿಗೆ ಕೊರೊನಾವೈರಸ್ ಸೋಂಕು ತಗುಲಿರುವುದು ವರದಿಯಾಗಿದೆ. ಅಲ್ಲದೇ ನಾಲ್ವರು ಮಾರಕ ಸೋಂಕಿಗೆ ಮೃತಪಟ್ಟಿದ್ದಾರೆ.

ಬಜಾಜ್ ಆಟೋದ ಅತಿದೊಡ್ಡ ಉತ್ಪಾದನಾ ಘಟಕವಾದ ವಾಲುಜ್ ಪ್ಲಾಂಟ್ ಏಪ್ರಿಲ್ ಕೊನೆಯ ವಾರದಲ್ಲಿ ಕ್ರಮೇಣ ಪುನರಾರಂಭಗೊಂಡಿದೆ. ಎರಡು ಪಾಳಿಯಲ್ಲಿ ಶೇ 50 ರಷ್ಟು ಸಿಬ್ಬಂದಿ ಕಾರ್ಯನಿರ್ವಹಿಸುತ್ತಿದ್ದಾರೆ.

ಪ್ಲಾಂಟ್‌ನಲ್ಲಿ ಸಾಮಾಜಿಕ ಅಂತರ ಕಾಪಾಡಿಕೊಳ್ಳದೇ ಕೆಲಸ ಮಾಡಲು ಬಿಟ್ಟಿದ್ದು ಇಷ್ಟು ದೊಡ್ಡ ಅನಾಹುತಕ್ಕೆ ಕಾರಣವಾಗಿದೆ ಎಂದು ಲೈವ್ ಮಿಂಟ್ ವರದಿ ಮಾಡಿದೆ. ಜೂನ್ 6 ರಂದು ಪ್ಲಾಂಟ್‌ನಲ್ಲಿ ಮೊದಲ ಪ್ರಕರಣ ವರದಿಯಾಗಿತ್ತು. ಆದರೂ ಪ್ಯಾಕ್ಟರಿಯ ಮುಖ್ಯಸ್ಥರು ಎಚ್ಚೆತ್ತುಕೊಳ್ಳದೇ ಇಷ್ಟೇಲ್ಲಾ ಅನಾಹುತ ಸಂಭವಿಸಿದೆ. ಕೋವಿಡ್ ಪಾಸಿಟಿವ್ ಪ್ರಕರಣಗಳ ಸಂಖ್ಯೆ ಹೆಚ್ಚುತ್ತಿದ್ದರೂ ಪ್ಲಾಂಟ್ ಇನ್ನೂ ಮುಚ್ಚಿಲ್ಲ. ಕೆಲಸಗಾರರು ಕಾರ್ಯನಿರ್ವಹಿಸುತ್ತಿದ್ದಾರೆ ಎನ್ನಲಾಗಿದೆ.

ಈ ಹಿಂದೆ, ಮಾರುತಿ ಸುಜುಕಿ , ಹ್ಯುಂಡೈ ಮೋಟರ್, ಟೊಯೋಟಾ ಕಿರ್ಲೋಸ್ಕರ್ ನಲ್ಲಿ ಕೋವಿಡ್ -19 ಪಾಸಿಟಿವ್ ಪ್ರಕರಣಗಳು ಕಂಡು ಬಂದಿದ್ದರಿಂದ ಅವುಗಳನ್ನು ಸ್ಥಗೀತಗೊಳಿಸಲಾಗಿತ್ತು.