ಹೂಡಿಕೆದಾರ ರಾಕೇಶ್ ಜುಂಜುನ್ವಾಲಾಗೆ ಸೆಬಿಯಿಂದ ಶೋಕಾಸ್ ನೋಟಿಸ್ ಜಾರಿ

ನವದೆಹಲಿ, ಜೂನ್ 16: ಆಪ್ಟೆಕ್ (Aptech) ಷೇರು ಅವ್ಯವಹಾರ ಬಗ್ಗೆ ಸೆಕ್ಯುರಿಟೀಸ್ ಅಂಡ್ ಎಕ್ಸಚೆಂಜ್ ಬೋರ್ಡ್ ಆಫ್ ಇಂಡಿಯಾ (ಸೆಬಿ) ಹೂಡಿಕೆದಾರ ರಾಕೇಶ್ ಜುಂಜುನ್ವಾಲಾ ಅವರಿಗೆ ಶೋಕಾಸ್ ನೋಟಿಸ್ ನೀಡಿದೆ.

ಆಪ್ಟೆಕ್ ಶಿಕ್ಷಣ ತರಬೇತಿಯಲ್ಲಿ ತೊಡಗಿರುವ ಕಂಪನಿಯಾಗಿದೆ. ರಾಕೇಶ್ ಜುಂಜುನ್ವಾಲಾ ಮತ್ತು ಅವರ ಕುಟುಂಬ ಈ ಕಂಪನಿಯಲ್ಲಿ ಹೂಡಿಕೆ ಮಾಡುತ್ತದೆ.

4 ವರ್ಷಕ್ಕಿಂತ ಹಳೆಯದಾಗಿರುವ ಆಪ್ಟೆಕ್ ಷೇರು ಅವ್ಯವಹಾರ ಪ್ರಕರಣಕ್ಕೆ ಸಂಬಂಧಿಸಿದಂತೆ ರಾಕೇಶ್ ಜುಂಜುನ್ವಾಲಾ ಅವರ ಖಾತೆಗಳನ್ನು ವಶಪಡಿಸಿಕೊಳ್ಳುವುದು ಸೆಬಿ ಉದ್ದೇಶವಾಗಿದೆ ಎಂದು ವರದಿಗಳು ಹೇಳಿವೆ. ಈ ತನಿಖೆಯಲ್ಲಿ ರಾಕೇಶ್ ಅವರಲ್ಲದೆ, ಅವರ ಸಹೋದರ ರಾಜೇಶ್, ಅವರ ಪತ್ನಿ ರೇಖಾ, ಸಹೋದರಿ ಸುಧಾ ಮತ್ತು ಅತ್ತೆ ಸುಶೀಲದೇವಿ ಗುಪ್ತಾ ಅವರನ್ನೂ ಪ್ರಶ್ನಿಸಲಾಗಿದೆ. ಈ ಪ್ರಕರಣದಲ್ಲಿ ಆಪ್ಟೆಕ್ ಸಿಇಒ ಮತ್ತು ನಿರ್ದೇಶಕ ಉತ್ಪಾಲ್ ಸೇಠ್ ಅವರ ಸಹೋದರಿ ಉಷಾ ಶೆತ್ ಸುಲೇ ಅವರಿಗೆ ಸೆಬಿ ಸಮನ್ಸ್ ಜಾರಿಗೊಳಿಸಿದೆ.

ಆಪ್ಟೆಕ್ ಷೇರುಗಳನ್ನು ಆಂತರಿಕ ವ್ಯವಹಾರ ಮಾಡಿದೆ ಎಂದು ಸೆಬಿ ಆರೋಪಿಸಿದೆ. ಷೇರು ಮಾರುಕಟ್ಟೆಯಲ್ಲಿ ಆಂತರಿಕ ವ್ಯಾಪಾರವನ್ನು ಕಾನೂನುಬಾಹಿರವೆಂದು ಪರಿಗಣಿಸಲಾಗಿದೆ. ಈ ರೀತಿಯ ವಹಿವಾಟಿನಲ್ಲಿ, ಕಂಪನಿಯ ಒಳಗಿನ ಮಾಹಿತಿಯನ್ನು ಹೊಂದಿರುವ ಕೆಲವರು ಅದಕ್ಕೆ ಅನುಗುಣವಾಗಿ ಷೇರುಗಳನ್ನು ಖರೀದಿಸಿ ಅಥವಾ ಮಾರಾಟ ಮಾಡುವ ಮೂಲಕ ಲಾಭ ಗಳಿಸುತ್ತಾರೆ. ಹೂಡಿಕೆದಾರರಿಗೆ ಈ ಮಾಹಿತಿಯನ್ನು ತಿಳಿಯಲು ಸಾಧ್ಯವಾಗುವುದಿಲ್ಲ. ಸೆಬಿಗೆ ದೊರೆತ ಮಾಹಿತಿಯ ಪ್ರಕಾರ, ಈ ಸಮಯದಲ್ಲಿ ಆಪ್ಟೆಕ್‌ನಲ್ಲಿ ಆಂತರಿಕ ವ್ಯಾಪಾರ ನಡೆದಿದೆ.