ಹೊಸ ಅಪಾರ್ಟ್‌ಮೆಂಟ್ vs ಹಳೆಯ ಫ್ಲಾಟ್: ಬೆಂಗಳೂರಿನಲ್ಲಿ ಮನೆ ಖರೀದಿಸಲು ಯಾವುದು ಲಾಭದಾಯಕ?

ಬೆಂಗಳೂರು ನಗರದ ರಿಯಲ್ ಎಸ್ಟೇಟ್ ಮಾರುಕಟ್ಟೆಯಲ್ಲಿ ಮನೆಯ ಬೆಲೆಗಳು ಸ್ಥಿರವಾಗಿ ಏರಿಕೆಯಾಗುತ್ತಿವೆ. ವಿಶೇಷವಾಗಿ ಡಿಮ್ಯಾಂಡ್ ಇರುವ, ಕೇಂದ್ರ ಪ್ರದೇಶಗಳಲ್ಲಿ ಕೈಗೆಟುಕುವ ಆಸ್ತಿಗಳು ತೀವ್ರವಾಗಿ ಕಡಿಮೆಯಾಗಿದೆ. ಈ ಹಿನ್ನೆಲೆ ಮನೆ ಖರೀದಿದಾರರು ಒಂದು ಮಹತ್ವದ ನಿರ್ಧಾರವನ್ನು ಎದುರಿಸುತ್ತಿದ್ದಾರೆ, ತಕ್ಷಣ ವಾಸಕ್ಕೆ ಸಿದ್ಧವಾಗಿರುವ ಸ್ಥಳೀಯ ಹಳೆಯ ಫ್ಲಾಟ್ ಖರೀದಿಸಬೇಕೋ, ಅಥವಾ ಹೆಚ್ಚಿನ ಸೌಲಭ್ಯಗಳೊಂದಿಗೆ ಅಭಿವೃದ್ಧಿ ಹೊಂದುತ್ತಿರುವ ಹೊರವಲಯದ ಹೊಸ ಅಪಾರ್ಟ್‌ಮೆಂಟ್‌ ಆಯ್ಕೆಮಾಡಬೇಕೋ ಎಂದು..

ಹಳೆಯ ಅಪಾರ್ಟ್‌ಮೆಂಟ್‌ಗಳು:

ಹಳೆಯ ಅಪಾರ್ಟ್‌ಮೆಂಟ್‌ಗಳ ಗಮನ ಸೆಳೆಯುವ ಅಂಶವೆಂದರೆ ಅವುಗಳ ಸ್ಥಳ...ಉದಾಹರಣೆಗೆ, ಕಡುಬಿಸನಹಳ್ಳಿ ಪ್ರದೇಶದಲ್ಲಿ ₹1 ಕೋಟಿಗೆ 16 ವರ್ಷ ಹಳೆಯದಾದ 3BHK ಫ್ಲಾಟ್ ಅನ್ನು ಖರೀದಿಸಲು ಯುವರೊಬ್ಬರು ಇಚ್ಛೆ ವ್ಯಕ್ತಪಡಿಸಿದ್ದು, ಆ ಸ್ಥಳ ಮುಖ್ಯ ರಸ್ತೆ, ಬಸ್ ನಿಲ್ದಾಣ ಮತ್ತು ಮುಂಬರುವ ಮೆಟ್ರೋ ನಿಲ್ದಾಣಕ್ಕೆ ನಡೆದಷ್ಟು ದೂರದಲ್ಲಿದೆ. ಅವರು ಈ ಆಸ್ತಿಯಿಂದ ತಿಂಗಳಿಗೆ 40,000 ರೂ. ಬಾಡಿಗೆ ಆದಾಯವನ್ನೂ ನಿರೀಕ್ಷಿಸುತ್ತಿದ್ದಾರೆ. ಆದರೆ ಈ ಫ್ಲಾಟ್‌ನಲ್ಲಿ ಈಜುಕೊಳ, ಕ್ಲಬ್‌ಹೌಸ್ ಅಥವಾ ಪ್ಲೇ ಏರಿಯಾ ಮುಂತಾದ ಯಾವುದೇ ಆಧುನಿಕ ಸೌಲಭ್ಯಗಳಿಲ್ಲ, ಸಮುದಾಯವು ಕೂಡ ಸಣ್ಣದಾಗಿದೆ.

ರಿಯಲ್ ಎಸ್ಟೇಟ್ ತಜ್ಞರಾದ ವಿವೇಕ್ ರಥಿಯವರು ಸ್ಪಷ್ಟಪಡಿಸುವಂತೆ, "ಹಳೆಯ ಫ್ಲಾಟ್‌ಗಳು, ವಿಶೇಷವಾಗಿ ಕೇಂದ್ರ ಭಾಗದಲ್ಲಿದ್ದರೆ, ಉತ್ತಮ ಸಂಪರ್ಕ, ಶಾಲೆ-ಆಸ್ಪತ್ರೆಗಳ ನಿಕಟತೆ ಮತ್ತು ಮೂಲಸೌಕರ್ಯದ ಲಭ್ಯತೆ ಎಂಬ ಲಾಭಗಳನ್ನು ನೀಡುತ್ತವೆ. ಇವು ಸಾಮಾನ್ಯವಾಗಿ ವಿಶಾಲ ಒಳಸೌಲಭ್ಯಗಳೊಂದಿಗೆ ಬರುತ್ತವೆ. ಆದರೆ 25 ವರ್ಷ ಮೀರಿದ ಬಳಿಕ ರಚನಾತ್ಮಕ ದೋಷಗಳು ಮತ್ತು ಸೌಲಭ್ಯಗಳ ಕೊರತೆಯು ಗೋಚರವಾಗಬಹುದು." ಹೀಗಾಗಿ, ವಾಸದ ಅವಧಿ, ನಿರ್ವಹಣಾ ಸ್ಥಿತಿ, ಮತ್ತು ಮಾರಾಟ ಮೌಲ್ಯ ಮೊದಲಾಗಿ ವಿಶ್ಲೇಷಿಸಬೇಕು.

ಹೊಸ ಫ್ಲಾಟ್‌ಗಳು:

ಇನ್ನೊಂದೆಡೆ, ನಗರ ಹೊರವಲಯಗಳಾದ ವೈಟ್‌ಫೀಲ್ಡ್, ಸರ್ಜಾಪುರ, ಯಲಹಂಕ, ದೇವನಹಳ್ಳಿ ಮುಂತಾದ ಭಾಗಗಳಲ್ಲಿ ಹೊಸ ಅಪಾರ್ಟ್‌ಮೆಂಟ್‌ ಯೋಜನೆಗಳು ಪುಟಾರುತ್ತಿರುವುದನ್ನು ನೋಡಬಹುದು. ಇವುಗಳಲ್ಲಿ ಕ್ಲಬ್‌ಹೌಸ್, ಈಜುಕೊಳ, ಜಿಮ್, EV ಚಾರ್ಜಿಂಗ್ ಪಾಯಿಂಟ್, ಮಕ್ಕಳ ಆಟದ ಸ್ಥಳ ಮುಂತಾದ ಎಲ್ಲಾ ಆಧುನಿಕ ಸೌಲಭ್ಯಗಳಿವೆ. ಈ ಅಪಾರ್ಟ್‌ಮೆಂಟ್‌ಗಳು ಸಮಕಾಲೀನ ವಿನ್ಯಾಸದೊಂದಿಗೆ, ಉತ್ತಮ ಸಮುದಾಯ ಪರಿಸರವನ್ನು ನೀಡುತ್ತವೆ. ಆದರೆ ಈ ಪ್ರದೇಶಗಳಲ್ಲಿ ಇನ್ನೂ ಹಲವು ಮೂಲಸೌಕರ್ಯಗಳು ಬೆಳೆದಿಲ್ಲ, ಅಲ್ಲದೆ ಕೆಲಸದ ಸ್ಥಳಗಳಿಗೆ ಸಂಚಾರ ಸಮಯ ಹೆಚ್ಚು ಬೇಕಾಗಬಹುದು.

ಸ್ಕ್ವೇರ್ ಯಾರ್ಡ್‌ನ ಸೋಪನ್ ಗುಪ್ತಾ ಅವರ ಅಭಿಪ್ರಾಯವಂತೆ, "ಹೊಸ ಅಪಾರ್ಟ್‌ಮೆಂಟ್‌ಗಳು ಭವಿಷ್ಯದಲ್ಲಿನ ಮೌಲ್ಯವರ್ಧನೆಗಾಗಿ ಉತ್ತಮ, ಆದರೆ ಪ್ರಾರಂಭದಲ್ಲಿ ಜನರು ಪ್ರಯಾಣ, ಮೂಲಭೂತ ಸೌಲಭ್ಯ ಕೊರತೆ ಮತ್ತು ಸಾರ್ವಜನಿಕ ಸಾರಿಗೆಯ ಕೊರತೆಯಂತಹ ಸವಾಲುಗಳನ್ನು ಎದುರಿಸಬೇಕಾಗುತ್ತದೆ."

ನಿರ್ಣಯದ ವೇಳೆ ಗಮನದಲ್ಲಿಡಬೇಕಾದ ಅಂಶಗಳು:

• ನಿಮ್ಮ ಬಜೆಟ್ ಎಷ್ಟು?
• ಕೆಲಸದ ಸ್ಥಳ, ಮಕ್ಕಳ ಶಾಲೆಗಳಿಗೆ ಸಮೀಪವಿದೆಯೆ?
• ತಕ್ಷಣ ವಾಸಕ್ಕೆ ಬೇಕೆ, ಅಥವಾ ಸಮಯವಿದ್ದರೆ ಬಹುಕಾಲಿಕ ಹೂಡಿಕೆಗೆ ತಯಾರಿದ್ದೀರಾ?
• ಮರುಮಾರಾಟ ಮತ್ತು ಬಾಡಿಗೆ ಸಾಮರ್ಥ್ಯವನ್ನೂ ಪರಿಗಣಿಸಿದ್ದೀರಾ?

ಆಸ್ತಿಯ ಆಯ್ಕೆ ಎಲ್ಲಿ ಖರೀದಿ ಮಾಡಬೇಕು ಎಂಬುದು ನಿಗದಿತ ಉತ್ತರವಿಲ್ಲದ ಪ್ರಶ್ನೆ. ಹಳೆಯ ಫ್ಲಾಟ್‌ಗಳು ಸ್ಥಳದ ನಿಖರತೆಗಾಗಿ ಲಾಭಕರವಾಗಬಹುದು, ಆದರೆ ಹೊಸ ಅಪಾರ್ಟ್‌ಮೆಂಟ್‌ಗಳು ಬಹುಪಾಲು ಸೌಲಭ್ಯ ಮತ್ತು ಭವಿಷ್ಯದ ಬೆಲೆ ಏರಿಕೆಗೆ ಸಹಕಾರಿಯಾಗಬಹುದು. ಖರೀದಿದಾರರು ತಮ್ಮ ಉದ್ದೇಶ, ಸಮಯ, ಬಜೆಟ್ ಮತ್ತು ಜೀವನಶೈಲಿಯ ಅವಶ್ಯಕತೆಗಳನ್ನು ಅರ್ಥಮಾಡಿಕೊಂಡು ಸಜ್ಜಾಗಿ ತೀರ್ಮಾನ ಮಾಡುವುದು ಮುಖ್ಯ.