ಭಾರತದ ಸಿರಿವಂತ ರೈತರಿವರು: ವಿಶಾಲವಾದ ಜಮೀನು ವೀಕ್ಷಣೆಗೆ ಸ್ವಂತ ಹೆಲಿಕಾಪ್ಟರ್ ಬಳಕೆ

ನವದೆಹಲಿ, ಸೆಪ್ಟೆಂಬರ್‌ 19: ನಮ್ಮ ದೇಶದ ಅಗರ್ಭ ಶ್ರೀಮಂತರ ಬಗ್ಗೆ ಯೋಚಿಸಿದಾಗ ನಮಗೆ ಥಟ್ಟನೆ ನೆನಪಿಗೆ ಬರೋ ಹೆಸರುಗಳೇ ಅಂಬಾನಿ,ಅದಾನಿ, ಟಾಟಾ..ಇವರ ಬಳಿಕ ಅನೇಕ ಕಂಪನಿಗಳ ಸ್ಥಾಪಕರು, ಸಿಇಒ ಗಳು ಸಿರಿವಂತರ ಪಟ್ಟಿಯಲ್ಲಿ ನಿಲ್ಲುತ್ತಾರೆ. ಆದರೆ ಈ ಸ್ಟೋರಿಯಲ್ಲಿ ಬರುವ ಒಂದಷ್ಟು ಶ್ರೀಮಂತರು ಯಾವುದೇ ಪ್ರಭಾವಶಾಲಿ ಕೈಗಾರಿಕೋದ್ಯಮಿಗಳು ಅಥವಾ ಕಂಪನಿಯ ಸ್ಥಾಪಕರಲ್ಲ. ಇವರು ನಮ್ಮ ದೇಶದ ಹೆಮ್ಮಯ ರೈತರು. ಹೌದು ಆಶ್ಚರ್ಯಕರವಾದರೂ ಸತ್ಯ ತಳಮಟ್ಟದಿಂದ ಆರಂಭಿಸಿ ಇಂದು ಎಕರೆಗಟ್ಟಲೆ ಕೃಷಿಭೂಮಿಯ ಮೂಲಕ ವಿಶಾಲ ಸಾಮ್ರಾಜ್ಯವನ್ನು ನಿರ್ಮಿಸಿದ್ದಾರೆ. ಕೇವಲ ಬೆಳೆಗಳನ್ನು ಮಾತ್ರವಲ್ಲದೆ ತಮ್ಮೊಂದಿಗೆ 'ಅದೃಷ್ಟ' ವನ್ನು ಬೆಳೆಸಿದ ರೈತರಾಗಿದ್ದಾರೆ. ಈ ರಿಚ್ ರೈತರ ಬಗ್ಗೆ ಒಂದಷ್ಟು ಮಾಹಿತಿ ಇಲ್ಲಿದೆ.

300 ಎಕರೆ ಒಡೆಯ ರಾಮಸರಣ್ ವರ್ಮಾ

ಉತ್ತರ ಪ್ರದೇಶದ ದೌಲತ್‌ಪುರದ ನಿವಾಸಿಯಾಗಿರುವ ರಾಮಸರಣ್ ವರ್ಮಾ ಅವರು ಭಾರತದ ಶ್ರೀಮಂತ ರೈತ ಎಂದು ಗುರುತಿಸಲ್ಪಟ್ಟಿದ್ದಾರೆ. 1986 ರಲ್ಲಿ ಕೇವಲ 6 ಎಕರೆ ಪೂರ್ವಜರಿಂದ ದೊರೆತ ಜಮೀನಿನೊಂದಿಗೆ ಇವರ ಪಯಣ ಪ್ರಾರಂಭವಾಯಿತು. ಆದರೆ ಈಗ ಅವರು 300 ಎಕರೆಗಳಿಗೆ ಒಡೆಯರಾಗಿದ್ದಾರೆ. ಇಂದು, ವರ್ಮಾ ಅವರ ವಾರ್ಷಿಕ ವಹಿವಾಟು ಕೋಟಿಗಳಲ್ಲಿ ನಡೆಯುತ್ತದೆ. ತರಕಾರಿ ಕೃಷಿಯಿಂದ ಹೆಸರುವಾಸಿಯಾಗಿರುವ ಇವರಿಗೆ 2019 ರಲ್ಲಿ ಪ್ರತಿಷ್ಠಿತ ಪದ್ಮಶ್ರೀ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ಆಧುನಿಕ ಕೃಷಿ ತಂತ್ರಗಳ ಮೂಲಕ ಯಶಸ್ಸಿನ ದಾರಿಯಲ್ಲಿ ಸಾಗಿದ ಇವರ ಸಾಧನೆಗಳು ಸ್ಫೂರ್ತಿಯಾಗಿ ಕಾರ್ಯನಿರ್ವಹಿಸುತ್ತವೆ. ಇವರ ಕಠಿಣ ಪರಿಶ್ರಮ ಮತ್ತು ನಾವೀನ್ಯತೆಯೊಂದಿಗೆ ಕೃಷಿಯಿಂದ ಹೇಗೆ ಅಭಿವೃದ್ಧಿ ಹೊಂದಲು ಸಾಧ್ಯ ಎಂಬುದನ್ನು ವಿವರಿಸುತ್ತದೆ.

ರಮೇಶ್ ಚೌಧರಿ: ಹಸಿರುಮನೆಗಳ ಮೂಲಕ ಚಿನ್ನದ ಬೆಳೆ

ರಾಜಸ್ಥಾನದ ಜೈಪುರದ ರಮೇಶ್ ಚೌಧರಿ ಮೂರು ಪಾಲಿಹೌಸ್ ಮತ್ತು ಹಸಿರುಮನೆ ಹೊಂದಿದ್ದಾರೆ. ಟೊಮೆಟೊ, ಸೌತೆಕಾಯಿ ಮತ್ತು ಹೂವುಗಳನ್ನು ಬೆಳೆಸುವಲ್ಲಿ ಪರಿಣತಿ ಹೊಂದಿರುವ ಚೌದರಿ ತಮ್ಮ ವಿಶಾಲವಾದ ಹೊಲಗಳಲ್ಲಿ ಜೋಳವನ್ನೂ ಬೆಳೆಯುತ್ತಾರೆ. ಅವರ ವಾರ್ಷಿಕ ವಹಿವಾಟು 2 ಕೋಟಿ ರೂ. ಮೀರಿದೆ. ಇದು ಸ್ಮಾರ್ಟ್ ಕೃಷಿ ಅಸಾಮಾನ್ಯ ಆದಾಯವನ್ನು ನೀಡುತ್ತದೆ ಎಂದು ಸಾಬೀತುಪಡಿಸುತ್ತದೆ. ಚೌಧರಿಯವರು ಕೃಷಿಯಲ್ಲಿ ತಂತ್ರಜ್ಞಾನದ ಸಮರ್ಥ ಬಳಕೆಯು ಭಾರತದಲ್ಲಿ ಕೃಷಿಯ ಭವಿಷ್ಯವನ್ನು ಪ್ರದರ್ಶಿಸುತ್ತದೆ.

ಆಟೋಮೊಬೈಲ್ ಇಂಜಿನಿಯರ್ ನಿಂದ ರೈತನಾದ ಪ್ರಮೋದ್ ಗೌತಮ್

ಆಟೋಮೊಬೈಲ್ ಇಂಜಿನಿಯರ್ ಆಗಿರುವ ಪ್ರಮೋದ್ ಗೌತಮ್ 2006 ರಲ್ಲಿ ಕೃಷಿಯತ್ತ ಗಮನ ಹರಿಸಿದರು. 26 ಎಕರೆ ಭೂಮಿಯಲ್ಲಿ ಪ್ರಯೋಗವಾಗಿ ಪ್ರಾರಂಭವಾದ ಅವರ ಕೃಷಿ ಯೂ ಈಗ ಅಭಿವೃದ್ಧಿಶೀಲ ವ್ಯಾಪಾರವಾಗಿ ಬದಲಾಗಿದೆ. ಕಡಲೆಕಾಯಿ ಮತ್ತು ಅರಿಶಿನ ಕೃಷಿಯಲ್ಲಿ ಆರಂಭಿಕ ಹಿನ್ನಡೆಯ ನಂತರ, ಗೌತಮ್ ಅವರು ಕಿತ್ತಳೆ, ಬಾಳೆಹಣ್ಣು ಮತ್ತು ಪೇರಳೆ ಹಣ್ಣುಗಳತ್ತ ತಮ್ಮ ಗಮನ ಹರಿಸಿದರು. ಈ ಬದಲಾವಣೆ ಫಲ ನೀಡಿದ್ದು, ಇಂದು ಅವರು ವಾರ್ಷಿಕ 1 ಕೋಟಿ ರೂ. ಗೂ ಅಧಿಕ ಆದಾಯ ಗಳಿಸುತ್ತಿದ್ದಾರೆ. ಗೌತಮ್ ಅವರ ಕಥೆಯು ವೈಫಲ್ಯದಿಂದ ಬೆಳೆಯುವ ಮತ್ತು ಕಲಿಯುವ ಪ್ರಾಮುಖ್ಯತೆಯನ್ನು ಒತ್ತಿಹೇಳುತ್ತದೆ.

ಸಚಿನ್ ಕಾಳೆ: ಕಾರ್ಪೊರೇಟ್‌ನಿಂದ ಕೃಷಿಯತ್ತ ಪಯಣ

ಛತ್ತೀಸ್‌ಗಢದ ಮಾಜಿ ಕಾರ್ಪೊರೇಟ್ ಉದ್ಯೋಗಿ ಸಚಿನ್ ಕಾಳೆ ಅವರು 2014 ರಲ್ಲಿ ತಮ್ಮ ಕೆಲಸವನ್ನು ತೊರೆದ ನಂತರ ಇನ್ನೋವೇಟಿವ್ ಅಗ್ರಿಲೈಫ್ ಸೊಲ್ಯೂಷನ್ ಪ್ರೈವೇಟ್ ಲಿಮಿಟೆಡ್ ಅನ್ನು ಸ್ಥಾಪಿಸಿದರು. ಅವರ ಕಂಪನಿಯು ಈಗ ಗುತ್ತಿಗೆ ಕೃಷಿಯಲ್ಲಿ ತೊಡಗಿಸಿಕೊಂಡಿದೆ, ದೊಡ್ಡ ಪ್ರಮಾಣದ ಭೂಮಿಯಲ್ಲಿ ಕೃಷಿ ಮಾಡಲು ರೈತರೊಂದಿಗೆ ಕೆಲಸ ಮಾಡುತ್ತದೆ. ವಾರ್ಷಿಕ 2.5 ಕೋಟಿ ರೂ. ವಹಿವಾಟು ನಡೆಸುತ್ತಿರುವ ಕಾಳೆ ಕೃಷಿ ಪದ್ಧತಿಯಲ್ಲಿ ಕ್ರಾಂತಿಯನ್ನುಂಟು ಮಾಡಿದ್ದು, ಕೃಷಿಯು ಕ್ರಿಯಾಶೀಲ ಕ್ಷೇತ್ರವಾಗಿದ್ದು, ಬೆಳವಣಿಗೆಗೆ ಸಾಕಷ್ಟು ಅವಕಾಶಗಳನ್ನು ಹೊಂದಿದೆ ಎಂಬುದನ್ನು ತೋರಿಸುತ್ತದೆ.

ಹರೀಶ್ ಧನ್‌ದೇವ್: ಅಲೋವೆರಾ ಕೃಷಿ ಮೂಲಕ ಯಶಸ್ಸು

ವೃತ್ತಿಯಲ್ಲಿ ಇಂಜಿನಿಯರ್ ಆಗಿರುವ ರಾಜಸ್ಥಾನದ ಹರೀಶ್ ಧನ್‌ದೇವ್ ಅವರು ಅಲೋವೆರಾ ಕೃಷಿಯತ್ತ ತಮ್ಮ ವೃತ್ತಿಜೀವನವನ್ನು ಬದಲಾಯಿಸಿದರು. ಇಂದು 100 ಎಕರೆ ಪ್ರದೇಶದಲ್ಲಿ ಅಲೋವೆರಾವನ್ನು ಬೆಳೆಸಿ, ಸಂಸ್ಕರಿಸುತ್ತಾರೆ. ಅವರ ವಾರ್ಷಿಕ ವಹಿವಾಟು ₹2.5 ಕೋಟಿಗಳಷ್ಟಿದ್ದು, ಭಾರತದ ಅತ್ಯಂತ ಶ್ರೀಮಂತ ರೈತರ ಪಟ್ಟಿಯಲ್ಲಿ ಅವರ ಹೆಸರಿದೆ. ಕೃಷಿ-ಸಂಸ್ಕರಣಾ ಉದ್ಯಮದಲ್ಲಿ ಧನ್‌ದೇವ್ ಅವರ ಯಶಸ್ಸು ಕೃಷಿ ಉತ್ಪನ್ನಗಳನ್ನು ವೈವಿಧ್ಯಗೊಳಿಸುವ ಮೌಲ್ಯವನ್ನು ಎತ್ತಿ ತೋರಿಸುತ್ತದೆ.

ಡಾ. ರಾಜಾರಾಮ್ ತ್ರಿಪಾಠಿ: ಹೆಲಿಕಾಪ್ಟರ್ ಒಡೆಯ

ಬಹುಶಃ ಎಲ್ಲರಿಗಿಂತ ಹೆಚ್ಚು ಬೆರಗುಗೊಳಿಸುವ ರೈತ ಅಂದರೆ ಬಿಹಾರದ ಬಸ್ತಾರ್ ಜಿಲ್ಲೆಯ ಡಾ. ರಾಜಾರಾಮ್ ತ್ರಿಪಾಠಿ. ಅವರು 400 ಕುಟುಂಬಗಳೊಂದಿಗೆ 1000 ಎಕರೆ ಭೂಮಿಯನ್ನು ನಿರ್ವಹಿಸುತ್ತಾರೆ. ದೊಡ್ಡ ಪ್ರಮಾಣದಲ್ಲಿ ಬಿಳಿ ಮುಸ್ಲಿ ಮತ್ತು ಕರಿಮೆಣಸನ್ನು ಉತ್ಪಾದಿಸುತ್ತಾರೆ. ಅವರ ಕೃಷಿ ಸಾಮ್ರಾಜ್ಯವು ಎಷ್ಟು ವಿಸ್ತಾರವಾಗಿದೆ ಅಂದ್ರೆ ಅವರ ಹೊಲಗಳನ್ನು ನೋಡಿಕೊಳ್ಳಲು ಹೆಲಿಕಾಪ್ಟರ್ ಇದೆ. ಮಾ ದಂತೇಶ್ವರಿ ಹರ್ಬಲ್ ಗ್ರೂಪ್ ನ ಸಿಇಒ ಆಗಿ ವಾರ್ಷಿಕ 25 ಕೋಟಿ ರೂ. ವಹಿವಾಟು ನಡೆಸುತ್ತಿರುವ ಡಾ.ತ್ರಿಪಾಠಿ ಕೃಷಿಯನ್ನು ಅಕ್ಷರಶಃ ಉತ್ತುಂಗಕ್ಕೆ ಕೊಂಡೊಯ್ದಿದ್ದಾರೆ. ಅವರ ಸಂಸ್ಥೆಯೂ ಯುರೋಪ್ ಮತ್ತು ಯುಎಸ್‌ಗೆ ಕರಿಮೆಣಸನ್ನು ರಫ್ತು ಮಾಡುತ್ತದೆ ಈ ಮೂಲಕ ಅವರು, ಭಾರತೀಯ ರೈತರು ಜಾಗತಿಕ ಮಟ್ಟದಲ್ಲಿ ಸ್ಪರ್ಧಿಸಬಹುದು ಎಂದು ಸಾಬೀತುಪಡಿಸಿದ್ದಾರೆ.