Non-Basmati Rice Price: ಸಿಹಿಸುದ್ದಿ, ಬಾಸ್ಮತಿಯೇತರ ಅಕ್ಕಿ ಬೆಲೆ ಇಳಿಸಿ ಎಂದ ಕೇಂದ್ರ

ಕೇಂದ್ರ ಸರ್ಕಾರವು ಜನರಿಗೆ ಸಿಹಿಸುದ್ದಿಯೊಂದನ್ನು ನೀಡಿದೆ. ಡಿಸೆಂಬರ್ 18 ರಂದು ಕೇಂದ್ರ ಸರ್ಕಾರವು ದೇಶದಲ್ಲಿ ಬಾಸ್ಮತಿಯೇತರ ಅಕ್ಕಿಯ ಬೆಲೆಯನ್ನು ಕಡಿಮೆ ಮಾಡುವಂತೆ ಅಕ್ಕಿ ಉದ್ಯಮ ಸಂಘಗಳಿಗೆ ನಿರ್ದೇಶನ ನೀಡಿದೆ. ಆಹಾರ ಮತ್ತು ಸಾರ್ವಜನಿಕ ವಿತರಣಾ ಇಲಾಖೆಯ ಕಾರ್ಯದರ್ಶಿ ಸಂಜೀವ್ ಚೋಪ್ರಾ ಅವರು ನವದೆಹಲಿಯಲ್ಲಿ ಬಾಸ್ಮತಿಯೇತರ ಅಕ್ಕಿ ಸಂಸ್ಕರಣಾ ಉದ್ಯಮದ ಪ್ರಮುಖ ಪ್ರತಿನಿಧಿಗಳೊಂದಿಗೆ ಸಭೆ ನಡೆಸಿದರು.

ರಿಟೇಲ್ ಅಕ್ಕಿ ಬೆಲೆಗಳನ್ನು ಪರಿಶೀಲಿಸಿ ಸೂಕ್ತ ಮಟ್ಟಕ್ಕೆ ಇಳಿಸಲು ಕ್ರಮಕೈಗೊಳ್ಳುವಂತೆ ಪ್ರತಿನಿಧಿಗಳಿಗೆ ಸೂಚಿಸಿದರು. ಈ ವಿಚಾರವನ್ನು ತಮ್ಮ ಸಂಘದ ಸದಸ್ಯರೊಂದಿಗೆ ಚರ್ಚಿಸುವಂತೆ ಉದ್ಯಮ ಸಂಘಗಳಿಗೂ ಸೂಚನೆ ನೀಡಲಾಗಿದೆ. ಅಕ್ಕಿಯ ರಿಟೇಲ್ ಬೆಲೆಯನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ಕಡಿಮೆ ಮಾಡಲು ಸೂಚಿಸಲಾದ ಸಂಘಗಳ ಹೆಸರನ್ನು ಪತ್ರಿಕಾ ಮಾಹಿತಿ ಬ್ಯೂರೋ ಹೇಳಿದೆ.

ಸಭೆಯಲ್ಲಿ ಇತರ ಸಂಬಂಧಿತ ವಿಷಯಗಳು ಪ್ರಸ್ತಾಪವಾದವು. ಖಾರಿಫ್ ಬೆಳೆ ಉತ್ತಮವಾಗಿದ್ದರೂ ಸಹ ದೇಶೀಯ ಮಾರುಕಟ್ಟೆಯಲ್ಲಿ ಬಾಸ್ಮತಿಯೇತರ ಅಕ್ಕಿಯ ಬೆಲೆ ಏಕೆ ಹೆಚ್ಚುತ್ತಿದೆ ಎಂಬ ಪ್ರಶ್ನೆ ಎತ್ತಲಾಯಿತು. ಭಾರತೀಯ ಆಹಾರ ನಿಗಮದಲ್ಲಿ (ಎಫ್‌ಸಿಐ) ಸಾಕಷ್ಟು ದಾಸ್ತಾನುಗಳಿವೆಯೇ ಎಂದು ಸಹ ಪ್ರಶ್ನಿಸಲಾಗಿದೆ.

ಅಕ್ಕಿ ರಫ್ತು ಕೂಡ ನಿಷೇಧಿಸಲಾಗಿದೆ. ಅಕ್ಕಿಯ ವಾರ್ಷಿಕ ಹಣದುಬ್ಬರ ದರವು ಕಳೆದ ಎರಡು ವರ್ಷಗಳಿಂದ ಸುಮಾರು ಶೇಕಡ 12 ರಷ್ಟು ಏರಿಕೆಯಾಗಿದೆ. ಇದು ತೀವ್ರ ಆತಂಕಕ್ಕೂ ಕಾರಣವಾಗಿದೆ. ಸಭೆಯಲ್ಲಿ ಚರ್ಚಿಸಲಾದ ಮತ್ತೊಂದು ಆತಂಕದ ಕಾರಣವೆಂದರೆ ಲಾಭದ ಪ್ರಮಾಣದಲ್ಲಿ ಅಗಾಧ ಹೆಚ್ಚಳವಾಗಿದೆ.

ಸಗಟು ಮತ್ತು ರಿಟೇಲ್ ವ್ಯಾಪಾರಿಗಳ ನಡುವೆ ಈ ಲಾಭದ ಪ್ರಮಾಣ ಹೆಚ್ಚಿದ್ದು, ಇದನ್ನು ನಿಯಂತ್ರಿಸುವ ತುರ್ತು ಅಗತ್ಯವಿದೆ. ಲಾಭಕೋರತನವನ್ನು ಕಟ್ಟುನಿಟ್ಟಾಗಿ ನಿರ್ವಹಣೆ ಮಾಡುವ ಅಗತ್ಯವನ್ನು ಸಭೆಯು ಒತ್ತಿಹೇಳಿತು. ಎಂಆರ್‌ಪಿ ಮತ್ತು ನಿಜವಾದ ರಿಟೇಲ್ ಬೆಲೆಗಳ ನಡುವೆ ವ್ಯಾಪಕ ಅಂತರವಿದೆ ಎಂದು ಸಭೆಯಲ್ಲಿ ಚರ್ಚೆ ನಡೆದಿದೆ. ಗ್ರಾಹಕರ ಹಿತಾಸಕ್ತಿ ಕಾಪಾಡಲು ದರ ಇಳಿಸಲು ಸೂಚಿಸಲಾಗಿದೆ.

ಉತ್ತಮ ಗುಣಮಟ್ಟದ ಅಕ್ಕಿಯ ಸಮೃದ್ಧ ದಾಸ್ತಾನು ಲಭ್ಯವಿದೆ ಎಂದು ಎಫ್‌ಸಿಐ ಅಕ್ಕಿ ಸಂಸ್ಕರಣಾ ಉದ್ಯಮಕ್ಕೆ ತಿಳಿಸಿದೆ. ಇದನ್ನು ಓಪನ್ ಮಾರ್ಕೆಟ್ ಸೇಲ್ ಸ್ಕೀಮ್ (ಒಎಂಎಸ್ ಎಸ್) ಅಡಿಯಲ್ಲಿ ಪ್ರತಿ ಕೆಜಿಗೆ 29 ರೂಪಾಯಿಗಳ ಮೀಸಲು ಬೆಲೆಯಲ್ಲಿ ಮಾರಾಟ ಮಾಡಲಾಗುತ್ತಿದೆ.

ಮುಕ್ತ ಮಾರುಕಟ್ಟೆ ಮಾರಾಟ ಯೋಜನೆಯಡಿ, ಭಾರತೀಯ ಆಹಾರ ನಿಗಮವು ಗೋಧಿ ಮತ್ತು ಅಕ್ಕಿಯ ಹೆಚ್ಚುವರಿ ದಾಸ್ತಾನುಗಳನ್ನು ಮಾರಾಟ ಮಾಡುತ್ತದೆ. ವ್ಯಾಪಾರಿಗಳು ಮುಕ್ತ ಮಾರುಕಟ್ಟೆ ಮಾರಾಟ ಯೋಜನೆಯಡಿ ಎಫ್‌ಸಿಐನಿಂದ ಅಕ್ಕಿಯನ್ನು ಸಂಗ್ರಹಿಸಬಹುದು.