Myntra ED Shock: 1,654 ಕೋಟಿ ರೂ. FDI ನಿಯಮ ಉಲ್ಲಂಘನೆ ಆರೋಪ..ಮಿಂತ್ರಾ ವಿರುದ್ಧ ED ಕಾನೂನು ಕ್ರಮ!

Myntra..ಭಾರತದ ಅತಿದೊಡ್ಡ ಇ-ಕಾಮರ್ಸ್ ಸಂಸ್ಥೆ. ಇದೀಗ ಈ ಕಂಪನಿ ವಿರುದ್ಧ ಗಂಭೀರ ಆರೋಪವೊಂದು ಕೇಳಿಬಂದಿದೆ. ಅದೇನೆಂದರೆ ಅಂದಾಜು 1,654.35 ಕೋಟಿ ರೂ. ಮೌಲ್ಯದ, ವಿದೇಶಿ ನೇರ ಹೂಡಿಕೆ ನಿಯಮ ಉಲ್ಲಂಘಿಸಿರುವ ಆರೋಪ ಕೇಳಿಬಂದಿದೆ. ಹೀಗಾಗಿ ಮಿಂತ್ರಾ ಡಿಸೈನ್ಸ್ ಪ್ರೈವೇಟ್ ಲಿಮಿಟೆಡ್ ಹಾಗೂ ಅದರ ಸಂಬಂಧಿತ ಕಂಪನಿಗಳು ಹಾಗೂ ನಿರ್ದೇಶಕರ ವಿರುದ್ಧ ಜಾರಿ ನಿರ್ದೇಶನಾಲಯ ಕಾನೂನು ಕ್ರಮಕ್ಕೆ ಮುಂದಾಗಿದೆ.

1999ರ ವಿದೇಶಿ ವಿನಿಮಯ ನಿರ್ವಹಣಾ ಕಾಯ್ದೆಯ ನಿಯಮಗಳ ಅಡಿಯಲ್ಲಿ ಈ ಪ್ರಕರಣ ದಾಖಲಿಸಲಾಗಿದೆ. ಇ.ಡಿಗೆ ದೊರಕಿದ ಮಾಹಿತಿಯ ಪ್ರಕಾರ, ಮಿಂತ್ರಾ ಮತ್ತು ಸಂಬಂಧಿತ ಕಂಪನಿಗಳು ಸಗಟು ನಗದು ಮತ್ತು ಸಾಗಣೆ ವಹಿವಾಟು ಮಾದರಿಯಂತೆ ಕಾರ್ಯನಿರ್ವಹಿಸುತ್ತಿದ್ದಂತೆ ತೋರುತ್ತದೆ. ಆದರೆ, ನಿಜವಾಗಿ ಇವು ಬಹು ಬ್ರಾಂಡ್ ಚಿಲ್ಲರೆ ವ್ಯಾಪಾರದಲ್ಲಿ ತೊಡಗಿಸಿಕೊಂಡಿದ್ದು, ದೇಶದ ಎಫ್‌ಡಿಐ ನೀತಿ ಉಲ್ಲಂಘನೆಯಾಗಿದೆ ಎಂಬ ಆರೋಪ ಮುಂದಿಟ್ಟಿದೆ.

ಇ.ಡಿಗೆ ಲಭ್ಯವಾದ ದಾಖಲೆಗಳ ಪ್ರಕಾರ, ಮೈಂತ್ರಾ ಡಿಸೈನ್ಸ್ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಯು 1,654 ಕೋಟಿ ರೂಪಾಯಿಯ ವಿದೇಶಿ ಹೂಡಿಕೆಯನ್ನು ಆಕರ್ಷಿಸಿದ್ದು, ತಾನೇ ಸಂಬಂಧ ಹೊಂದಿರುವ ವೆಕ್ಟರ್ ಇ-ಕಾಮರ್ಸ್ ಪ್ರೈವೇಟ್ ಲಿಮಿಟೆಡ್ ಎಂಬ ಕಂಪನಿಗೆ ಬಹುಪಾಲು ಉತ್ಪನ್ನಗಳನ್ನು ಮಾರಾಟ ಮಾಡಿದೆ. ಈ ವೆಕ್ಟರ್ ಸಂಸ್ಥೆಯು ಗ್ರಾಹಕರಿಗೆ ನೇರವಾಗಿ ಚಿಲ್ಲರೆ ಮಾರಾಟ ಮಾಡುತ್ತಿದ್ದ ಹಿನ್ನೆಲೆಯಲ್ಲಿ, ಇದು ನಿಜವಾದ ಅರ್ಥದಲ್ಲಿ ಬಿಇ2ಸಿ ಮಾದರಿಯ ವ್ಯಾಪಾರದ ಉದಾಹರಣೆಯಾಗುತ್ತದೆ.

ಮೈಂತ್ರಾ ಮತ್ತು ವೆಕ್ಟರ್ ಇ-ಕಾಮರ್ಸ್ ಒಂದೇ ಕಂಪನಿಯ ಗುಂಪಿಗೆ ಸೇರಿವೆ ಎಂದು ಇಡಿ ದೃಢವಾಗಿ ಹೇಳಿದ್ದು, ಕಂಪನಿಗಳು ತಾವು ಸಗಟು ವ್ಯಾಪಾರ ಮಾಡುತ್ತಿರುವಂತೆ ತೋರಿಸುತ್ತಿದ್ದರೂ ನಿಜವಾಗಿ ಬಹು ಬ್ರಾಂಡ್ ಚಿಲ್ಲರೆ ಮಾರಾಟದಲ್ಲಿದ್ದವು ಎಂಬುದನ್ನು ತನಿಖೆ ಬಹಿರಂಗಪಡಿಸಿದೆ.

ಫೆಮಾ ಕಾಯ್ದೆಯ ಪ್ರಕಾರ 2010ರ ಏಪ್ರಿಲ್ 1 ಮತ್ತು ಅಕ್ಟೋಬರ್ 1ರ ತಿದ್ದುಪಡಿ ಎಫ್‌ಡಿಐ ನೀತಿಯ ಅಡಿಯಲ್ಲಿ ಒಂದೇ ಗುಂಪಿಗೆ ಸೇರಿದ ಕಂಪನಿಗಳಿಗೆ 25 ಶೇಕಡಾ ಮಿತಿಯ ಒಳಗೆ ಮಾತ್ರ ಮಾರಾಟ ಮಾಡಬಹುದಾಗಿದೆ. ಆದರೆ ಮೈಂತ್ರಾ ಸಂಸ್ಥೆಯು ತನ್ನ ಉತ್ಪನ್ನಗಳ ಶೇಕಡಾ 99ರಷ್ಟು ಅನ್ನು ವೆಕ್ಟರ್‌ಗೆ ಮಾರಾಟ ಮಾಡಿರುವುದರಿಂದ ಇದು ನೇರವಾಗಿ ನಿಯಮ ಉಲ್ಲಂಘನೆಯಾಗಿದೆ.

ಇಡಿಗೆ ಪ್ರಕಾರ, ಮೈಂತ್ರಾ ಮತ್ತು ಸಂಬಂಧಿತ ಕಂಪನಿಗಳು ಫೆಮಾ ಕಾಯ್ದೆಯ ಸೆಕ್ಷನ್ 6(3)(ಬಿ) ಹಾಗೂ ಕೇಂದ್ರ ಸರ್ಕಾರ ಪ್ರಕಟಿಸಿದ್ದ ಎಫ್‌ಡಿಐ ನೀತಿಯ ಉಲ್ಲಂಘನೆ ಮಾಡಿವೆ. ಇದರಿಂದಾಗಿ ₹1,654 ಕೋಟಿ ಮೌಲ್ಯದ ವಿದೇಶಿ ಹೂಡಿಕೆಗೆ ಸಂಬಂಧಿಸಿದ ಹಗರಣ ಎದ್ದು ಬಂದಿದೆ.

ಈ ವಿಚಾರದಲ್ಲಿ ಮೈಂತ್ರಾ ಸಂಸ್ಥೆಯ ಪ್ರತಿಕ್ರಿಯೆ ಕೂಡ ಬಂದಿದೆ. ವಾಲ್ಮಾರ್ಟ್ ಇಂಡಿಯಾ ಘಟಕವಾಗಿರುವ ಮೈಂತ್ರಾ ಸಂಸ್ಥೆಯು ತಮ್ಮ ಹೇಳಿಕೆಯಲ್ಲಿ, ಇಡಿಯಿಂದ ಯಾವುದೇ ಅಧಿಕೃತ ದಾಖಲೆಗಳು ಅಥವಾ ದೂರಿನ ಪ್ರತಿಗಳು ಲಭ್ಯವಾಗಿಲ್ಲವೆಂದು ತಿಳಿಸಿದೆ. ಹಾಗೆಯೇ ಅವರು ಯಾವುದೇ ತನಿಖೆಗೆ ಪೂರ್ಣ ಸಹಕಾರ ನೀಡಲು ಸಿದ್ಧರಾಗಿದ್ದಾರೆ ಎಂಬ ಮಾತು ಕೂಡ ವಿವರಿಸಿದ್ದಾರೆ.

ಇಡೀ ಪ್ರಕರಣವು ಭಾರತದ ಇ-ಕಾಮರ್ಸ್ ವಲಯದಲ್ಲಿ ವಿದೇಶಿ ಹೂಡಿಕೆಗಳಿಗೆ ವಿಧಿಸಲಾಗಿರುವ ನಿಯಮಗಳು ಮತ್ತು ಅದರ ಪಾಲನೆಯ ಕುರಿತು ಹೊಸ ಚರ್ಚೆಗೆ ದಾರಿ ಹಾಕಿದೆ. ಮುಂದೆ ಇಡಿ ಯಾವ ಕ್ರಮ ಕೈಗೊಳ್ಳುತ್ತದೆ ಎಂಬುದರ ಮೇಲೆ ಗಮನ ಹರಿಸುವುದು ಅಗತ್ಯ.