Second Hand Vehicle Sale Rules: ಹಳೇ ಗಾಡಿ ಮಾರುವವರೇ ಹುಷಾರ್!‌ ಈ ತಪ್ಪು ಮಾಡಿದ್ರೆ ಫೈನ್‌ ಗ್ಯಾರಂಟಿ

ಯಾರೇ ಆಗಲಿ, ತಮ್ಮಲ್ಲಿರುವ ಹಳೇ ವಾಹನವನ್ನೂ (Old Vehicles) ಹೇಗಾದರೂ ಮಾಡಿ ಸೇಲ್‌ ಮಾಡ್ಬೇಕು ಅಂದುಕೊಂಡಿರುತ್ತಾರೆ. ಆದರೆ ಕೆಲವೊಮ್ಮೆ ಏನೇ ಮಾಡಿದ್ರೂ ತಮ್ಮ ಹಳೇ ವಾಹನಗಳು ಸೇಲ್‌ ಆಗೋದೇ ಇಲ್ಲ. ಆದರೆ ಇನ್ಮೇಲೆ ಸೆಕೆಂಡ್‌ ಹ್ಯಾಂಡ್‌ ಗಾಡಿ ಸೇಲ್‌ (Second Hand Vehicle Sale) ಮಾಡುವವರು, ಖರೀದಿಸುವವರು (Buyers) ಸ್ವಲ್ಪ ಎಚ್ಚರಿಕೆಯಿಂದ ಇರಬೇಕು. ಇಲ್ಲದಿದ್ರೆ ಸಂಕಷ್ಟ ಕಟ್ಟಿಟ್ಟ ಬುತ್ತಿ.

ಹೌದು, ಇನ್ಮೇಲೆ ಯಾರೇ ಆಗಲಿ ಟೋಲ್‌ ಫೀಸ್‌ ಕಟ್ಟದೆ ತಪ್ಪಿಸೋಕೆ ಆಗಲ್ಲ. ಯಾವುದೇ ಕಳ್ಳಬುದ್ಧಿಗಳು ಇನ್ಮೇಲೆ ಸರ್ಕಾರದ ಎದುರ ನಡೆಯಲ್ಲ. ಏಕೆಂದರೆ ರಸ್ತೆ ಸಾರಿಗೆ ಸಚಿವಾಲಯ ಖಡಕ್‌ ನಿಯಮ ಜಾರಿಗೆ ತಂದಿದೆ. ನೀವು ಟೋಲ್‌ ಪಾವತಿ ಮಾಡದೆ, ಒಂದು ವೇಳೆ ನಿಮ್ಮ ವಾಹನವನ್ನು ಸೇಲ್‌ ಮಾಡೋಕೆ ಮುಂದಾದ್ರೆ, ಬೇರೆಯವರ ಹೆಸರಿಗೆ ಆ ವಾಹನ ವರ್ಗಾವಣೆ ಮಾಡಲಾಗುವುದಿಲ್ಲ. ಹಾಗಿದ್ರೆ ಇದೇನು ಹೊಸ ನಿಯಮ?ೀ ಕುರಿತು ಸಂಪೂರ್ಣ ಮಾಹಿತಿ ಇಲ್ಲಿದೆ ಓದಿ.

ರಸ್ತೆ ಸಾರಿಗೆ ಮತ್ತು ಹೆದ್ದಾರಿಗಳ ಸಚಿವಾಲಯ (MoRTH) ಇತ್ತೀಚೆಗೆ ಕೇಂದ್ರೀಯ ಮೋಟಾರು ವಾಹನ ನಿಯಮಗಳು, 2026ಕ್ಕೆ ಮಹತ್ವದ ತಿದ್ದುಪಡಿಗಳನ್ನು ಜಾರಿಗೆ ತಂದಿದೆ. ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಟೋಲ್ ಪಾವತಿಗೆ ಸಂಬಂಧಿಸಿದ ನಿಯಮಗಳನ್ನು ಇನ್ನಷ್ಟು ಕಠಿಣಗೊಳಿಸುವುದು ಇದರ ಮುಖ್ಯ ಉದ್ದೇಶ. ಬಳಕೆದಾರರ ಶುಲ್ಕ ಪಾವತಿಯ ನಿಯಮಗಳನ್ನು ಸುಧಾರಿಸುವುದು, ಎಲೆಕ್ಟ್ರಾನಿಕ್ ಟೋಲ್ ಸಂಗ್ರಹಣೆಯ (ETC) ದಕ್ಷತೆಯನ್ನು ಹೆಚ್ಚಿಸುವುದು ಹಾಗೂ ಟೋಲ್ ತಪ್ಪಿಸುವುದನ್ನು ನಿಯಂತ್ರಿಸುವುದು ಈ ಬದಲಾವಣೆಗಳ ಹಿಂದಿನ ಪ್ರಮುಖ ಅಂಶಗಳಾಗಿವೆ.

ಹೊಸ ಬದಲಾವಣೆ, ಚಾಲಕರಿಗೆ ವಾರ್ನಿಂಗ್‌!
ಈ ನಿಯಮ ತಿದ್ದುಪಡಿಗಳಲ್ಲಿನ ಒಂದು ಪ್ರಮುಖ ಬದಲಾವಣೆ "ಪಾವತಿಸದ ಬಳಕೆದಾರರ ಶುಲ್ಕ" (unpaid user fee) ಎಂಬ ಹೊಸ ಪದದ ಸೇರ್ಪಡೆ. ಈ ನಿಯಮ ವಾಹನಕ್ಕೆ ಸಂಬಂಧಿಸಿದ ಬಾಕಿ ಇರುವ ಟೋಲ್ ಪಾವತಿಗಳಿದ್ದರೆ, ಆ ವಾಹನದ ಮಾರಾಟ ಅಥವಾ ಹೆಸರು ವರ್ಗಾವಣೆ ಮಾಡಲು ಸಾಧ್ಯವಾಗುವುದಿಲ್ಲ. ಇದರಿಂದಾಗಿ ವಾಹನ ಮಾಲೀಕರು ತಮ್ಮ ಟೋಲ್ ಬಾಕಿಗಳ ಬಗ್ಗೆ ಎಚ್ಚರಿಕೆಯಿಂದ ಇದ್ದರೆ ಒಳ್ಳೆಯದು.

ಪರಿಷ್ಕೃತ ನಿಯಮಗಳ ಪ್ರಕಾರ, ವಾಹನದ ಮೇಲೆ ಪೇ ಮಾಡದ ಟೋಲ್ ಬಾಕಿಗಳಿದ್ದರೆ "NOC ನೀಡಲಾಗುವುದಿಲ್ಲ. NOC ಇಲ್ಲದೆ, ಯಾವುದೇ ವಾಹನವನ್ನು ಮಾರಾಟ ಮಾಡುವುದು ಅಥವಾ ಇನ್ನೊಂದು ರಾಜ್ಯಕ್ಕೆ ವರ್ಗಾಯಿಸುವುದು ಕಷ್ಟಕರ. ಆದ್ದರಿಂದ ಪಾವತಿಸದ ಟೋಲ್ ಶುಲ್ಕಗಳು ವಾಹನದ ಮಾರಾಟ ಪ್ರಕ್ರಿಯೆ ಮತ್ತು ಮರು-ನೋಂದಣಿ ಎರಡನ್ನೂ ತಡೆಯುವ ಸಾಧ್ಯತೆ ಇದೆ. ಇದು ವಾಹನ ಮಾಲೀಕರಿಗೆ ಗಮನಾರ್ಹ ಪರಿಣಾಮಗಳನ್ನು ಬೀರಲಿದೆ.

ಟೋಲ್ ಶುಲ್ಕಗಳನ್ನು ಬಾಕಿ ಇಟ್ಟುಕೊಂಡಿರುವ ವಾಹನಗಳು 'ಫಿಟ್‌ನೆಸ್ ಪ್ರಮಾಣಪತ್ರ'ದ (FC) ವಿತರಣೆ ಅಥವಾ ನವೀಕರಣಕ್ಕೆ ಸಹ ಅರ್ಹವಾಗಿರುವುದಿಲ್ಲ. ಹಳೆಯ ಹಾಗೂ ವಾಣಿಜ್ಯ ವಾಹನಗಳ ಕಾನೂನುಬದ್ಧ ರಸ್ತೆ ಯೋಗ್ಯತೆಗೆ ಇದು ಕಡ್ಡಾಯವಾಗಿದೆ. ರಾಷ್ಟ್ರೀಯ ಪರವಾನಿಗೆಗಾಗಿ ಅರ್ಜಿ ಸಲ್ಲಿಸುವ ವಾಣಿಜ್ಯ ವಾಹನಗಳಿಗೆ, ಯಾವುದೇ ಪಾವತಿಸದ ಟೋಲ್ ಶುಲ್ಕಗಳು ಇರಬಾರದು ಎಂದು ನಿಯಮಗಳು ಈಗ ಸ್ಪಷ್ಟಪಡಿಸಿವೆ. ಅಲ್ಲದೆ, NOC ಪಡೆಯಲು ಬಳಸುವ ಅಪ್ಲಿಕೇಶನ್ ಆದ 'ಫಾರ್ಮ್ 28' ಅನ್ನು MoRTH ತಿದ್ದುಪಡಿ ಮಾಡಿದ್ದು, ಅರ್ಜಿದಾರರು ತಮ್ಮ ವಾಹನದ ವಿರುದ್ಧ ಬಾಕಿ ಇರುವ ಯಾವುದೇ ಶುಲ್ಕಗಳಿದ್ದಲ್ಲಿ ಮೊದಲೇ ತಿಳಿಸಬೇಕು.

ಟೋಲ್ ಬಾಕಿಗಳು ಪಾವತಿಸದೆ ಉಳಿದಿದ್ದರೆ, ವಾಹನ ವರ್ಗಾವಣೆ, ಎಫ್‌ಸಿ ಅಪ್ಡೇಟ್‌ ಅಥವಾ ಯಾವುದೇ ಪರವಾನಿಗೆಗಳಿಗೆ NOC ನೀಡುವುದಿಲ್ಲ ಎಂದು ಸಚಿವಾಲಯ ಸ್ಪಷ್ಟಪಡಿಸಿದೆ.