ಈಗ ದುಬೈನಲ್ಲೂ ಫೋನ್‌ಪೇ ಯುಪಿಐ ಸೇವೆ ಲಭ್ಯ, ಇಲ್ಲಿದೆ ವಿವರ

ನವದೆಹಲಿ, ಏಪ್ರಿಲ್‌ 1: ಫೋನ್‌ಪೇ ತನ್ನ ಯುನಿಫೈಡ್ ಪೇಮೆಂಟ್ಸ್ ಇಂಟರ್ಫೇಸ್ (ಯುಪಿಐ) ಸೇವೆಗಳನ್ನು ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ನಲ್ಲಿ ಭಾರತೀಯ ಪ್ರಯಾಣಿಕರು ಮತ್ತು ಅಲ್ಲಿ ವಾಸಿಸುವ ಎನ್‌ಆರ್‌ಐಗಳಿಗಾಗಿ ಮಾರ್ಚ್ 28 ರಂದು ಪ್ರಾರಂಭಿಸಿದೆ.

ಈ ಯುಪಿಐ ಸೇವೆಯು ಈಗ ಫೋನ್‌ಪೇ ಬಳಕೆದಾರರಿಗೆ ಚಿಲ್ಲರೆ ಅಂಗಡಿಗಳು, ರೆಸ್ಟೋರೆಂಟ್‌ಗಳು ಮತ್ತು ಇತರ ಪ್ರವಾಸಿ ಸ್ಥಳಗಳಲ್ಲಿ ಕ್ಯೂಆರ್‌ ಕೋಡ್ ಅನ್ನು ಸ್ಕ್ಯಾನ್ ಮಾಡುವ ಮೂಲಕ ತ್ವರಿತವಾಗಿ ಡಿಜಿಟಲ್ ವಹಿವಾಟುಗಳನ್ನು ಮಾಡಲು ಅವಕಾಶ ನೀಡುತ್ತದೆ.

ಯುಎಇಯ ಪ್ರಮುಖ ಬ್ಯಾಂಕ್ ಮಶ್ರೆಕ್ ಮೂಲಕ ಅದರ ನಿಯೋಪೇ ವಿಭಾಗಗಳ ಮೂಲಕ ಸೇವೆಯನ್ನು ಸಕ್ರಿಯಗೊಳಿಸಲಾಗುತ್ತಿದೆ. ಮುಖ್ಯವಾಗಿ ಭಾರತೀಯ ಬಳಕೆದಾರರಿಗಾಗಿ ವಾಟ್ಸಾಪ್‌ ಮೊಬೈಲ್ ಅಪ್ಲಿಕೇಶನ್‌ಗಳ ಮೂಲಕ ಅಂತರರಾಷ್ಟ್ರೀಯ ಯುಪಿಐ ಪಾವತಿಗಳನ್ನು ಸಹ ಪರೀಕ್ಷಿಸುತ್ತಿದೆ ಎಂದು ವರದಿಗಳು ತಿಳಿಸಿವೆ.

ವರದಿಗಳ ಪ್ರಕಾರ, ಯುಎಇಯಲ್ಲಿ ಫೋನ್‌ಪೇ ಯುಪಿಐ ಪಾವತಿಗಳನ್ನು ಮಶ್ರೆಕ್‌ನ ನಿಯೋಪೇ ವಿಭಾಗಗಳ ಮೂಲಕ ಮಾಡಲು ಅವಕಾಶ ನೀಡುತ್ತದೆ. ಇದು ಹಲವು ಔಟ್‌ಲೆಟ್‌ಗಳಲ್ಲಿ ಲಭ್ಯವಿದೆ. ಯುಎಇ ಆಧಾರಿತ ಬ್ಯಾಂಕ್ 2021 ರಲ್ಲಿ ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಶನ್ ಆಫ್ ಇಂಡಿಯಾದ (ಎನ್‌ಪಿಸಿಐ) ಇಂಟರ್ನ್ಯಾಷನಲ್ ಪೇಮೆಂಟ್ಸ್ ಲಿಮಿಟೆಡ್ (ಎನ್‌ಐಪಿಎಲ್‌) ನೊಂದಿಗೆ ಪಾಲುದಾರಿಕೆಯನ್ನು ಹೊಂದಿದೆ.

ಗ್ರಾಹಕರಿಗೆ ಅನುಕೂಲಕರ ಮತ್ತು ಗಡಿಯಾಚೆಯ ಸುರಕ್ಷಿತ ಪಾವತಿ ವಿಧಾನಗಳನ್ನು ಒದಗಿಸಲು ಪ್ರಪಂಚದಾದ್ಯಂತದ ಹಣಕಾಸು ಸಂಸ್ಥೆಗಳೊಂದಿಗೆ ಸಕ್ರಿಯವಾಗಿ ಸಹಕರಿಸುವ ಗುರಿಯನ್ನು ನಾವು ಹೊಂದಿದ್ದೇವೆ. ಈ ಪಾಲುದಾರಿಕೆಯು ಫೋನ್‌ಪೇ ಸಹಯೋಗವನ್ನು ಕೋರುತ್ತದೆ. ಯುಎಇಗೆ ಭಾರತೀಯ ಪ್ರಯಾಣಿಕರಿಗೆ ಪಾವತಿ ಪ್ರಕ್ರಿಯೆಗಳನ್ನು ಸುವ್ಯವಸ್ಥಿತಗೊಳಿಸಲು ಸಮರ್ಪಕ ವ್ಯವಸ್ಥೆಯನ್ನು ಒದಗಿಸುತ್ತದೆ ಎಂದು ಎನ್‌ಐಪಿಎಲ್‌ನ ಪಾಲುದಾರಿಕೆ ವ್ಯವಹಾರ ಅಭಿವೃದ್ಧಿ ಮತ್ತು ಮಾರ್ಕೆಟಿಂಗ್ ಉಪ ಮುಖ್ಯಸ್ಥ ಅನುಭವ್ ಶರ್ಮಾ ಹೇಳಿದ್ದಾರೆ.