ಇಂದಿನ ಪೆಟ್ರೋಲ್, ಡೀಸೆಲ್ ದರ: ನಿಮ್ಮ ನಗರದಲ್ಲಿ ಬೆಲೆ ಸ್ಥಿರವೋ ಅಥವಾ ಏರಿಕೆಯೋ?

ಆಗಸ್ಟ್ 31ರ ಸೋಮವಾರ ಬೆಳಿಗ್ಗೆ 6 ಗಂಟೆಗೆ ದೇಶದ ಪ್ರಮುಖ ಮಹಾನಗರಗಳಲ್ಲಿ ಇಂಧನ ದರ ಸ್ಥಿರವಾಗಿದೆ. ದೆಹಲಿಯಲ್ಲಿ ಪೆಟ್ರೋಲ್ ದರ ಲೀಟರ್‌ಗೆ ₹102.12 ಹಾಗೂ ಡೀಸೆಲ್ ದರ ₹95.20 ರಲ್ಲೇ ಮುಂದುವರಿದಿದೆ. ಇತ್ತ ಮುಂಬೈನಲ್ಲಿ ಪೆಟ್ರೋಲ್ ₹111.21 ಮತ್ತು ಡೀಸೆಲ್ ₹97.83 ಕ್ಕೆ ಮಾರಾಟವಾಗುತ್ತಿದೆ. ಬೆಂಗಳೂರು ಮತ್ತು ಚೆನ್ನೈನಲ್ಲೂ ದರಗಳಲ್ಲಿ ಯಾವುದೇ ಬದಲಾವಣೆಯಾಗಿಲ್ಲ.

ಭಾರತದ ದೈನಂದಿನ ದರ ಪರಿಷ್ಕರಣೆ (ಡೈನಾಮಿಕ್ ಪ್ರೈಸಿಂಗ್) ವ್ಯವಸ್ಥೆಯಂತೆ ಪ್ರತಿದಿನ ಬೆಳಿಗ್ಗೆ 6 ಗಂಟೆಗೆ ಇಂಧನ ದರಗಳು ನವೀಕರಣಗೊಳ್ಳುತ್ತವೆ. ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ಬೆಲೆ ಮತ್ತು ರೂಪಾಯಿ ಮೌಲ್ಯದಲ್ಲಾದ ಏರಿಳಿತಗಳ ಹೊರತಾಗಿಯೂ ಇಂದು ಚಿಲ್ಲರೆ ಬೆಲೆಗಳು ಸ್ಥಿರವಾಗಿವೆ. ಪ್ರಮುಖ ನಗರಗಳಲ್ಲಿನ ಇಂದಿನ ಇಂಧನ ದರ ವಿವರ ಇಲ್ಲಿದೆ ನೋಡಿ.

ಇಂದಿನ ಪೆಟ್ರೋಲ್, ಡೀಸೆಲ್ ದರ: ಪ್ರಮುಖ ನಗರಗಳ ವಿವರ

ನಗರ	ಪೆಟ್ರೋಲ್ (ರೂ/ಲೀ)	ಡೀಸೆಲ್ (ರೂ/ಲೀ)	ದೈನಂದಿನ ಬದಲಾವಣೆ (ರೂ/ಲೀ)
ನವದೆಹಲಿ	102.12	95.20	0.00
ಮುಂಬೈ	111.21	97.83	0.00
ಬೆಂಗಳೂರು	110.93	98.80	0.00
ಚೆನ್ನೈ	108.60	100.43	0.00

ಮೆಟ್ರೋ ನಗರಗಳ ಪೈಕಿ ಮುಂಬೈನಲ್ಲಿ ಇಂಧನ ದರ ಅತ್ಯಂತ ದುಬಾರಿಯಾಗಿದ್ದರೆ, ದೆಹಲಿಯಲ್ಲಿ ತುಸು ಕಡಿಮೆಯಿದೆ. ರಾಜ್ಯ ಸರ್ಕಾರಗಳು ವಿಧಿಸುವ ಮೌಲ್ಯವರ್ಧಿತ ತೆರಿಗೆ (VAT) ಮತ್ತು ಸಾಗಣೆ ವೆಚ್ಚದ ವ್ಯತ್ಯಾಸವೇ ಇದಕ್ಕೆ ಪ್ರಮುಖ ಕಾರಣ. ಇದರೊಂದಿಗೆ ಡೀಲರ್ ಕಮಿಷನ್ ಹಾಗೂ ಕೇಂದ್ರ ಸರ್ಕಾರದ ತೆರಿಗೆಗಳು ಸೇರಿಕೊಳ್ಳುವುದರಿಂದ ಸ್ಥಳೀಯವಾಗಿ ಬೆಲೆಗಳು ಭಿನ್ನವಾಗಿರುತ್ತವೆ. ಜಾಗತಿಕ ಮಟ್ಟದಲ್ಲಿ ಕಚ್ಚಾ ತೈಲ ಮತ್ತು ರೂಪಾಯಿ ಮೌಲ್ಯ ಒಂದೇ ಆಗಿದ್ದರೂ ನಗರದಿಂದ ನಗರಕ್ಕೆ ದರ ವ್ಯತ್ಯಾಸವಾಗಲು ಇದೇ ಕಾರಣ.

ಪೆಟ್ರೋಲ್, ಡೀಸೆಲ್ ದರ: ಬ್ರೆಂಟ್ ಕ್ರೂಡ್ ಮತ್ತು ರೂಪಾಯಿ ಮೌಲ್ಯದ ಸ್ಥಿತಿ

ಏಷ್ಯನ್ ಮಾರುಕಟ್ಟೆಯಲ್ಲಿ ಸೋಮವಾರ ಬೆಳಿಗ್ಗೆ ಬ್ರೆಂಟ್ ಕಚ್ಚಾ ತೈಲ ಬೆಲೆ ಬ್ಯಾರಲ್‌ಗೆ $89.2 ರಷ್ಟಿದ್ದರೆ, ಡಾಲರ್ ಎದುರು ರೂಪಾಯಿ ಮೌಲ್ಯ 95.5 ಮಟ್ಟಕ್ಕೆ ಕುಸಿದಿದೆ. ಚಿಲ್ಲರೆ ದರಗಳನ್ನು ಬದಲಾಯಿಸದೆ ಹೀಗೆಯೇ ಕಾಯ್ದುಕೊಂಡರೆ ತೈಲ ಮಾರಾಟ ಕಂಪನಿಗಳ (OMC) ಲಾಭದ ಪ್ರಮಾಣ ತಗ್ಗಲಿದೆ. ಕಚ್ಚಾ ತೈಲ ಬೆಲೆಯಲ್ಲಿ ಪ್ರತಿ $1 ವ್ಯತ್ಯಾಸವಾದಾಗಲೂ ಲೀಟರ್‌ಗೆ 50 ರಿಂದ 55 ಪೈಸೆ ವ್ಯತ್ಯಾಸವಾಗುತ್ತದೆ. ಒಂದು ವೇಳೆ ಬ್ರೆಂಟ್ ತೈಲ ದರ ಬ್ಯಾರಲ್‌ಗೆ $115 ದಾಟಿದರೆ ತೈಲ ಕಂಪನಿಗಳ ಮೇಲಿನ ಒತ್ತಡ ಮತ್ತಷ್ಟು ಹೆಚ್ಚಾಗಲಿದೆ ಎಂದು ವಿಶ್ಲೇಷಕರು ಅಂದಾಜಿಸಿದ್ದಾರೆ.

ಪ್ರಯಾಣಿಕರಿಗೆ ಇಂಧನ vs ಸಿಎನ್‌ಜಿ ದರ ವ್ಯತ್ಯಾಸ

ಇಂದ್ರಪ್ರಸ್ಥ ಗ್ಯಾಸ್ ಲಿಮಿಟೆಡ್ (IGL) ಆಗಸ್ಟ್ 29 ರಿಂದ ಜಾರಿಗೆ ಬರುವಂತೆ ದೆಹಲಿಯಲ್ಲಿ ಸಿಎನ್‌ಜಿ ದರವನ್ನು ಕೆಜಿಗೆ ₹86.98 ಕ್ಕೆ ಏರಿಸಿದ್ದರೆ, ಮುಂಬೈನಲ್ಲಿ ₹86 ರಷ್ಟಿದೆ. ದೆಹಲಿಯಲ್ಲಿ ಪೆಟ್ರೋಲ್ ಬೆಲೆ ₹102.12 ಇದ್ದು, ಸಿಎನ್‌ಜಿಗೂ ಪೆಟ್ರೋಲ್‌ಗೂ ಲೀಟರ್/ಕೆಜಿಗೆ ಸುಮಾರು ₹15 ವ್ಯತ್ಯಾಸವಿದೆ. ಅದೇ ಮುಂಬೈನಲ್ಲಿ ಈ ಅಂತರ ₹25 ರಷ್ಟಿದೆ. ಸ್ಪಾಟ್ ಎಲ್‌ಎನ್‌ಜಿ ದರ ಹೆಚ್ಚಾಗಿರುವುದರಿಂದ ಸಿಎನ್‌ಜಿ ವಾಹನ ಸವಾರರ ಉಳಿತಾಯದ ಪ್ರಮಾಣ ತುಸು ಕಡಿಮೆಯಾಗಿದೆ.

ದಿನಪೂರ್ತಿ ಕಚ್ಚಾ ತೈಲ ಮತ್ತು ರೂಪಾಯಿ ಮೌಲ್ಯದ ಏರಿಳಿತಗಳ ಮೇಲೆ ನಿಗಾ ಇಡುವುದು ಅಗತ್ಯ. ದಿನದ ಮಧ್ಯದಲ್ಲಿ ದರ ಬದಲಾಗುವುದಿಲ್ಲ, ಪ್ರತಿದಿನ ಬೆಳಿಗ್ಗೆ 6 ಗಂಟೆಗೆ ಮಾತ್ರ ಪರಿಷ್ಕೃತ ದರ ಪ್ರಕಟವಾಗುತ್ತದೆ. ನಿಮ್ಮ ನಗರದ ನಿಖರ ಇಂಧನ ದರ ತಿಳಿಯಲು ತೈಲ ಕಂಪನಿಗಳ ಆ್ಯಪ್ ಬಳಸಿ ಅಥವಾ ದೆಹಲಿಯ ಬೆಲೆಗೆ "RSP 102090" ಎಂದು ಟೈಪ್ ಮಾಡಿ 92249 92249 ಸಂಖ್ಯೆಗೆ ಎಸ್‌ಎಂಎಸ್ ಕಳುಹಿಸಬಹುದು. ಇತರ ನಗರಗಳಿಗೂ ಇದೇ ರೀತಿಯ ಕೋಡ್‌ಗಳು ಲಭ್ಯವಿವೆ.