ಕರ್ನಾಟಕದ ರೈಲು ಯೋಜನೆಗಳಿಗೆ 7,564 ಕೋಟಿ ರೂ. ಹಾಗಿದ್ರೆ ಬೆಂಗಳೂರಿಗೆ ಸಿಕ್ಕಿದೆಷ್ಟು?

ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಅವರು 2025-26ರ ಬಜೆಟ್‌ನಲ್ಲಿ ಎಲ್ಲಾ ರಾಜ್ಯಗಳಿಗೂ ರೈಲ್ವೆ ಹಂಚಿಕೆ ಹೆಚ್ಚಾಗಿದೆ ಎಂದು ಹೇಳಿದ್ದಾರೆ. 2009-14ರ ಅವಧಿಗೆ ಹೋಲಿಸಿದರೆ ಈ ಬಾರಿ ಗಣನೀಯ ಹೆಚ್ಚಳವಾಗಿದೆ. ರೈಲ್ವೆ ಮೂಲಸೌಕರ್ಯಕ್ಕೆ ಒತ್ತು ನೀಡಲಾಗಿದ್ದು, ಅಭಿವೃದ್ಧಿ ದರವನ್ನು ಹೆಚ್ಚಿಸುವ ಗುರಿ ಹೊಂದಲಾಗಿದೆ.

ವೈಷ್ಣವ್ ಅವರ ಪ್ರಕಾರ, ಮುಂಬರುವ 2025-26 ರೈಲ್ವೆ ಬಜೆಟ್ 2009-2014ರ ಅವಧಿಗೆ ಹೋಲಿಸಿದರೆ ಹಂಚಿಕೆಗಳಲ್ಲಿ ಗಮನಾರ್ಹ ಹೆಚ್ಚಳವನ್ನು ತೋರಿಸುತ್ತದೆ. ದೆಹಲಿಯ ಬಜೆಟ್ 27 ಪಟ್ಟು, ಮಧ್ಯಪ್ರದೇಶದ 23 ಪಟ್ಟು ಮತ್ತು ಛತ್ತೀಸ್‌ಗಢದ 22 ಪಟ್ಟು ಹೆಚ್ಚಾಗಲಿದೆ. 2009-2014ರ ನಡುವೆ 1,132 ಕೋಟಿ ರೂ.ಗಳಷ್ಟಿದ್ದ ಬಿಹಾರದ ಬಜೆಟ್ ಅನ್ನು ಈಗ 2025-26ಕ್ಕೆ ಒಂಬತ್ತು ಪಟ್ಟು ಹೆಚ್ಚಿಸಿ 10,066 ಕೋಟಿ ರೂ.ಗಳಿಗೆ ಹೆಚ್ಚಿಸಲಾಗಿದೆ. ಅದೇ ರೀತಿ, 2025-26ರ ಹಣಕಾಸು ವರ್ಷದಲ್ಲಿ ದೆಹಲಿಯ ಬಜೆಟ್ 96 ಕೋಟಿ ರೂ.ಗಳಿಂದ 2,539 ಕೋಟಿ ರೂ.ಗಳಿಗೆ ಏರಿಕೆಯಾಗಿದೆ.

ಕರ್ನಾಟಕದ ಪಾಲಿಗೆ ಸಿಕ್ಕಿದೆಷ್ಟು?

ಕೇಂದ್ರ ಬಜೆಟ್ 2025-26 ರಲ್ಲಿ ಕರ್ನಾಟಕದ ರೈಲ್ವೆ ಯೋಜನೆಗಳಿಗೆ ₹7,564 ಕೋಟಿಗಳನ್ನು ಮೀಸಲಿಡಲಾಗಿದೆ, ಇದು ಕಳೆದ ವರ್ಷದ ₹7,559 ಕೋಟಿಗಿಂತ ಸ್ವಲ್ಪ ಹೆಚ್ಚಾಗಿದೆ. ಬಜೆಟ್‌ನಲ್ಲಿ 15 ರೈಲ್ವೆ ಯೋಜನೆಗಳಿಗೆ ಹಣಕಾಸು ಒದಗಿಸಲಾಗಿದೆ, ಇದು ರಾಜ್ಯ ಮತ್ತು ಅಂತರರಾಜ್ಯ ಸಂಪರ್ಕವನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿದೆ.

ರೈಲ್ವೆ ಸಚಿವೆ ಅಶ್ವಿನಿ ವೈಷ್ಣವ್ ಕರ್ನಾಟಕಕ್ಕೆ ಸಿಕ್ಕ ಬಜೆಟ್‌ ಬಗ್ಗೆ ಮಾತನಾಡುತ್ತಾ " 2014 ರಿಂದ ಕರ್ನಾಟಕದಾದ್ಯಂತ 1,652 ಕಿ.ಮೀ ಹೊಸ ರೈಲು ಹಳಿಗಳನ್ನು ಹಾಕಲಾಗಿದೆ. ಇದು ಶ್ರೀಲಂಕಾದ ಸಂಪೂರ್ಣ ರೈಲ್ವೆ ಜಾಲವನ್ನು ಮೀರಿಸುತ್ತದೆ ಎಂದು ಅವರು ವಿವರಿಸಿದ್ದರು.

ಕೇಂದ್ರ ಬಜೆಟ್ ಹಿನ್ನೆಲೆಯಲ್ಲಿ ಕರ್ನಾಟಕ, ಕೇರಳ ಮತ್ತು ತಮಿಳುನಾಡಿನ ಮಾಧ್ಯಮ ಪ್ರತಿನಿಧಿಗಳಿಗೆ ವರ್ಚುವಲ್ ಆಗಿ ಮಾಹಿತಿ ನೀಡಿದ ಅವರು, "ಕರ್ನಾಟಕದಲ್ಲಿ ವಾರ್ಷಿಕವಾಗಿ ಸರಾಸರಿ 150 ಕಿ.ಮೀ ಹೊಸ ಹಳಿಗಳನ್ನು ಹಾಕಲಾಗುತ್ತಿತ್ತು, ಇದು 2009-2014ರ ಅವಧಿಯಲ್ಲಿ ಹಾಕಲಾದ ಸರಾಸರಿ 113 ಕಿ.ಮೀ.ಗಿಂತ ಗಮನಾರ್ಹ ಸುಧಾರಣೆಯಾಗಿದೆ" ಎಂದು ಹೇಳಿದರು.

ಕರ್ನಾಟಕದ 1,672 ಕಿ.ಮೀ. ಉದ್ದದ ಕವಚ ಸುರಕ್ಷತಾ ವ್ಯವಸ್ಥೆಯನ್ನು ಅಳವಡಿಸಲು ಟೆಂಡರ್ ಕರೆಯಲಾಗಿದೆ. ಕರ್ನಾಟಕದ ರೈಲು ಜಾಲದ ಶೇ. 96.5 ರಷ್ಟು ವಿದ್ಯುದೀಕರಣ ಪೂರ್ಣಗೊಂಡಿದೆ. ಇದರಲ್ಲಿ ನೈಋತ್ಯ ರೈಲ್ವೆ, ದಕ್ಷಿಣ ಮಧ್ಯ ರೈಲ್ವೆ, ದಕ್ಷಿಣ ರೈಲ್ವೆ ಮತ್ತು ಮಧ್ಯ ರೈಲ್ವೆಯ ಕೆಲವು ಭಾಗಗಳು ಸೇರಿವೆ. "2014-25ರಲ್ಲಿ ವರ್ಷಕ್ಕೆ ಸರಾಸರಿ 294 ಕಿ.ಮೀ. ವಿದ್ಯುದೀಕರಣ ಮಾಡಲಾಗಿದೆ, ಇದು 2009-14ರಲ್ಲಿ ವರ್ಷಕ್ಕೆ ಸರಾಸರಿ 18 ಕಿ.ಮೀ. ವಿದ್ಯುದೀಕರಣಕ್ಕೆ ಹೋಲಿಸಿದರೆ 16 ಪಟ್ಟು ಹೆಚ್ಚಾಗಿದೆ" ಎಂದು ಅವರು ಹೇಳಿದರು.

ಕರ್ನಾಟಕದ ರೈಲ್ವೆಗೆ ಸರಾಸರಿ ವಾರ್ಷಿಕ ಬಜೆಟ್ ಹಂಚಿಕೆಯಲ್ಲಿ ಸ್ಥಿರವಾದ ಹೆಚ್ಚಳ ಕಂಡುಬಂದಿದೆ. "2025-26ನೇ ಹಣಕಾಸು ವರ್ಷದಲ್ಲಿ, ಇದು ₹7,564 ಕೋಟಿ, ಇದು 2024-25ನೇ ಹಣಕಾಸು ವರ್ಷದಲ್ಲಿ ಹಂಚಿಕೆಯಾದ ₹7,559 ಕೋಟಿಗಿಂತ ಹೆಚ್ಚಾಗಿದೆ," ಎಂದು ಅವರು ಹೇಳಿದರು.

ಹೆಚ್ಚುವರಿಯಾಗಿ, ₹1,981 ಕೋಟಿ ಹೂಡಿಕೆಯೊಂದಿಗೆ 61 ಅಮೃತ ನಿಲ್ದಾಣಗಳನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ. 2014 ರಿಂದ, ಸಂಪರ್ಕವನ್ನು ಸುಧಾರಿಸಲು ಮತ್ತು ದಟ್ಟಣೆಯನ್ನು ಕಡಿಮೆ ಮಾಡಲು 644 ರೈಲು ಮೇಲ್ಸೇತುವೆಗಳು ಮತ್ತು ಕೆಳಸೇತುವೆಗಳನ್ನು ನಿರ್ಮಿಸಲಾಗಿದೆ.

"ಪ್ರಯಾಣಿಕರ ಸೌಲಭ್ಯಗಳನ್ನು ಹೆಚ್ಚಿಸಲು, 61 ಲಿಫ್ಟ್‌ಗಳು ಮತ್ತು 43 ಎಸ್ಕಲೇಟರ್‌ಗಳನ್ನು ಸ್ಥಾಪಿಸಲಾಗಿದೆ ಮತ್ತು 335 ನಿಲ್ದಾಣಗಳಲ್ಲಿ ವೈ-ಫೈ ಒದಗಿಸಲಾಗಿದೆ. ರಾಜ್ಯವು ಪ್ರಸ್ತುತ 10 ವಂದೇ ಭಾರತ್ ರೈಲುಗಳನ್ನು ನಿರ್ವಹಿಸುತ್ತಿದೆ, ಇದು ಕರ್ನಾಟಕದ 12 ಜಿಲ್ಲೆಗಳು ಮತ್ತು 18 ವಿಶಿಷ್ಟ ತಂಗುದಾಣಗಳನ್ನು ಒಳಗೊಂಡಿದೆ," ಎಂದು ಅವರು ಹೇಳಿದರು.

ತುಮಕೂರು ನಿಲ್ದಾಣವನ್ನು ₹88 ಕೋಟಿ ವೆಚ್ಚದಲ್ಲಿ ಮರುಅಭಿವೃದ್ಧಿಪಡಿಸಲಾಗುವುದು, ಟೆಂಡರ್ ಮಾರ್ಚ್ 31 ರಂದು ಅಂತಿಮಗೊಳ್ಳಲಿದೆ. ಯಶವಂತಪುರ ಮತ್ತು ಬೆಂಗಳೂರು ಕಂಟೋನ್ಮೆಂಟ್ ನಿಲ್ದಾಣಗಳನ್ನು ಸಹ ₹367 ಕೋಟಿ ಮತ್ತು ₹485 ಕೋಟಿ ವೆಚ್ಚದಲ್ಲಿ ಮರುಅಭಿವೃದ್ಧಿಪಡಿಸಲಾಗುತ್ತಿದೆ ಎಂದು ಹೇಳಿದ್ದಾರೆ.

ಬೆಂಗಳೂರಿನ ಸುತ್ತಮುತ್ತಲಿನ ರೈಲ್ವೆ ಯೋಜನೆಗಳಿಗೆ ಈ ವರ್ಷದ ಬಜೆಟ್‌ನಲ್ಲಿ ಅನುದಾನ:

ಕಂಟೋನ್ಮೆಂಟ್ - ವೈಟ್‌ಫೀಲ್ಡ್ ರೈಲ್ವೆ ಕಾರಿಡಾರ್‌ನ ಚತುಷ್ಪಥ ಕಾಮಗಾರಿಗೆ ₹352 ಕೋಟಿ.

ಗದಗ-ವಾಡಿ ಮತ್ತು ತುಮಕೂರು-ಚಿತ್ರದುರ್ಗ-ದಾವಣಗೆರೆ ರೈಲು ಮಾರ್ಗಗಳಿಗೆ ತಲಾ ₹549 ಕೋಟಿ.

ರಾಯದುರ್ಗ-ತುಮಕೂರು ಮೂಲಕ ಕಲ್ಯಾಣದುರ್ಗ ಯೋಜನೆಗೆ ₹434 ಕೋಟಿ.

ಮುನಿರಾಬಾದ್-ಮಹಬೂಬ್‌ನಗರ ರೈಲು ಮಾರ್ಗಕ್ಕೆ ₹214 ಕೋಟಿ.