Tirupati Laddu: ತಿರುಪತಿ ಶ್ರೀ ವೆಂಕಟೇಶ್ವರ ದೇವಸ್ಥಾನಕ್ಕೆ ಲಡ್ಡು ಮಾರಾಟದಿಂದಲೇ ದಾಖಲೆಯ ಆದಾಯ

ಆಂಧ್ರಪ್ರದೇಶದ ತಿರುಪತಿ ಶ್ರೀ ವೆಂಕಟೇಶ್ವರ ದೇವಸ್ಥಾನದದಲ್ಲಿ ಬಡಿಸುವ ಜಗದ್ವಿಖ್ಯಾತ ಲಡ್ಡುಗಳಲ್ಲಿ 'ಪ್ರಾಣಿಗಳ ಕೊಬ್ಬು' ಪತ್ತೆಯಾಗಿದೆ ಎಂಬ ವರದಿಗಳು ಪದಾರ್ಥಗಳು ಭಾರಿ ವಿವಾದ ಸೃಷ್ಟಿಸಿದೆ. ತಿರುಮಲ ತಿರುಪತಿ ದೇವಸ್ಥಾನದಿಂದ "ಪ್ರಸಾದ"ವಾಗಿ ನೀಡಲಾಗುವ ಲಡ್ಡು ದೇವಾಲಯಕ್ಕೆ ಭೇಟಿ ನೀಡುವ ಭಕ್ತರಿಗೆ ಪ್ರಧಾನವಾಗಿದೆ. ಲಡ್ಡು ತಯಾರಿಸಲು ಬಳಸಿದ ತುಪ್ಪದಲ್ಲಿ ದನ ಹಾಗೂ ಹಂದಿ ಮಾಂಸದ ಕೊಬ್ಬು, ಮೀನಿನ ಎಣ್ಣೆ ಅಲ್ಲದೆ ಪಾಮ್ ಆಯಿಲ್, ಸೂರ್ಯಕಾಂತಿ ಮತ್ತು ಸೋಯಾಬೀನ್ ಮುಂತಾದ ಅಂಶಗಳು ಇರುವುದು ಲ್ಯಾಬ್ ಪರೀಕ್ಷೆಯಿಂದ ಬಹಿರಂಗವಾಗಿದೆ. ಇದರ ಬೆನ್ನಲ್ಲೇ ಕಲಬೆರೆಕೆಯುಕ್ತ ತುಪ್ಪ ಬಳಕೆ ಮಾಡುವುದು ಟಿಟಿಡಿ (ತಿರುಮಲ ತಿರುಪತಿ ದೇವಸ್ಥಾನಂ) ಒಪ್ಪಿಕೊಂಡಿದೆ. ಈ ಎಲ್ಲಾ ಕಾರಣಗಳಿಂದ ತಿರುಪತಿ ಲಡ್ಡು ಇದೀಗ ಬಿಸಿಬಿಸಿ ಚರ್ಚೆಯ ವಿಚಾರವಾಗಿದೆ.

ತಿರುಪತಿ ದೇವಸ್ಥಾನದಲ್ಲಿ ಲಡ್ಡುಗಳನ್ನು ಪ್ರಸಾದವಾಗಿ ನೀಡುವ ಸಂಪ್ರದಾಯ 200 ವರ್ಷಗಳಷ್ಟು ಹಳೆಯದು. ತಿರುಪತಿಯಲ್ಲಿ ಲಡ್ಡು ಪ್ರಸಾದ ನೀಡುವ ಸಂಪ್ರದಾಯವು 1803 ರಲ್ಲಿ ಬೂಂದಿಯನ್ನು ಪ್ರಸಾದವಾಗಿ ನೀಡುವುದರೊಂದಿಗೆ ಆರಂಭವಾಯಿತು. ಆದರೆ ಬಳಿಕ ಈ ಸಂಪ್ರದಾಯವನ್ನು 1940 ರಲ್ಲಿ ಬದಲಾಯಿಸಲಾಯಿತು. ತಿರುಪತಿ ಬಾಲಾಜಿ ದೇವಸ್ಥಾನವು ಲಡ್ಡುಗಳಿಂದ ವಾರ್ಷಿಕವಾಗಿ ಕೋಟ್ಯಾಂತರ ರೂ. ಆದಾಯವನ್ನು ಪಡೆಯುತ್ತದೆ.

ಟೈಮ್ ನೌ ವರದಿಯ ಪ್ರಕಾರ, ಪ್ರತಿ ದಿನ, ಟಿಟಿಡಿ ತಿರುಮಲದಲ್ಲಿ ಸುಮಾರು 3 ಲಕ್ಷ ಲಡ್ಡುಗಳನ್ನು ತಯಾರಿಸಿ, ವಿತರಿಸುತ್ತದೆ, ವಾರ್ಷಿಕವಾಗಿ ಲಡ್ಡು ಮಾರಾಟದಿಂದ ಸುಮಾರು 500 ಕೋಟಿ ರೂಪಾಯಿಗಳನ್ನು ಗಳಿಸುತ್ತದೆ. ಸಾಮಾನ್ಯವಾಗಿ ಲಡ್ಡುಗಳು ದೇವಾಲಯದ ಆವರಣದಲ್ಲಿ ಮತ್ತು ಹೊರಗೆ ಗೊತ್ತುಪಡಿಸಿದ ಕೌಂಟರ್‌ಗಳಲ್ಲಿ ಲಭ್ಯವಿರುತ್ತದೆ. ಇದಲ್ಲದೇ ಅದೆಷ್ಟೋ ಜನ ಆನ್‌ಲೈನ್ ಮೂಲಕ ಕೂಡ ಇಲ್ಲಿಂದ ಲಡ್ಡುಗಳನ್ನು ತೆಗೆದುಕೊಳ್ಳುತ್ತಾರೆ.ಸರಿಯಾಗಿ ಪ್ಯಾಕೇಜ್ ಮಾಡಿದಾಗ ಅವು ಸಾಮಾನ್ಯವಾಗಿ 15 ದಿನಗಳವರೆಗೆ ಶೆಲ್ಫ್ ಜೀವನವನ್ನು ಹೊಂದಿರುತ್ತವೆ.

'ಪ್ರತಿದಿನ 3 ಲಕ್ಷ ಲಡ್ಡು ಮಾರಾಟ, 500 ಕೋಟಿ ರೂ. ಆದಾಯ'

ತಿರುಪತಿ ಬಾಲಾಜಿ ಟ್ರಾವೆಲ್ಸ್ ಪ್ರಕಾರ, ಇಲ್ಲಿನ ಲಡ್ಡುಗಳು ಮೂರು ಗಾತ್ರಗಳಲ್ಲಿ ಅಂದರೆ ಸಣ್ಣ, ಮಧ್ಯಮ ಮತ್ತು ದೊಡ್ಡ ಗಾತ್ರಗಳಲ್ಲಿ ಲಭ್ಯವಿದೆ. ಇವುಗಳು ಕ್ರಮವಾಗಿ 40 ಗ್ರಾಂ, 175 ಗ್ರಾಂ ಮತ್ತು 750 ಗ್ರಾಂ ತೂಕವನ್ನು ಹೊಂದಿರುತ್ತದೆ. ವೆಂಕಟೇಶ್ವರ ದೇವಸ್ಥಾನದಲ್ಲಿ ವಿತರಿಸಲಾಗುವ ಚಿಕ್ಕ ಲಡ್ಡುಗಳು ಎಲ್ಲಾ ಭಕ್ತರಿಗೆ ಉಚಿತವಾಗಿದ್ದು ಪ್ರಸಾದ ರೂಪದಲ್ಲಿ ನೀಡಲಾಗುತ್ತದೆ. ಮಧ್ಯಮ ಗಾತ್ರದ ಲಡ್ಡುಗಳಿಗೆ ತಲಾ 50 ರೂಪಾಯಿ, ದೊಡ್ಡ ಗಾತ್ರದ ಲಡ್ಡುಗಳಿಗೆ 200 ರೂ. ಬೆಲೆ ಇದೆ. ಪ್ರತಿ ದಿನ ಟಿಟಿಡಿ ತಿರುಮಲದಲ್ಲಿ ಸುಮಾರು 3 ಲಕ್ಷ ಲಡ್ಡು ಮಾರಾಟದಿಂದ ವಾರ್ಷಿಕವಾಗಿ ಸುಮಾರು 500 ಕೋಟಿ ರೂಪಾಯಿ ಆದಾಯ ಗಳಿಸುತ್ತಿದೆ.

ವಿಶ್ವವಿಖ್ಯಾತ ತಿರುಪತಿ ದೇವಸ್ಥಾನದ ಲಡ್ಡು ಪ್ರಸಾದದ ಕುರಿತು ವಾದ - ವಿವಾದಗಳು ನಡೆಯುತ್ತಿದೆ. ಆಂಧ್ರಪ್ರದೇಶದ ಮಾಜಿ ಮುಖ್ಯಮಂತ್ರಿ ಜಗನ್ ಮೋಹನ್ ರೆಡ್ಡಿ ಸರ್ಕಾರದ ವಿರುದ್ಧ ಮುಖ್ಯಮಂತ್ರಿ ಚಂದ್ರುಬಾಬು ನಾಯ್ಡು ತಿರುಪತಿ ದೇವಸ್ಥಾನದ ನೈವೇದ್ಯದಲ್ಲಿ ಪ್ರಾಣಿಗಳ ಕೊಬ್ಬನ್ನು ಬಳಸಲಾಗುತ್ತಿದೆ ಎಂದು ಆರೋಪ ಮಾಡಿದ ಬಳಿಕ ಈ ವಿವಾದ ಗಂಭೀರ ಸ್ವರೂಪ ಪಡೆದುಕೊಂಡಿದೆ.

ಶುದ್ದ ತುಪ್ಪದ ಬದಲಿಗೆ ಪ್ರಾಣಿಗಳ ಕೊಬ್ಬನ್ನು ಬಳಸಿ ಪವಿತ್ರ ತಿರುಮಲ ಲಡ್ಡುವನ್ನು ಕಲುಷಿತಗೊಳಿಸಲಾಗಿದೆ ಎಂದು ಎನ್ ಚಂದ್ರಬಾಬು ನಾಯ್ದು ಆರೋಪಿಸಿದ್ದರು. ಇದಕ್ಕೆ ವೈಎಸ್ಆರ್ ಕಾಂಗ್ರೆಸ್ ಪಕ್ಷದ ಅಧ್ಯಕ್ಷ ಜಗನ್ ಮೋಹನ್ ರೆಡ್ಡಿ ಎಕ್ಸ್‌ನಲ್ಲಿ ಪೋಸ್ಟ್‌ನಲ್ಲಿ "ಚಂದ್ರಬಾಬು ನಾಯ್ಡು ದೈವಿಕ ದೇವಾಲಯ ತಿರುಮಲದ ಪಾವಿತ್ರ್ಯತೆ ಮತ್ತು ನೂರಾರು ಕೋಟಿ ಹಿಂದೂಗಳ ನಂಬಿಕೆಗೆ ಹಾನಿ ಮಾಡುವ ಮೂಲಕ ದೊಡ್ಡ ಪಾಪ ಮಾಡಿದ್ದಾರೆ. ತಿರುಮಲ ಪ್ರಸಾದ ಚಂದ್ರಬಾಬು ಅವರು ನೀಡಿದಂತ ಹೇಳಿಕೆಯನ್ನು ದುಷ್ಟರು ಮಾತ್ರ ನೀಡುತ್ತಾರೆ. ಮನುಷ್ಯ ಜನ್ಮದಲ್ಲಿ ಹುಟ್ಟಿದವರು ಯಾರೂ ಇಂತಹ ಮಾತುಗಳನ್ನಾಡುವುದಿಲ್ಲ, ಇಂತಹ ಆರೋಪ ಮಾಡುವುದಿಲ್ಲ" ಎಂದು ತಿರುಗೇಟು ನೀಡಿದ್ದಾರೆ.

ಲ್ಯಾಬ್ ಪರೀಕ್ಷೆಯ ತುಪ್ಪದಲ್ಲಿ 'ಕಲಬೆರಕೆ ಕೊಬ್ಬು' ದೃಢ

ತಿರುಪತಿ ಲಡ್ಡುಗಳನ್ನು ತಯಾರಿಸಲು ಬಳಸುವ ತುಪ್ಪವನ್ನು ಪರೀಕ್ಷಿಸಿದ ಗುಜರಾತ್ ಮೂಲದ ರಾಷ್ಟ್ರೀಯ ಡೈರಿ ಮಂಡಳಿಯು "ಕಲಬೆರಕೆ ತುಪ್ಪದ" ಕುರುಹುಗಳನ್ನು ಪತ್ತೆ ಮಾಡಲಾಗಿದೆ ಎಂದು ಟಿಡಿಪಿ ಗುರುವಾರ ತನ್ನ ವರದಿಯನ್ನು ಬಹಿರಂಗಪಡಿಸಿದೆ. ನ್ಯಾಷನಲ್ ಡೈರಿ ಡೆವಲಪ್‌ಮೆಂಟ್ ಬೋರ್ಡ್‌ನ ಸೆಂಟರ್ ಆಫ್ ಅನಾಲಿಸಿಸ್ ಅಂಡ್ ಲರ್ನಿಂಗ್ ಇನ್ ಜಾನುವಾರು ಮತ್ತು ಆಹಾರದ ವರದಿಯ ಪ್ರಕಾರ, ಮೀನಿನ ಎಣ್ಣೆ, ಪ್ರಾಣಿಗಳ ಕೊಬ್ಬು, ದನದ ಕೊಬ್ಬು, ಹಂದಿಯ ಕೊಬ್ಬು ಇತ್ಯಾದಿಗಳಿರುವುದು ದೃಢಪಟ್ಟಿದೆ.

ತಿರುಪತಿ ಪ್ರಸಾದದ ಕಲಬೆರಕೆ ಕುರಿತು ಟಿಡಿಪಿ ಮತ್ತು ವೈಎಸ್‌ಆರ್‌ಸಿಪಿ ನಡುವೆ ನಡೆಯುತ್ತಿರುವ ವಾಗ್ಯುದ್ಧದ ನಡುವೆ, ಟಿಡಿಪಿ ವಕ್ತಾರ ಆನಂ ವೆಂಕಟ ರಮಣ ರೆಡ್ಡಿ ಅವರು ಗುರುವಾರ ಸುದ್ದಿಗೋಷ್ಠಿಯಲ್ಲಿ ಲ್ಯಾಬ್ ವರದಿಯನ್ನು ಮಂಡಿಸಿದ್ದು ಅವರು ನೀಡಿದ ರಸೀದಿಯಲ್ಲಿ2024 ಜುಲೈ 9ರ ದಿನಾಂಕವಿದ್ದು , ವರದಿಯಲ್ಲಿ ಜುಲೈ 16 ರ ದಿನಾಂಕವಿದೆ.