ಜನಪ್ರಿಯ ಸ್ನ್ಯಾಕ್ಸ್ ಭಾರತದಲ್ಲಿ ಪ್ರಾರಂಭಕ್ಕೆ ಅಂಬಾನಿ ಸಜ್ಜು, ಲೇಸ್- ಪಾರ್ಲೆಗೆ ಸ್ಪರ್ಧೆ

ಮಹತ್ವದ ಬೆಳವಣಿಗೆಯೊಂದರಲ್ಲಿ, ಮುಕೇಶ್ ಅಂಬಾನಿ ನೇತೃತ್ವದ ರಿಲಯನ್ಸ್ ರಿಟೇಲ್ ಜನರಲ್ ಮಿಲ್ಸ್‌ ನೊಂದಿಗೆ ಕೈಜೋಡಿಸಿದ್ದು ಭಾರತೀಯ ಎಫ್‌ಎಂಸಿಜಿ ವಿಭಾಗದಲ್ಲಿ ತನ್ನ ಛಾಪು ಮೂಡಿಸಲು ಮುಂದಾಗಿದೆ. ಮುಕೇಶ್ ಅಂಬಾನಿ ಹಾಗೂ ಇಶಾ ಅಂಬಾನಿ ಜನಪ್ರಿಯ ಸ್ನ್ಯಾಕ್ಸ್ ಒಂದನ್ನು ಭಾರತದಲ್ಲಿ ಆರಂಭಿಸಲು ಮುಂದಾಗಿದ್ದು, ಲೇಸ್, ಪಾರ್ಲೆ, ಹಲ್ದಿರಾಮ್‌ಗೆ ಸ್ಪರ್ಧೆ ನೀಡಲು ಸಜ್ಜಾಗಿದ್ದಾರೆ.

ರಿಲಯನ್ಸ್ ರೀಟೇಲ್ ವೆಂಚರ್ಸ್ ಲಿಮಿಟೆಡ್ ಅಂಗಸಂಸ್ಥೆ, ಎಫ್ ಎಂಸಿಜಿ ವಿಭಾಗವಾಗಿದೆ ರಿಲಯನ್ಸ್ ಕನ್ಸ್ಯೂಮರ್ ಪ್ರಾಡಕ್ಟ್ಸ್ ಲಿಮಿಟೆಡ್, ಇದೀಗ ಭಾರತದಲ್ಲಿ ಆಲನ್ಸ್ ಬ್ಯೂಗಲ್ಸ್ ಬಿಡುಗಡೆ ಮಾಡುವುದರ ಮೂಲಕ ಪಾಶ್ಚಾತ್ಯ ಖಾದ್ಯಗಳ ವರ್ಗಕ್ಕೆ ತನ್ನ ಪ್ರವೇಶ ಘೋಷಣೆ ಮಾಡಿದೆ.

ಮೊದಲ ಬಾರಿಗೆ ಭಾರತದಲ್ಲಿ ಬ್ಯೂಗಲ್ಸ್ ಅನ್ನು ಪರಿಚಯಿಸಲಾಗುತ್ತದೆ. 50 ವರ್ಷಕ್ಕೂ ಹೆಚ್ಚಿನ ಇತಿಹಾಸ ಹೊಂದಿರುವ ಅಂತಾರಾಷ್ಟ್ರೀಯ ಕಾರ್ನ್ ಚಿಪ್ಸ್ ಸ್ನ್ಯಾಕ್ಸ್ ಬ್ರ್ಯಾಂಡ್ ಇದು ಜನರಲ್ ಮಿಲ್ಸ್ ಒಡೆತನದಲ್ಲಿದೆ. ಜತೆಗೆ ಇದು ಯುನೈಟೆಡ್ ಕಿಂಗ್ ಡಮ್, ಅಮೆರಿಕ ಮತ್ತು ಮಧ್ಯಪ್ರಾಚ್ಯ ಸೇರಿದಂತೆ ಪ್ರಮುಖ ಜಾಗತಿಕ ಮಾರುಕಟ್ಟೆಗಳಲ್ಲಿ ಲಭ್ಯವಿದೆ.

ಆರ್‌ಸಿಪಿಎಲ್ ವಕ್ತಾರರು ಹೇಳುವುದೇನು?

ಈ ಬಿಡುಗಡೆಯ ಕುರಿತು ಮಾತನಾಡಿದ ಆರ್‌ಸಿಪಿಎಲ್ ವಕ್ತಾರರು, "ಆಲನ್‌ನ ಬಿಡುಗಡೆಯೊಂದಿಗೆ ಮಹತ್ವಾಕಾಂಕ್ಷೆಯ ಭಾರತೀಯ ಗ್ರಾಹಕರು ತಮ್ಮ ಖಾದ್ಯದ ಅಗತ್ಯಗಳನ್ನು ಪೂರೈಸಲು ಶ್ರೀಮಂತ ಮತ್ತು ಪ್ರೀಮಿಯಂ ಕೊಡುಗೆಗಳ ರುಚಿ ಆನಂದಿಸುತ್ತಾರೆ ಎಂದು ಖಚಿತಪಡಿಸಲು ನಾವು ಬಯಸುತ್ತೇವೆ," ಎಂದು ತಿಳಿಸಿದ್ದಾರೆ.

"ಅಭಿರುಚಿಯ ಪ್ರೊಫೈಲ್ ಮತ್ತು ಒಟ್ಟಾರೆ ಅನುಭವದ ಮೇಲೆ ಹೆಚ್ಚಿನ ಗಮನಹರಿಸುವುದರೊಂದಿಗೆ ನಾವು ಬೆಳೆಯುತ್ತಿರುವ ಪಾಶ್ಚಾತ್ಯ ಖಾದ್ಯಗಳ ಮಾರುಕಟ್ಟೆಯಲ್ಲಿ ಸಕ್ರಿಯವಾಗಿ ಭಾಗವಹಿಸಲು ಉದ್ದೇಶಿಸಿದ್ದೇವೆ. ಎಫ್‌ಎಂಸಿಜಿ ಮಾರುಕಟ್ಟೆಯಲ್ಲಿ ನಮ್ಮ ಹೆಜ್ಜೆಗುರುತನ್ನು ವಿಸ್ತರಿಸುವ ನಿಟ್ಟಿನಲ್ಲಿ ಮತ್ತೊಂದು ಹೆಜ್ಜೆ ಇದು. ಬ್ಯೂಗಲ್‌ಗಳಿಂದ ಪ್ರಾರಂಭವಾಗುವ ಅಲನ್‌ನ ಖಾದ್ಯಗಳ ಶ್ರೇಣಿಯನ್ನು ಪ್ರಾರಂಭಿಸಲು ನಾವು ಉತ್ಸುಕರಾಗಿದ್ದೇವೆ," ಎಂದಿದ್ದಾರೆ.

ಬ್ಯೂಗಲ್ಸ್ ಉಪ್ಪು, ಟೊಮೆಟೊ ಮತ್ತು ಚೀಸ್‌ನಂತಹ ಸುವಾಸನೆಗಳಲ್ಲಿ ಲಭ್ಯವಿದ್ದು, ಇದರ ಬೆಲೆ 10 ರೂಪಾಯಿಯಿಂದ ಆರಂಭವಾಗಲಿದೆ. ಭಾರತೀಯ ಗ್ರಾಹಕರಿಗೆ ಕೈಗೆಟುಕುವ ಬೆಲೆಯಲ್ಲಿ ಗುಣಮಟ್ಟದ ಉತ್ಪನ್ನಗಳನ್ನು ನೀಡುವ ಉದ್ದೇಶವನ್ನು ಸಂಸ್ಥೆಯು ಹೊಂದಿದೆ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.

ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ ಜನರಲ್ ಮಿಲ್ಸ್ ಇಂಡಿಯಾದ ಹಣಕಾಸು ನಿರ್ದೇಶಕ ಶೇಷಾದ್ರಿ ಸಾವಳಗಿ, "ಜನರಲ್ ಮಿಲ್ಸ್ ಜಾಗತಿಕವಾಗಿ ಪ್ರೀತಿಸುವ ಬ್ರ್ಯಾಂಡ್‌ಗಳಲ್ಲಿ ಒಂದಾದ ಬ್ಯೂಗಲ್ಸ್ ಅನ್ನು ಭಾರತದಲ್ಲಿ ಹೊಂದಲು ರೋಮಾಂಚನವಾಗಿದೆ. ಬ್ಯೂಗಲ್‌ಗಳು ಐಕಾನಿಕ್ ಕೋನ್-ಆಕಾರದ ಕಾರ್ನ್ ಚಿಪ್ಸ್‌ಗಳಾಗಿದ್ದು, ಹಗುರವಾದದ್ದು ಮತ್ತು ಗರಿಗರಿಯಾಗಿರುತ್ತದೆ," ಎಂದು ವಿವರಿಸಿದ್ದಾರೆ.

"ಮೊದಲ ರುಚಿಕರವಾದ ಕೊಂಬಿನ ಆಕಾರದ ಕಾರ್ನ್ ಚಿಪ್ಸ್ ಆಗಿ 1964ರಲ್ಲಿ ಪ್ರಾರಂಭವಾಯಿತು. ಇದು ಪ್ರಪಂಚದಾದ್ಯಂತ ವಿಸ್ತರಿಸಿದೆ. ಭಾರತದಾದ್ಯಂತದ ಖಾದ್ಯ ಪ್ರಿಯರು ಜಾಗತಿಕವಾಗಿ ಗ್ರಾಹಕರು ಇಷ್ಟಪಡುವ ಬ್ಯೂಗಲ್‌ಗಳನ್ನು ಆನಂದಿಸುವುದನ್ನು ನೋಡಲು ನಾವು ಎದುರು ನೋಡುತ್ತಿದ್ದೇವೆ," ಎಂದಿದ್ದಾರೆ.

ಆರ್‌ಸಿಪಿಎಲ್‌ನ ಆಲನ್ಸ್ ಬ್ಯೂಗಲ್‌ಗಳ ಮೊದಲು ಕೇರಳದಲ್ಲಿ ಪ್ರಾರಂಭವಾಗಲಿದೆ ಮತ್ತು ಕ್ರಮೇಣ ಭಾರತದಾದ್ಯಂತ ಇದರ ಮಾರಾಟ ಆರಂಭವಾಗಲಿದೆ. ಇದರೊಂದಿಗೆ ಆರ್‌ಸಿಪಿಎಲ್ ತನ್ನ ಬಹುಮುಖ ಎಫ್‌ಎಂಸಿಜಿ ಪೋರ್ಟ್‌ಫೋಲಿಯೊವನ್ನು ಕ್ಯಾಂಪಾ, ಸೊಸ್ಯೊ ಮತ್ತು ರಾಸ್ಕಿಕ್ ಅಡಿಯಲ್ಲಿ ವ್ಯಾಪಕವಾದ ಪಾನೀಯ ಶ್ರೇಣಿಯನ್ನು ಒಳಗೊಂಡಿರುತ್ತದೆ. "ಇಂಡಿಪೆಂಡೆನ್ಸ್" ಅಡಿಯಲ್ಲಿ ದೈನಂದಿನ ಅಗತ್ಯಗಳು, ಟಾಫಿಮನ್ ಮಿಠಾಯಿ, ಮಲಿಬಾನ್ ಬಿಸ್ಕಟ್‌ಗಳು ಮತ್ತು ಗ್ಲಿಮ್ಮರ್ ಹಾಗೂ ಡೋಜೊ ಅಡಿಯಲ್ಲಿ ಮನೆ ಮತ್ತು ವೈಯಕ್ತಿಕ ಆರೈಕೆ ಶ್ರೇಣಿ, ಇತ್ಯಾದಿಯನ್ನು ಹೊಂದಿದೆ.