Reliance General Insurance: ರಿಲಯನ್ಸ್ ವಿಮಾ ಸಂಸ್ಥೆಗೆ 922 ಕೋಟಿ ರೂಪಾಯಿ ಜಿಎಸ್‌ಟಿ ನೋಟಿಸ್!

ದೇಶದ ಅತೀ ಶ್ರೀಮಂತ ವ್ಯಕ್ತಿಯಾದ ಮುಕೇಶ್ ಅಂಬಾನಿಯ ಸಹೋದರ ಅನಿಲ್ ಅಂಬಾನಿ ನೇತೃತ್ವದ ರಿಲಯನ್ಸ್ ಕ್ಯಾಪಿಟಲ್‌ನ ಅಂಗಸಂಸ್ಥೆಯಾದ ರಿಲಯನ್ಸ್ ಜನರಲ್ ಇನ್ಶುರೆನ್ಸ್ ಕಂಪನಿಗೆ (ಆರ್‌ಜಿಐಸಿ) ಬರೋಬ್ಬರಿ 922 ಕೋಟಿ ರೂಪಾಯಿ ಜಿಎಸ್‌ಟಿ ನೋಟಿಸ್ ಬಂದಿರುವುದಾಗಿ ವರದಿಯಾಗಿದೆ. ಜಿಎಸ್‌ಟಿ ಗುಪ್ತಚರ ನಿರ್ದೇಶನಾಲಯದಿಂದ (ಡಿಜಿಜಿಐ) ಈ ಶೋಕಾಸ್ ನೋಟಿಸ್‌ ಬಂದಿದೆ ಎಂಬ ಮಾಹಿತಿಯಿದೆ.

ಮರು ವಿಮೆ ಮತ್ತು ಸಹ ವಿಮೆಯಂತಹ ಸೇವೆಗಳಿಂದ ಸಂಸ್ಥೆಯು ಪಡೆಯುವ ಆದಾಯದ ಮೇಲೆ ಕ್ರಮವಾಗಿ 478.84 ಕೋಟಿ ರೂಪಾಯಿ, 359.70 ಕೋಟಿ ರೂಪಾಯಿ, 78.66 ಕೋಟಿ ರೂಪಾಯಿ ಮತ್ತು 5.38 ಕೋಟಿ ರೂಪಾಯಿ ಜಿಎಸ್‌ಟಿ ಕೋರಿ ಡಿಜಿಜಿಐ ಕಂಪನಿಗೆ ನಾಲ್ಕು ನೋಟಿಸ್‌ಗಳನ್ನು ಕಳುಹಿಸಿದೆ ಎಂದು ಸುದ್ದಿ ಸಂಸ್ಥೆ ಪಿಟಿಐ ವರದಿ ಮಾಡಿದೆ.

ತೆರಿಗೆ ತಜ್ಞರ ಪ್ರಕಾರ, ಸೆಪ್ಟೆಂಬರ್ 30 ಕ್ಕೆ ಕೊನೆಗೊಳ್ಳುವ ತ್ರೈಮಾಸಿಕ ವರದಿಯಲ್ಲಿ ಆಡಿಟರ್‌ಗಳು ಈ ಮೊತ್ತವನ್ನು ಅನಿಶ್ಚಿತ ಆದಾಯವಾಗಿ ತೋರಿಸಬೇಕಾಗುತ್ತದೆ. ಆದರೆ ರಿಲಯನ್ಸ್ ಈ ಮಾಹಿತಿ ನೀಡಿಲ್ಲ ಎಂದು ವರದಿ ಹೇಳಿದೆ. ಅಷ್ಟು ಮಾತ್ರವಲ್ಲದೆ ರಿಲಯನ್ಸ್ ಜನರಲ್ ಇನ್ಶುರೆನ್ಸ್ ಕಂಪನಿಯು ರಿಲಯನ್ಸ್ ಕ್ಯಾಪಿಟಲ್‌ನ ಒಟ್ಟು ಮೌಲ್ಯದ ಸುಮಾರು ಶೇಕಡ 70 ರಷ್ಟಿದೆ. ಇದು ಸಾಲ ಪರಿಹಾರ ಪ್ರಕ್ರಿಯೆಯಲ್ಲಿದೆ.

ಮೊದಲ ಶೋಕಾಸ್ ನೋಟಿಸ್

ಭಾರತೀಯ ಮತ್ತು ವಿದೇಶಿ ಮರುವಿಮಾ (ರಿ-ಇನ್ಶುರೆನ್ಸ್) ಕಂಪನಿಗಳಿಗೆ ಮರು ವಿಮಾ ಸೇವೆಗಳನ್ನು ಒದಗಿಸಿದ ಹಿನ್ನೆಲೆ ಮರು- ವಿಮಾ ಕಮಿಷನ್ ಅನ್ನು (re-insurance commission) ಪಡೆದಿದ್ದು, ಇದರಿಂದಾಗಿ ಕಂಪನಿಯು ಸೆಪ್ಟೆಂಬರ್ 28 ರಂದು ಡಿಜಿಜಿಐನಿಂದ 478.74 ಕೋಟಿ ರೂಪಾಯಿ ಮೊತ್ತದ ಮೊದಲ ಶೋಕಾಸ್ ನೋಟಿಸ್ ಅನ್ನು ಪಡೆದಿದೆ ಎಂದು ವರದಿ ಹೇಳಿದೆ.

ಈ ರಿ- ಇನ್ಶುರೆನ್ಸ್ ಕಮಿಷನ್ ಅನ್ನು ಕಂಪನಿಯು ತನ್ನ ಸಂಸ್ಥೆಯ ಆದಾಯದ ಲೆಕ್ಕಾಚಾರದಲ್ಲಿ ಸೇರ್ಪಡೆ ಮಾಡುತ್ತದೆ. ಹಾಗಿರುವಾಗ ಅದಕ್ಕಾಗಿ ಜಿಎಸ್‌ಟಿ ಪಾವತಿ ಮಾಡಬೇಕಾಗುತ್ತದೆ ಎಂದು ಡಿಜಿಜಿಐ ಹೇಳಿದೆ. ಇನ್ನು ಸಹ- ವಿಮೆ (co-insurance) ವಹಿವಾಟಿನಲ್ಲಿ ಸಹ-ವಿಮಾ ಪ್ರೀಮಿಯಂ ಮೇಲೆ ಜಿಎಸ್‌ಟಿ ಅನ್ವಯವಾಗುವ ಕಾರಣ ಕಂಪನಿಗೆ 359.70 ಕೋಟಿ ರೂಪಾಯಿ ಮೌಲ್ಯದ ಎರಡನೇ ಶೋಕಾಸ್ ನೋಟಿಸ್ ಕಳುಹಿಸಲಾಗಿದೆ.

ಇನ್ನು ಈ ಎರಡನೇ ನೋಟಿಸ್‌ನಲ್ಲಿ ಪ್ರಮುಖ ವಿಮಾದಾರರು ಸಂಪೂರ್ಣ ಪ್ರೀಮಿಯಂನಲ್ಲಿ ಜಿಎಸ್‌ಟಿಯನ್ನು ಈಗಾಗಲೇ ಬಿಡುಗಡೆ ಮಾಡಿದ್ದಾರೆ ಎಂದು ಕಂಪನಿಯು ಹೇಳಿದೆ. ಹಾಗಿರುವಾಗ ಪ್ರೀಮಿಯಂ ಮೇಲಿನ ಜಿಎಸ್‌ಟಿಯನ್ನು ಕಂಪನಿ ಪಾವತಿ ಮಾಡಬೇಕಾಗಿಲ್ಲ ಎಂದು ವಿಮಾ ಸಂಸ್ಥೆ ಹೇಳಿದೆ.

ಆದರೆ ಜಿಎಸ್‌ಟಿ ಇಲಾಖೆಯು ಜಿಎಸ್‌ಟಿ ಕಾಯಿದೆಯಲ್ಲಿ ಇದಕ್ಕೆ ಯಾವುದೇ ಅವಕಾಶವಿಲ್ಲ ಎಂದಿದೆ. ಈ ಕಾಯ್ದೆಯಡಿಯಲ್ಲಿ ನೋಂದಾಯಿತ ವ್ಯಕ್ತಿಯು ಯಾವುದೇ ಸಹ-ವಿಮಾವಾದರೂ ಕೂಡಾ ಇನ್ನೊಬ್ಬರ ಪರವಾಗಿ ತೆರಿಗೆಯನ್ನು ಸಂಗ್ರಹಿಸಬಹುದು ಮತ್ತು ವಿತರಿಸಬಹುದು ಎಂದು ಉಲ್ಲೇಖಿಸಿದೆ.

78.66 ಕೋಟಿ ರೂಪಾಯಿ ಮೊತ್ತದ ಮೂರನೇ ಶೋಕಾಸ್ ನೋಟಿಸ್‌ನಲ್ಲಿ, ಜುಲೈ 1, 2017 ರಿಂದ ಮಾರ್ಚ್ 31, 2022 ರವರೆಗಿನ ಮಾರ್ಕೆಟಿಂಗ್ ವೆಚ್ಚಗಳಿಗೆ ಸಂಬಂಧಿಸಿದಂತೆ ಆಧಾರವಾಗಿರುವ ಸೇವೆಗಳಿಲ್ಲದೆ ಆಧಾರವಾಗಿರುವ ಸೇವೆಗಳಿಲ್ಲದೆ ಇನ್‌ಪುಟ್ ಟ್ಯಾಕ್ಸ್ ಕ್ರೆಡಿಟ್ (ಐಟಿಸಿ) ಅನ್ನು ಪಡೆಯುವ ವಿಷಯದ ಬಗ್ಗೆ ಡಿಜಿಜಿಐ ತನಿಖೆ ಪ್ರಾರಂಭಿಸಿದೆ ಎಂದು ಉಲ್ಲೇಖಿಸಿದೆ. ಕಂಪನಿಯು ಇದರಡಿ 10.13 ಕೋಟಿ ರೂಪಾಯಿ ಮೌಲ್ಯದ ಐಟಿಸಿ ಮೊತ್ತವನ್ನು ಡೆಪಾಸಿಟ್ ಮಾಡಿದೆ.

ಕಂಪನಿಗೆ 5.38 ಕೋಟಿ ರೂಪಾಯಿ ಮೌಲ್ಯದ ನಾಲ್ಕನೇ ಶೋಕಾಸ್ ನೋಟಿಸ್ ಜುಲೈ 2017 ರಿಂದ ಜನವರಿ 2018 ರವರೆಗೆ ವಿನಾಯಿತಿ ಪಡೆದ ಕ್ರಾಪ್ ವಿಮಾ ಯೋಜನೆಗಳಿಗೆ ಸಂಬಂಧಿಸಿದಂತೆ ವಿದೇಶಿ ವಿಮಾದಾರರಿಂದ ಮರುವಿಮೆ ಸೇವೆಗಳ ಆಮದು ಮೇಲೆ ಪಡೆದ ಶುಲ್ಕದ ಆಧಾರದಲ್ಲಿ ಜಿಎಸ್‌ಟಿ ಪಾವತಿ ಮಾಡದಿರುವುದಕ್ಕೆ ಸಂಬಂಧಿಸಿದೆ.